Tlu̱nar ɓu̱ Pudeku 17

Waazu ɓu̱ Bulus ndu̱ Sila mbu̱ Tasalonika

1Nu̱ Bulus ndu̱ Sila ɗu̱ki mbu̱ ghai Amfipolis ndu̱ Apoloniya, tu̱ khu̱l ku mbu̱ ghai Tasalonika, ye maa nu̱ke kib tabar ɓu̱ Yakhudeku a nje. 2Tu̱ Bulus vi nu̱ she wora ba wa nu̱ su̱nki shiran, tu̱ Fu̱ɗar Maasi kunung peeta gaanje yen a keele ndu̱ wora mbu̱ bu̱lar ɓalar ɓu̱ Magham. 3A zu̱ mban ye wora, a wutan ye wor za wa ku̱s ku̱ Masiya za bonye shwat tu̱ ji mbe mu̱ti tu̱k. Tu̱ Bulus zu̱ tu̱k za, “Chin Yesu nu̱ke nga ɓalar ɓaran ye nu nang, chin ke Masiya.” 4Tu̱ Yakhudeku ndu̱ Gu̱rik ku nggur nu̱ ghaari ghai ye Magham su̱yen ndu̱ man nusuku nggur nu̱ke a na wor nu̱ zhaaji khang maita ɓalar nu̱ Bulus ndu̱ Sila shikyang, tu̱ gonta ɗyin wor ndu̱ wora.

5Tu̱ yang Yakhudeku nu̱ke a zhiri ɓaanda taba nduki malkandi ku nu̱ goma, tu̱ da khangkal ɓu̱ nduki nu̱ mbu̱ ghayang nu̱ viɗi. Tu̱ ɗa ku nu̱ kaa ɓu̱ Jason a laɓ Bulus ku ndu̱ Sila ma a dut nda wor nu̱ gume tabar nduki. 6Yang nu̱ke nu̱ gwa wor ɓa, tu̱ ɗa dut Jason ndu̱ nu̱ mbu Yesu ku ngguri, tu̱ ɗu̱ ndu̱ wor gume nu̱ kumar ku. A zhaano ku a zu̱ran za, “Nduki nu̱ke a ɓar ndu̱ dakhlar aa fu̱n mbu̱ larji nangang, a ɓa fan ku tu̱k. 7Yang Jason zhurki wor nu̱ mbu̱ rafti ɓaran. Yang kap ɓaanda wa ka shi ɗyi nu̱ Kaisar nggu̱tlki gha mbu̱ dlar ghai nang, a zu̱ran ku za kuji nggur a nje zum, dlu̱man za Yesu nggwa.” 8Ni nu̱ kumarku ndu̱ nduki nu̱ mbu̱ ghayang tu̱kki wanang tu̱ damta ku. 9Tu̱ zhang ngga Jason ndu̱ ɓeenan kwang gha kope nu̱ saki wor tu̱ ɓi mu̱zhindi nggar wor gha.

Bulus ndu̱ Sila wa Ɗu̱ ku mbu̱ ghai Biriya

10Nu̱ virkir shiki tu̱ nu̱ mbu Yesu kwang shi khar mu̱ndi ye Bulus ndu̱ Sila tu̱ peeta ku nu̱ Biriya. Nu̱ khu̱lki ku nje tu̱ vi nu̱ mbu kib tabar ɓu̱ Yakhudekwang. 11Yang nduk Biriya wa duk nduki nu̱ Tasalonika ku, ku̱me wa dlu̱ ɓalar ɓu̱ Magham ku khar wor rap. A nggu̱t mbu̱ bu̱lar ɓalar ɓu̱ Magham aa nyi fu̱ɗa ma na nda mbu̱ ɗyi nu̱ Bulus zu̱kyang ɗya zhire. 12Ku̱me nang, tu̱ Yakhudeku khang maita su̱yen ndu̱ nusuku nggur nu̱ke ɗya Gu̱rik yang a na wor ndu̱ zhaaji ndu̱ ɓeeni Gu̱rik khuzuku khang.

13Yang ba nu̱ Yakhudeku nu̱ke a Tasalonika tu̱kki za Bulus a wopa Labar Mbarkandang ɓu̱ Magham mbu̱ ghai Biriya, tu̱ ɗu̱ ku tu̱ ɗa sokh nduki nje, a da khangkal ɓaanda nu̱ viɗi. 14Fan ndu̱ fan tu̱ nu̱ mbu Yesu kwang tu̱pa Bulus ɓara nu̱ me ɗyim chitndi yang tu̱ Sila ndu̱ Timoti kha gha nje dong. 15Tu̱ nduki nu̱ du̱ngki Bulus nu̱ me ɗyim chitndang khu̱l ndu̱ chin mbu̱ ghai Atina. Nu̱ nduki nu̱ du̱ngki nda a jiiki ma gaɓti, tu̱ Bulus ru̱k wor za ku̱ ze Sila ndu̱ Timoti ku̱ ɗa gwa nda ku ɗau ɗau nje, kom ku̱ ɓa peeta nda yirang.

Bulus wa shi Waazu mbu̱ ghai Atina

16Sarchi nu̱ke Bulus a bu Sila ndu̱ Timoti mbu̱ ghai Atina, tu̱ memu̱naran su̱bu̱ri maɗyi ku̱me su̱ maghamndiku zum zum nu̱ke a nje nyeedlan mbu̱ ghayang. 17Ku̱me nang tu̱ka shi keele mbu̱ kib ɓu̱ Yakhudekwang ndu̱ Yakhudeku ndu̱ Kheleneku nu̱ ghaari ghai ye Magham. Wa ka shi ku tu̱k ndu̱ nduki nu̱ka gwaki me gomari. 18Wanang tu̱k, tu̱ Abikuriyeku ndu̱ Su̱tokiyeku nu̱ shiki zu̱ndi shi keele ndu̱ chin. Tu̱ ɓeenan chele ɓaanda zu̱ za, “Woɗye nu̱ khang ɓalar nang a zu̱kya nu̱ma?” Ɓeenan za, “Ba wa a shikya waazu ɓu̱ pooni maghamndiku nggur zum nu̱ke a nje khaarem fan ɓa.” Zu̱ wanang ku ku̱me Bulus a zu̱kya Labar Mbarkandi ɓu̱ Yesu, ndu̱ jiiri mbe mu̱ti. 19Ku̱me nang, tu̱ ɗu̱ ndu̱ chin ku Ariyopagus mbu̱ tabar ɓaanda tu̱ zham nda ku za, “To ka ɗu̱ma zu̱ su̱ mewar shogar nu̱ke ta shiran nang yerem mu? 20Ku̱me nyem tu̱k pooni ɓala wanang sar da ɓa. Chem a shim zu̱n mi mbu̱ ɗyi nu̱ke ta zu̱ranang.” 21Ku̱me nduki nu̱ mbu̱ ghai Atina ndu̱ runggiku nu̱ke a nje kharan ɗya nu̱ shimndi tu̱kti mewar tun ku maɗyi ma ku̱ ki ɓalarang ku tu̱ duk aa nu̱m.

22Tu̱ Bulus ji nu̱ viɗi gume tabar dlegumeku nu̱ Ariyopagus, tu̱ zu̱ za, “Tun ndukin Atina nga zu̱n tun nu̱ shimndi ghaari ghai maɗyi ve aa nyi njiva. 23Sarchi nang baaraki mbu̱ ghai nga nggu̱t ɗyiku nun ka gharki ghai ye wora tang na du̱ku̱l dlar sadke nu̱ bu̱lar ɗyine nda viɗ za, ‘YE MAGHAMNDI NU̱KE NYEM ZU̱N ƁA.’ Nga ɓakya ma wut chin Maghamndi nun ka gharki ghai yenda yang nun zu̱n nda ɓa nda ni.

24“Chin Maghamndi nu̱ du̱ngki larji ndu̱ ɗyi nu̱ke a mban kap, chin nu̱ke chin ke Zhinkir gwaanji ɓu̱ maa viɗi ndu̱ maa vu̱ghai nu̱ka khan mbu̱ kib nu̱ nduk du̱nki ɓa. 25Yang nu̱ka shim shaata she nduk ɓa, nu̱ ka gang tun ɓa ku̱me chin ke nu̱ vu̱r nyifi ye nduki kap, ndu̱ dar nyifiri ndu̱ ɗyi nu̱ke a shimndan ku kap.#17:25 Nggu̱t tu̱k mbu̱: 1Kuj 8:27; Yish 42:5; Tlp 7:48. 26Chin shiki nduk kap nu̱ ku̱nshe nduk da, ma ku̱ khan mu̱na larji, chin shiki lauɗar su̱ sarchi nu̱ke ku̱ shi ku, kom ndu̱ ye maa nu̱ke aa nyi pooni nduk ka khaki nje. 27Magham shi wanang ma ku̱ laɓ nda ku bai ka taɓ ku tu̱ gwa nda, aa nu̱ke chin ɓakh ndu̱ aaki chele ɓaarem ɓa. 28‘Ai, chin saki chem kha ndu̱ nyifiri, chem ki qushumndi, chem a nje kharan.’ Ba wa ni nu̱ qar taazi ku ɓaanu zu̱ki ku za, ‘Shwat, chem pooni ɓaran.’

29“Na ɗo, nu̱ke chem pooni ɓu̱ Magham ai, nu̱ shipa chem taman za Magham wa shipa ginarwa, ko azurfe, ko ndooga nu̱ nduk khu̱ɓki ndu̱ shaandi ɓaran ɓa. 30Zhu tang Magham nu̱ kuma nduki ku̱rku̱r ndu̱ zop ɓaanda ɓa, ku̱me song zu̱ndi ɓaanda. Yang leendang wa qa nduki aa fu̱n ku̱ nggoɗ ku. 31Ku̱me wa sa sarchi nu̱ke chin ka kumaki larji mbe zhire nu̱ ku̱nshe njif nggur nyin datki. Magham wa wut zhire ni shwat nu̱ daki nda nu̱ viɗi nu̱ nyifiri mbe mu̱ti.”

32Nu̱ tu̱kki ɓalar dar nda nu̱ viɗi mbe mu̱ti tu̱ ɓeenan shi ɓalar ndu̱mndi yenda, yang tu̱ ɓeenan zu̱ za, “Chem a shim tu̱k mi ɗyi nu̱ke to ka zu̱ki ɗyine ɓalar nang tu̱k.” 33Nang ke maa nu̱ Bulus shakki ndu̱ wora. 34Tu̱ yang ɓeenan khan gaanje Bulus tu̱ maita ku, Diyonisiyus a mban ɗya da chele tabarang ndu̱ nokhzi nggur dlu̱man za Damaris ndu̱ ɓeeni nduki tu̱k.

Currently Selected:

Tlu̱nar ɓu̱ Pudeku 17: ttrNT

Highlight

Copy