Yokhana 8

Nokhzi nu̱ Ku̱ski nda ɗyin Zawari

1Tu̱ yang Yesu ɗu̱ mbu̱ Dleng qu̱far Zaitun. 2Vi dumaaran ndu̱ ɗawi tu̱ Yesu ɗu̱ mbu̱ Rafti ɓu̱ Maghamang tu̱k, tu̱ nduki kap a ɓa she nda, tu̱ kha gha a shogar ye wora. 3Tu̱ maalu̱m taureteku ndu̱ Pariseku a ɓa ndu̱ nokhzi nggur nu̱ ku̱ski nda a qaandi ndu̱ chin. Tu̱ sa nda nu̱ tala ku. 4Tu̱ yang ze Yesu za, “Maalu̱m, nokhzi nang a ku̱s nda mbe zawa. 5Yang Wopar ɓu̱ Musa wa wuɗ za ku̱ tlagha mi pooni nduki nang ndu̱ mbukti. Yang ɓa to zu̱ za kima?” 6Yang zham nda ku ma tu̱k men, a shim gwa nda ku ndu̱ zop nu̱ke wor ka daki zhaano ɓaran nu̱ ɗyinan. Yang tu̱ Yesu sa ɗyinan ye ghai tu̱ ki bu̱lar nu̱ vu̱ghai ndu̱ ye kharan. 7Nu̱ zu̱mki guma ndu̱ zhamndi ku ye Yesu, tu̱ da ɗyinan nu̱ viɗi tu̱ ze wor za, “Kap njif nu̱ke nu̱ shi sola sarda chele ɓaanu ɓa ku̱ nggaasi mbukti nda ndu̱ ndogdi.” 8Tu̱ Yesu gaɓ tu̱ sa ɗyinan ye ghai tu̱ shi bu̱lar yaghai.

9Nu̱ tu̱kki wanang ku, tu̱ nggasi lakhtar ku ndu̱ da da, ji ɗyin nduk kudaandi ma yir she qusonggi. Tu̱ njig Yesu chin ɗyenda, ndu̱ nokhzang chingndan gume nda. 10Tu̱ Yesu da ɗyinan nu̱ viɗi, tu̱ zham nda za, “Nusu, a fu̱n wora? Nduk a nje nu̱ kumaki ɓa?”

11Tu̱ tlogha za, “Ku̱man, nduk a nje ɓa.” Tu̱ Yesu zu̱ za, “Aa nga nang kuma ɓa, ɗu̱ vaaro, yang gaɓ na to shi sola tu̱k ɓa.”

Yesu ke Yarang ɓu̱ Larji

12Tu̱ Yesu zu̱m guma ndu̱ ɓalar ye nduki a zu̱ran za, “Nga ke yarang ɓu̱ larji. Kap njif nu̱ke a mburi nga ɓu̱ shi yir mbu̱ zhum ɓa, yang ka gwa yarang nyifiri.”

13Tu̱ Parisekwang ze Yesu za, “Ta saida ɗyinoro, yang saidu ɓarang ɗya zhire ɓa.”

14Tu̱ Yesu tlogha ye wor za, “Aa nga saida ɗyina, ai, saidu ɓang ɗya zhire, ku̱me nga zu̱n ye maa na nga viki si, ndu̱ maa nu̱ke nga yir si. Yang nun zu̱n maa na nga viki si ɓa, yang nun zu̱n maa nu̱ke nga yir su̱ ɓa. 15Ɓaanu tun a kumakya nar ɓu̱ nduku. Yang ɓang nang ka kuma aaki ɓa. 16Yang aa ngga shi kuma, kumar ɓang ɗya zhire, ku̱me nga ɗyenda ɓa, Zhinkir ɓang nu̱ ɗa ru̱kki nga a nje su̱yen ndu̱ nga.” 17A nje bu̱laran mbu̱ wopar ɓaanwang za, “Mbu̱ nduki rap wa vu̱r saida ɗyine ɗyi da, saidu ɓaanda ɗya zhire. 18Yang nga shi saidu ɓu̱ ɗyina, Zhinkir ɓang nu̱ ɗa ru̱kki nga ke nu̱ rapan.”

19Tu̱ zham nda ku za, “A fu̱n ke zhwa na?” Tu̱ Yesu tlogha ye wor za, “Nun zu̱ndi nga ɓa yang nun zu̱n Zhinkir ɓang ɓa. Mbu̱ tun wa zu̱ndi nga, tu̱ga tun wa zu̱n Zhinkir ɓanga.” 20Yesu shi ɓalar nang sarchi nu̱ke a shogar mbu̱ Rafti ɓu̱ Magham bing ndu̱ maa du̱ngdi mu̱zhindi vu̱rtang. Yang kap ndu̱ nang nduk a nje nu̱ ku̱ski nda ɓa, ku̱me sarchi ɓaran nu̱ shi dong ɓa.

Yesu wa Shi Ɓalar nu̱ ɗyine Pitl Mu̱ti ɓaran

21Tu̱ Yesu ze ndukyang tu̱k za, “Nga yir vara, yang tun ka ɓa laɓti nga, tun ka mu̱t nu̱ mbu̱ solar ɓaanu, ye maa nu̱ke nga yir sang, tun ɓu̱ ɗu̱ma yir njig ɓa.”

22Tu̱ pitl nang sa dlegumeku ɓu̱ Yakhudekwang tu̱ zu̱ za, “Yang a ma tlagha kya ɗyinan mu nu̱ zu̱ki za, ye maa nu̱ke nga yirang, tun ɓu̱ ɗu̱ma yir nje ɓa.”

23Tu̱ yang Yesu zu̱m guma ndu̱ zu̱ran za, “Tun a vi vu̱ghai, yang ɓang nga vi viɗi. Tun ɓu̱ larji, yang nga ɓu̱ larji ɓa. 24Nang ke ɗyi nu̱ saki tang ze nu̱ nga za, tun ka mu̱ɗ mbu̱ solar ɓaanu. Ku̱me mbu̱ nun maita za nga ke njif nang zu̱ki ye nu Nga ke chin na ɓa, tun ka mu̱ɗ mbu̱ solar ɓaanu.”

25Tu̱ zham Yesu ku za, “To ke ki ya?” Tu̱ Yesu tlogha ye wor za, “Nga ke njif nang zu̱ki ye nu gumapaalyang. 26Ɗyi kwa nje khang nu̱ke ngga ɗu̱maki zu̱ran ɗyinonu, kom ɗyiku khang nu̱ke kuma nga nun ɗyinan tu̱k. Yang nga zu̱kya ba ɗyi nang tu̱kki she njif nu̱ ɗa ru̱kki nga ɗyenda, yang nga zu̱kya ba zhire ye larji.”

27Yang ndukyang nu̱ zu̱n za a shikya ɓalar ye wor ɗyine Zhinkir ɓa. 28Nang ke ɗyi nu̱ saki tu̱ Yesu ze wor za, “Sarchi nun daki Yi ɓu̱ Nduk nu̱ viɗi,#8:28 Daki Yi ɓu̱ Nduk nu̱ viɗi A ve katli nda me qu̱far katlang. ye sarchi nang tun ka zu̱nki za nga ke chin. Tun ka zu̱n za nang ka shi aa nu̱m ndu̱ zalale ɓang ɓa, yang nga zu̱kya ɗyi nu̱ke Zhinkirang shogaki ya ɗyenda. 29Njif nu̱ ɗa ru̱kki ngang a nje su̱yen ndu̱ nga, nu̱ njigti nga ɗyenda ɓa, ku̱me nga shikya ɗyi nu̱ke a shimndan aakochi.” 30Sarchi nu̱ke Yesu a ɓalar nang tu̱ nduki khang maita nda.

Dli ɗyin Zhirekandi

31Tu̱ Yesu ze Yakhudeku nu̱ maitaki nda za, “Mbu̱ tun wa zu̱m guma ndu̱ khubti shogar ɓanga, tun ke nu̱ mburi nga ku zhirekandi. 32Kom tun ka zu̱n zhire, zhiryang ka dli ɗyinonu.”

33Tu̱ tlogha yenda ku za, “Ai, chem pooni ɓu̱ Yibram, sar da nyem shi khar maava ɓa. Yang nu̱m saki to zu̱ za chem ka dli ɗyineremang na?”

34Tu̱ Yesu zu̱ ye wor za, “Zhire, nga zu̱ran ye nu, kap nu̱ sola ɗya maavi ɓu̱ sola. 35Ai, maava nu̱ka khan mbu̱ rafa aakochi ɓa, yang woi, ɗya ye raftang aakochi. 36Ku̱me nang, mbu̱ woyang wa dli ɗyinonu, tun ka gwa dli ɗyin zhirekandi. 37Nga zu̱n tun zhikan Yibram, yang tun a shim tlagha nga, ku̱me nun dlu̱ shogar ɓang ɓa. 38Nga zu̱kya ɗyi nang naki she Aba ɓanga, yang tun a shi kya ɗyi nun tu̱kki she zhinonu.”

Yesu wa Ze nu̱ Ghaari Sankwang za Sheɗan ke Zhin Wora

39Tu̱ tlogha ku za, “Yang, ai, Yibram ke zhinerem.”

Tu̱ Yesu ze wor za, “Mbu̱ tun qusonggi ɓu̱ Yibram, tu̱ga tun wa shi ɗyi nu̱ Yibram shiki. 40Nga nu̱ zu̱r zhire ɓu̱ ɗyi nang tu̱kki she Magham, yang tun a laɓ njiv tlagha nga. Ai, Yibram nu̱ka shi tun wanang ɓa. 41Ku̱me nang, tun a shikya ɗyi nu̱ke zhinonu a shiran.” Tu̱ yang Yakhudekwang zu̱ za, “Khaarem mbu̱ khu̱r ɓa. Magham ke Zhinerem, chin ke Zhinerem ɗyenda.”

42Tu̱ Yesu ze wor za, “Mbu̱ Magham ke zhinonu tu̱ga tun wa ndola nga, ku̱me nga vi she Magham, yang wonji nga fan. Na nga ɓa ndu̱ zalale ɓang ɓa, Magham a ru̱kki nga. 43Nu̱m saki nun da mbu̱ ɓalar ɓang ɓa? Ku̱me nun ɗu̱ma gwa dlu̱mndonu ye shogar ɓang ɗo ɓa. 44Tun ɓu̱ zhinonu Sheɗan, yang tun a shim shir ɗyi nu̱ke a shiran tu̱k. Ɗya nu̱ tlaghar mu̱ɗi gumapaali yang nu̱ damta ndu̱ zhire ɓa, ku̱me zhire nje mbe nda ɓa. Mbu̱ wa kota wollo aakochi a shikya me ghai ɓaran, ku̱me ɗya nu̱ kotama, zhinkir ɓu̱ wollo. 45Yang ku̱me nga zu̱ zhire, tun wa zhang maita nga gha. 46Nduk a nje chele ɓaanu nu̱ke ka wuɗki za nga shi zop sar da mu? Yang mbu̱ke nga zu̱kya zhire, nu̱m saki nun maita nga ɓa? 47Njif ɓu̱ Magham wa ka tu̱k ɗyi nu̱ke Magham a zu̱ran. Yang nun gwa dlu̱mndonu ye ɗyi nu̱ke Magham a zu̱ran ɓa ku̱me tun ɓu̱ Magham ɓa.”

Yesu wa Duk Yibram

48Tu̱ Yakhudekwang tlogha yenda za, “Alapa zhire ɓaarem de nyem zu̱ki nyem za to khuzi Samariya yang ta su̱yen ndu̱ khu̱kheeti tu̱kang?”

49Tu̱ Yesu tlogha za, “Nga nu̱ khu̱kheet ɓa. Nga vu̱rkya zhaaji ye Zhinkir ɓanga, yang tun a ndu̱mndi nga. 50Nang laɓ zhaaji ye vara ɓa. Njif nggur a nje nu̱ke a laɓtan ya, yang chin ka ɓa shiki kumari. 51Zhire, nga zu̱ran ye nu, kap njif nu̱ khutloki shogar ɓanga ɓu̱ mu̱t shwat ɓa.”

52Tu̱ Yakhudekwang ze nda za, “Uughu! Leendang chem wa zu̱n nu̱ke ta su̱yen ndu̱ khu̱kheet shwat. Ai, Yibram ndu̱ annabikwang kap wa mu̱ɗ ku, yang no za, ‘Kap njif nu̱ khutloki shogar ɓang ɓu̱ mu̱ɗ shwat ɓa.’ 53Tamandi ɓa ta duk zhinerem Yibram mu? Yang aa chin wa mu̱ɗi, annabikwang mu̱ɗ ba wanang tu̱k. To da va ma ki ɗo?”

54Tu̱ Yesu tlogha ye wor za, “Mbu̱ nga vu̱r zhaaji ye ɗyina, zhaajyang ɗya ɗyi nggur ɓa, Zhinkir ɓang kya vu̱r zhaaji ya, nun ka qaki nda za ɗya Maghamndi ɓaanu nggwang. 55Nun zu̱n nda ɓa, yang nga zu̱ndi nda. Mbu̱ tu̱ga nga ze nu za nang zu̱n nda ɓa tu̱ga nga kha ma nu̱ kotama wa tunu. Yang nga zu̱n nda, nga khutlo ɗyi nu̱ke a zu̱ran. 56Zhinonu Yibram wa kasha nar sarchi ɓanga maɗyi, yang wa na tu̱ kasha.”

57Tu̱ Yakhudekwang ze Yesu za, “To nu̱ke no khu̱l aa sonyi ɗyin qurmun ɓa, yang ta zu̱ran no za ta na Yibram?”

58Tu̱ Yesu ze wor za, “Zhire nga zu̱ran ye nu, me ku̱ kha Yibram nga nje.” 59Ba nu̱ Yesu zu̱ki wanang, tu̱ ɗa ghar ndogdiku ma mbukti nda. Tu̱ yang Yesu sagha nu̱ me yiti wora, tu̱ vi ɓar tu̱ njig mu̱na Rafti ɓu̱ Maghamang.

Currently Selected:

Yokhana 8: ttrNT

Highlight

Copy