Matta 20
20
Nu̱ Tlu̱narku mbu̱ Dam Anap
1“Kwaaɗar mbu̱ viɗi wa shipa nu̱ rafti nggur nu̱ viki nu̱ dumaari ɗau ma qa nduki nu̱ke a ma tlu̱nar mu̱zhindi yenda mbu̱ dam qu̱far anap ɓaran. 2Nu̱ shiki mu̱zhindi piti tlu̱nar ndu̱ wora, tu̱ ɗu̱ ndu̱ wor mbu̱ dam ɓaranang.
3“Nu̱ vi mu̱dlam shiki, tu̱ vi nu̱ dam tu̱ ɗa gwa nduki nggur kharanku bam me gomari. 4Tu̱ ze wor za, ‘Ɗu̱ ma tu̱k tun a shi tlu̱nar ya mbu̱ dam ɓang ɓaa, ngga ɓiiro ro ndu̱ ɗyi nu̱ shipaki.’ 5Tu̱ ɗu̱ ku. Nu̱ viki nu̱ dam tu̱k chele fu̱ɗari, kom ndu̱ vi kunung nu̱ mugdi, tu̱ da nu̱ tlu̱narku tu̱k. 6Yang tu̱k, nu̱ vi qurmun tu̱ na nduki nggur chingndan a tlu̱nar aa nu̱m ku ɓa, tu̱ ze wor za, ‘Nu̱m saki tun piɗi kharan gha ba bam wanangang?’
7“Tu̱ zu̱ ku za, ‘Nduka nje nu̱ vu̱rki tlu̱na yerem ɓa.’
“Tu̱ ze wor tu̱k za, ‘Ɗu̱ma tun a shi tlu̱nar mbu̱ dam ɓanga.’
8“Nu̱ mugdi shiki, tu̱ nu̱ damang ze nu̱ shaatar nda ndu̱ nggu̱ti damang za, ‘Qo nu̱ tlu̱narkwang to ɓi wora, to nggaasan ndu̱ nduki nu̱ qaki wor gana ma yi ɗyin nduki nang qaki wor gumapaalyang.’
9“Nduki nu̱ qaki wor vi qurmun nu̱ mugdang ta ɓa ku, tu̱ vu̱rkya mu̱zhindi tlu̱nar piti ye wora. 10Tu̱ nduki na ɓa ki gumapaalyang taman za ka vu̱r mu̱zhindang ye wor tu̱ duk ɓu̱ aaki, tu̱ yang vu̱rkya mu̱zhindi tlu̱nar piti ye wor kap. 11Nu̱ dlu̱ki ku, tu̱ nggaasi ruru ku ɗyine nu̱ damang, 12a zu̱ran ku za, ‘Nduki na ɓa ki gana shi tlu̱narku ba me awe da, yang to ɓiirerem wayen ndu̱ wora, yang chem pitki mbu̱ fu̱ɗar chem a tlu̱nari.’
13“Tu̱ nu̱ damang tlogha ye da chele ɓaanda za, ‘Rapta, nang shi batal ye nu ɓa, chem shi ndu̱ to za ngga ɓiiro mu̱zhindi tlu̱nar piti da ɓa goma? 14Dlu̱ mu̱zhindi tlu̱nar ɓa to ɗu̱ vaaro. Nga shimki ɓi nduki nu̱ ɗa ɓa ki gana wayen ndu̱ to. 15Zalala khara shi nga ɗyi nang shimki ndu̱ mu̱zhindi ɓang de? Yang ta shikya zhiri mbarkir nang shikya mu?’
16“Ku̱me nang nu̱ gana ka kha ma nu̱ guma, nu̱ guma ka kha ma nu̱ gana.”
Yesu wa Gaɓ tu̱ shi Ɓalar ɗyine Mu̱ti ɓaran
(Mar 10:32-34; Luk 18:31-34)
17Yesu ndu̱ nu̱ mburindakwang a yir Urshalima ku, tu̱ Yesu dut wor nu̱ konggol tu̱ ze wor za, 18“Wonji chem a yir Urshalima. Ka vu̱r Yi ɓu̱ Nduk nu̱ mbu̱ khar kuruku rututundi ndu̱ Maalu̱m Taurete kwang, ka kuma za ku̱ tlagha nda nu̱ gha. 19Kom tu̱ vu̱r nda ye nduki nu̱ke ɗya Yakhudeku ɓa, tu̱ shi ɓalar ndu̱mndi yenda, tu̱ shi dlabti yenda ku, tu̱ katl nda gha me qu̱far katlang ku, yang ye fu̱ɗar nu̱ kunung ka ji mbe mu̱ti ndu̱ nyifiri.”
Khuti nu̱ Man Yaqub ndu̱ Yokhana shiki
(Mar 10:35-45)
20Ye sarchi nang, tu̱ man qusonggi ɓu̱ Zabadi a ɓa she Yesu ndu̱ qusonggi ɓaran, tu̱ kurum gha gume nda tu̱ khuti nda mu̱nkir ngguri.
21Tu̱ Yesu zham nda nda za, “Ta shimkya nu̱ma?”
Tu̱ ze nda za, “So qusonggi ɓang rapndi nang ku̱ kha gha ku da ve ɗyin bu̱nor nu̱ zu̱ma da ve bu̱nor nu̱ gu̱ɗau mbu̱ kwaaɗar ɓaaro.”
22Tu̱ yang Yesu ze qusonggyang za, “Nun zu̱n ɗyi nu̱ke tun a khutanang ɓa. Tun ka ɗu̱ma za ɗyekhti bonye nu̱ke nga ma zarana mu?”
Tu̱ tlogha yenda ku za, “Chem ka ɗu̱ma.”
23Tu̱ ze wor za, “Wanang ni tun ka za mbu̱ ɗyekhti ɓanga, yang khar nu̱ ve bu̱na nu̱ zu̱ma ndu̱ nu̱ gu̱ɗau, nga ke nu̱ zalale vu̱rtan ɓa. Zhinkir ɓang nu̱ mbu̱ viɗi wa daasa maa khar na ye nduki nu̱ datki.”
24Nu̱ ɓeena pudeku gwangndang tu̱kki ku wanang tu̱ memu̱na wor su̱bu̱r ndu̱ khachinkirku rapndang. 25Tu̱ yang Yesu qa wor kap tu̱ zu̱ za, “Tun wa zu̱n ndu̱ pooni wuti me kwaaɗar nu̱ke kujiku ɓu̱ nduki nu̱ke ɗya Yakhude ku ɓa ka shiki ɗyine nduki ɓaanda, aa dlegumeku ɓaanda tu̱k wa ka shi ku wanang. 26Yang ku̱ kha wanang chele ɓaanu ɓa. Kap njif nu̱ke a shim kha ma gorkir ɓaanu, wa ku̱s ku̱ kha ma maavi ɓaanu. 27Yang tu̱k, njif nu̱ke a shim khar ma dle gume ɓaanu, wa ku̱s ku̱ kha ma maavi ɓaanu tu̱k. 28Wanang ni, Yi ɓu̱ Nduk na ɓa ku̱ nduki shi tlu̱nar maava yenda ɓa, a ɓa kya ma tlu̱na, kom ku̱ vu̱r nyifi ɓaran ma ɗanar nduki khang.”
Pugumku Rap wa gwa Shaana
(Mar 10:46-52; Luk 18:35-43)
29Nu̱ke Yesu ndu̱ nu̱ mburi nda ku a ma njig Jeriko, tu̱ tabar nduki khang mbu gaanje nda. 30Pugumku nggur a nje wor rap kharan gha ku tleebi njivang. Nu̱ tu̱kki Yesu a peetari, tu̱ da su̱qur wor nu̱ viɗi tu̱ zu̱ ku za, “Zhinerem gwaanji, Yi ɓu̱ Dauda, no zhiyaye ɓaarem!”
31Tu̱ ndukikwang wu wor ma ku̱ kha tu̱tu̱k ku. Yang tu̱ shaata kya ba da su̱qur wor nu̱ viɗi, tu̱ zu̱ ku za, “Zhinerem gwaanji, Yi ɓu̱ Dauda! No zhiyayi ɓaarem!”
32Tu̱ Yesu ching gha tu̱ ze wor za, “Tun a shim shi nga nu̱m ye nwa?”
33Tu̱ ze nda ku za, “Zhinerem gwaanji, chem a shim nami maari.”
34Tu̱ Yesu na zhiyaye ɓaanda, tu̱ su̱ɓa yiti wora. Fan ndu̱ fan tu̱ nggaasi na maari ku, tu̱ mbu gaanje nda ku.
Currently Selected:
Matta 20: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
