Tlu̱nar ɓu̱ Pudeku 18

Tlu̱nar ɓu̱ Bulus mbu̱ ghai Koranti

1Qu̱rse nang tu̱ Bulus njig ghai Atina tu̱ gaɓ nu̱ Koranti. 2Tu̱ gama ndu̱ Yakhude nggur fara dlu̱man za Akila, ye ghai Pontus. Akila ndu̱ nokhzan Bu̱rsikila nu̱ shoɓ ndu̱ njigti dlar ghai Italiya ɓa ku̱me Ku̱laudiyus wa sa tu̱ shi wopar za Yakhude ku kap ku̱ njig Roma. Tu̱ Bulus ɗu̱ she wora. 3Nu̱ke tlu̱nar ɓaanda da, nang ke ku̱dmar tanti, tu̱ kha gha su̱yen ndu̱ wora tu̱ ki tlu̱nar ku su̱yen. 4Aa nyi Fu̱ɗar Maasi, tu̱ Bulus ki keele ndu̱ wor mbu̱ kib tabarang tu̱ ku̱s dut khangkal ɓu̱ Yakhudeku ndu̱ Gu̱rik ku.

5Sarchi nu̱ Sila ndu̱ Timoti a jiiki ku Makidoniya, tu̱ Bulus vu̱r sarchi ɓaran kap ye waazu, a wutan ye Yakhudeku za shwat Yesu ke Masiya. 6Tu̱ yang keela ku tu̱ ku̱s pu̱zi nda. Ku̱me nang tu̱ mba lukti ɓaran nu̱gha tu̱ ze wor za, “Ku̱ tom ɓaanu khan ɗyine nu! Zop ɗyina ku̱men ɓa, ji meeni ngga ɗu̱ kya she nduki nu̱ke ɗya Yakhudeku ɓa.”

7Tu̱ gu̱r ɓar ye mbu̱ kib tabaran tu̱ gaɓ nu̱ kaa ɓu̱ khuski nggur dlu̱man za Titiyus Justus nu̱ ghaari ghai ye Magham, rafti ɓaran a bing ndu̱ kib tabarang maɗyi. 8Tu̱ Ku̱rispus, dle gume ɓu̱ kib tabarang maita Zhinerem gwaanji, chin ndu̱ nduki nu̱ mbu̱ rafti ɓaran kap. Tu̱ nduki Koranti khang tu̱k ɓalar ɓu̱ Bulus tu̱ maita, tu̱ shi baptisme ye wora.

9Fu̱ɗa nggur nu̱ virkiri tu̱ Magham qu̱n yiti Bulus mbu̱ zhine yelndi tu̱ ze nda za, “Tu̱k na sawa ɓa, zu̱m guma ndu̱ waazu ɓaaro kha na yit ɓa, 10ku̱me nga nje su̱yen ndu̱ to. Nduk a nje nu̱ke ka ɗu̱maki shi ɗyi nggur yor ɓa, ku̱me nduki a nje khara khang mbu̱ ghai nang.” 11Tu̱ Bulus kha gha nje me sonyi da ndu̱ chere njong, a shoga ɓalar ɓu̱ Magham ye wora.

12Yang sarchi nu̱ Galiyo zu̱mki kwaaɗar ghai Akaya, tu̱ Yakhudeku taba ɗyin wor tu̱ nggu̱ɗ nu̱ ve Bulus ku tu̱ ɗu̱ ndu̱ chin gume kumari. 13Tu̱ zu̱ ku za, “Khuski nang a sa nduki ma ku̱ ghar ghai ye Magham mbe njiv nu̱ woparang nggu̱tlki.”

14Bulus a ma ɓalari, tu̱ Galiyo ze Yakhudekwang za, “Mbu̱ tu̱ga shikya zop nggur mbe zop ku gwaanji, tu̱ga ngga tu̱kto nu. 15Yang nu̱ke ɗya keele ɗyine ɓalarku ndu̱ dlu̱mku, ndu̱ wopar ɓaanu, ɗu̱ma tun a tu̱k si. Ɓang nang shim kuma nga nduk ɗyine pooni ɗyiku nang ɓa.” 16Tu̱ komba wor ɓar mbu̱ kib kumarang. 17Tu̱ yang ndukyang kap ku̱s Sostanus dle gume ɓu̱ kib tabarang tu̱ shi kurpi yenda ku gume kib kumarang. Yang Galiyo nu̱ damta ndu̱ wor ɓa.

Bulus wa gaɓ nu̱ mbu̱ ghai Antakiya ɓu̱ Siriya

18Qu̱rsan tu̱ Bulus shaata qaandi nu̱ si koɗom Koranti kom tu̱ shi khar mu̱ndi ndu̱ nu̱ mbu Yesu ku. Tu̱ vi du̱mbu̱l ɗyim ku ndu̱ Bu̱rsikila ndu̱ Akila tu̱ ku̱s njiv Siriya ku. Yang me ku̱ ji ku, Bulus wa khu̱z ɗyinan nu̱gha mbu̱ ghai Kankiriya ma wuti nyedli alqawar nu̱ shiki.#18:18 Nggu̱t tu̱k mbu̱: Shig 6:18. 19Nu̱ khu̱lki ku Afisa tu̱ Bulus njig Bu̱rsikila ndu̱ Akila nu̱ nje, tu̱ yang vi nu̱ mbu̱ kib tabarang tu̱ shi keele ku ndu̱ Yakhudekwang. 20Tu̱ khuti nda ku za ku̱ qan nu̱ si she wora, yang nu̱ tlogha ye wor ɓa. 21Nu̱ kya ma njig wor tu̱ zu̱ za, “Ngga ɗa gaɓ nu̱ she nu mbu̱ Magham wa tlogha yerem.” Kom tu̱ vi nu̱ mbu̱ du̱mbu̱lang tu̱ njig Afisa. 22Nu̱ ɗu̱ki Kaisariya, tu̱ dla nu̱ ɗyin nu̱ mbu Yesu ku nu̱ Urshalima tu̱ shi qaandi ye wora, kom tu̱ ɗu̱ Antakiya.

23Nu̱ qanki koɗom nje tu̱ ji tu̱ baara mbu̱ dlar ghai Galatiya ndu̱ Pargiya a mbu ghai ghai a pa du̱mbu̱r ye nu̱ mbu Yesu ku.

Apolos wa shi Waazu mbu̱ ghai Afisa

24A nje a nje, tu̱ Yakhude nggur dlu̱man za Apolos ɗa ɓa Afisa. Yang ɗya khuzi Alekhzandu̱riya nu̱ maghar ɓala, wa zu̱n bu̱lar ɓalar ɓu̱ Magham maɗyi maɗyi. 25Wa shoga njiv ɓu̱ Zhinerem gwaanji yenda. Wa kha wang maɗyi mbu̱ ɓala. Wa ka shoga zhire ɓu̱ Yesu ɓar maɗyi, yang zu̱n kya baptisme ɓu̱ Yokhana ɗyenda. 26Tu̱ nggasi waazu ndu̱ du̱mbu̱r ɓaran kap mbu̱ kib tabari. Nu̱ Bu̱rsikila ndu̱ Akila tu̱kki ɓalar ɓaran tu̱ da nda nu̱ kaa ɓaanda tu̱ shaata nda ku tu̱ zu̱n njiv ɓu̱ Magham mbari.

27Nu̱ Apolos shimki peetar ma yir mbu̱ dlar ghai Akaya, tu̱ nu̱ mbu Yesu kwang shaata nda, tu̱ bu̱la lagarkati ye nu̱ mbu Yesu ku nu̱ Akaya ma ku̱ dlu̱r nda ku khar wor rap. Nu̱ khu̱lki nje tu̱ kha ndu̱ shaata maɗyi ye nduki nu̱ maitaki nu̱ ku̱nshe mu̱nkir ɓu̱ Magham. 28Ku̱me wa ra Yakhudeku maɗyi gume nduki, a wutan ye wor shwat mbu̱ lagarkati ɓu̱ Magham nu̱ ɗyine Yesu chin ke Masiya.

Currently Selected:

Tlu̱nar ɓu̱ Pudeku 18: ttrNT

Highlight

Copy