Tlu̱nar ɓu̱ Pudeku 20

Bulus wa gaɓ nu̱ mbu̱ Dlar ghai Makidoniya ndu̱ Kheles

1Qu̱rse lu̱khshang wa remta, tu̱ Bulus qa nu̱ mbu Yesu ku. Nu̱ paki du̱mbu̱r ye wora tu̱ shi khar mu̱ndi ndu̱ wor tu̱ ɗu̱ mbu̱ dlar ghai Makidoniya. 2Nu̱ baaraki dlar ghai kunang tu̱ pa du̱mbu̱r ye wor maɗyi, tu̱ khu̱l nu̱ mbu̱ dlar ghai Kheles. 3Tu̱ shi chere kunung nje. A daasa viri nu̱ mbu̱ du̱mbu̱l ɗyim ma yir dlar ghai Siriya, tu̱ Yakhudeku daasa ɗyi malkandi nu̱ ɗyine nda. Nu̱ke wanangang tu̱ shim gaɓ varan tu̱ mbu mbu̱ Makidoniya. 4Tu̱ Sopata yi ɓu̱ Farus na viki ghai Biriya, ndu̱ Aristakus ndu̱ Sakundus, nduki nu̱ Tasalonika, ndu̱ Gayus na jiiki Darbe, ndu̱ Timoti ndu̱ Tikikus ndu̱ Tu̱rofimus nduki nu̱ Asiya bala nda ku. 5Nu̱ke wa kaya rem ku tu̱ ɗa burerem mbu̱ ghai Tu̱rowas. 6Chem ji Filipi mbu̱ du̱mbu̱l ɗyim, qu̱rse Tabar Ɓu̱rti Tolir nu̱ke Yis su̱ ɓa ndang, chem a gwa wor mbu̱ ghai Tu̱rowas qu̱rse qaandi qurmun. Chem a qan mut mbu̱ ghai Tu̱rowas.

Lauɗarsi Yir ɓu̱ Bulus mbu̱ ghai Tu̱rowas

7Ye fu̱ɗar nu̱ gumapaali mbu̱ qaandi mut chem taba ma shakh ɓu̱rti toliri. Tu̱ Bulus ki ɓalar ku̱me a shim yir varan vi dumaaran, tu̱ shi ɓalar ye wor ma yir chele virkiri. 8Pitileku a nje khang mbu̱ dangkali nu̱ tabaki ku nu̱ njang. 9Yang nyakhtlir nggur a nje dlu̱man za Yutikus kharan me wundu kibang, tu̱ ɗyenir ku̱na nda sarchi nu̱ Bulus shoɓki ɗyine ɓalarang. Nu̱ ɗyenir daki Yutikus, tu̱ ɗa lawa viɗi ɗyin dangkali nu̱ kunung tu̱ mu̱ɗi. 10Tu̱ Bulus ɗa zhur nu̱ yaghai tu̱ kurum gha tu̱ khaapa nda tu̱ zu̱ za, “Damta nu ɓa, ai, a nje nu̱ nyifiri.” 11Tu̱ Bulus gaɓ nu̱ viɗi tu̱ shakh ɓurti tolirang yerem chem nji. Tu̱ zu̱m guma ndu̱ ɓalar kope nu̱ maa ɗatlki, kom tu̱ peeta yirang. 12Tu̱ ndukyang da nyakhtlirang tu̱ ɗu̱ si kaari tu̱ kasha ku maɗyi ku̱me wa nakha.

Bulus wa Ji mbu̱ ghai Tu̱rowas ma Yir Malitus

13Ɓaarem chem vi nu̱ guma ma yir she du̱mbu̱l ɗyim, chem ku̱s njiv kwatu̱ra ma yir Asus ma a gwami Bulus fara. Shi wanang ndu̱ chem ku̱me a yir ndu̱ saaran. 14Nu̱ gwaki rem mbu̱ ghai Asus chem da nda mbu̱ du̱mbu̱l ɗyim chem ɗi Mitilin. 15Chem zu̱m guma ndu̱ yir mbu̱ du̱mbu̱lang. Vi dumaaran chem khu̱l Kiyos. Ɗatli maaran tu̱k chem a Samos, nu̱ maa ɗatlki tu̱k chem a Militus. 16Bulus nu̱ shim ɗu̱ nji Afisa ɓa, ku̱me ku̱ su̱bu̱r nji sarchi Asiya ɓa. A wakho mbu̱ ka shi gwa nji chin khu̱l Urshalima me ku̱ Tabar Pentikos shi.

Bulus wa shi khar mu̱ndi ye Dlegumeku ɓu̱ nu̱ mbu Yesu ku nu̱ Afisa

17Bulus a Militus tu̱ ru̱k nu̱ Afisa ku̱ ɗa qa dlegumeku ɓu̱ tabar nu̱ mbu Yesu ku nu̱ nje yenda. 18Nu̱ ɗa ɓa ki ku tu̱ ze wor za, “Tun nu̱ vaanu tun wa zu̱n pooni khar nang shiki ndu̱ tunu ji ɗyin sarchi nang viki nu̱ mbu̱ dlar ghai Asiya nu̱ gumapaali. 19Nga tlu̱nar ɓu̱ Magham ndu̱ katar ɗyin maɗyikandi ndu̱ ɗyim gho. Nga kanaɗa buuri malkandiku zum zum nu̱ Yakhudeku shiki ya. 20Nang laada zu̱ aa nyi tunu nang naki ka kha ye nu ndu̱ boota ɓa, nga waazu ndu̱ shogar ye nu ye dalangi ndu̱ mbu̱ rafa rafa. 21Nga wu Yakhudeku ndu̱ Gu̱rik ku ku̱ nggoɗ ku mbe solar ɓaanda, ta gaɓ nu̱ she Magham, tu̱ maita Zhinerem gwaanji Yesu.

22“Wonji leendang Jiimba a khu̱n sa, ma ɗu̱ nga Urshalima, yang nang zu̱n ɗyi nu̱ke a ma gwa nga far ɓa. 23Aa nu̱ke Jiimbi shakhshakhndi wa wut mbu̱ aa nyi ghai za khiiri nu̱ mbu̱ zhaaru̱m ndu̱ bonye maɗyikandi a nje a buri nga. 24Yang nang da nyifi ɓang ma aa nu̱m ɓa, mbu̱ ngga ɗu̱ma woɗa tlu̱nar nu̱ Zhinerem gwaanji Yesu vu̱rki ya nang, nang ke, saida nga Labar Mbarkandi nu̱ mu̱nkir ɓu̱ Magham.#20:24 Nggu̱t tu̱k mbu̱: 2Tim 4:7.

25“Yang leendang nga zu̱n tun ɓu̱ na nga tu̱k ɓa, tun nang baaraki ɗyinonu nga zu̱ Labar Mbarkandi nu̱ kwaaɗar ɓu̱ Maghamang. 26Ku̱me nang nga zu̱ran ye nu meeni, tom ɓu̱ aaki a nje ɗyina ɓa, 27ku̱me nang zhang zu̱ kap shimndi ɓu̱ Magham gha ye nu ɓa ɗo. 28Tun ɗang vaanu, ndu̱ shapir Jiimbi shakhshakhndi saki nu̱ mbu̱ bu̱nonu ma nggu̱t nu, tun zu̱m guma ndu̱ khutlo tabar ɓu̱ nu̱ mbu Yesu ku nu̱ Magham masaki ndu̱ tom ɓu̱ Yi ɓaran. 29Nga zu̱n qu̱rse nga ɗu̱ vara yiɗi gaariku malkandi kaɗa vi nu̱ chele ɓaanu, yang ɓu̱ njig shapirang ɓa. 30Aa chele ɓaanu ɓeeni nduki kaɗa vi tu̱ zu̱ shim nggoɗ zhire ku nu̱ gha, ma ku̱ dut nu̱ mbu Yesu ku nu̱ she wora. 31Ku̱me nang kha ma daasaran! Kor ma nu̱ke me sonyi kunung nu̱ peetaki nang laada dut dlu̱mndi aaki chele ɓaanu virkir ndu̱ fu̱ɗar ɓa, nga shi ye nu ndu̱ ɗyim ghoori.

32“Yang leendang, nga sa nun mbu̱ khar Magham. Bu ku̱ ɓalar mu̱nkir ɓaran khutlo nu, chin ka du̱nki nu, tu̱ vu̱r me shakhti ɗye mbu̱ ge ɓaanu ye nu su̱yen ndu̱ nduki nu̱ wakaki var wora. 33Nang zhiri mu̱zhindi ndu̱ lukti ɓu̱ aaki ɓa. 34Tun wa zu̱n nu̱ vaanu nu̱ ɗyine nga shi tlu̱nar ndu̱ khara ma gwa nga ɗye khar viti ɓanga ndu̱ nduki nu̱ kya su̱yen ndu̱ nga. 35Mbu̱ ɗyiku nang kap tun ka na nu̱ vya tun zu̱n nu̱ ɗyine wa ku̱s ku̱ shi nu tlu̱nar wa nang shiki ma ku̱ shaata nu nduki nu̱ke du̱mbu̱r ɓaanda kata. Tun a kor ɓalar ɓu̱ Zhinerem gwaanji Yesu nu̱ zu̱ki za, ‘Vu̱rtan wa duk dlu̱ran barke.’ ”

36Nu̱ Bulus woɗaki ɓalar nang, tu̱ kurum gha tu̱ shi barar ndu̱ wor kap. 37Tu̱ kap ɓaanda ngga ghoori, tu̱ nggu̱ɗ ku nu̱ ve qur Bulus a khaapa nda ku tu̱ sa me wor ye shalnggan. 38Memu̱na wor chit ku̱me ɓalar nu̱ zu̱ki za ɓu̱ na nda ku tu̱k ɓa. Kom tu̱ du̱ng nda ku nu̱ me du̱mbu̱lang.

Currently Selected:

Tlu̱nar ɓu̱ Pudeku 20: ttrNT

Highlight

Copy