Tlu̱nar ɓu̱ Pudeku 15

Tabar ɓu̱ Dlegumeku ɓu̱ nu̱ mbu Yesu ku mbu̱ Urshalima

1Tu̱ nduki nggur na viki Yakhudiya ta ɓa ku Antakiya tu̱ ki shogar ye nu̱ mbu̱ Yesu ku a zu̱ran ku za, “Mbu̱ nu̱ dla sonu nu̱ gha ba wa nu̱ me ghai ɓu̱ Musa zu̱kyang ɓa, tun ɓu̱ gwa ɗana ɓa.” 2Nu̱ Bulus ndu̱ Barnaba shiki keele maɗyikandi chele ɓaanda ndu̱ nduki nang. Tu̱ ru̱k Bulus ndu̱ Barnaba su̱yen ndu̱ nduki nggur ku̱ ɗu̱ ku Urshalima she pudeku ndu̱ dle gume ɓu̱ nu̱ mbu Yesu ku, ma ku̱ shi ɓalar ndu̱ wor ɗyine shogar nang. 3Nu̱ tabar ɓu̱ nu̱ mbu Yesu kwang ru̱kki wor tu̱ ɗu̱ ku ta mbu mbu̱ dlar ghai Fonishiya ndu̱ Samariya a zu̱ labar ɓu̱ nduki nu̱ke ɗya Yakhudeku ɓa yang wa maita Yesu ku. Tu̱ labar nang sa tabar ɓu̱ nu̱ mbu Yesu ku kap kasha maɗyi. 4Nu̱ khu̱lki ku Urshalima, tu̱ tabar ɓu̱ nu̱ mbu Yesu ku ndu̱ Pudeku ndu̱ dlegumeku ɓaanda gaɗa wora, tu̱ Bulus ndu̱ Barnaba zu̱ ɗyi nu̱ Magham shiki nu̱ ku̱nshe wor kap ye nu̱ mbu Yesu kwang.

5Tu̱ yang nu̱ mbu Yesu ku nggur nu̱ke a mbu̱ tabar ɓu̱ Parisekwang ji nu̱ viɗi tu̱ zu̱ ku za, “Wa ku̱s ku̱ dla su̱ nduki nu̱ke ɗya Yakhudeku ɓa nu̱ mbuki Yesu ku nu̱gha, tu̱ sa wor ku khutlo wopar ɓu̱ Musa.”

6Tu̱ Pudekwang ndu̱ dle gume ɓu̱ nu̱ mbu Yesu ku taba ma ɓalar nang. 7Qu̱rse wa shi ɓalarku khang, tu̱ Biturus ji nu̱ viɗi. Tu̱ zu̱ za, “Nyeezaku, tun wa zu̱n nu̱ ɗyine ɗau fara Magham wa daati nga chele ɓaanu, ma ku̱ nduki nu̱ke ɗya Yakhudeku ɓa tu̱k Labar Mbarkandang tu̱ maita ku ku̱n sha.#15:7 Nggu̱t tu̱k mbu̱: Tlp 10:1-43. 8Yang Magham nu̱ zu̱nki memu̱na aaki, tu̱ wuɗ za chin wa dlu̱ wor nu̱ ku̱nshe Jiimbi shakhshakhndi nu̱ vu̱rki ye wor ba wa nu̱ vu̱rki yerem.#15:8 Nggu̱t tu̱k mbu̱: Tlp 2:4; 10:44. 9Nu̱ shakh chele ɓaarem ndu̱ wor ɓa, ku̱me wa sa memu̱na wor tu̱ kha shakhshakh nu̱ ku̱nshe maitar Yesu nu̱ shiki ku. 10Yang nu̱m saki tun a keela Magham nu̱ ku̱nshe du̱ngdi shipiti taɗakandi nang ye nu̱ mbu Yesu ku nang, ma nu̱ke aa chem ndu̱ zhikaneremku nyem ɗu̱ma daran ɓa? 11Chem wa maita nu̱ ɗyine chem gwa ɗanar nu̱ ku̱nshe mu̱nkir ɓu̱ Yesu, ba wa nu̱ gwaki ku.”

12Tu̱ tabar ndukyang kap kha yit, tu̱ gwa dlu̱mndi wor ye Barnaba ndu̱ Bulus sarchi nu̱ke a zu̱ labar ɗye saidu ndu̱ ɗye lazhamku nu̱ Magham shiki nu̱ ku̱nshe wor chele nduki nu̱ke ɗya Yakhudeku ɓa. 13Qu̱rse wa du̱ng me ɓalarang ku, tu̱ Yaqub dlu̱ men za, “Nyeeza, gwa ma dlu̱mndonu ya. 14Siman wa zu̱ labar ndolar nu̱ Magham nggaki su̱ wutan ye nduki nggur nu̱ke ɗya Yakhudeku ɓa, nu̱ ku̱nshe nduki nggur nu̱ daki tu̱ kha ma ɓaran chele nduki nu̱ke ɗya Yakhudeku ɓa. 15Nang wa kha ku̱rku̱r ndu̱ ɓalar ɓu̱ annabikwang nu̱ke a nje bu̱laran za,

16‘Qu̱rsan ngga ɗa gaɓ

tang du̱n rafti kwaaɗar ɓu̱ Dauda

nu̱ gu̱ɗakyang.

Aa nu̱ke wa gu̱ɗa,

ngga du̱n nu̱ gha zum tang du̱ng nda

nu̱ ɗyin saaran,

17ma ku̱ ɓeeni ndukyang kaala nga.

Nga Zhinkir gwaanji shiki ɗyikunang,

nang ke nduki nu̱ke ɗya Yakhudeku ɓa

nang datki ku̱ kha ma ɓang ku.’

18Nang ke zu̱r ɓu̱ Zhinkir gwaanji,

chin nu̱ wutki ɗyiku nang zhu tang.

19“Ku̱me nang, ye nar ɓanga, nu̱ shipa ku̱ du̱ng mi ɗyi nggur gu̱rgu̱rndi ye nduki nu̱ke ɗya Yakhudeku ɓa nu̱ke a gaɓti nu̱ she Magham ɓa. 20Buka bu̱lami lagarkati chem ze wor nyem za ku̱ zu̱m ɗye zu̱mndi nu̱ vu̱rki ye mu̱lu̱mku ɓa ndu̱ ku̱ shi zawa ku ɓa, yang ku̱ nji dlu nu̱ ghengki quran tu̱ mu̱t ndu̱ liipa ɓa, kom ndu̱ tom tu̱k.#15:20 Nggu̱t tu̱k mbu̱: Viri 34:15-17; Kur 17:10-16; 18:6-23. 21Jiwa zhu tang ma ɓar meeni wa ka shi waazu ndu̱ wopar ɓu̱ Musa mbu̱ aa nyi ghai, tu̱ka qa ye chitang mbu̱ kib tabar ɓu̱ Yakhudekwang aa nyi Fu̱ɗar Maasi.”

Ɗyi nu̱ Dlegumeku ɓu̱ nu̱ Mbu Yesu ku Chingki nu̱ Ɗyinan

22Tu̱ Pudekwang ndu̱ dlegumeku ndu̱ tabar ɓu̱ nu̱ mbu Yesu kwang kap na wa shipa ku̱ dat nda nduki chele ɓaanda, tu̱ ru̱k wor ma yir Antakiya su̱yen ndu̱ Bulus ndu̱ Barnaba. Tu̱ dat Yakhuda nu̱ka qaki nda Barsaba, su̱yen ndu̱ Sila, nu̱ke ɗya dlegumeku ɓu̱ tabar nu̱ mbu Yesu ku. 23Tu̱ vu̱r lagarkati ye wora.

Bu̱laran za, Ji she nyeezonu, Pudeku ndu̱ dlegumeku ɓu̱ tabar ɓu̱ nu̱ mbu Yesu ku.

Ma yir she nu̱ mbu Yesu ku nduki nu̱ke ɗya Yakhudeku ɓa nu̱ke a mbu̱ dlar ghai Antakiya ndu̱ Siriya ndu̱ Kilikiya.

Chem a zoɓa qaandi ye nu.

24Chem wa gwa labaran za nduki nggur chele ɓaarem wa da khangkal ɓa nun viɗi tun damta nu̱ ku̱nshe ɓalarku nu̱ shiki ku, aa nu̱ke chem vu̱rki zalaleni ye wor ɓa. 25Nu̱ke wanangang, qu̱rse chem wa shi ɓalar ndu̱ yen, chem na wa shipa dat mi nduki chem a ru̱k wor nu̱ she nu. Su̱yen ndu̱ rapteremku Barnaba ndu̱ Bulus 26nu̱ vu̱rki nyifi ɓaanda ku̱me dlu̱m Zhinerem gwaanji Yesu Masiya. 27Ku̱me nang, chem wa ru̱k Yakhuda ndu̱ Sila she nu. Wor ka zu̱ki zhire ɓu̱ ɗyi nu̱ke chem bu̱laki ye nu nang ndu̱ me wora. 28Jiimbi shakhshakhndi wa na wa shi mbari, chem yang tu̱k, chem wa na wa shi mbari ku̱ du̱ng taɗar nggur ye nu nu̱ dukki ɗyiku nu̱ ku̱ski nang ɓa. 29Tun shakh ɗyinonu ndu̱ ɗyiku nu̱ vu̱rki ye mu̱lu̱mku, ndu̱ tom, ndu̱ nji dlu nu̱ ghengki quran ghengi, ndu̱ zawari. Mbu̱ tun wa shakh ɗyinonu ndu̱ ɗyikunang, tun wa shi ɗyi mbarkandi.

Mas mi laya.

30Nu̱ ru̱kki wor, tu̱ ɗu̱ ku Antakiya. Ni nu̱ mbu Yesu ku tabaki, tu̱ zoɓa lagarkatang ye wora. 31Nu̱ tabar ɓu̱ nu̱ mbu Yesu kwang nggu̱tki ɗyi nu̱ bu̱laki nu̱ mbu̱ lagarkatang, tu̱ kasha ku ku̱me wa pa du̱mbu̱r ye wora. 32Tu̱ Yakhuda ndu̱ Sila, nu̱ke ɗya annabiku dut dlu̱mndi nyeezi wora ndu̱ ɓalarku khang, tu̱ pa du̱mbu̱r ye wor tu̱k. 33Qu̱rse wa qan ku koɗom nje, tu̱ nu̱ mbu Yesu kwang shi kharmu̱ndi tu̱ du̱ng wora, ta gaɓ ku nu̱ she nduki nu̱ ru̱kki worang. 34Yang ɓu̱ Sila ta kha gha njigi.#15:34 Ɓeena bu̱larku nu̱ zhu nu̱ sa maa nang ɓa. 35Tu̱ Bulus ndu̱ Barnaba qan koɗom mbu̱ ghai Antakiya a shogar ku ndu̱ waazu ɓalar ɓu̱ Magham su̱yen ndu̱ ɓeeni nduki ngguri.

Bulus ndu̱ Barnaba wa Shakh ku

36Nu̱ qanki nu̱ si koɗom, tu̱ Bulus ze Barnaba za, “Ɗyem mbu̱ ghaiku nyem wopaki ɓalar ɓu̱ Zhinerem gwaanji ye nyeezeremku ɗau fara, chem a nggu̱t wora.” 37Barnaba wa shim tu̱ga ɗu̱ nda ndu̱ Yokhana nu̱ka qaki nda za Markus, 38yang Bulus nu̱ shim yir ndu̱ Yokhana Markus ɓa. Ku̱me wa njig wor mbu̱ dlar ghai Pamfiliya ɗau fara tu̱ zhang zu̱m guma ndu̱ tlu̱nar su̱yen ndu̱ wor gha.#15:38 Nggu̱t tu̱k mbu̱: Tlp 13:13. 39Tu̱ ku̱na tu̱k me yen ku maɗyi tu̱ shakh ku. Chin Barnaba tu̱ da Yokhana Markus tu̱ vi du̱mbu̱l ɗyim ku ma yir Saipurus. 40Tu̱ Bulus dat Sila. Qu̱rse nu̱ mbu Yesu ku wa khuɗ ku̱ mu̱nkir ɓu̱ Zhinkir gwaanji khutlo wora, tu̱ vi ku ma yirang. 41Tu̱ mbu ku mbu̱ dlar ghai Siriya ndu̱ Kilikiya a pa du̱mbu̱r ye tabar ɓu̱ nu̱ mbu Yesu ku.

Currently Selected:

Tlu̱nar ɓu̱ Pudeku 15: ttrNT

Highlight

Copy