Luka 18

Labar ɓu̱ Ku̱du̱w nggur nu̱ Chingki gha Shaanggu̱ɗang

1Tu̱ Yesu shi ku̱rti ɓalar nggur ye nu̱ mburindakwang ma ku̱ shoga ku za wa shipa ku̱ ki bararku aakochi yang ku̱ nggum ndu̱ shiran ku zum ɓa. 2Tu̱ vu̱r labarang ye wor za, “Nu̱ kumar nggur a nje mbu̱ ghai nggur nu̱ke nu̱ka sawa Magham ɓa, yang nu̱ damta ndu̱ nduk zum ɓa. 3Yang tu̱k ku̱du̱w nokhzi nggur a nje ba mbu̱ ghayang tu̱k nu̱ gangki nu̱ ve nda ndu̱ khuti za, ‘Shoto nga to vu̱r zhire ɓang ya ɗyine nu̱ zhangndi ɓang nu̱ke chem a kumar ndu̱ yen.’

4“Tu̱ nu̱ kumarang zhang vu̱r zhire ɓu̱ ku̱du̱w nang yenda gha gumapaali, yang ku̱me ku̱du̱wang wa gang nu̱ ve nda ndu̱ khuti. Tu̱ nu̱ kumarang zu̱ mbu̱ memu̱naran za, ‘Aa nu̱ke nga nu̱ sawar Magham ɓa, yang nang ka damta ndu̱ nduk zum ɓa, 5kap ndu̱ nang, ngga vu̱r zhire ɓu̱ ku̱du̱w nang yenda. Ku̱me wa pu̱ɗa maa khar ya, yang kuzhom vu̱r nga yenda ma gwa nga ku̱ khu̱kheeti piiri nga.’ ”

6Tu̱ Zhinerem Gwaanji zu̱ za, “Tu̱k ma ɗyi nu̱ke nu̱ kumar song zhire nang zu̱ki ka. 7Yang alapa Magham ɓu̱ ɗa kobyo ɓu̱ daatiku ɓaran nu̱ kya ghoori yenda fu̱ɗar ndu̱ virkir ɓa? Ka zhang tu̱k wor gha mu? 8Nga zu̱ran ye nu, ka pasha ɗyim ghoori ɓaanda ye wor nu̱ gha waare su̱bu̱rti sarchi yang kap ndu̱ nang, mbu̱ Yi ɓu̱ Nduk a gaɓ nu̱ larji ka gwa nu̱ maito shoɗa?”

Labar ɓu̱ Parise nggur ndu̱ nu̱ Dlu̱r Zhaanggali

9Tu̱ Yesu zu̱ ku̱rti ɓalar nang ye nduki nu̱ka ndu̱mki ɓeena nduki a tamandan ku za wor nu̱ jeembuku. A za, 10“Nduki rap a nje nu̱ ɗu̱ki ku ma barar mbu̱ Rafti ɓu̱ Magham, dandang ɗya Parise, yang njif dandang ɗya nu̱ dlu̱r zhaanggali. 11Nu̱ Parisyang jiiki tu̱ ching gha, tu̱ shi barar ku̱me ɗyinan a zu̱ran za, ‘Magham, nga kuna maɗyi ku̱me nga ngga yen ndu̱ ɓeena ndukiku nu̱ke ɗya nu̱ muuri ku ndu̱ nu̱ mu̱narku, kom ndu̱ nu̱ zawar ku. Yang nga wa nu̱ dlu̱r zhaanggal nang zum ɓa. 12Ku̱me nga ka shi zhumti sar rap mbu̱ aa nyi qaandi mut, nga ka vu̱r zake ɓu̱ da mbu̱ ɗyi gwang ɓu̱ kap ɗyi nang gwaki.’

13“Tu̱ yang nu̱ dlu̱r zhaanggalang ching gha gana ɓakh, nu̱ ɗu̱ma daa yitan nu̱ viɗi ɓa, tu̱ ki ɓu̱tl memu̱naran ku̱me nar katar ɓaran a zu̱ran za, ‘Magham, no zhiyaye ɓanga ku̱me nga nu̱ sola.’

14“Nga zu̱ran ye nu, njif nang, gaɓki nu̱ kaari nu̱ gwar yaapar she Magham, yang Parise nang nu̱ gwa aa nu̱m ɓa. Aaki daki ɗyinan ma ɗyi ngguri ka gaɓ ndu̱ chin ma aa nu̱m ɓa, yang njif nu̱ kataki ɗyinan nu̱ gha, ka vu̱r gorkir yenda.”

Yesu wa Sa Barke ye Qusonggi Pichichindi

(Mat 19:13-15; Mar 10:13-16)

15Sarchi nggur nu̱ke ndukya ɓar ndu̱ qusonggi ɓaanda pichichi ye Yesu ma ku̱ su̱ɓa wor tu̱ sa barke ye wora. Ni nu̱ mburindakwang naki wanang, tu̱ wu ndukyang. 16Tu̱ yang Yesu qa qusonggikwang tu̱ zu̱ za, “Njig ma qusonggi pichichindi ku̱ ɗa ɓa ku sha, nggu̱tl nu wor ɓa, ku̱me kwaaɗar ɓu̱ Magham ɗya ɓu̱ pooni wora. 17Zhire nga zu̱ran ye nu, kap njif nu̱ke nu̱ vu̱r ɗyinan tu̱ dlu̱ kwaaɗar ɓu̱ Magham wa woi koɗomma ɓa, sar da ɓu̱ vi nu̱ mbu̱ kwaaɗarang ɓa.”

Nu̱ Kwaaɗar nggur Gu̱nakandi

(Mat 19:16-30; Mar 10:17-31)

18Tu̱ gorkir ɓu̱ Yakhudeku nggur zham Yesu za, “Maalu̱m mbarkandi, ngga shi kya nu̱m ma gwa nga nyifi nu̱ke ɓu̱ shi woɗa ɓa?”

19Tu̱ Yesu tlogha yenda za, “To qa nga nduk mbarkandang kha nu̱ma? Ai Magham ɗyenda ke mbari. 20Ta zu̱n wopar ku nu̱ mbu̱ Tauretyang wa zu̱ za, ‘Tom ɓu̱ shi zawa ɓa, shi na tlaghar mu̱ɗ ɓa shi na muuru ɓa, yang gu̱n na si ye wollo zum ɓa. To vu̱r gorkir ye mo ndu̱ zhu.’#18:20 Nggu̱t mbu̱ lagarkati Nggb 24:1-4. ”

21Tu̱ nu̱ gu̱narang tlogha yenda za, “Nga khutlo ɗyiku nang kap sarchi nu̱ke nga woi koɗomma ma ɓar meeni.”

22Nu̱ Yesu tu̱kki wanang, tu̱ ze nda za, “Ta mbu̱ɗ tun da nu̱ke no shi ɓa. Moso ɗyi nu̱ke a kha ɓar kap to vu̱r mu̱zhindan ye nu̱ nungndiku. To ka gwa du̱ngndi gu̱nar no shikyang mbu̱ viɗi. Kom to ɗa gaɓ to mburi nga.”

23Nu̱ tu̱kki ɓalar nang, tu̱ memu̱naran su̱bu̱r maɗyi ku̱me gu̱naran maɗyi. 24Nu̱ Yesu naki memu̱naran wa su̱bu̱ri tu̱ zu̱ za, “Ka shi shar maɗyi ku̱ nu̱ gu̱na vi nu̱ mbu̱ kwaaɗar ɓu̱ Magham! 25Ku̱me ka duk ndu̱ ndolndol ku̱ dliimokh vi mbu̱ ghub lu̱bu̱ra ye ku̱ nu̱ gu̱na vi nu̱ mbu̱ kwaaɗar ɓu̱ Magham.”

26Tu̱ nduki nu̱ tu̱kki ɓalar nang zu̱ ku za, “Chabɗi! Mbu̱ wanang, ki ka ɗanaki ɗo?”

27Tu̱ Yesu tlogha za, “Ɗyi nu̱ dukki du̱mbu̱r ɓu̱ nduku ɓu̱ duk du̱mbu̱r ɓu̱ Magham ɓa.”

28Tu̱ yang Biturus ze nda za, “Ai wonji chem wa njig aa nu̱m chem a mburoro!”

29Tu̱ Yesu ze wor za, “Nga zu̱ zhire ye nu, nduk a nje nu̱ke ka njigki rafti ɓaran, aa nokhzan, aa khachinkirku ɓaran, aa man ndu̱ zhin, aa qusonggi ɓaran ku̱me kwaaɗar ɓu̱ Magham. 30Yang nu̱ke za ɓu̱ gwa dukti ɗyi nu̱ njig kya san khang mbu̱ qaandi virkir nang ɓa. Yang tu̱k fu̱ɗar wuri ka gwa nyifi nu̱ke ɓu̱ shi woɗa ɓa.”

Yesu wa Gaɓ tu̱ Shi Ɓalar ɗyine Mu̱ti ɓaran

(Mat 20:17-19; Mar 10:32-34)

31Tu̱ ɗu̱ nu̱ wor gwaanggu̱m rapndang konggol, tu̱ yang ze wor za, “Chem a ma yir Urshalima yang ɗyi nu̱ annabikwang bu̱laki nu̱ ɗyine Yi ɓu̱ Nduk ka nyel kap. 32Ka vu̱r nda nu̱ mbu̱ khar nduki nu̱ke ɗya Yakhudeku ɓa. Ka zu̱ ɓalar ndu̱mndi yenda tu̱ vu̱r palase yenda, tu̱ koɗ nyakhti nu̱ ve nda. 33Ka shi kurpi yenda ku tu̱ tlagha nda ku, yang ye fu̱ɗar nu̱ kunung ka ji nu̱ viɗi.”

34Yang nu̱ mburindakwang nu̱ daa mbu̱ ɓalar nu̱ Yesu zu̱kyang ɓa ku̱me mbu̱ ɓalarang wa kha tukaran ye wora, nang ke ɗyi nu̱ saki nu̱ daa mban ku ɓa.

Yesu wa Shaana Pugum nu̱ Khuti ngguri

(Mat 20:29-34; Mar 10:46-52)

35Nu̱ Yesu ɗu̱ki bing ndu̱ Jeriko, pugum nggur a nje kharan konggole njiva a khuti 36Nu̱ tu̱kki su̱qur tabar nduki nu̱ kya peetari tu̱ zham ɗyi nu̱ke a ɗaatli. 37Tu̱ ndukyang ze nda za, “Ɗya Yesu khuzi Nazaret kya peetari.”

38Tu̱ pugumang daa su̱quran nu̱ viɗi za, “Yesu yi ɓu̱ Dauda, no zhiyaye ɓanga!”

39Tu̱ nduki nu̱ke a guma wu nda za ku̱ kha tu̱tu̱k, tu̱ pugumang yang shaata daa su̱quran nu̱ viɗi a zu̱ran za, “Yi ɓu̱ Dauda no zhiyaye ɓanga!”

40Tu̱ Yesu ching gha, tu̱ zu̱ za ku̱ ɗa ɓa ndu̱ pugumang yenda. Nu̱ ɗa ɓa ki bing ndu̱ chin, tu̱ zham nda za, 41“Ta shim shi nga nu̱m yora?”

Tu̱ pugumang tlogha yenda za, “Zhinkir gwaanji, nga shim na nga maari.”

42Tu̱ Yesu ze nda za, “No maari! Vu̱rti zhire ɓa wa shaana ro.” 43Fan ndu̱ fan tu̱ nggaasi na maari, tu̱ yang mbu̱ Yesu a gor dlu̱m Magham, tu̱ nduki nu̱ naki ɗyi nang gor dlu̱m Magham tu̱k.

Currently Selected:

Luka 18: ttrNT

Highlight

Copy