Yokhana 9
9
Yesu wa Shaana Khuski nggur nu̱ Khaki nda Puguman
1Yesu a peetari tu̱ na khuski nggur nu̱ khaki nda puguman. 2Tu̱ yang nu̱ mburindakwang zham nda za, “Maalu̱m, zop ɓu̱ ki saki tu̱ kha khuski nang pugumang nang na? Ɗya ku̱me solar ɓaran mu, yang solar ɓu̱ man ndu̱ zhin?”
3Tu̱ Yesu tlogha za, “Ɗya ku̱me solar ɓu̱ khuskyang ɓa, yang ɓu̱ man ndu̱ zhin ɓa, kha nda puguman ma ku̱ wuɗ tlu̱nar ɓu̱ Magham ɗyine nda. 4Wa ku̱s ku̱ zu̱m mi guma ndu̱ tlu̱nar ɓu̱ njif nu̱ ɗa ru̱kki nga ndu̱ fu̱ɗari. Ku̱me virkiri a ɓar nu̱ke nduk a nje nu̱ke ka shiki tlu̱na ɓa. 5Mbu̱ nga nje mbu̱ larji nang, nga ke yarang ɓu̱ larji.”
6Nu̱ zu̱ki wanang tu̱ koɗ nyakhti nu̱ yaghai, tu̱ lokhɓa ghayang si, tu̱ da tu̱ pasha nu̱ ve yiti khuskyang. 7Tu̱ ze khuskyang za, “Ɗu to ɗa shiɓ yitorang nu̱gha mbu̱ Shaplangge Silwam.” (Mban za, “Ru̱kti”) Tu̱ khuskyang ɗu̱ tu̱ ɗa shiɓ yitanang nu̱gha, tu̱ ɗa gaɓ a na maari.
8Tu̱ nu̱ bing ɓaranku ndu̱ nduki nu̱ su̱nki na nda a khuti zu̱ za, “Woɗye nang ke khuski nu̱ka khaki gha ma khutang ɓa goma?” 9Tu̱ ɓeeni nduki zu̱ za, “Ɗya chin.” Yang ɓeenan za, “Auwo, ɗya ba shipa.” Tu̱ yang khuskyang tlogha za, “Ɗya ba nga.”
10Tu̱ zham nda ku za, “Yang shi kikimndi tu̱ yitorang qu̱na na?”
11Tu̱ tlogha za, “Ɗya khuski nu̱ka qaki nda za Yeswang tokhɓaki ghai tu̱ pasha nu̱ ve yita, tu̱ zu̱ ya za, ‘Ɗu̱ to ɗa shiɓ yitorang nu̱gha ndu̱ ɗyim Silwam.’ Tang ɗi tang a shiɓi tu̱ yita qu̱ni.”
12Tu̱ zham nda ku za, “A fu̱n khuskyang na?” Tu̱ zu̱ za, “Nang zu̱n ɓa.”
Pariseku wa Shi Zhamndiku ɗyine Shaanar ɓu̱ Pugumang
13Tu̱ ndukyang ɗu̱ ndu̱ khuski pugum nu̱ shaanakyang she Pariseku. 14Yang Yesu tokhɓa ghayang tu̱ qu̱n yiti khuskyang si ye Fu̱ɗar Maasi ɓu̱ Yakhudekwang. 15Tu̱ Parisekwang gaɓ tu̱ zham khuskyang ɗyi nu̱ shiki yenda tu̱ yitan qu̱nang. Tu̱ khuskyang zu̱ za, “Tokhɓakya ghai tu̱ pasha nu̱ ve yita, kom tang a shiɓ nu̱gha, tang shaana, nga na maari leendang.”
16Tu̱ ɓeena Parisekwang zu̱ za, “Njif nang a vi she Magham ɓa, ku̱me nu̱ka khutlo Fu̱ɗar Maasi ɓa.” Tu̱ yang ɓeenan shi zhamndi za, “Nu̱ sola ka ɗu̱ma shi ɗye lazhamku nang kikimndana?” Tu̱ ɗyin wor shakh ku̱men.
17Tu̱ gaɓ tu̱ zham khuskyang ku za, “Yang ɓa to ka zu̱kya nu̱m ɗyine khuski na nga na, nu̱ke qu̱n kya yitoro?” Tu̱ khuskyang tlogha ye wor za, “Ɗya annabi.”
18Yang kap ndu̱ nang, dlegumeku ɓu̱ Yakhudekwang nu̱ maita za khanda puguman kom tu̱ gwa nar maari leendang ɓa. Ku̱me nang, tu̱ ru̱k ku̱ ɗa qa man ndu̱ zhin. 19Tu̱ zham wor ku za, “Njif nang ɗya yi ɓaanu mu? Nun za kha nda puguman ya? Yang na maari leendang nga kikimnda?”
20Tu̱ man ndu̱ zhin tlogha za, “Ɗyi nyem zu̱nki chin ke khuski nang ɗya yi ɓaarem, yang chem kha nda puguman. 21Nyem zu̱n shi kikimndi tu̱ yitan qu̱n ɓa, yang nyem zu̱n njif nu̱ shaanaki nda nu̱ gha ɓa. Zham ma nda. Ai, ɗya woi ɓa, ka ze nu ndu̱ men.” 22Yang zhin ndu̱ manang zu̱ wanang ku ku̱me a sawa dlegumeku ɓu̱ Yakhudekwang ku̱me wa gu̱n me wor ɗau za kap njif nu̱ zu̱ki za Yesu ɗya Masiya, wor ka komba nda ɓar mbu̱ maa tabar ɓaanda. 23Nang ke ɗyi nu̱ saki tu̱ zu̱ ku za, “Ai ɗya woi ɓa, zham ma nda.”
24Tu̱ Parisekwang gaɓ tu̱ qa pugum nu̱ shaanakyang, tu̱ ze nda ku za, “Zu̱ zhire ma ku̱ Magham gwa zhaaji. Ɓaarem chem wa zu̱n khuski nu̱ shaanaki nang ɗya nu̱ sola.”
25Tu̱ tlogha ye wor za, “Aa ɗya nu̱ sola, nang zu̱n ɓa. Ɗyi da nang zu̱nki chin ke kha nga puguman ɗau, yang leendang nga na maari.”
26Tu̱ gaɓ tu̱ zham nda ku za, “Shikya nu̱m yora? Qu̱n yitora nu̱gha kikimndana?”
27Tu̱ tlogha ye wor za, “Nang zu̱ki ye nwang, nun tu̱k de. Nu̱m saki tun a shim tu̱ktan tu̱ka? Tun a shim gaɓ nu ma nu̱ mburi nda ku tu̱k mu?” 28Tu̱ yang pu̱zi nda ku za, “To ke nu̱ mburi nda, ɓaarem chem a mbu kya Musa. 29Chem wa zu̱n Magham wa shi ɓalar ndu̱ Musa, yang khuski nang nyem zu̱n ye maa nu̱ ɗa viki su̱ ɓa.”
30Tu̱ khuskyang tlogha ye wor za, “Meeni nga na ɗye lazham! Nun zu̱n ye maa nu̱ ɗa viki su̱ ɓa ya, yang wonji wa qu̱n yita nu̱gha! 31Chem wa zu̱ni Magham nu̱ka tu̱k me nu̱ sola ɓa, yang wa ka tu̱k me njif nu̱ka gharki ghai yenda, a mbu̱ zu̱r ɓaran. 32Ma shir larji nyem tu̱k za njif nggur wa qu̱n yiti nduk nu̱ khaki nda puguman ɓa. 33Mbu̱ njif nang a vi she Magham ɓa, tu̱ga ɓu̱ ɗu̱ma shi aa nu̱m ɓa.”
34Tu̱ tlogha yenda ku za, “To nu̱ khaki mbu̱ sola, ta shim shi na shogar yerem mu?” Tu̱ yang komba nda ku.
Dle gume ɓu̱ Yakhudekwang ɗya Pugumku mbu̱ Jiimba
35Tu̱ Yesu tu̱k labaran za wa komba khuskyang. Nu̱ gwaki nda, tu̱ zham nda za, “Ta maita Yi ɓu̱ Magham mu?”
36Tu̱ khuskyang tlogha yenda za, “Ku̱man ɗya kiya? Zu̱ ya ngga maita nda.”
37Tu̱ Yesu ze nda za, “Ai ta na nda, chin kya ɓalarang ndu̱ to.”
38Tu̱ khuskyang zu̱ za, “Zhinerem gwaanji, nga maita.” Tu̱ ghar ghai yenda.
39Tu̱ Yesu zu̱ za, “Nga ɓa nu̱ mbu̱ larji nang ma kuma ku̱me nduki nu̱ke nu̱ka na maa ɓa#9:39 Nduki nu̱ke nu̱ka na maa ɓa A ve nduki nu̱ zu̱nki wor nu̱ sola tu̱ tuba ku, ka gwa nar maari. ku̱ na, nduki nu̱ke a na maari ku̱ kha ma pugum ku.”#9:39 Nduki nu̱ tamanki za wora na maari A ve nduki nu̱ke nu̱ka na zop ɓaanda ma ku̱ kala yaapa ɓa, ka gang gha puguman.
40Nu̱ Pariseku nu̱ke a bing ndu̱ chin tu̱kki, tu̱ ze nda ku za, “Yang nang ta zu̱ran no za chem puguman tu̱k mu?”
41Tu̱ Yesu ze wor za, “Ai mbu̱ tun puguman tu̱ga sola ve nu ɓa. Yang nun zu̱ki za tun a na maari, solar ɓaanu ba a nje rong.”
Currently Selected:
Yokhana 9: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016
