Luka 9
9
Yesu wa Ru̱k Pudeku Gwanggu̱m Rapndang
(Mat 10:5-15; Mar 6:7-13)
1Sarchi ngguri, tu̱ Yesu qa pudeku ɓaran gwanggu̱m rapndang tu̱ vu̱r zalale ndu̱ du̱mbu̱r feti khu̱kheetiku ɓar ndu̱ shaanar aa nyi khaati ye wora. 2Tu̱ ru̱k wor ma wopa kwaaɗar ɓu̱ Magham ye nduki su̱yen ndu̱ shaanar nu̱ khaatiku. 3Tu̱ ze wor za, “Da nu aa nu̱m me kha nu ma yir nang ɓa, da nu saaɓi ɓa, da nu kulup ɓa, da nu ɗye zu̱m ɓa, da nu mu̱zhin ɓa, yang baa lukti kaadandi nun sakyang wa gama. 4Rafti nun zhurki nu̱ nje kap, kha ma gha ba nje kope tun wa njig ghayang. 5Kap maa nu̱ nduk zhangki nu gha, mbu̱ tun a ma njig ghayang, tun mba kalau nu̱ ve saaronu nu̱ gha tu̱ kha ma saidu ɗyine wora.” 6Tu̱ ɗu̱ ku a baara ghaiku, a wopa labar mbarkandang ndu̱ shaanar nu̱ khaatiku aa fu̱n.
Kuji Khiridus wa Damta
(Mat 14:1-14; Mar 6:14-29)
7Nu̱ kuji Khiridus tu̱kki labar ɗyi nu̱ke Yesu a shiran, tu̱ damta maɗyi ku̱me ɓeena nduki a zu̱ran za ɗya Yokhana nu̱ baptisma jiiki mbe mu̱ti. 8Yang ɓeenan za ɗya annabi Iliya, ɓeenan za ɗya da chele annabiku ɓu̱ Magham nu̱ zhu nakhaki mbe mu̱ti. 9Tu̱ Khiridus zu̱ za, “Ngaa ɗakh ɗyin Yokhana nu̱ gha, yang ɗa ngaa tu̱kkya mewar labar ɓu̱ kiya?” Tu̱ kuji Khiridus shim na Yesu ndu̱ yitan.
Yesu wa Zu̱m ndu̱ Nduki Du̱pu Qurmun
(Mat 14:13-21; Mar 6:30-44; Ykh 6:1-14)
10Nu̱ pudekwang a gaɓ ki ye maa yirang, tu̱ zu̱ ɗyi nu̱ wora shiki ye Yesu kap, tu̱ yang Yesu qa wor nu̱ konggol mbu̱ gaari nggur Besaida. 11Nu̱ tabar ndukikwang tu̱kki maa nu̱ ɗu̱ki ku si, tu̱ mbu wor ku, tu̱ Yesu gaɗa wor kom tu̱ shi ɓalar ye wor ɗyine kwaaɗar ɓu̱ Magham tu̱ shaana nduki nu̱ shimki ku̱ shaana wora.
12Nu̱ mugdi shiki lu̱s, tu̱ pudeku gwaanggu̱m rapndang a ɓa she Yesu. Tu̱ zu̱ yenda ku za, “Njig tabar ndukikwang ku̱ ɗu̱ ku mbu̱ damku ndu̱ ghaiku nu̱ke a bing ku̱me ku̱ gwa ɗye zu̱mndi ndu̱ ye maa qaandi me ku̱ virkir shi ku̱me ɗye zu̱m nje khaarem mbu̱ gaari nang ɓa.”
13Tu̱ yang Yesu ze wor za, “Ɓaanu vu̱r ma ɗye zu̱mndi ye wor ɓa.”
Tu̱ pudekwang tlogha za, “Chem ka ɗu̱ma zu̱m ndu̱ tabar ndukiku nang kikimnda? Ɗya ba ɓurti tolir qurmun ndu̱ yurvi rap kya khaarem. Buka ɗyem chem a masa ɗye zu̱mndi ye ndukiku nang kap.” 14Ku̱me khuzukwang wa khu̱l du̱pu qurmun.
Tu̱ Yesu ze nu̱ mburi nda kwa za, “Zu̱ma ye ndukyang ku̱ shakh ɗyin wor nu̱gha san ɗyin qurmun ɗyin qurmun ku̱ chipa gha ku.”
15Tu̱ nu̱ mburi nda kwa shi ɗyi nu̱ zu̱ki ye wora, tu̱ sa wor tu̱ kha gha ku. 16Nu̱ Yesu daki ɓurti tolir qurmun ndu̱ yurvi rapndang, tu̱ ghar yitan nu̱ viɗi. Tu̱ shi barke nu̱ si, kom tu̱ nggaasi ɓakhla ɓurti tolirang ndu̱ yurvyang a vu̱rtan ye nu̱ mburi nda kwang ku̱me ku̱ shakh ye ndukyang. 17Tu̱ ndukyang zu̱mi tu̱ mbu̱ wor zhi ku̱tl. Nu̱ tabaki ɓeeni ɗye zu̱mndi nu̱ khaki, tu̱ gwa wa nyel kang gwaanggu̱m rap.
Yesu ke Masiya ɓu̱ Magham
(Mat 16:13-19; Mar 8:27-29)
18Sarchi ngguri nu̱ke Yesu a barari chin ɗyenda, yang nu̱ mburi nda ku a nje su̱yen ndu̱ chin. Tu̱ Yesu zham nu̱ mburi nda kwang za, “Ndukyang a zu̱ran za nga ki kwa?”
19Tu̱ nu̱ mburi nda kwang tlogha za, “Ndukyang zu̱ran za to ke Yokhana nu̱ baptisma, ɓeenan za to ke annabi Iliya, ɓeenan za to da chele annabiku ɓu̱ Magham nu̱ zhu jiiki mbe mu̱ti.”
20Tu̱ Yesu gaɓ tu̱ ze wor za, “Yang ɓaanu ɗa, tun a zu̱ran za nga kiya?”
Tu̱ Biturus tlogha za, “To ke Masiya ɓu̱ Magham.”
Yesu wa Shi Ɓalar ɗyine Pooni Mu̱ti ɓaran ndu̱ Jiiri mbe Mu̱ti
(Mat 16:20-28; Mar 8:31–9:1)
21Tu̱ Yesu wu wor za ku̱ zu̱ ɗyinang ye aaki ɓa, 22tu̱ ze wor tu̱k za, “Yi ɓu̱ nduku a ma za bonye maɗyikandi ku̱me nduk kudaandi ɓu̱ Yakhudeku ndu̱ kuruku rututundi ndu̱ nu̱ shogar Taurete ye nduki. Ka wuɗ zhangndi yenda, tu̱ tlagha nda, yang ye fu̱ɗar nu̱ kunung ka ji mbe mu̱ti.”
23Tu̱ Yesu ze tabar ndukyang za, “Mbu̱ aa nyi nduka shim mburi nga, kope wa njig tlu̱na shimndi memu̱naran dong, tu̱ da qu̱far kaatli nda aakochi, tu̱ ki mburi nga si. 24Ku̱me kap njif nu̱ke a shim ɗana nyifi ɓaran kaa mbu̱ɗ nyifirang, yang njif nu̱ mbu̱ɗki nyifi ɓaran ku̱me nga ka gwa nyifirang. 25Woɗye a fu̱n boote ku̱ nduk gwa larji kap tu̱ yang mbu̱ɗ nyifi ɓarana? 26Aaki kawaki nga ndu̱ ɓalar ɓanga, nga Yi ɓu̱ nduk ngga ɓa tu̱k kawar ɓaran mbu̱ ngaa gaɓ mbu̱ zhaaji ɓanga ndu̱ zhaaji ɓu̱ Zhinkir ɓanga ndu̱ ɓu̱ nu̱ ru̱ktiku shakhshakhndi ɓu̱ Magham. 27Zhire ngaa zu̱ran ye nu, ɓeeni nduki a nje chingndan fan nu̱ke ɓu̱ mu̱ɗ ku ɓa kope wa na kwaaɗar ɓu̱ Magham.”
Shipar ɓu̱ Yesu wa Mbu̱mi
(Mat 17:1-8; Mar 9:2-8)
28Gaanje qaandi miyasi, tu̱ Yesu da Biturus ndu̱ Yokhana ndu̱ Yaqub tu̱ dlan ɗyin dleng nggur ma barari. 29Yesu a mbu̱ barari, tu̱ mbu̱ yitan mbu̱mi, tu̱ lukti ɓaran mbu̱m tu̱ kha ma ɓong khat khat a gha me yiti. 30Fan ndu̱ fan tu̱ annabi Musa ndu̱ annabi Iliya a ɗal she Yesu a ɓalarku ndu̱ chin. 31Kap ɓaanda mbu̱ zhaaji, a ɓalar ɗyine mu̱ti nu̱ke Yesu a ma shiran Urshalima. 32Yang Biturus ndu̱ nyeezan a ɗyenirku taɗa, nu̱ nakhaki ku, tu̱ na zhaaji ɓu̱ Yesu ndu̱ nduki rapndi nang chingndan she nda. 33Sarchi nu̱ke Musa ndu̱ Iliya a ma njig Yesu ma yir vaanda, tu̱ Biturus shi ɓalar waare zu̱ndi ɓaran. Tu̱ zu̱ za, “Zhinerem gwaanji, wa shi mbar nu̱ke chem a fan; Yang bu kwaaɗa mi shekhɗekh ye nu, da ɓaaro, da ɓu̱ Musa, da ɓu̱ Iliya.”
34A mbu̱ ɓalar nang tu̱ ku̱zapti a ɓa tu̱ za wor nu̱gha, tu̱ tu̱k sawar ku maɗyi, 35yang tu̱ su̱qur a vi mbu̱ ku̱zaptang za, “Nang ke Yi ɓang nang datki, gwa ma dlu̱mndonu yenda.”
36Nu̱ su̱qurang khaki yit, tu̱ njig Yesu chingndan chin ɗyenda. Yang sar da nu̱ zu̱ ɗyiku nang ye aaki mbu̱ qaandiku naandang ɓa.
Yesu wa Shaana Woi nu̱ Khu̱kheeti Malkandi ngguri
(Mat 17:14-18; Mar 9:14-27)
37Ɗaatli maaran, nu̱ ɗa bu̱rki ku ɗyin dlengang, tu̱ tabar ndukiku khang a ɓa she nda. 38Tu̱ khuski nggur chele tabar ndukyang qa Yesu za, “Maalu̱m, nggu̱t woi ɓang nang ya ka, ba chin ɗyenda khara, 39yang khu̱kheeti malkandi wa ku̱si nda. Wa ka sa nda tu̱ka shi zhaano, tu̱ka ngga nda yaghai varan a dlu̱rti, nyakhti a viiri mbu̱ men, tu̱ ka ruɓa nda, nu̱ka njigti nda ɗau ɓa. 40Ngaa khuɗ nu̱ mburoku ku̱ fed wor ɓar mbe woyang yang wa ku̱na wora.”
41Tu̱ Yesu zu̱ za, “Nduki galkandi nu̱ song maito, nu̱ qaandi virkir meeni, woɗye ngga du̱ng me kanaɗyi ndu̱ tun nu̱ fu̱na? A ɓo ndu̱ yi ɓara ya fan.”
42Sarchi nu̱ke woyang a ɓari, tu̱ khu̱kheetang ghwaɗ nda nu̱ yaghai varan a dlu̱rti maɗyi, tu̱ yang Yesu wu khu̱kheeti malkandang tu̱ woyang shaana, tu̱ yang Yesu gaɓ ndu̱ woyang ye zhin. 43Tu̱ nduki nu̱ke a nje kap shi lazham zalale ɓu̱ Magham.
Yesu wa Gaɓ tu̱ Shi Ɓalar ɗyine Pooni Mu̱ti ɓaran
(Mat 17:22-23; Mar 9:30-32)
Sarchi nu̱ke nduki a mbu̱ lazham ɗyiku nu̱ shikyang, tu̱ Yesu ze nu̱ mburi nda kwa za, 44“Ngga ma dlu̱mndonu tun tu̱k ɗyi nu̱ke nga ma zu̱ran ye nu. Ka vu̱r Yi ɓu̱ nduk ɓar nu̱ mbu̱ khar nduki.” 45Yang kap ndu̱ nang nu̱ da mban ku ɓa ku̱me mbu̱ ɓalarang tukaran, tu̱ yang tu̱k sawar zham nda ku̱ zu̱ mbu̱ ɓalarang ye wora.
Njif nu̱ Dukki Gwaari mbu̱ Kwaaɗar ɓu̱ Magham
(Mat 18:1-5; Mar 9:33-37)
46Tu̱ keele ji mbu̱ nu̱ mbu Yesu kwang ɗyine ki ke gor chele ɓaanda. 47Ku̱me Yesu wa zu̱n kwaari ɓaanda, tu̱ dut woi koɗommandi nggur nu̱ she nda 48za, “Aaki dlu̱ki woi koɗommandi nang ku̱me nga, dlu̱kyang nga, njif nu̱ dlu̱ki nga, dlu̱kyang njif nu̱ ɗa ru̱kki nga. Kap njif nu̱ dukki ndu̱ katari chele ɓaanu, chin ke gorkir ɓaanu kap.”
Njif nu̱ke nu̱ Kare ɓaanu ɓa a Su̱yen ndu̱ Tunu.
(Mar 9:38-40)
49Tu̱ Yokhana ze Yesu za, “Ku̱man, chem wa gwa njif nggur a boote ndu̱ dlu̱moro ma fed khu̱kheetiku ɓara, yang chem nggu̱tl nda ku̱me a mbu̱ tabar ɓaarem ɓa.”
50Tu̱ yang Yesu tlogha yenda za, “Nggu̱tl nu nda ɓa. Ai kap njif nu̱ke nu̱ kare ɓaarem ɓa, a su̱yen ndu̱ chem.”
Nduki nu̱ mbu̱ Gure nggur Samariya wa Wuɗ Zhangndi ye Yesu
51Nu̱ sarchi gaɓti ɓu̱ Yesu nu̱ viɗi shiki bing, tu̱ du̱ng ɗyinan ma yir Urshalima. 52Tu̱ ru̱k nu̱ ru̱ktiku guma, nu̱ ɗu̱kiku, tu̱ ɗu̱ mbu̱ gure nggur Samariya ma daasa ɓar ɓaran. 53Tu̱ yang nduki nu̱ Samariya zhang ku̱ Yesu a ɓa mbu̱ ghai ɓaanda, a zu̱ran ku za tun a nje nu̱ baki wor ndu̱ Yesu ɓa, shi wanang ku ku̱me wa zu̱nku za Yesu a ma yir Urshalima. 54Nu̱ pudeku ɓaran, Yaqub ndu̱ Yokhana naki wanang, tu̱ ze Yesu za, “Zhinerem gwaanji, qaami ku̱ ɓai a ɓa viɗi tu̱ va ghayang nu̱gha ru̱m wa nu̱ Iliya shi kya mu?”
55Tu̱ yang Yesu dambu̱r nu̱ she wor tu̱ wu wor za, “Nun zu̱n pooni jiimbi nu̱ke a zalale ndu̱ tun ɓa. 56Jiwa Yi ɓu̱ nduk nu̱ ɗa ɓa ma tlagha nyifi ɓu̱ nduk ɓa, a ɓa kya ma ɗanaran.” Kom tu̱ ji tu̱ ɗu̱ mbu̱ gure nggur ku.
Nu̱ Zu̱ran ku za wor ka Mbu Yesu
(Mat 8:19-22)
57A mbu̱ yir ku tu̱ njif nggur ze Yesu za, “Ngga mburoro kap maa nu̱ke ta yir si.”
58Tu̱ yang, Yesu tlogha za, “Aa birimbirimku ndu̱ geeku ɓaanda, ɗyikhtiku nu̱ viɗi ndu̱ pugdiku ɓaanda, yang rafa kha Yi ɓu̱ nduk ɓa, aa maa qaandi bamndi nu̱ke ka saki ɗyinan ye maaran a nje ɓa.”
59Tu̱ ze njif nggur za, “A ɓo to kha ma nu̱ mburi nga.” Tu̱ njifang tlogha za, “Zhinerem gwaanji, ngga mburoro yang bu gaɓ nga nu̱ kaari dong ma pa mu̱ti ku̱maandi ɓanga.”#9:59 Ngga mburoro yang bu gaɓ nga nu̱ kaari ma pa mu̱ti ku̱maandi ɓanga She Yakhudeku par mu̱ti zhinki ndu̱ manki ɗya ɗyi gwaanji maɗyi, nduk wa khutlo wopar ɓu̱ Musa nu̱ qurmun, Nggu̱t mbu̱ lagarkati (viri nu̱ dam 20:12). Yang njif nu̱ ɓalar fan nang, zhin nu̱ mu̱t dong ɓa.
60Tu̱ Yesu ze nda za, “Njig nduki nu̱ke jiimbi wor mu̱tan tu̱ pa mu̱ti ɓaanda, yang to, wopar ɓar ɓu̱ kwaaɗar ɓu̱ Magham ke tlu̱nar ɓaaro.”
61Tu̱ njif nggur rong ma kaani zu̱ za, “Ngga mburoro Da gwaanji, yang bu shi nga khar mu̱ndi ye nduki nu̱ke a mbu̱ rafti ɓanga.”
62Tu̱ Yesu zu̱ yenda za, “Kap njif nu̱ khubki ɗye ari tu̱ yang ki nggu̱t maa gana, nu̱ shipa kwaaɗar ɓu̱ Magham ɓa.”
Currently Selected:
Luka 9: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
