Luke 8

Satekon aton tehioteriȣasonterakȣen Oriȣatokenti tsini hoiaton Roiatatokenti Luc.

1ETHONE are onen tonsahaststekafa tsi kanataienton oni tsi ionatakȣenraron, roteriȣanotatie oni rotrorihatie tsini kanakeraseroten ne Niio raonakerasera; nok ne tekeni iaȣenre nihati Ratikȣekonne neh ronneskȣe.

2Tohka oni nikonti tsiohnatonȣisen nehne sesakotsienton tsi ionatiennine notkonseraksen oni sekon tikannratesonha; neh eh kontiiatare nʼOnȣari konȣanatonkȣakȣe ȣari-ȣatere nehne tsiatak niiotiennine nʼotkon.

3Tanon, Sann, Cusas rone neh ne Herod roststeristasehakȣe raoriȣasonha; nok Susann, sekon oni ionentiokoȣanen ne ronȣaiatakennhenhatieskȣe tsinonkati nahotiientatserakon.

4Nok tsini kentiokoȣanen etho iakoteroronhatie, oni tsi kanataienton tionientionkȣaskȣe ronȣaiatorenhonhatie, kenh nahaiere tsi ȣatesakoriȣaken tonkȣen.

5Saiatat ne ronkȣe ȣahaienthosera ne raonatsia; tsi kati ronatsiontionhatie, otiake nonatsia ohohaktontie ȣakakerontane, ȣationskȣaseronkȣate onkȣeokon tanon otsitenhokonha takonneke.

6Otiake oststenrake ȣakakerontane; nok nonen sahkanio oksaok onstathen aseken iah ki tetiotonris tsi tiohniote.

7Otiake ohiktokon iakakerontane; takonnetakȣe nehne tsi takonteiaron nok ȣahotirio.

8Nok otiake tsinonȣe niionȣentsiio iakakerontane, ȣakonteiaron nok ontonnisa otiake enskat teȣenniaȣe ȣatkananeta tsi onteiaron-ȣathohenrete tsi iaharihokten, ȣahenron: Ionronk ne teionhontakarontakȣen naionronkate.

9Nok ne raotiokȣa ȣahonȣariȣanontonse oh nahoten kenton tohiken tekariȣakentonkȣen.

10Tontahenron: ietsiiaȣi nise naeseȣariȣaienterhane tsiniiot ne Niio raonakerasera; nok tanon ne rononha neok ne tehonȣatiriȣakentonkȣennis, ne tosa tahatikaraientane tsi enhontkatto, nok tosa ahotinikonraientane tsi enhonronke.

11Kenh kati kaien kenton ne tekariȣakentonkȣen; Onatsia, nehne Niio raoȣenna.

12Kenh kaien nohahaktatie iokerontaon, neh iakoton, ne iakotaonsate noȣenna; nok ki Otkon onaken tare Shatakȣas noȣenna nakaȣeriane, onȣa sotsi enhieniakenne tsinonkati Kaiatateritsera naontaiaketakȣe.

13Kenh kaien nʼoststenrake iokerontaon, neh iakoton ne ȣaontonnharen tsi ȣaonronke noȣenna, nok ki tsi iah teioteronte: neki ok ne iateȣaktatha tsi tiaketakȣa, nok nonen kanikonrotakȣenke Kahtonte tiienskonne,

14Kenh kaien nohiktokon ieiokerontaon, neh iakoton nonen konȣaȣennaienteri nok ki eh nonkati tsiakoiatontieton tsini iorihoten nonȣentsiakeka, teiakohnikonrhare atsokoȣatsera oni kanaiesera, neseȣaonni iah ki tiieȣatonnisahas.

15Nok kenh kaien ne tsinonȣe niionȣentsiio niiokerontaon, neh neneh iakoton ne konȣaȣennaronken, akaȣeriane iakaȣeten oni iakoteȣeienton, nok kanikonriiotserakon enkanorari.

16Iah ȣahi neneh onka nʼoksaok aienakoroke nonen ȣaehaseroten. Iah oni ȣahi ne kanaktokon tiiaionsete; iehaserotakȣake tanon enhienioten, naontkatto tsiniiakon iontaȣeiatha, oni taiakosȣatheten.

17Aseken iah tekaien ne ioteriȣaseton ne iah taonterihotasionhe, iah oni othenon ne kariȣarhoron iahȣene taontonsere.

18Seȣanikonrarak kati tsiniiot tsi seȣathonte: aseken onka roien, sekonse enhsonhion; nok niah othenon tehoien, sekon oni tsinikonha roienha enshonȣakȣa.

19Ethone onen etho ȣaonneȣe ne ronistenha oni ne rontatekenha; iah tanon teiotonhon nakta ahoneton sotsi kentiokoȣanen, tehonȣanitiokȣaton.

20Iahonȣarori kati, ȣahiron: sanistenha oni seȣatatekenhokonha kentho astste thonnete nok iesaiatisaks.

21Tontasakoȣennaȣeron, nok ȣahenron: neh ne ronȣaȣennarakȣa oni ronȣaȣennanoronkȣa ne Niio neh Akenistenha oni akatatekenha.

22Ohnakenke kehiken onen are kaonȣakon iahatita oni neraotiokȣa, nok ȣahenron: teteȣaiaiak, nensok ȣathatiiaiake.

23Nok tsiniiore niiahonne eh ȣahotaȣe; ioȣeratsanit ȣahotiiena tsini kaniatara akȣa ȣatnekitahas nok skanorons ahatiskone.

24Ethone kati onen ȣahonȣaiete, ȣahonniron: Seȣenniio! Seȣenniio! ȣateteȣenheie. Tontahatane, nok ȣasakotarhase tsi iahote oni tsi ionontakȣarontonties; Akȣa oksaok ok skennen tsi tonsakaȣeriiake.

25Ethone ȣasakaȣenhase: kah nekenh akȣa nitiseȣetakȣen? nok tanon ne rononha neok ne rohnateronhientenni, nok rontonhakȣe: Onka naha onte akȣa kehiken ok tisakoȣenniio noȣeron, onekanos, nok ronȣaȣennarakȣa?

26Nok eh nonȣe niiahonne tsi thatinakere ne Gadarenianronon, Galile teiotiniatara.

27Akȣa neok iahatitako, Saiatat tontahoterate neh nonȣe nihanakerekȣe, neh nonen ȣaonnise sihotienni nonesonronon, akȣekon iah tehotseronni iah oni kanonskon tehatienskȣe, oststenrokonson tihanakerekȣe.

28Akȣa neok ȣahoken ne Iesos, ȣathohenrete, nok ȣahosennaien, ȣathoionstsothase nok ȣahenron: ohnahoten ionkeniriȣaien, Iesos, Niio Iaienha? Konnekennis tosa askeronhiakente.

29Aseken ne Iesos rattetanihakȣe notkon, ratonhakȣe oni iosnorenn tontatsiakenn, aseken onen ȣaonnise sihonaskonnis; eso ioriȣake oronkȣasa ronȣanerenkston nok akȣekon niiatehoiakhon, nok karhakonson tiienhoiatenhaȣe notkon.

30Iesos ȣahariȣanontonse notkon ȣahenron: Nahoten iesaiasts? tontahenron: kentiokȣa. Ne tsi onen siionentiokoȣanen nonatkon sihonȣatienni.

31Ronȣanekennihakȣe kati ne Iesos, tosa Onesson iahonsasakotori.

32Iah ihnon tehken tionontahere eh tkonneskȣe ionentiokoȣanen kȣiskȣis, nok ȣahonȣaneken nasakaon ne kȣiskȣis iaonsaiakonataȣeiaten; nokȣasakaon.

33Sahonȣatkaȣe ne ronkȣe, nok iakonttakȣarisiate kȣiskȣis ionsaiakonataȣeiaten; ok eh nontontenenrakarhatto nekȣiskȣis kaniatarake ȣakontiatonti nok akȣekon etho ȣakonniheie.

34Oksaok nehne sakonteko ne sakonaststeristakȣe, sahatiriȣaienna kanatakon, ok oni thiiatonteriȣareniate.

35Ȣahaiakenne nonkȣeokon ȣaontkensera tsinontaiaȣen, nok eh iakanenraserenne tsi thenteron ne Iesos, eh oni ȣahonȣaken notkon rotiennine, Iesos rasitakta renstskȣahere, shotseronni, akȣa oni skennen tatethanikonraieri, nok ȣahakoteronhienten.

36Kenh kaien noriȣakȣekon ronatkathon ȣasakotirori tsi nahaȣenne tsi sahaniakenne notkon rotiennine.

37Ethone kati onen akȣekon ok ȣahonȣanekon ne ehren ahonsarete ne rahononȣentsiake; netsi sotsi ronateronhientennine. Sahatita kati kaonȣakon nok sahatenti.

38Nok notkon rotiennine, ȣahoneken nahnesheke; nok ne Iesos ok eken sahotekȣate nok ȣahenron.

39Sasatenti nok serihoȣanat tsinaientenre ne Niio, Sahatenti kati nok kanatakesson rorihoȣanatonhaties tsi nahotenre ne Iesos.

40Nonen siionsaraȣe ne Iesos; akȣekon ok taiontonnharonnion; aseken thonȣarharekȣe.

41Saiatat eh ȣahoketote Jairus ronȣaiasts neh ronȣakoȣanen nesakonatatis ȣathotonstsothase ne Iesos, nok ȣahoneken nahathontate iahre tsi thononsote.

42Aseken onen tiahiheions ne sakoienha neok oni enskat roȣiraien nehnahoten ne tekeni iaȣenre teiahoseriiakon. Ok kati ok eh iotiokȣentonhne nonkȣeokon tsi nihre ne Iesos.

43Skaiatat kati tsiothonȣisen etho kaiataratie nonen tekeni iaȣenre niioserake siiononȣaktanitta naonekȣensa, onen oni siieiosahaton tsinikon tsi oni nahoten ioientakȣa iakonnhatakȣe rontetsiens, iah ki othenon tehotiriȣakȣenion naonsakaieȣentane.

44Akȣa skenenha ohnaken nontaȣe, nok tsi tetkakȣatton neraotiataȣi iakaiena; akȣa ok saok ȣatkatane naonekȣensa nok sakaieȣentane.

45Iesos tontahatkarhateni, nok ȣahenron: Onka kenh niiaonkiere? akȣekonok iontonnhiiakȣe; Tier tahatati, nok oni notiake, ȣahonniron: Seȣenniio! ieiothe kati kenh nekenh ok tiiotonhiototatie tsi iteȣe: tanon saton onka kenh niiaonkiere?

46Tontahenron: Onkase kiok kenh niiaonkiere: aseken ȣakattoke tsi ȣakaiakenne niihne nakatanitenresera.

47Ethone ne tsiothonȣisen Sahonikonraientane tsi iah tehoteriȣasetenni tsi nahaiere, ioiatissonkȣane rasitakta ȣateȣatonstsoten, nok kanenrakȣekon iakottonte tsi ontrori nahoten ahoriȣake kenh niiakaiere, nok oni tsi oksaok sahaieȣentane.

48Nok ȣarenhase: kien, tosa sateronn: neh sesatsiente tsi tisetakȣen; ȣas skennen sasatenti.

49Sekon ok nihotaratie, eh ȣaraȣe ne sakotatis raonnhatsera, ȣahenron: onen iaȣenheion ne tsienha, tosa kati taonsatsenikonrharen ne Roianer.

50Iesos ȣahohonsonkote, ȣahenren: tosa sateronn; neok ne tasetakȣenhak nok enskaieȣentane.

51Nok nonen siiaonneȣe tsi tkanonsote, iah onka nakoren tesakoiatinionton ne Iesos neok ne Tier, Sak tanon San, oni nehne kaiatase konȣaienha.

52Akȣekon ok tehonsenthoserons, rontatonstskȣenaiahakons tsinikonȣannhatens oni tsini hotinikonranonȣaks; ȣasakaȣenhase kati: Tosa teseȣasentho: iahseteiaȣenheion, neok se neiotas.

53Ok tihonȣaieronhakȣe aseken ronaterientare tsi oriȣiio iaȣenheion.

54Nok tanon nonen akȣekon sonsasakoiatinekenȣe, Iahanentsa, nok ȣahenron: tsiatase satkestsko.

55Sonȣe naonikonra, nok sontkestsko; nok ȣasakorori nakonȣanonte.

56Kenh kaien ne rotikstenha ȣahotinerako; nok tanon ȣasakotiaȣenrastse nasakotirori onkakiok akenhake tsi nahaȣenne.

Currently Selected:

Luke 8: MHK

Highlight

Copy

Want to have your highlights saved across all your devices? Sign up or sign in

Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.

The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).

Learn More About Ohiatonhseratokénti