Luka 10

Yesu wa Ru̱k Nduki ɗyin Mut qu̱m Rap

1Qu̱rse nang, tu̱ Zhinerem gwaanji dat nduki nggur ku ɗyin mut qu̱m rap, tu̱ ru̱k wor rap rap ku ma ku̱ ɗu̱ mbu̱ ghaiku ndu̱ maaku nu̱ke chin a shim ɓa mbu nji gaandan. 2Tu̱ yang ze wor za, “Tlu̱nar ku̱mndang khang ka, yang nu̱ tlu̱narkwang wa kata. Ku̱me nang, khuɗ ma nu̱ damang, ku̱ ɗa ru̱k nu̱ tlu̱nar ku ma ku̱mndang. 3Kope tun ɗu̱ leendang. Wonji nga ru̱ktonu ba wa ye ndu̱ɓang chele yiɗi gaariku. 4Da nu larshi mu̱zhin nu̱ khaanu ɓa, yang aa kulup da nu ɓa, yang tu̱k da nu paghamndiku nggur nu̱ si ɓa. Kha nu gha ma qaandi ye nduki me njiva ɓa.”

5“Aa nyi rafti nun viiki, ngga ma san nun za, ‘Gappu̱ramma ku ye nduki nu̱ mbu̱ rafti nang!’ 6Mbu̱ ye barka nje tu̱ barkya kha nda, mbu̱ yang a nje ɓa ta gaɓ nu̱ she nu. 7Mbu̱ tun wa vi nu̱ mbu̱ ghai, tun kha ba nu̱ mbu̱ rafti da, tun zu̱m aa nyi ɗye zu̱m nu̱ vu̱rki ye nu. Ku̱me nu̱ tlu̱na wa shipa ku̱ gwa ɗye ɓi ɓaran. Kha nu ma vi rafa rafa ɓa.

8“Aa nyi ghai nun viki nu̱ mban ku̱ dlu̱ronu, zu̱m ma aa nyi pooni ɗye zu̱m nu̱ vu̱rki ye nu. 9Tun shaana nu̱ khaatiku nu̱ mbu̱ ghayang nu̱ gha tun ze ndukyang nun za, ‘Kwaaɗar ɓu̱ Magham aa ɓa bing ndu̱ tunu.’ 10Yang aa nyi ghai nun viki nu̱ mban tu̱ zhang dlu̱ronu gha, mbu ma bonga bonga tun a zu̱ran nun za, 11‘Aa kalau mbu̱ ghai ɓaanu nu̱ mbu̱ sarerem chem a mbaran nu̱gha ye nu. Yang ɗo zu̱n ma, kwaaɗar ɓu̱ Magham a ɓa bing ndu̱ tunu!’ 12Nga zu̱ran ye nu, ye fu̱ɗar wuri, Magham ka duk nu̱ shir longguma ye Sodom#10:12 Nduki nu̱ Sodom Sodom ɗya ghai nggur nu̱ Magham vaki nu̱ gha nu̱ ɓai ku̱me tlu̱nar ɓu̱ nduki nu̱ mbanang maatlin. Nggu̱t mbu̱ Lagarkati (Nggar 18:20-21; 19:24-28). aa ndu̱ maatli ɓaanda, ye ghai nang.”

Ghaiku nu̱ Zhangki Tubar gha

(Mat 11:20-24)

13“Tun ɗye zhiyaye tun Korazin ndu̱ Besaida! Ku̱me ɗye lazhamku nu̱ shiki mbe nu, aa shi mbu̱ ghai Taya ndu̱ Sidon#10:13 Taya ndu̱ Sidon Ɗya ghaiku rap mbu̱ dlar ghai Fonesiya nu̱ke wang ku mbu̱ tlu̱nar malkandi ɓaanda. (Yish 23:1-18; Amos 1:9-10). kap nu̱ maatli ɓaanda, tu̱ga wa nggoɗ ku ɗau, tu̱ sa ngguzurku su̱yen ndu̱ ghaari pu̱zhiti ye ɗyin wora, ma wuɗ dambu̱rti ɓaanda. 14Ye fu̱ɗar wuri Magham ka duk ndu̱ nar zhiyaye ɓu̱ Taya ndu̱ Sidon, ye ghaiku ɓaanu nang. 15To tu̱k Kaparnakhum! Ta tamandan to ka gwa zhaaji khar viɗi mu? Aa koɗom! Ka gaɓ ndu̱ to gana ye maa khar ɓu̱ mu̱tiku!

16“Kap njif nu̱ tu̱kki nu, a tu̱k kya nga. Kap njif nu̱ zhangki nu gha yang, zhang kya nga. Aaki nu̱ zhangki nga yang, zhang kya Magham nu̱ ɗa ru̱kki ngang.”

Gaɓti ɓu̱ Nduki ɗyin Mut qu̱m Rapndang

17Sarchi ni nu̱ mburi nda ku ɗyin mut qu̱m rap ndang#10:17 Ɗyin mut qu̱m rap Ɓeeni bu̱larku wa zu̱ za ru̱kkyang nduki ɗyin mut. a gaɓki ku, a ɗyine kashar ku, a zu̱ran ku za, “Zhinerem gwaanji kap ndu̱ khu̱kheetiku ba mbu zu̱r ɓaarem mbu̱ dlu̱moro.”

18Tu̱ Yesu tlogha ye wor za, “Ngaa na Sheɗan aa nggu̱ɗ viɗi wa wuti maari. 19Tu̱k ma! Nga vu̱r zalale ye nu, ma ɗu̱ma nu khatl su̱tiku ndu̱ ghu̱rɗarku, kap ndu̱ nu̱ zhangndi ɓaanu, ma ku̱ aa nu̱m gwa nu ɓa. 20Yang kap ndu̱ nang, shi nu kashar ku̱me khu̱kheetikwang tu̱kto nu ɓa. Shi ma kashari ku̱me dlu̱monu a nje bu̱laran mbu̱ viɗi ma viiri nu̱ zhena.”

Yesu wa Shi Ɓong Memu̱na

(Mat 11:25-27; 13:16-17)

21Ye sarchi nang, Yesu wa nyel nu̱ ɓong memu̱na ndu̱ kashari nu̱ ku̱nshe Jiimbi shakhshakhndi. Tu̱ zu̱ za, “Nga kunaro Aba, Zhinkir nu̱ viɗi ndu̱ maa vu̱ghai, ku̱me ta tuka ɗyiku nang gha ye nu̱ kaɗari ku ndu̱ nu̱ zu̱ndi ku̱, yang ta wuɗ ye qusonggi. I, Aba, ku̱me ta na wanang shiki yor mbari.

22“Aba ɓang wa vu̱r zalale ya ɗyine aa nu̱m kap. Nduka nje zu̱nki Woyang ɓa, kope Zhinang ɗyenda, yang tu̱k nduk a nje zu̱nki Zhinang zum ɓa kope Woyang, kom ndu̱ njif nu̱ Woyang shimki wuti nda yenda.”

23Tu̱ Yesu dambu̱r nu̱ she nu̱ mburindakwang tu̱ ze wor mbe tuka za, “Barkya ve nu tun nun naki ɗyiku nang a shir mbu̱ yito nu. 24Jiwa nga zu̱ran ye nu, annabiku ndu̱ kujiku khang wa shim tu̱ga na nda ɗyiku nu̱ke tun a naran nang, yang nu̱ gwa naran ku ɓa. Wa shim ku̱ tu̱k nda ɗyiku nu̱ke tun a tu̱ktanang, yang nu̱ tu̱k ku ɓa.”

Ki ke nu̱ Bing ɓanga?

25Sarchi ngguri tu̱ njif nggur nu̱ zu̱ndi wopar ɓu̱ Magham mbu̱ khar Musa ji ma tu̱k me Yesu, tu̱ zham nda za, “Maalu̱m, ngga shi kya nu̱m ku̱me gwa nga nyifi nu̱ke ɓu̱ shi woɗa ɓa?”

26Tu̱ Yesu tlogha yenda za, “Bu̱laran mbu̱ Lagarkatikwang za nu̱ma? To da mban za kima?”

27Tu̱ njifang tlogha yenda za, “A nje bu̱laran, ‘Ndolo Magham Zhinkir gwaanji ndu̱ memu̱na da, ndu̱ nyifi ɓaaro, ndu̱ du̱mbu̱r ɓaaro, kom ndu̱ kwaari ɓaaro. To ndola nu̱ bing ɓa tu̱k wa vaaro.’ ”

28Tu̱ Yesu ze nda za, “Ta tlogha torop. Shi wanang ɗo to ka gwa nyifirang.”

29Yang ku̱me a shim lawa ɗyin varan nu̱ njifang, tu̱ zham Yesu za, “Ki ke nu̱ bing ɓanga?”

30Tu̱ Yesu tlogha yenda mbe labar za, “Khuski nggur a nje nu̱ ɗa jiiki Urshalima ma yir Jeriko. A mbu̱ yirang tu̱ nu̱ yetarku yeta nda tu̱ lawa ɗyin kha nda ɓar kap, tu̱ shi dlabti tlaghar mu̱ti yenda tu̱ njig nda mugaandan mbu̱ tomi.”

31“A nje, a nje tu̱ kuru#10:31 Kuru Ɗya nu̱ tlu̱nar mbu̱ kib ɓu̱ Magham. nggur nu̱ tlu̱nar mbu̱ Rafti ɓu̱ Magham nu̱ kya mbu njivang gwaanda ghalaran, tu̱ dla vaaran dam dam tu̱ ɗu̱ varan. 32Nu̱ shoɓki koɗom tu̱ Lawi#10:32 Lawi Ɗya nu̱ shaatar kuru mbu̱ kib ɓu̱ Magham. nggur nu̱ kya mbu njivang tu̱ gwa nda tu̱k, yang nu̱ shaata nda zum ɓa. 33Gaandan kom tu̱ khuzi Samariye#10:33 Khuzi Samariye: Ɗya njif na viki Samariya, yang khuzi Samariya ndu̱mndan she Yakhudeku. nggur a khu̱dli, nu̱ naki nda, tu̱ zhiyaye ɓaran ku̱si nda, 34tu̱ khu̱l she nda tu̱ gu̱n ruɓarang yenda nu̱ gha, gaanje sar ɗyim kuzhi ndu̱ mor yenda nu̱ si.#10:34 Sar ɗyim kuzhi ndu̱ mori yenda nu̱ si Zu̱r mor ye ruɓarang a wut vu̱rti kuzhi ye njif nu̱ ruɓakyang. Tu̱ daa nda nu̱ ɗyine kooro ɓaran, tu̱ ɗu̱ ndu̱ chin ye maa zhurti ɓu̱ runggiku ma ku̱ndi.” 35“Ɗaatli maaran, ta da mu̱zhindi nu̱ tlu̱nar piti rap#10:35 Mu̱zhindi tlu̱nar piti rap Chin ke dinari rap (Mu̱zhindi ɓu̱ nduk Roma zhu)., tu̱ vu̱r ye nu̱ nggu̱ti maarang za, ‘Nggu̱t njif nang ya mbari, mu̱zhindi nu̱ ku̱ski kap, ngga ɓa gaɓ khwaatan yoro.’ ”

36Yang tu̱ Yesu zham nda za, “Chele nduk kunungndi nangang ki khaki ma nu̱ bing ɓu̱ njif nu̱ ruɓa kya na?”

37Tu̱ tlogha za, “Njif nu̱ wuɗki tlu̱nar dambyang.”

Tu̱ Yesu ze nda za, “Ɗu̱ ɗo, to ɗa shi wanang.”

Yesu wa Ɗu̱ Kaa ɓu̱ Marta ndu̱ Maryam

38Yesu ndu̱ nu̱ mburindakwang a mbe yir ku, ta khu̱l mbu̱ ghai nggur nu̱ke nokhzi nggur dlu̱man Marta dlu̱ki wor nu̱ ka ɓaran. 39Khachindi Marta a nje dlu̱man Maryam, tu̱ kha gha wudle Zhinerem gwaanji tu̱ ku̱s tu̱k ɓalar ɓaranang. 40Ɓu̱ Marta yang tlu̱nar ɗye zum damtaki nda. Tu̱ ɗu̱ she Yesu, za, “Zhinerem gwaanji no damta ndu̱ nar khata nu̱ njigki vu̱rti shir ɗye zu̱mnda ya ba nga ɗyenda de? Ze nda ku̱ ɗa ɓa ku̱ shaata nga ɓa.”

41Yang tu̱ Zhinerem gwaanji tlogha yenda za, “Marta, Marta, khangkal ɓa wa ji, ta damta va nu̱gha tu̱k ɗyine su̱ tun khang. 42Yang ba tun kaada ke ɗye gangi, Maryam wa kar tu̱ dat ɗyi mbarkandi, nu̱ke am ɓu̱ shi dlu̱ ɓar kha nda ɓa.”

Currently Selected:

Luka 10: ttrNT

Highlight

Copy