Tlu̱nar ɓu̱ Pudeku 14

Waazu ɓu̱ Bulus ndu̱ Barnaba mbu̱ ghai Ikoniya

1Tu̱ Bulus ndu̱ Barnaba mbu̱ ghai Ikoniya vi nu̱ mbu̱ kib tabar ɓu̱ Yakhudekwang ba wa nu̱ su̱nki ku ndu̱ shiran. Tu̱ shi waazu ku nje maɗyi, tu̱ nduki khang, Yakhudeku ndu̱ nduki nu̱ke ɗya Yakhudeku ɓa maita. 2Yang tu̱ ɓeeni Yakhudeku nu̱ zhangki maitaran gha ɗu̱ tu̱ ɗa sokh nduki nu̱ke ɗya Yakhudeku ɓa tu̱ su̱bu̱r chele ɓaanda ndu̱ nu̱ mbu Yesu ku. 3Yang kap ndu̱ nang, tu̱ Bulus ndu̱ Barnaba shoɓ nje maɗyi a ɓalarku ndu̱ memu̱na wor da nu̱ ku̱nshe zalale ɓu̱ Magham. Tu̱ Magham gu̱n su̱ ɓalar mu̱nkir ɓaran nu̱ vu̱rki zalale ye wor tu̱ shi ɗye saiduku ndu̱ ɗye lazhamku. 4Yang tu̱ nduki nu̱ mbu̱ ghayang shakh ku san rap. San da a gu̱n su̱ ye Yakhudekwang, san da a gaanje Pudekwang.

5Tu̱ nduki nu̱ke ɗya Yakhudeku ɓa ndu̱ Yakhudekwang su̱yen ndu̱ dlegumeku ɓaanda daasa ku ma wut palase ye Pudekwang ma mbuk wor ndu̱ ndogdiku. 6Nu̱ Pudekwang tu̱kki wanang, tu̱ ɗa vaanda nu̱ mbu̱ ghaiku nu̱ke a Likoniya, nang ke ghai Listu̱ra ndu̱ Darbe, kom ndu̱ ɓeena maaku mbu̱ dlar ghayang. 7Tu̱ zu̱m guma ndu̱ wopar Labar Mbarkandang fara.

Bulus wa shi Waazu mbu̱ ghai Listu̱ra

8Yang mbu̱ ghai Listu̱ra khuski nggur a nje nu̱ke zu̱ɓtan sar da nu̱ khatl yi ɓa ma nu̱ khaki nda. A nje kharan, 9a tu̱k ɓalar ɓu̱ Bulus. Tu̱ Bulus nja yitan nu̱ mbu̱ ɓaran, nu̱ Bulus naki maito ɓaran ka shaana nda, 10tu̱ da su̱quran nu̱ viɗi tu̱ zu̱ za, “Ju to ching gha nu̱ mbu̱ saaroro.” Tu̱ khuskyang ku̱m ji tu̱ nggaasi yiri.

11Nu̱ tabar ndukyang naki ɗyi nu̱ Bulus shiki, tu̱ da su̱qur wor nu̱ viɗi guma da a zu̱ran ku nu̱ me ghai Likoniya za, “Uughu, maghamndiku a zhur yerem mbu̱ shipar ɓu̱ nduki!” 12Tu̱ qa Barnaba ku za, Zeyus, tu̱ qa Bulus za Khermes, ku̱me chin dlu̱ki gume ɓalarang. 13Tu̱ kuru ɓu̱ Zeyus, nu̱ke maa konom ɓaranang a qu̱rse ghayang, ɗu̱ tu̱ ɗa ɓa ndu̱ dle ku ndu̱ viiri qu̱fa me vi garuk ghayang. Tu̱ dle gume konomang ndu̱ nduki ɓaran shim dla qur dle ku ma sadke su̱ ye Pudekwang.

14Yang nu̱ pudeku nang, Barnaba ndu̱ Bulus tu̱kki wanang, tu̱ ɓyakh luktiku ɓaanda nu̱ gha ku̱me su̱bu̱rti memu̱na. Tu̱ ɓu̱tl nu̱ mbu̱ tabar ndukyang ɗyin ɗa a zu̱ran ku za, 15“Nu̱m saki tun ka shi ki wanangang na? Ai, chem nduk wa tunu, chem a ɓa kya ndu̱ Labar Mbarkandi ye nu, ku̱me njig nu ɗyi bamndiku nang tun a gaɓ nu̱ she Magham nu̱ nyifiri. Chin nu̱ du̱ngki maa viɗi ndu̱ maa vu̱ghai ndu̱ ɗyim chitndi ndu̱ ɗyi nu̱ke a mban kap.#14:15 Nggu̱t tu̱k mbu̱: Viri 20:11; Zab 146:6. 16Zhu wa njig nduki tu̱ shi ɗyi nu̱ke a shimndan ku, 17yang kap ndu̱ nang sar da nu̱ njig ɗyinan waare ɗye saidu ɓa. Chin ke nu̱ vu̱r romndi ye nu mbu̱ viɗi ndu̱ boote dam mbarkandi. Wa zhi mbonu ndu̱ ɗye zu̱mndi, tu̱ sa nu tun kha ndu̱ ɓong memu̱na.” 18Yang kap ndu̱ ɓalar nu̱ shiki ku nang, wa za bonyeku me ku̱ nggu̱tl nduki nang ndu̱ shir sadkyang ye wora.

19Yang nu̱ Yakhudeku nggur a jiiki Antakiya ndu̱ Ikoniya ta ɓa ku tu̱ za ɗyin ndukyang, tu̱ da ndogdi ku tu̱ mbuk Bulus tu̱ ku̱du̱r nda nu̱ qu̱rse ghayi a tamandan ku za wa mu̱ɗi. 20Yang ni nu̱ mbu Yesu ku karaki nda tu̱ ji tu̱ gaɓ nu̱ mbu̱ ghayi. Vi dumaaran tu̱ ɗu̱ ku Darbe ndu̱ Barnaba.

Gaɓti nu̱ Antakiya nu̱ Suriya

21Nu̱ Bulus ndu̱ Barnaba wopaki Labar Mbarkandang mbu̱ ghai Darbe, tu̱ gwa nduki nu̱ mbuki Yesu ku khang. Tu̱ gaɓ ku nu̱ Listu̱ra ndu̱ Ikoniya ndu̱ Antakiya nu̱ Pisidiya, 22a pa du̱mbu̱r ye nu̱ mbu Yesu ku, a mata wor ku̱ ching gha ku nu̱ ɗyine maito ɓaanda. A zu̱ran ye wor za, “Chem ka vi nu̱ mbu̱ kwaaɗar ɓu̱ Magham yang kope chem wa za bonye maɗyikandi dong.” 23Qu̱rse wa dat dlegumeku ye tabar ɓu̱ nu̱ mbu Yesu ku nu̱ mbu̱ aa nyi ghai, tu̱ sa wor nu̱ mbu̱ khar Maghamndi nu̱ maitaki nda kwang, su̱yen ndu̱ barar ndu̱ zhumti. 24Nu̱ mbuki ku mbu̱ Pisidiya tu̱ ɗu̱ ku Pamfiliya. 25Tu̱ wopa ɓalar ɓu̱ Magham ku mbu̱ ghai Parga tu̱ peeta nu̱ Ataliya.

26Tu̱ dla du̱mbu̱l ɗyim ku nje tu̱ gaɓ ku nu̱ Antakiya. Nang ke ye maa nu̱ khuɗki mu̱nkir ɓu̱ Magham gumapaali ma ku̱ khutlo wor mbu̱ tlu̱nar nu̱ woɗaki ku nang. 27Nu̱ khu̱lki ku, tu̱ taba nu̱ mbu Yesu ku tu̱ vu̱r labar kap ɗyi nu̱ Magham shiki nu̱ ku̱nshe wora, kom ndu̱ njiv maito nu̱ Magham qu̱nki ye nduki nu̱ke ɗya Yakhudeku ɓa. 28Tu̱ shoɓ ku far su̱yen ndu̱ nu̱ mbu Yesu kwang.

Currently Selected:

Tlu̱nar ɓu̱ Pudeku 14: ttrNT

Highlight

Copy