Tlu̱nar ɓu̱ Pudeku 16

Timoti wa mbu gaanje Bulus ndu̱ Sila

1Tu̱ Bulus ɗu̱ Darbe ndu̱ Listu̱ra. Yang nu̱ mbu Yesu nggur a nje dlu̱man za Timoti, man ɗya nu̱ mbu Yesu tu̱k yang me ghai ɓaran ɗya Yakhuda, zhin ɗya me ghai Gu̱rik. 2Nu̱ mbu Yesu ku nu̱ke a Listu̱ra ndu̱ Ikoniya a kuna Timoti ku. 3Yang nu̱ke Bulus a shim ku̱ Timoti bala nda, tu̱ dla su̱ Timoti nu̱ gha ku̱me Yakhudeku nu̱ke a mbu̱ ghai ku nang kap wa zu̱n nu̱ke zhin Timoti ɗya Gu̱rik. 4Sarchi nu̱ke a baara ɗyin ghaiku, tu̱ka zu̱ ɗyi nu̱ Pudeku ndu̱ dlegumeku ɓu̱ tabar nu̱ mbu Yesu ku nu̱ke a Urshalima chingki nu̱ ɗyinang, tu̱ mata nu̱ mbu Yesu kwang ku̱ khutlo ɗyi nu̱ zu̱ki kwang. 5Tu̱ tabar ɓu̱ nu̱ mbu Yesu ku shaata gwa du̱mbu̱r mbu̱ maitar Yesu, a shaata gwa nduki aa nyi fu̱ɗa.

Wa Qa Bulus ma Yir Makidoniya

6Tu̱ baara dlar ghai Pargiya ndu̱ Galatiya nu̱ke Jiimbi shakhshakhndi wa nggu̱tl wor ku̱ shi ɓalar ɓu̱ Magham mbu̱ dlar ghai Asiya ɓa. 7Nu̱ ɗa ɓa ki ku me koɗokh dlar ghai Misiya, tu̱ shim viri nu̱ dlar ghai Bitiniya, yang Jiimbi ɓu̱ Yesu nu̱ tlogha ye wor ku̱ ɗu̱ ku ɓa. 8Tu̱ mbu tleebi dlar ghai Misiya tu̱ ɗu̱ ku Tu̱rowas. 9Mbu̱ virkiri tu̱ yiti Bulus qu̱n mbu̱ Jiimba. Nu̱ qu̱nki tu̱ na khuski nggur nu̱ke ɗya khuzi Makidoniya chingndan a khuti nda za, “A ɓo mbu̱ ghai Makidoniya to shaata rem.” 10Ba nu̱ yiti Bulus naki ɗyinang, chem ji fan ndu̱ fan chem zhang vaarem ma peetar nu̱ Makidoniya, ku̱me chem wa maita Magham kya qa rem ma zu̱ Labar Mbarkandang.

Lidiya wa Maita Yesu

11Chem njig Tu̱rowas mbu̱ ye du̱mbu̱l ɗyim nyem ching gha ɓa, chem ɗu̱ Chenjesi Samotires. Vi dumaaran tu̱k chem ɗu̱ Niyapolis. 12Nyem njigki ye maaran chem ɗu̱ Filipi nu̱ke a mbu̱ bu̱n Roma, yang chin ke ghai gwaanji mbu̱ dlar ghai Makidoniya. Chem qan koɗom nje.

13Ye Fu̱ɗar Maasi chem vi ɓar me vi ghayang chem ɗu̱ me gaawu ye maa nu̱ke chem tamanki za maa barar ɓu̱ Yakhudekwang a nje ye maaran, chem kha gha chem a ɓalar ye nusuki nu̱ tabaki nu̱ nje. 14Yang nokhzi nggur a nje nu̱ sawar Magham nu̱ gwaki dlu̱mndan yerem dlu̱man za Lidiya. Ɗya ye Tiyatira, wa ka masa kaparku nu̱ me mu̱zhindi ɓara ɗya pooni kaparku nu̱ka yobki nu̱ gha vyang garara. Tu̱ Zhinkir gwaanji qu̱n memu̱naran nu̱gha, tu̱ gwa dlu̱mndan ye Bulus a tu̱k ɗyi nu̱ke a zu̱ran. 15Nu̱ shiki baptisme yenda ndu̱ nduki nu̱ mbu̱ rafti ɓaran, tu̱ khuɗ wor za, “Mbu̱ tun wa maita nu̱ ɗyine nga maita Zhinkir gwaanji, a ɓa ma tun zhur nu̱ kaa ɓanga.” Tu̱ padla remi chem tlogha yenda.

Wa Khi Bulus ndu̱ Sila gha Zhaaru̱m

16Sarchi ngguri chem a yir ye maa barari chem gama ndu̱ wonkhar nggur nu̱ khu̱kheeti malkandi nu̱ka shiki nggu̱ti ye nduki. Nduki ɓu̱ wonkhar nang wa ka gwa mu̱zhindi maɗyi nu̱ ku̱nshe ɓu̱tli ghai nu̱ke wonkharang ka shikyang. 17Tu̱ yang ka mbu gaanje rem, chem ndu̱ Bulus a zhaano a zu̱ran za, “Nduki nang ɗya maaviku ɓu̱ Maghamndi nu̱ dukki aaki, a wutkya njiv ɗanar ye nu ku!” 18Tu̱ka shi ye wor wanang me qaandiku khang. Tu̱ memu̱na Bulus su̱bu̱ri tu̱ ze khu̱kheetang za, “Nga zu̱ran yoro mbu̱ dlu̱m Yesu Masiya a vi ɓar mbe nda.” Fan ndu̱ fan tu̱ ɗa vi ɓar mbe nda.

19Nu̱ nduki ɓu̱ wonkhar nang naki njiv gwar mu̱zhindi ɓaanda wa za, tu̱ ku̱s Bulus ndu̱ Sila ku, tu̱ ɗu̱ ndu̱ wor me gomari gume nu̱ kumar ku. 20Nu̱ khu̱lki ndu̱ wor gume nu̱ kumarkwang tu̱ zu̱ ku za, “Yakhudeku nang a ɓar nu̱ jiiri khankal yerem mbu̱ ghai nang shwat. 21A ɓar ku ndu̱ me ghaiku nu̱ke nu̱ shipa dlu̱mi chem shi boote su̱ ɓa, ku̱me chem Romeku.”

22Tu̱ ndukyang taba nu̱ ɗyine wora, tu̱ nu̱ kumarkwang ɓyakh luktiku ɓaanda ye wor nu̱ gha, tu̱ fet ɓar ve wora, tu̱ sa ku̱ shi dlabti ye wor nu̱ ɗye dlabti. 23Nu̱ shiki dlabti ye wor maɗyi, tu̱ khi wor gha zhaaru̱m tu̱ ze nu̱ nggu̱ti maarang ku̱ nggu̱t wor mbari. 24Tu̱ nu̱ nggu̱ti maarang mbu zu̱r ɓaanda, tu̱ sa wor nu̱ mbu̱ kib nu̱ke a mbu mbu, tu̱ sa wor nu̱ me tuuru.

25Chele virkiri, Bulus ndu̱ Sila a bararku ndu̱ taazi gwaari dlu̱m Magham. Ɓeeni nduki nu̱ke a nje khiiran mbu̱ zhaaru̱mang a ngga dlu̱mndi wor ye wora. 26Fan ndu̱ fan tu̱ maa vu̱ghai shi yakhtar nggur maɗyikandi tu̱ yakhta maa nu̱ saki saari du̱ndi Zhaaru̱mang nu̱ ɗyinanang. Tu̱ me vi ku nu̱ zhaaru̱mang kap qu̱n vaanda, tu̱ yakhliku nu̱ gu̱nki nduki khiikandang gha si kwang kol vaanda. 27Ba ni nu̱ nggu̱ti maarang nakhaki mbu̱ ɗyeniri tu̱ na me vikwang qu̱ndan, ta ku̱di kaskar ɓaran ma tlagha nji varan nu̱gha, ku̱me a tamandan za nduki khiikandang wa ɗa vaanda. 28Tu̱ Bulus da su̱quran nu̱ viɗi tu̱ zu̱ za, “Ruɓana va nu̱ gha bam ɓa! Chem a nje kap ɓaarem!”

29Tu̱ nu̱ nggu̱ti maarang zu̱ za ku̱ ɗa ɓa ndu̱ pitile. Tu̱ zhan mbu tu̱ ɗa nggu̱ɗ nu̱ gume Bulus ndu̱ Sila, varan a dlu̱rti ku̱me sawa. 30Kom tu̱ ɗa vi ndu̱ wor dam tu̱ zham wor za, “Nduk kudaandi, ngga shikya nu̱m tang gwa ɗanara?”

31Tu̱ ze nda ku za, “Moito Zhinerem gwaanji Yesu to ndu̱ rafti ɓaaro tun ka gwa ɗanari.” 32Kom tu̱ zu̱ ɓalar ɓu̱ Zhinkir gwaanji ye wora, chin ndu̱ nduki nu̱ke a mbu̱ rafti ɓaran kap. 33Ba mbu̱ virkirang tu̱ da wor tu̱ shiɓ ruɓarku nu̱ke a ve wor nu̱gha. Fan ndu̱ fan tu̱ shi baptisme yenda su̱yen ndu̱ nduki nu̱ mbu̱ rafti ɓaran. 34Kom tu̱ vi ndu̱ wor mbu̱ rafti ɓaran tu̱ vu̱r ɗye zu̱mndi ye wora. Tu̱ nu̱ nggu̱ti zhaaru̱mang kasha maɗyi, chin ndu̱ rafti ɓaran ku̱me kap ɓaanda wa maita Magham ku.

35Vi dumaaran, tu̱ nu̱ kumarkwang ru̱k nu̱ gu̱ndi mbu̱ varku nu̱ ɓalar za, “Ku̱ ngga nduki nang gha.” 36Tu̱ nu̱ nggu̱ti zhaaru̱mang ze Bulus za, “Nu̱ kumarkwang a ru̱k za ku̱ ngga nu̱ gha. Nu̱ke wanangang, a vi ma tun ɗu̱ vaanu laya.”

37Tu̱ Bulus tlogha za, “Ai, shi kurpi yerem waare ku̱ kumarem gume nduki kap, yang ɗya chem nduki Roma. Tu̱ gaɓ tu̱k ta khiirerem gha zhaaru̱m, yang leendang a shim ngga nda rem gha mbu tuka mu? Ɓu̱ shi ɓa! Buka a ɓaanda ndu̱ var wor tu̱ vi ndu̱ chem dam.” 38Tu̱ nu̱ gu̱ndi mbu̱ var kwang ɗu̱ tu̱ ɗa zu̱ ɓalar nang ye nu̱ kumarkwang. Tu̱ nu̱ kumarkwang tu̱k sawari nu̱ tu̱kki za Bulus ndu̱ Sila ɗya nduki Roma ku.

39Tu̱ ɗa ɓa ku mbu̱ zhaaru̱mang tu̱ khuɗ Bulus ndu̱ Sila. Qu̱rsan tu̱ ngga wor gha, tu̱ khuɗ wor tu̱k za ku̱ njig ghayang ku. 40Nu̱ Bulus ndu̱ Sila viki ɓar mbu̱ zhaaru̱mang, tu̱ ɗu̱ ku she Lidiya. Nu̱ gwaki nu̱ mbu Yesu ku, tu̱ pa du̱mbu̱r ye wora. Kom tu̱ vi tu̱ ɗu̱ vaanda.

Currently Selected:

Tlu̱nar ɓu̱ Pudeku 16: ttrNT

Highlight

Copy