Luka 11

Yesu wa Shoga Shir Barar ye nu̱ Mburi nda ku

(Mat 6:9-13; 7:7-11)

1Sarchi nu̱ke Yesu woɗaki barar ye maa ngguri, tu̱ da chele ɓu̱ nu̱ mburindakwang khuɗ nda za, “Zhinerem gwaanji, shogo shir barar yerem tu̱k, wa nu̱ke Yokhana shogaki ye nu mburi nda kwang.”

2Tu̱ Yesu ze wor za, “Mbu̱ tun a ma shi barari, tun zu̱ nun za,

‘Zhinerem,

ku̱ dlu̱mor kha shakhshakh.

Kwaaɗar ɓa ta ɓa.

3To vu̱r ɗye zu̱mndi nu̱

aa nyi piti fu̱ɗar yerem.

4To yaapa solarku ɓaarem yerem,

wa nyem ka yaapa ki solarku ye nduki

nu̱ kya solarku yerem.

Lowo rem mbe lambarku ɓu̱ Sheɗan.’ ”

5Tu̱ Yesu zu̱m guma ndu̱ shogarang ye wor za, “Mbu̱ raptor a ɓa shoro chele virkiri, ma gang kudum ɓurti tolir kunung ku̱me vu̱r nji ye runggi ɓaran nu̱ ɗa ɓa ki chele virkirang. 6Tu̱ yang zu̱ za, ‘Rapta, ngaa shim vu̱r na kudum ɓurti tolir kunung ya ku̱me ngaa shi runggu chele virkir nang yang aa nu̱m khara vu̱r nga yenda ɓa.’

7“Tom ze nda no za, ‘Damtana nga ɓa ku̱me nga kar tang qan vara gha, nga ndu̱ qusonggi ɓanga, wonji me virang khiiran mu?’ 8Ai, aa tom ɓu̱ vu̱r yenda ku̱me ɗya raptor ɓa, to ka nyel shimndi ɓaran yenda, ku̱me ɗya ɗye kawa mbu̱ ta nggu̱tli nda si.

9“Ku̱me nang, nga zu̱ran ye nu, khuɗ ma, ka vu̱r yor nu, kaala ma, tun ka gwa, ghwaɗ ma me virang, ka qu̱n ye nu. 10Kap njif nu̱ khuɗki ka vu̱r yenda, njif nu̱ kaalaki ka gwa, njif nu̱ ghwaɗki me virang ka qu̱n yenda.

11“Nyi zhinki ka vu̱rki su̱ti ye woi ɓaran mbu̱ke khuɗ kya yurvwa? 12Ki ka vu̱rki ghu̱rɗar ye woi ɓarana mbu̱ke khuɗ kya nggaral? 13Yang mbu̱ tun nu̱ solarku, tun wa zu̱n ɗyi mbarkandi nu̱ke tun ka vu̱rki ye qusonggi ɓaanu, bele zhunonu nu̱ viɗi nu̱ke kaa vu̱rki Jiimbi shakhshakhndi ye nu̱ khuti nda?”

Yesu ndu̱ Baalzabul

(Mat 12:22-30; Mar 3:20-27)

14Sarchi ngguri, Yesu wa komba khu̱kheeti nu̱ nggu̱tlki njif nggur ndu̱ ɓalar ɓar mbe njifang, tu̱ njif nu̱ke a su̱yen ndu̱ khu̱kheetang qu̱n men tu̱ nggasi ɓalari. Tu̱ ɗyinang shi lazham ye tabar ndukyang. 15Yang ɓeena ndukyang za, “Komba khu̱kheetikwang ɓar ndu̱ zalale ɓu̱ Baalzabul, kuji ɓu̱ khu̱kheetiku.” 16Ɓeena ndukyang tu̱ buu nda ku ndu̱ zhamndi za ku̱ wuɗ ɗye lazham ye wor she Magham.

17Yang Yesu wa zu̱n ɗyi nu̱ke a kwaaran ku, ku̱me nang tu̱ ze wor za, “Aa nyi kwaaɗar nu̱ shakki tu̱ ku̱s dakhla yen, a ma chingndi ɓa, wanang tu̱k, rafti nu̱ shakki tu̱ ku̱s dakhla yen kaa lakhta. 18Ku̱me nang, mbu̱ke nu̱ kwaaɗar ku ɓu̱ Sheɗan a dakhla yen ku kwaaɗar ɓaran a ma gwa maa chingndi ɓa. Ɓaanu tun za ngaa komba khu̱kheetiku ɓar mbe nduki ndu̱ zalale ɓu̱ Baalzabul. 19Mbu̱ke nang ke ɓalarang, wor nu̱ mbu gaanje nu kwa tu̱k ɗa, ɓaanda a komba Baalzabul ɓar ndu̱ zalale ɓu̱ kiya? Ku̱me nangang, wor ka ɓa kuma nu. 20Yang mbu̱ke ngaa komba khu̱kheetiku ɓar ndu̱ zalale ɓu̱ Magham, nanga wa wuɗ za kwaaɗar ɓu̱ Magham aa ɓa ye nu.

21“Mbu̱ nduk du̱mbu̱rkandi wa daasa varan nu̱gha mbari ndu̱ ɗye dakhlari ma bu ɗyin rafti ɓaran, ɗye varan ɓu̱ shi su̱ɓa ɓa. 22Mbu̱ yang njif nggur nu̱ dukki nda ndu̱ ndumbu̱r a ɓa tu̱ nggu̱ɗ nu̱ ve nda, yang nu̱ke wa duk du̱mbu̱r ɓaran tu̱ ghar ɗye dakhlar nyin maitakyang ɓara, ka shakh ɗye varanang ɓar ye nduki ɓaran.

23“Kap njif nu̱ke a su̱yen ndu̱ nga ɓa, ɗya nu̱ zhangndi ɓanga, yang tu̱k njif nu̱ke nu̱ taba nduki ya ɓa, a shikya lakhta wora.

Gaɓti ɓu̱ Khu̱kheetiku Malkandi

(Mat 12:43-45)

24“Mbu̱ khu̱kheeti malkandi wa vi ɓar mbe nduku, tu̱ baara maa nu̱ke ghwaaran gar ma laɓ maa khari nu̱ ɗa gwa ɓa, ka ɗa zu̱ za, ‘Bu gaɓ nga nu̱ ye maa nanga jiiki.’ 25Mbu̱ wa gaɓ ta gwa maarang kooran shakhshakh, 26ka ɗi tu̱ ɗa qa khu̱kheetiku mut nu̱ dukki nda ndu̱ maatli tu̱ vi ku nu̱ mbe njifang, khar viti ɓu̱ njif nang ka duk nu̱ gumapaalyang ndu̱ maatli.”

Barke nu̱ zhire

27A mbu̱ ɓalarang, tu̱ nokhzi nggur mbu̱ tabar ndukyang zu̱ za, “Barke ye mankir nu̱ khaki ro tu̱ moola ro.”

28Tu̱ Yesu tlogha yenda za, “Nduki nu̱ ka tu̱kki ɓalar ɓu̱ Magham tu̱ tlu̱na wa duk ndu̱ barke.”

Yesu wa Shi Ɓalar ɗyine Nduki nu̱ Qaandi Virkir meeni

(Mat 12:38-42)

29Nu̱ tabar ndukyang shaataki khangi, tu̱ Yesu ze wor za, “Nduki nu̱ qaandi virkir meeni ɗya nduki malkandi. Ba a khuɗ wuti shipar ku, yang a ma wuɗ shipar nggur ye wor ɓa kope pooni shipar ɓu̱ annabi Yunana. 30Ba wa nu̱ annabi Yunana khaki ma shipar ye nduki nu̱ Nineva, wanang tu̱k, Yi ɓu̱ Nduk ka kha ma shipar ye nduki nu̱ qaandi virkir meeni. 31Kuji nusukandi nu̱ke a kwaaɗar ghai Sheba#11:31 Kuji nusukandi nu̱ke a kwaaɗar ghai Sheba Nang ke kuji Sheba nu̱ ɗa njigki mbu̱ ghai ɓaran ɓakh ta ɓa ma na kuji Solomon (1Kuj 10:1-10). ka ji su̱yen ndu̱ nduki nu̱ qaandi virkir meeni fu̱ɗar wuri tu̱ kha ma njiv kumar nduki nu̱ qaandi virkir meeni ku̱me wa ɗu̱ ma tu̱k kaɗari ɓu̱ kuji Solomon. Aa nu̱ke ghai ɓaran a ɓakh maɗyi, yang meeni wonji njif nu̱ dukki Solomon gwaari she nu. 32Wanang tu̱k, nduki nu̱ Nineva ka ji su̱yen ndu̱ nduki nu̱ qaandi virkir meeni fu̱ɗar wuri tu̱ kha ma ɗye kumar nduki nu̱ qaandi virkir meeni. Ku̱me wa nggoɗ ku tu̱ njig solar ɓaanda ku̱nshe tu̱kti wopar ɓalar ɓu̱ Magham nu̱ Yunana shiki. Yang wonji njif nu̱ dukki annabi Yunana fan meeni.

Yarang ɓu̱ Manva

(Mat 5:15; 6:22-23)

33“Nduk nu̱ka sa Pitila nu̱ ye maa tuka ɓa, yang nduk nu̱ka kurpan gha ndu̱ du̱ɓa zum ɓa. Nduk ka sa pitila nu̱ ɗyine ɗye du̱ngndan ku̱me ku̱ vu̱r yarang ye nduki nu̱ ɗa viki nu̱ mbu̱ kibang. 34Yitor ke yarang ɓu̱ man vaaro. Mbu̱ yitor mbari, manva kap ka kha yarang, yang mbu̱ yitor mbar ɓa, manva kap a mbu̱ zhumi. 35Shi ɗyi nu̱ke to ka ɗu̱maki kap, ku̱me ku̱ yarang nu̱ke a mbeerang gaɓ ma zhum maa ɓa. 36Ku̱me nang, mbu̱ manva kap yarang, yang tleebi nggur a nje nu̱ke a mbu̱ zhum ɓa, manva kap ka kha yarang ba wa nu̱ke pitila ka vu̱rki yarang yoro.”

Yesu wa Wuɗ Zop ɓu̱ Pariseku ndu̱ Maalu̱m Taurete ku

(Mat 23:1-16; Mar 12:38-40; Luk 20:45-47)

37Nu̱ Yesu woɗaki ɓalarang, tu̱ Parise nggur qa nda ma zu̱m ɗye zu̱mndi. Tu̱ Yesu ɗu̱ ta kha gha ye maa zu̱mndi ɗye zu̱mndang. 38Tu̱ Parisyang shi lazham ɗyi nu̱ saki Yesu nu̱ shiɓ kharan nu̱gha me ku̱ nggaasi zu̱mndi ɗye zu̱mnda ɓa.#11:38 Yesu nu̱ shiɓ kharan nu̱gha kaabu ku̱ nggaasi zu̱mndi ɗye zu̱mnda ɓa: Nang a ɓalar ɗyine me ghai shiɓti khar ɓu̱ Yakhudeku nu̱ka shiki me ku̱ zu̱m ɗye zu̱mndi yang pooni shiɓti khar nang ɗya baa me ghai.

39Tu̱ yang Zhinerem gwaanji ze nda za, “Tun Pariseku, tun wa shipa nduki nu̱ka shiɓki qu̱rsi ɗyekhti ndu̱ kotumndi nu̱ gha mbari. Yang mbanang nyeedlan ndu̱ ru̱kna ku̱me tun wa ka lawa ɗyiku ɓar kha nduki ku̱me ɗyooti mbu. 40Nggu̱bu̱ngku, alapa Magham nu̱ shiki maa damang, chin shiki maa mbwang ɓa goma? 41Ku̱me nang, vu̱r ma gu̱nar nun lawaki ɓar kha ndukyang ye nu̱ nungndiku kom aa nu̱m ka kha shakhshakh ye nu.

42“Tun Pariseku tun a khar ɗye zhiyaye, ku̱me tun wa ka fed zake ɓu̱ aa nyi ɗyi koɗommandi ɓaanu wa ɗu̱khti kimbili ndu̱ dlu̱mndi ginu kap. Yang tun wa zhang shir zhire ndu̱ ndolar ɓu̱ Magham gha aa nu̱ke vu̱rti zaka mbari. Yang nu̱ shipa njig nu̱ tlu̱na ɓeenan kwa ɓa.

43“Pariseku tun ɗye zhiyaye, ku̱me tun wa ka ndola maa khar nu̱ dukki ndu̱ zhaaji mbu̱ kib tabarku ɓaanu, ndu̱ ku̱ nduki shi wuse ye nu mbu̱ gomari.

44“Tun ɗye zhiyaye, ku̱me tun wa shipa ku̱jipku nu̱ke ndukyang khaatlan ku waare zu̱ndi ɓaanda.”

45Tu̱ da chele nduki nu̱ shogar Taurete ɓara ze nda za, “Ai mbu̱ ɓalar no shiki nang, ta pu̱zerem tu̱k.”

46Tu̱ Yesu tlogha yenda za, “Tun nu̱ shogar Taurete ye nduki, tun ɗye zhiyaye, ku̱me tun wa shipa nduki nu̱ka du̱ngki shipiti taɗakandi nu̱ke nduk ɓu̱ ɗu̱ma daran ɓa ye nduki. Yang nun ka shaata wor ndu̱ daran aa nu̱ ye khaa nu da ɓa.

47“Tun ɗye zhiyaye, ku̱me tun wa ka du̱n ku̱jip ɓu̱ annabiku nu̱ gha yang ɗya zhikannu tlaghaki wora. 48Nang wa wuɗ nu̱ ɗyine tun wa saida ɗyi nu̱ zhikannu shiki yang tu̱k tun a mbu su̱ wor ku̱me wor tlaghaki annabikwang, yang tun du̱nki ku̱jip ɓaanda rong ma kaani. 49Nang ke ba ɗyi nu̱ Magham zu̱ki mbu̱ kaɗari ɓaran za, ‘Ngga ru̱k annabiku ndu̱ pudeku ye wora, yang kaa tlagha ɓeenan tu̱ vu̱r bonye ye ɓeenanku.’ 50Ku̱me nang, ka ɓa kuma nduki nu̱ qaandi virkir meeni ku̱me tom ɓu̱ annabiku nu̱ mbu̱ɗki ji sarchi nu̱ shiki larji ma ɓar meeni. 51Jiiri ɗyine tom ɓu̱ Khabila nu̱ mbu̱ɗki ma yir ɗyine tom ɓu̱ Zakariya nu̱ tlaghaki nda chele du̱ku̱l ndu̱ maa Shakhshakhndi mbu̱ rafti ɓu̱ Maghamang. Wanang, ngaa zu̱ran ye nu, kumara nje ɗyine nduki nu̱ qaandi virkir meeni ku̱me ɗyiku nang.

52“Tun ɗye zhiyaye, tun nu̱ shogar Taurete ɓara, ku̱me tun wa nggu̱tl nduki ndu̱ zu̱ndi Magham ba wa nu̱ke song ɗye qu̱ndi ka nggu̱tlki nduk viiri nu̱ ku̱ba. Nun vi nu̱ mbu̱ kwaaɗar ɓu̱ Magham ɓa, yang nun njig nduki nu̱ke a shim viri ku̱ vi ɓa.”

53Nu̱ Yesu njigki maa nu̱ shiki ɓalarang, tu̱ Pariseku ndu̱ nu̱ shogar Taurete ku ɓara shokhna maɗyi, tu̱ yang ki ku̱na nda ndu̱ zhamndi zum zum. 54Ku̱me ku̱ zu̱ ɗyi galkandi nu̱ke wor ka ku̱ski nda si ku.

Currently Selected:

Luka 11: ttrNT

Highlight

Copy