Mark 8
8
Satekon-aton nateioteriȣasonterakȣen tsini hoiaton Roiatatokenti Mark.
1Kentiokoȣanen are nethone ronȣanonteratieskȣe ne Iesos, tanon iah othenon tehotiien niieks, nese ȣaonni iasakononke ne raotiokȣa, Sahenron!
2Oriȣiio tsi khetenre kehiken teȣakanitiokȣaton, onen asen nonta shiionkariskonton, iah oni othenon tehonatennatseraien.
3Tanon nakaȣentakon aonsakheiatori enhiakonoronse tsiniiohahes aseken otiake ihnon nitiakaȣenon.
4Tontahonȣaȣennaȣeron ne raotiokȣa, ȣahonniron: ionikonrokta kiȣahi naiakȣanataratsenri ne kenhnonȣe tsinikon iatakaieri naiakotane.
5Ȣasakoriȣanontonse, ȣahenron: toh nikon Seȣanataraien? Tontahonniron: tsiatak.
6Ethone ȣasakorori nonkȣeokon akȣekon ehtake aiontien, ȣatrakȣe ne tsiatak nikanatarake, ȣahaiatateriste, ȣathaiakkon iasakaon ne raotiokȣa nok ne rononha onkȣeokon iaonsasakohnon.
7Sekon tokara nihotitsiaientakȣe, eh kati oni neneh nahaiere ȣahaterennaienhase nok ȣahenron: ietsiion oni neneh.
8Ȣatonstskaon kati, nok akȣekon oni ȣahonatane, tanon tsiatak niȣasenontserake ȣakanane tsinikon ȣahotikkȣine.
9Neh nahoten ne kaieri niȣenniaȣehetserasen niionkȣetake ne ȣatonstskaon; ethone onen tonsasakoreniate.
10Nok oksaok ne raonha oni ne raotiokȣa tonsahatiiaiake Dalmanutha niiaonne.
11Ethononh nathontatken Pharisian ȣathatiriȣatirontonko, nok ȣathonȣanikonraserakȣe ȣahonȣaneken enskat asakonatonhase ne ioriȣanerakȣat karonhiakeka.
12Nok ne Iesos rahonikonrakon tontaronniserenne, nok-ȣahenron: Oh nahoton kariȣanontontta ne ioriȣanerakȣat kehiken niionkȣetoton? Oriȣiio tsi kȣarori tsi iah taontkatto.
13Ok eh tasakotkaȣe nok ionsahatita oni tonsahatiiaiake.
14Ok iah tehoneiaraon nahotinataraninonke onen enskatok sishotinataraien.
15Kenh kaien enskat ȣasakotiaȣenratse; ȣahenron: Seȣatsanisek ne Pharisian oni ne Herod raonattenkȣatta.
16Rontonhakȣoe ne rononhake; neh ȣahi tsi iah teionkȣanataraien.
17Nok ne Iesos roterientaratsion tsinahoten ronnere, ȣahenron: nahoten neneh seȣatroriaton tsi iah teseȣanataraien? iah ken teseȣakahenhions, iah oni kenh teseȣanikonraientas? Sekon oni kenh oni nise tetiseȣanikonrakaras.
18Teseȣakarat nok iah teseȣatkattos? Teseȣaontakaronte nok iahkenteseȣaronkas? iah oni ken teseȣaien naonseseȣeiarane?
19Toh niȣaterake ionanonhon ne rotikkȣihon Sahatinatarake neȣisk nihonniaȣehetserasen ne ȣisk nikanatarake kheiakhonni? Tontahonniron tekeni iaȣenre.
20Nok ne tsiatak nikanatarake, toh neneh nikon rotikkȣihon ne kaieri nihonniaȣehetserasen? tontahonniron tsiatak.
21Tontahenron oh katine kenh niiot tsi iah teseȣanikonraientas tsi nahoten kiton.
22Nok nonen sihiaharaȣe Betsaïda eh ȣahonȣaiatheȣe saiatat teharonȣekon ȣahonȣennitenten nahotsiente.
23Iahonentsa nok ȣahoiatotarho tsi ionkȣene tsiniiore iatekanatakte, ok neneh raostskeri ȣaharho rakarake nok ȣahonisnonsaerhase, nok ȣahoriȣanontonse nothenon ahatkattoseke.
24Ȣahenron ne ronkȣe tsi ȣathatkatonnion, eh niiot tsi khekens nonkȣe ihiens tsiniiot ne karonta akenhake,
25Sekon ne Iesos iatonsahanisnonsaren rakarake, nok ȣahorori tahonsahatkathonnion; onen iakaierine akȣa oni tehakariios.
26Ethone tsi thononsote ionsahotori, nok ȣahenron: tosa kanatakon niionsase tosa oni onka sherori.
27Ethone are onen sahontenti neh nonȣe tsi tionatakȣenrare ne Cesare-Philipp niiahonne. Tsi niiohahes eh ȣasakoriȣanontonse ne raotiokȣa, tsi nahoten aiontonheke nonkȣesonha ne raonha raiatatake?
28Tontahonniron: otiake ionton ise ne Saȣatis, otiake, Elie; nok notiake ionton Rotokense.
29Tontahenron: onka kati nise iseȣere nʼii? Tier tahatati, ȣahenron: ise ne Keristos.
30Ȣahateȣennakȣisron tsi ȣasakotiaȣenrastse neh niiot tsi asakotirori onkakiok oni akenhake.
31Ethone oni onen ȣasakonikonraientaten tsi iatekakonte eso enharonhiaken nʼOnkȣe Roienha, tsi enhonȣateȣentete ne ratiianerenseronni, ratitsihenstatsiokon nok oni ne ratiiatons, enhonȣario, nok ki tanon tsi ensatonnhete nasenhaton nenȣata.
32Akȣa iah othenon tehoriȣarhoron tsi neh rotharakȣenhatie; nese ȣahonni ne Tier ȣahoriste nok ȣahoriȣasten.
33Tontahatkarhateni ne Iesos ȣasakotkathoseron ne raotiokȣa, ȣahoteȣennateten ne Tier nok ȣahenron: ehren iset ne kiatakta Satkonseraksen; aseken iah tehonikonraientas ne Niio raoriȣasonha neok nonkȣe akoriȣasonha.
34Iasakononke nonkȣeokon oni ne raotiokȣa nok ȣahenron: Onkakiok enhienrheke rinonieratie, akȣa niare ratateȣentet nok terak ne raoiasa nok rakser.
35Aseken nenhionskennha tsi iakonnhe, enhiakotonsoe; nok nii akeriȣake, oni aksennakon enhionteȣentete neh enkonȣaniakente.
36Nahoten nah oni aionstste nonȣentsiakȣekon taiontentsa, nok aiontetsirate nonakenke?
37Ok ne ens, oh nahoten tahatataȣistakȣe ne ronkȣe ne raotonnhest?
38Aseken onka enhionkatehase, ok ne ens nakeȣenna, kentho tsi ionȣentsiate kariȣaneraakserakon, enshotehase oni noneh nʼOnkȣe Roienha nonen tentre enthoiatanerakȣatonhatie Roniha raoiatanerakȣatsera oni ne raoronhiakeronon okon.
Currently Selected:
Mark 8: MHK
Highlight
Share
Copy
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
