Luka 12

Shir Wuuri Su̱yen ndu̱ Par Du̱mbu̱ri

(Mat 10:26-27)

1Sarchi nu̱ke nduki tabaki du̱mmbu̱su̱m, tu̱ ku̱s khatl yen ku, tu̱ Yesu nggaasi ɓalar ye nduki nu̱ mburi nda kwa za, “Ku̱r ma vaanu ndu̱ yis ɓu̱ Parisekwang, nga ve pitli gwaari ɗyin ɓaandang. 2Aa nyi ɗyi nu̱ke zaran ka ɓa vi ye dalangi, yang ɗyi nu̱ke a mbu̱ tukar tu̱k kap ba nduk ka zu̱ni. 3Ku̱me nang, aa tun zu̱kya nu̱m mbu̱ zhum maari nduki ka ɓa tu̱ki fu̱ɗar gangtlu̱rang, yang a tun su̱pa aa nu̱m ye yen ku̱ba, me kiba zaran ɗyinonu ba ka ɓa wopa ɗyine ɗyin kibku.#12:3 Ka ɓa wopa ɗyine kibi Du̱ndi kib ɓu̱ Yakhudekwang mbu̱ yinanang dlamdlam, tu̱ nduk kaa kha gha ye maaran ma pijiri. Nduk ka shi wopa ɗyinan ku̱me ku̱ nduk mbu̱ ghayang kap tu̱ki.

Njif nu̱ke ɗye Sawa

(Mat 10:28-31)

4“Raptaku, nga zu̱ran ye nu, sawa nu nduki nu̱ke ka tlagha man var nduk nu̱gha yang qu̱rsan ɓu̱ ɗu̱ma shi ɗyi nu̱ dukki nangang ɓa. 5Wonji ma njif nu̱ke sawa nu nda, sawa ma Magham nu̱ke qu̱rse wa shakh nduk ndu̱ nyifi ɓaran, zalale a nje kha nda ma ku̱ mbuk nda nu̱ mbu̱ giɗim ɓai, nang ke njif nu̱ke sawa nu nda. 6Mu̱zhindi zhilo qurmun kobo rap ɓa goma? Yang kap ndu̱ nang, Magham nu̱ka mona aa zhilo kaada ɓa. 7Jiwa aa ghosi ɗyinonu kap shigaran, ku̱me nang, shi nu sawa ɓa: tun wa duk zhiloku khang ndu̱ zhaaji maɗyi.

Saidar Yesu Gume Nduki

(Mat 10:32-33; 12:32; 10:19-20)

8“Nga zu̱ran ye nu, aaki saidaki nga gume nduki, Yi ɓu̱ nduk ka ɓa saida nda tu̱k gume nu̱ ru̱ktiku ɓu̱ Magham. 9Yang aaki zhangki nga gha gume nduki, Yi ɓu̱ nduk ka ɓa zhang nda gha gume nu̱ ru̱ktiku ɓu̱ Magham. 10Aaki zu̱ki ɓalar ndu̱mndi nu̱ ɗyine Yi ɓu̱ nduku ka gwa yaapari, yang aaki zu̱ki ɓalar malkandi nu̱ ve Jiimbi shakhshakhndi am ɓu̱ gwa yaapar ɓa.

11“Mbu̱ke wa ɗu̱ ndu̱ tun ye maa kumari, aa mbu̱ kib tabar ɓaanda, aa gume nu̱ zalaleku, damta nu nu̱ ɗyine njiv feti ɗyinonu ɓa, yang damta nu ɗyine ɗyi nu̱ke tun ka zu̱ki zum ɓa. 12Ku̱me ye sarchi nang, Jiimbi shakhshakhndi ka shoga ɗyi nu̱ke tun ka zu̱ki ye nu.”

Shogar ɗyine Nggu̱bu̱ng nu̱ Gu̱nar ngguri

13Tu̱ njif nggur chele tabar ndukyang ze Yesu za, “Maalu̱m, ze khata vu̱r nji me ɓang shakhti ya mbe gu̱nar nu̱ zhinerem mu̱ɗki tu̱ njig yeremi.”

14Tu̱ Yesu tlogha yenda za “Khusku, ki saki nga ma kuma ɗyin chele ɓaanwa?” 15Tu̱ zu̱m guma ndu̱ zu̱ran ye wor za, “Ku̱r ma vaanu, ka shi nu khape ɓa, aa gu̱nar ɓu̱ nduk khang wa nu̱m, chin ke nyifi ɓaran ɓa.”

16Kom tu̱ Yesu shi ku̱rti ɓalar nggur ye wora, za, “Njif nggur a nje mbu̱r fara, nu̱ke dam ɓaran shiki boote mbari. 17Tu̱ vi ma kwaari ye varan za, ‘Gatla khara ku̱ zu̱ nga boote dam ɓang kap nu̱ mban ɓa, ngga shikya nu̱ma?’

18“Kom za, ‘Wonji ɗyi nu̱ke ngga shiki, nga ka gu̱ɗa gatleku ɓang nu̱gha tang du̱n rututundi tang zu̱ ye gur ɓanga ndu̱ ɗye vara nu̱ mban. 19Yang tang zu̱ ve memu̱nara nga za, “Nggu̱t ka! Gu̱nar ɓaara nje khaaro, me sonyi khang, kho va gha to maasi, to zu̱m, to za, to tu̱k mu̱ndi ɓaaro.” ’

20“Yang tu̱ Magham ze nda za, ‘To nggu̱bu̱ng, to ka mu̱ɗ mbu̱ virkir nang, ki ka khaki nu̱ me ɗyiku no tabaki ye vaara na?’

21“Nang ke ɗyi nu̱ke ka gwaki aa nyi njif nu̱ tabaki gu̱nar ye varan yang gu̱naran she Magham ɓa.”

Dlama Vaanu nu̱ ve Magham

(Mat 6:25-34)

22Kom tu̱ Yesu ze nu̱ mburindakwang za, “Ku̱me nangang, nga zu̱ran ye nu, damta nu ɗyine ɗyi nu̱ke tun ka zu̱mki ma khar viti ɓaanu ɓa, yang damta nu ɗyine ɗyi nu̱ke tun ka saki ye vaanu zum ɓa.” 23Ku̱me nyifi wa duk ɗyi nu̱ke ku̱ nduk zu̱mi, yang tu̱k, man var nduk wa duk luktiku. 24Nggu̱t ma kwakhiku ɓa, nu̱ka kaɓ tun ku ɓa, yang nu̱ka ku̱m boote damku zum ɓa, gatla kha wor ɓa, yang Magham ba a vu̱r ɗye zu̱mndi ye wora. Zhaaji ɓaanu wa duk ɓu̱ ɗyikhtiku maɗyi 25Chele ɓaanu damtar ɓu̱ ki ka ɗu̱maki shaata sarchi kaada ye qaandi virkir ɓarana? 26Ma nu̱ke tun ɓu̱ ɗu̱ma shir ɗyi katakandi nanga ɓa, tun a damta va nun gha ɗyine ɓeena ɗyikwang ma nu̱ma?

27“Nggu̱t ma viiri qu̱far ku ɓa, wa nu̱ke a gwaari ku. Nu̱ka shi tlu̱na ku ɓa, yang nu̱ka kaala ɗye sa ku ɓa. Yang nga zu̱ran ye nu, aa kuji Solomon, kap ndu̱ zhaaji ɓaran, nu̱ sa ɗye sar mbarkandi wa wor ɓa. 28Ma nu̱ke Magham a za ashiri ye wuzu̱ndi nu̱ gar, nu̱ke to ka naki meeni yang ɗaatli maaran tu̱ va wor nu̱gha, yang nun duk wor ɓa goma? Tun nu̱ song maito!

29“Ku̱me nang damta nu ɗyine ɗyi nu̱ke gwa nu tun zu̱mi tun za ɓa, ku̱ kha ma ɗye damta ye nu ɓa. 30Nduk larji nu̱ke nu̱ zu̱n Magham ɓa a damtarku ɗyine ɗyiku nangang. Zhinonu wa zu̱n za tun a shim ɗyiku nangang. 31Kuzhom sa nu memu̱na nu nu̱ ɗyine kwaaɗar ɓu̱ Magham, yang tun ka gwa ɗyiku nanga kap.

Gu̱nar mbu̱ Rafti ɓu̱ Magham

(Mat 6:19-21)

32“Shi nu sawa ɓa tun shapir rakhndi, jiwa Zhinonu a kashari ma vu̱r nji kwaaɗarang ye nu. 33Masa ma ɗyin kha nu ɓara, tun vu̱r sadke ye nduki nu̱ke nungndan. Shi ma du̱ngndi nu̱ ye maa nu̱ke am ɓu̱ su̱bu̱r ɓa. Du̱ng ma gu̱narang nu̱ mbu̱ viɗi she Magham ye maa nu̱ke ɓu̱ shi woɗa ɓa, nu̱ muuru ɓu̱ gwa maa muraran ɓa, yang susut ɓu̱ gwa tu̱ su̱bu̱r nu̱gha ɓa. 34Maa no du̱ngki gu̱nar ɓaa nu̱ si nang ke maa nu̱ke kwaari ɓa ka khaki nu̱ ɗyinan.

Maaviku Daasakandi

35“Kha ma gha daasaran ndu̱ pitile nar maari. 36Tun kha wa nduki nu̱ke a ku̱rsa gaɓti ɓu̱ zhinkir nu̱ rafti ye maa gu̱ndi ɓu̱rti, ku̱me mbu̱ke aa ɓa tu̱ ghwaɗ me viri, ka ɗu̱ma jiiri ku fan ndu̱ fan tu̱ qu̱n me virang yenda. 37Maaviku nangang ka ɓa shi kashar ku mbu̱ke zhin nda nu̱ raftang a khu̱l tu̱ gwa wor daasaran a ku̱rsa gaɓti ɓarani. Nga zu̱kya zhire ye nu, ka nggosa lukti nu̱ gha, tu̱ ze wor za ku̱ kha gha, tu̱ vu̱r ɗye zu̱mndi ye wora. 38Maaviku ɓaranang, ka ɓa tu̱k mu̱ndi mbu̱ke a gaɓi aa virkiri, aa zhuzhumi, tu̱ gwa wor daasaran. 39Yang zu̱n ma mbu̱ke nu̱ rafa wa zu̱n za nu̱ muuru a ɓari, tu̱ga ka kha daasaran. 40Daasa ma vaanu tu̱k, ku̱me Yi ɓu̱ nduku ka ɓa ɗa ɓa sarchi nu̱ke nun taman ɓa.”

Maavi nu̱ Zhire ndu̱ nu̱ Song Zhire

(Mat 24:45-51)

41Tu̱ Biturus zham za, “Zhinerem gwaanji, ku̱rti ɓalar nanga ta zu̱ran ku̱me chem mu, yang ku̱me aaki mu?”

42Tu̱ Zhinerem gwaanji tlogha za, “Nga ɓalarang ku̱me nu̱ shir zhire, nu̱ kaɗari tu̱k nu̱ke nu̱ rafti ɓaran du̱ngki nda za ku̱ kosa rafti ɓaran yenda tu̱ ku̱s vu̱r ɗye zu̱mndi ye pudeku ɓaran aa nyi sarchi. 43Barkya ve maavi nu̱ke nu̱ rafti ɓaran a gaɓki tu̱ gwa nda a shir ɗyiku nu̱ke nu̱ rafti ɓaran zu̱ki yendang ka ɓa tu̱k mu̱ndi. 44Zhire nga zu̱ran ye nu, nu̱ raftang ka du̱ng maavi nanang tu̱ kha ma nu̱ ɗozar ɗye varan kap yenda. 45Yang mbu̱ke maavyang wa kor za nu̱ rafti ɓaran a gaɓti dong ɓa, tu̱ vi ma mu̱nar ye ɓeena maaviku nu̱ su̱yen ndu̱ chin, khuzuku kap ndu̱ nusuku, wonji khang zu̱mndi ndu̱ zar ɗyamndi. 46Fu̱ɗa ngguri, nu̱ rafti ɓaranang ka ɓa ɗa gaɓi, sarchi nu̱ke maavyang nu̱ taman ɓa, yang sarchi nu̱ke nu̱ zu̱n zum ɓa. Tu̱ shi dlabti yenda maɗyi tu̱ kuma nda su̱yen ndu̱ nduki nu̱ zhangndi tu̱kti maari ku.

47“Maavi nu̱ zu̱nki ɗyi nu̱ke nu̱ rafti ɓaran a shimndan shi nji, yang nu̱ daasa tu̱ shi ɓa, ka gwa dlabti gu̱rgu̱rndi. 48Yang maavi nu̱ke nu̱ zu̱n ɗyi nu̱ke nu̱ rafti ɓaran a shimndan ɓa, yang tu̱ shi ɗye gwar dlabti, ka gwa dlabtang laya laya. Njif nu̱ vu̱rki yenda khang, ka ɓa zham khang kha nda, njif nu̱ gwaki khang tu̱ duk mu̱dlen ka zham kha nda khang tu̱ duk ɓu̱ mu̱dlenang.

Yesu wa ka Shakh Chele ɓu̱ Nduku

(Mat 10:34-36)

49“Nga ɓa ma ngga nga ɓai nu̱ larji, meeni tu̱ga ɓaiyang vindan! 50Baptisme a nje nu̱ke nga buran, yang nga damtaran ɗyinan kope wa woɗa. 51Tun a kwaaran za nga ɓa kya ndu̱ khar mu̱nkandi mbu̱ larji mu? Nga zu̱ran ye nu̱, auwo, khar mu̱nkandi ɓa, tun ka ngga yen. 52Jiiri leendangang, nduk qurmun kharan mbu̱ rafti da ku ka ku̱s zhang yen, nduk kunung a zhang nduk rapndang, nduk rapndang a zhang nduk kunungndang. 53Ka shakh ku, zhin woyang zhang yi ɓaran, woyang a zhang zhini, ye nusu a zhang mani; man nusu a zhang nokhzi yi ɓaran, nusuku a zhang man zhime nda.”

Zu̱ndi Sarchi

(Mat 16:2-3)

54Tu̱ Yesu ze ndukyang za, “Mbu̱ke tun wa na ku̱zaɓti aa ji ku̱n mugu, fan ndu̱ fan tun wa ka zu̱ nun za, ‘Romndi a ma shiri,’ yang tu̱ shi. 55Mbu̱ tun wa tu̱k khu̱kheeti a piiri ku̱n kona tu̱k, tun za, ‘maarang ka shi gu̱rgu̱r,’ yang tu̱ shi yel. 56Nu̱ mu̱narku! Tun wa magha zu̱ndi maa vu̱ghai ndu̱ maa viɗi, tun zu̱n ɗyi nu̱ke a nje, yang kha ku̱me nu̱m nun zu̱n ɗyi nu̱ke a nje sarchi nang ɓa?

Tlot ndu̱ nu̱ Dar Zhaano ɓaaro

(Mat 5:22-26)

57“Kha ku̱me nu̱m nun ka kuma ɗyi mbarkandi ye va nu ɓa? 58Mbu̱ke nduk wa da zhaano ɓaaro ye maa kumari, to shi tun tlaɗ ndu̱ chin yiti njivi, mbu̱ke ta zhang gha, ka khu̱l ndu̱ to gume nu̱ kumarang. Chin nu̱ kumarang ka vu̱r toro ye nu̱ gu̱ndi mbu̱ vari, tu̱ nu̱ gu̱ndi mbu̱ varang ɗu̱ ndu̱ to zhaaru̱m. 59Nga zu̱ran yoro, ta ma gwa maa vi ɓar ɓa, kope ta dli anyi kobo nu̱ke zhaki dliiran nu̱ ɗyinoro.”

Currently Selected:

Luka 12: ttrNT

Highlight

Copy