Tlu̱nar ɓu̱ Pudeku 19

Waazu ɓu̱ Bulus mbu̱ ghai Afisa

1Sarchi nu̱ke Apolos a mbu̱ ghai Koranti, tu̱ Bulus mbu tala tala a baara maakwang kom tu̱ khu̱l Afisa ye maa nu̱ gwaki nu̱ mbu Yesu ku ngguri. 2Tu̱ zham wor za, “Tun wa dlu̱ Jiimbi shakhshakhndi sarchi nun maitaki mu?”

Tu̱ tlogha yenda ku za, “Ɓaarem nyem tu̱k za Jiimbi shakhshakhndi a nje ɓa.”

3Tu̱ zham wor za, “Yang shikya nyi pooni baptisma ye nwa?”

Tu̱ tlogha ku za, “Pooni baptisme ɓu̱ Yokhana.”

4Tu̱ Bulus zu̱ za, “Ai, Yokhana shikya baptisme nggooti khar viti ye nduki a zu̱ran ye wor za ku̱ maita njif nu̱ke a ɓar gaanje nda, nang ke Yesu.” 5Nu̱ tu̱kki nang ku tu̱ shi baptisme ye wor mbu̱ dlu̱m Zhinerem gwaanji Yesu. 6Nu̱ Bulus saki khar barke ye wora, tu̱ Jiimbi shakhshakhndi a zhur nu̱ ɗyine wora, tu̱ shi ɓalar nu̱ me ghiindiku, a zu̱ ɗyi nu̱ Magham zu̱ki ye wora. 7Kap kap ɓaanda nduki gwaanggu̱m rap.

8Tu̱ Bulus vi nu̱ mbu̱ kib tabar a waazu sawa su̱ ɓa, tu̱ shi chere kunung a zu̱ mbu̱ ɗyiku ye wor a dut khangkal ɓaanda mbe ɗyiku nu̱ kwaaɗar ɓu̱ Magham. 9Yang tu̱ ɓeeni nduki zhang tu̱ktan gha nu̱ maita ku ɓa, tu̱ka shi ɓalar bamndi ye nduki nu̱ mbuki Njiv ɓu̱ Zhinkir gwaanji gume nduki. Ku̱me nang tu̱ Bulus vi ɓar mbu̱ njiv ɓaanda tu̱ ɗu̱ su̱yen ndu̱ wor nu̱ maitakyang mbu̱ ye maa shogar ɓu̱ Tiranus. 10Tu̱ zu̱m guma nu̱ shogarang me sonyi rap tu̱ nduki nu̱ke a mbu̱ dlar ghai Asiya kap tu̱k ɓalar ɓu̱ Magham, Yakhudeku ndu̱ Gu̱rik ku.

Qusonggi ɓu̱ Siva

11Tu̱ Magham shi ɗye lazhamku gwaanji gwaanji nu̱ ku̱nshe Bulus nu̱ke nu̱ nduk su̱n ndu̱ naran ɓa. 12Nu̱ke aa kelɓeng kapar me kharan ndu̱ lukti nu̱ su̱ɓaki varan, mbu̱ wa ɗu̱ si ye nduki nu̱ke khaatan, tu̱ka shaana wora. Mbu̱ ɗya nu̱ khu̱kheeti malkandi, khu̱kheetang tu̱ka vi ɓara.

13Tu̱ yang Yakhudeku nggur nu̱ke a baara ghaiku a fet khu̱kheetiku malkandi ɓara, shi komkomi boote ndu̱ dlu̱m Zhinerem gwaanji Yesu ɗyine khu̱kheetiku. Tu̱ zu̱ ku za, “Nga zu̱ran ye nu mbu̱ dlu̱m Yesu nu̱ke Bulus a waazu ɓaran nang, a vi ma ɓaara.” 14Yang qusa khuzuku nggur a nje wor mut nu̱ke ɗya qusonggi ɓu̱ da chele kuru rututundi ɓu̱ Yakhudeku dlu̱man za Siva nu̱ke wa ka shi wanang ku tu̱k. 15Tu̱ yang khu̱kheetang zham wor za, “Nga zu̱n Yesu, nga zu̱n Bulus tu̱k, yang ɓaanu ɗa, tun ke kiya?” 16Tu̱ khuski nu̱ khu̱kheeti malkandi nang ku̱m ji, tu̱ nggu̱ɗ nu̱ ve wora, tu̱ duk du̱mbu̱r ɓaanda, ta zhan dam ku mbu̱ raftang su̱ wor nggaran, var wor nang kap ruɓaran.

17Nu̱ nduki nu̱ke a mbu̱ ghai Afisa, Yakhudeku ndu̱ nduki nu̱ke ɗya Yakhudeku ɓa tu̱kki labar ɗyi nu̱ ɗatlki, tu̱ sawar ku̱s wora tu̱ gor dlu̱m Zhinerem gwaanji Yesu. 18Tu̱ nduki khang nu̱ maitaki a ɓa ku a zu̱ ɗyi galkandi nu̱ wor shiki ye dalangi. 19Tu̱ nduki khang nu̱ka wutki me bilimi a kanggu̱la lagarkatiku ɓaanda tu̱ va nu̱ gha gume nduki kap. Nu̱ shigaki mu̱zhindi nu̱ke ka masaki lagarkatiku nu̱ vaki nu̱ gha nang, tu̱ gwa mu̱zhindan ka ɗu̱ma ɓi nu̱ tlu̱nar me qaandi du̱pu ɗyin qurmun. 20Nu̱ wanang tu̱ ɓalar ɓu̱ Zhinkir gwaanji shaata yir aa fu̱n tu̱ shi du̱mbu̱r maɗyi.

Ɗye Ji Khangkal mbu̱ ghai Afisa

21Qu̱rse ɗyiku nang tu̱ Bulus san mbu̱ memu̱naran nu̱ ɗyine mbu̱ chin wa baara dlar ghai Makidoniya ndu̱ Akaya chin ka ɗu̱ Urshalima. Tu̱ zu̱ tu̱k za, “Mbu̱ nga ɗu̱ nje, wa ku̱s ku̱ ɗu̱ nga mbu̱ ghai Roma.” 22Tu̱ ru̱k nu̱ shaatar nda ku wor rap, wor ke Timoti ndu̱ Erastus, ku̱ ɗu̱ ku Makidoniya, chin yang, tu̱ kha gha dong mbu̱ dlar ghai Asiya.

23Ye sarchi nang, tu̱ ɗye ji khangkal shi maɗyi ku̱me Njiv#19:23 Njiv A ve nduki nu̱ maitaki Yesu. nang. 24Ɗye ji khangkal nang nggaasan ndu̱ nu̱ ɓu̱dli azurfe ngguri dlu̱man za Dimitiriyus nu̱ka shiki boote ndu̱ azurfe a ɓu̱tl shipar ɓu̱ maa ghaari ghai ye Artemis. Chin ndu̱ nu̱ tlu̱nar ɓaranku wa ka gwa mu̱zhindi maɗyikandi nu̱ ku̱nshe tlu̱nar nang. 25Tu̱ taba nu̱ tlu̱nar ku ɓaran kap ndu̱ nduki nu̱ka shiki pooni tlu̱nar nang, tu̱ zu̱ za, “Nduki ɓanga, tun wa zu̱n nu̱ ɗyine tlu̱nar nang ke gu̱nar ɓaarem. 26Yang tun wa tu̱ki tun a naran mbu̱ dlar ghai Afisa ɗyenda ɓa, mbu̱ dlar ghai Asiya guma da, Bulus wa dut nduki maɗyi, wa nggoɗ wor nu̱gha, a zu̱ran za maghamndi nu̱ shiki ndu̱ khar ɗya maghamndiku ɓa. 27To, damta nje. Ka su̱bu̱r tlu̱nar ɓaarem yerem nu̱gha. Qu̱rse nang, aa maa ghaari ghai ye maghamndi Artemis ka gaɓ maa ɗyi bamndi, zhaaji ɓu̱ maghamndang ka kha kata, chin nu̱ke dlar ghai Asiya ru̱m ndu̱ larji guma da a ghar ghai yenda.”

28Ba nu̱ tu̱kki wanang ku, tu̱ memu̱na wor su̱bu̱r maɗyi, tu̱ da su̱qur wor nu̱ viɗi a zu̱ran ku za, “Gorkir ku̱ kha Artemis ɓu̱ Afiseku!” 29Tu̱ ghayang rokhdla, tu̱ nduki ɗan ye maa nu̱ke kib tabarang a si, a dut Gayus ndu̱ Aristakus, qusa Makidoniya nu̱ke ɗya nu̱ yir ku ɓu̱ Bulus. 30Tu̱ Bulus shim wut varan gume tabarang, tu̱ yang nu̱ mbu Yesu kwang nggu̱tli nda. 31Nu̱ kwaaɗarku nggur nu̱ke a Asiya nu̱ke ɗya raptan ku wa ru̱k tu̱ khuɗ nda ku tu̱k za ku̱ vi nu̱ mbu kib tabarang ɓa.

32Nduki nu̱ tabakyang kap ɗyin wor ɓu̱tlan, ku̱me nu̱ zu̱n ɗyi nu̱ saki tu̱ taba nu̱ nje ku ɓa. Ɓeenan a da su̱qur wor nu̱ viɗi a zu̱ ɗyi ngguri, yang ɓeenan a zu̱kya ɗyi nggur zum. 33Tu̱ Yakhudeku nggur sa ku̱ Alekhzanda ɗu̱ guma, tu̱ yang Alekhzanda da kharan nu̱ viɗi ma ku̱ aaki kha yit zu̱ nji ɗyi nu̱ke a nje ye wora. 34Yang ba nu̱ daki mban ku za ɗya khuzi Yakhuda, tu̱ da su̱qur wor nu̱ viɗi a zu̱ran ku za, “Ku̱ gorkir kha Artemis ɓu̱ Afiseku.” A maata ɗyinang ku me awe rap.

35Ni nu̱ bu̱lar ɓu̱ ghayang saki tu̱ kha yit ku, tu̱ zu̱ za, “Nduki nu̱ Afisa! Aaki wa zu̱n nu̱ ɗyine ghai Afisa kya nggu̱t maa ghaari ghai ɓu̱ gorkir Artemis kom ndu̱ ndogdi shakhshakhndi na nggu̱ɗki viɗi. 36Yang nu̱ke nduk ɓu̱ ɗu̱ma keela ɗyiku nang ɓa, ai, shipa tun shi aa nu̱m mbu̱ qaandi khangkal, shi nu aa nu̱m mbe lu̱kshi ɓa. 37Wonji tu̱k nduki nu na ɓa ki ndu̱ wor fanang, nu̱ muura tun mbu̱ kib ghaari ghai ɓu̱ maghamndi ɓaarem ɓa, yang nu̱ pu̱zi nda zum ɓa. 38Yang mbu̱ damta kha Dimitiriyus ndu̱ nu̱ tlu̱nar ɓaran, wonji maa kumar qu̱ndan ndu̱ nu̱ kumarku ku̱ da nda zhaano. 39Yang mbu̱ ɗyi nggur a nje zum nu̱ke tun a shim zu̱n nu, tun tlaɗ she tabar nduk kudaandi. 40Shwat nduk ka ɗu̱ma da zhaano ɓaarem ɗyine ɗye ji khangkal nu̱ ɗatlki meeni nang, ku̱me chem ɗu̱ma zu̱ ɗyi na ɓa ki su̱ ɓa ɗo.” 41Nu̱ woɗaki zu̱ ɗyinang tu̱ sa ku̱ tabarang lakhta.

Currently Selected:

Tlu̱nar ɓu̱ Pudeku 19: ttrNT

Highlight

Copy