Genesis 9
9
Naterihwahsehronniáhtshera Skát꞉ne Ne Noah
1Rawenni꞉io wahoiaʼtaté꞉rihste ne Noah ó꞉ni ne raonekenhterontsheraʼshón꞉ʼa tánon waʼhshakawènhase, “Sewahwatsirowáhnha tánon sewentiohkowáhnha, tontasewá꞉raʼn ne tsi ionhwentsá꞉te. 2Tsi niiesatshá꞉nis tánon kwáh í꞉ken tsi eniesatshahní꞉sheke tho nón꞉we neniotatén꞉ronke ne kwáh tsi niaʼtekón꞉ti ne kontitshé꞉nens ne tsi ionhwentsá꞉te, tánon ne kwáh tsi niaʼtekatsiʼtenʼserá꞉ke ne tsi karonhiá꞉te, ne niatekón꞉ti ne konté꞉seres nonhwentsá꞉ke, ó꞉ni kontikwé꞉kon ne kentsonʼshón꞉ʼa ne kaniataraʼkehkowá꞉ne; sahtsahnà꞉ke nón꞉we nakonwanáhtkaʼwe. 3Kwáh tsi nahó꞉ten ne kontoriá꞉neronʼs ne konnónhnhe ne sákhwa enkénhake; tánon kwáh tsi nitkonhiá꞉wi nohoteʼshón꞉ʼas ne iotenénha, akwé꞉kon takón꞉ion. 4Ne khók, tóhsa enhseʼwá꞉rake ne iotenekwénhsa, asèkenh thóh onekwenhsà꞉ke nón꞉we niká꞉ien natónhnhets. 5Tó꞉ka, ónhkaʼk aiontatáhsehteʼ nakó꞉ren nón꞉kwe, kwáh kíʼ í꞉i enionkeʼnikonhraientáhten nontié꞉ren tsi thóh naiá꞉wenʼne: kwáh ratikwé꞉kon né kontitshé꞉nens kwáh ne saʼorí꞉wa tsi enkeriʼwanón꞉ton tánon kwáh ó꞉ni tsi nokwá nonkwehshón꞉ʼa, tóka ónhkak aʼiontatáhsehte kwáh kíʼ enionthré꞉wahte.
6Nónhka aiontatenonhwariá꞉kon nón꞉kwe,
akó꞉ren nón꞉kwe entiontatenonhwariá꞉kon;
aseʼkénh kwáh tsi nihatkathohtsheró꞉ten
ne Rawenni꞉io tsi shakoiaʼtíson nón꞉kwe.
7“Ók ní꞉se, sewathwatsirón꞉ni tánon sewentiohkowáhnha, thontasewá꞉raʼn tsi ionwentsá꞉te tánon sewentiohkowáhnha.”
8Eʼthó꞉ne ne Rawenni꞉io wahawénhahse ne Noah tánon ne raonekenteronʼtsheraʼshón꞉ʼa ne skátne rón꞉neʼskweʼ rá꞉ton, 9“Ní꞉i iaʼtetià꞉ti, wakonnihátie nakaterihwahsehronniáhtshera tsi naʼtetiátere ó꞉ni tsi nienhsathwatsí꞉rine ne kén꞉ʼen ieniótiehteʼ, 10tánon kwáh tsi niaʼtewatonhnhnehtsherá꞉ke ne sewakwé꞉kon, notsiʼtenʼokón꞉ʼas ó꞉ni ne ienáhskwaiens—kwáh tsi niaʼtehá꞉ti ne kontírioʼs ne tsi ionhwentsá꞉te ne skátne sewaiaʼtí꞉tahkwe ne kahón꞉wakon tánon ne skátne sesewatitáhko ne kahón꞉wakon, tsi nihá꞉ti ne sahontitáhko ne kahón꞉wakon tánon tsi nihá꞉ti nenhonnónhnheke ne tsi ionhwentsá꞉te né kén꞉ʼen eniótiehteʼ. 11Tsi Wakonnihátie nakaterihwahseronniáhtshera waʼkonhrharátsten ní꞉se, tsi iáh nonwén꞉ton shé꞉kon ne iakónhnhe thaonsaiakóhtonʼte nohnékanos nawenhnóton, tánon iáh shé꞉kon nonwén꞉ton naonsonhwenhnó꞉ton né tsi ionhwentsá꞉te.” 12Rawenni꞉io wahén꞉ron, “Ne kí꞉ken enkaieronnitstáhkwen naterihwahseronniáhtshera neʼthó enkón꞉ni tsi naʼtetiátere tánon kwáh tsi nahó꞉ten ne iónhnhe neʼthó skátne íseweʼs, kwáh ratikwé꞉kon tsi wahatinekwenhsatátie: 13Thóh nón꞉we niwátien nakaʼén꞉na ne tsi iotshatarónnion, tánon ne enkaieronnitstáhkwen naterihwahseronniáhtshera tsi naʼteiatiátere ne tsi ionhwentsá꞉te. 14Nó꞉nen entétkawe notshataʼshón꞉ʼas ne tsi ionhwentsá꞉te tánon naʼén꞉na enhontkáhtho ne tsi iotshatarónnion, 15Kwáh enkehiá꞉raʼne nakaterihwahseronniáhtshera ne꞉ne tsi naʼtetiátere tánon tsi nihá꞉ti ne ronnónhnhe; tánon nohné꞉kanos iáh shé꞉kon nonwén꞉ton thaonsawenhnó꞉ton thaonsaiahkòhtonʼte ne ionnonhnhénion. 16Ne nó꞉nen naʼén꞉na tsi iotshatarónnion nón꞉we ní꞉weʼs, kwáh kiʼ enkatkáhtho tánon enhkehiá꞉raʼne ne꞉ne tsi nén꞉we enká꞉take naterihwahseronniáhtshera tsi naʼtehóntere ne Rawenni꞉io tánon ne ronnonhnhénion, tánon kwáh tsi nahó꞉ten ne iónhnhe ne tsi ionhwentsá꞉te.” 17Eʼthó꞉ne ne Rawenni꞉io sahawénhahse ne Noah, “Ne kí꞉ken weʼnéhstha naterihwahseronniáhtshera ne wákson tsi naʼteiakwáhtere tánon ne ronnonhnhénion tsi ionhwentsá꞉te.”
Noah Tánon Ne Raonekenhteronʼtsheraʼshón꞉ʼas
18Ne raonekenhteronʼtsheraʼshón꞉ʼas ne Noah tahatiiá꞉kenʼne ne kahón꞉wakon ne ne Shem, Ham, tánon ne Japheth. (Ne Ham né ieshoién꞉ʼa ne Canaan.) 19Kí꞉ken áhsen nihá꞉ti ne ne Noah raonekenhterontsheraʼshón꞉ʼas; ronnónha nón꞉we nontakaiénhtahkweʼ tsi kahsótshera ronatón꞉ʼon ne tsi ionhwentsá꞉te.
20Ne Noah, raónha thotonkweʼtatierénhton ne tahatonhontsá꞉rihte, wahaʼnenʼharaiénthoh. 21Wahahnekí꞉ra notsí꞉tsa tánon wahononhwaráhton, tánon tsi raiaʼtión꞉ni raoʼtohserá꞉kon kwáh raonehóhskonʼk thikèn꞉ne. 22Tánon ne Ham ne roién꞉ʼa ne Canaan, wahó꞉ken ne roʼníha raonehóhskonk thí꞉ken, tánon iahshakohró꞉ri ne tehniiáhse rontateʼkenʼokón꞉ʼa ne átste ítneʼs. 23Eʼthó꞉ne ne Shem, tánon ne Japheth atiá꞉tawi iahníhawe, waʼkthiatirón꞉ten natiá꞉tawi tánon tsi naʼtehiatnenhsátere wahniié꞉na, tánon ohná꞉ken wahiahténtiáʼte tsi ionsahiatá꞉weiaʼte naʼtohserá꞉kon tánon wahonwà꞉rahse tsi raoʼnotstóskonk thikèn꞉ne ne ronwaʼníha; ákte niehonatierá꞉ton, iáh kiʼ tehonwá꞉ken ne ronwaʼníha tsi raonehóhskonʼk thikèn꞉ne. 24Nó꞉nen ne Noah shonsahatnekó꞉kewe tánon waháttoke tsi nihoierá꞉se ne kenʼnierá꞉ʼa roién꞉ʼa, 25wahén꞉ron,
“Ratré꞉waht ne Canaan;
ne ne kwáh thoʼnonhkwí꞉sen tsi ronwatenahskónniaʼt ne rontateʼkenʼokón꞉ʼas.”#9.25 Né Hebrew nowén꞉na Atateʼkèn꞉sera ahón꞉ton ne akèn꞉tonhkwe ronwanonhá꞉ʼa.
26Kwáh ó꞉ni wahén꞉ron,
“Thón꞉ion ne kanonhweratónhtshera ne Roiá꞉ner ne Raoní꞉io ne Shem;
tánon ánion ne Canaan ne ronwatenahskónniaʼt.
27Aiá꞉wens ne Rawenni꞉io ahotenatowanáhten ne Japheth,
tánon ronwaríhon tho renʼterón꞉tak raoʼtohserá꞉kon ne Shem;
tánon ánion né Canaan ronwatenahskónniaʼt.”
28Ne sontóhetste tsi iowehnó꞉tonhkwe; ne Noah áhsen tewenʼniáwe tánon wísk niwáhsen niiohserá꞉ke nikarí꞉wes srónhnhehkwe. 29Norihwakwé꞉kon tsi nihothenhniseraténionkwe ne Noah tióhton tewenʼniáwe tánon wísk niwáhsen niiohserá꞉ke; tánon wahrénheie.
Currently Selected:
Genesis 9: MHK
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.