Mark 8

Cecoc e acamatc newaw kice mitato mitana iriniwa

(Natawapata kaie Matio 15.32-39)

1Ani apitc kiapatc micta mitcet iriniwok ki mawotcihitowok neta ka ici kiskinohamakespan Cecoc. Nac nama otci takoniw ke mitcikik aniki iriniwok. Aci Cecoc wicamew owitcewakana e itatc: 2“Ni kitimakerimawok aniki iriniwok. Aci meka nicto kickwa esko pe witci tacikemitcik ota, aka tca tekaci e takonik kekociciriw ke mitcikik. 3Kecpin kiweticohwakenak aka e mitcisotcik, kata iti pakiciniwok meskanak e kiwetcik. Warawik meka ki pe ototewok atita.”

4Itiko anahweriw owitcewakana: “Tante tca ke ki otinamak mitcim kitci acamawikok ni tca e tacitcik iriniwok, ota e ici cipewatawokak?”

5Kokwetcimikowok Cecoca: “Tan e tacitcik kipakwecikanimiwawok?”

“Nicowaso#8.5 Nicowaso: (7) taciwok,” itewok.

6Aci Cecoc itew anihi iriniwa e mitcetiritci kitci aipiritci motcik. Minawatc ki otapinew anihi e nicowatciritci pakwecikana. Mikwetc ki itew Kice Manitowa. Ki pakwepitew. Ki mirew owitcewakana kitci mamiraritci kaskina anihi iriniwa. Ki tca papakitineriwa. 7Atita namesa kirika taripana. Mikwetc ki itew kiapatc Kice Manitowa, kirika ki itew owitcewakana kitci papakitinaritci. 8Tato nta e tacitcik ki mitcisowok aniki iriniwok, kaie ki miro tipipariwok. Ka ickwa mitcisonaniwonik, Cecoc owitcewakana ki mawotcitawok kiapatc nicowaso pakitenakaniw#8.8,19 pakitenakaniw: Kekotc: mackoci orakaniw; otapi orakaniw. e mockinerik mitcimiriw e ki ickoparinik. 9Aniki iriniwok ka ki mitcisotcik, wiec newaw kice mitato mitana taciwakopan. Minawatc Cecoc ki itew anahweriw iriniwa kitci kiweritci. 10Ki positcimew kirika owitcewakana, nete e icitcimetcik Dalmanoutha askik#8.10 Dalmanoutha askik: Nama kiskeritakon tante mia e ici takok anihe aski. itekera.

Pharisien iriniwok e nataweritamawatcik Cecoca kitci mata kackitaritci

(Natawapata kaie Matio 16.1-4)

11Minawatc Pharisien iriniwok ki pe takociniwok. Ekoni e iti aimihitotcik kirika Cecoca. Wikokwe paciwirewakopan Cecoca arotc kitci iteritci, ke ki otci itactahorakaniwiritci. Ekoni tca e ici nataweritamawatcik kitci mata kackitaritci, kitci wapatahikotcik Kice Manitowa e ki mirikoritci aniheriw ka ici kackitaritci. 12Ki micta iskotamo Cecoc, e itetc: “Kekwariw wetci micta nataweritakik anotc iriniwok kitci mata kackitakaniwonik? Tapwe ohwe ka witamatakok: nama kata mirakaniwiwok kitci wapatakik aniheriw.”

13Minawatc ki nakatew anahweriw iriniwa. Ki positcimew e acohak, akam sakihikanik e icitcimetc.

Ociwockitcitcikaniwaw Pharisien iriniwok kirika Hérode

(Natawapata kaie Matio 16.5-12)

14Ki onikepanak aniki Cecoc owitcewakana kitci matcewitatcik mitcimiriw otcimaniwak. Tepirak peikociriw pakwecikana. 15Aci itikowok Cecoca: “Aiekwamisikw! Nanakatcihitisokw aka kitci apatcihimekw ociwockitcitcikaniwaw Pharisien iriniwok, kaie okimaw Hérode anihi!”

16Aititowok Cecoc owitcewakana: “Pot wetci aitetc aniheriw, osam aka e opakwecikanimiikw.”

17Kiskerimew Cecoc ani e aiteritamiritci. Aci kokwetcimew: “Kekwan wetci iteiekw ‘osam aka e opakwecikanimiikw’? Nama ia ni moci ki nisitotenawaw? Nama ia ni ki kackitanawaw kitci mamitoneritamekw? 18Takon kickicikowaw. Nama ia tca ki wapatenawaw? Takon kaie kitokawaw. Peikon ia nama ki petenawaw? Aci kotc kit ickwa onikanawaw, 19ka pakwepitakik niaran pakwecikanak, aniki otci iriniwok niaranaw kice mitato mitana ka ki tacitcik, tan tato ka ki mawotcitaiekw pakitenakan e mockinek nta mitcim e ki ickoparik?”

“Mitato acitc nicw,” itiko owitcewakana.

20“Minawatc aniki nicowaso pakwecikana ka pakwepitakik, aniki otci iriniwok newaw kice mitato mitana ka ki tacitcik, tan tato ka ki mawotcitaiekw pakitenakan e mockinek nta mitcim e ki ickoparik?”

“Nicowaso,” itiko owitcewakana.

21Aci minawatc itikowok Cecoca: “Nama ia tca kiapatc ki nisitotenawaw anihe ka aiarimotamapan?”

Bethsaïda otenacik e kikehakaniwitc iriniw aka ka wapitc

22Aci takociniwok Bethsaïda otenacik. Iciwitowakaniwiw neta Cecoc iriniwa aka ka wapiritci, e tca pakoserimikotc tepirak kitci takinatc kitci kikehatc. 23Aci otapiniskenew Cecoc anihi aka ka wapiritci. Nte tca iciwirew nakewar otenacik. Minawatc ki actamawew osikowinapo ockicikorik anihi iriniwa. Ki takinew ockicikorik e tca kokwetcimatc: “Ki wapaten ia kekocic?”

24Itapiw anahwe aka ka wapitc, e tca itetc: “Ni wapamawok iriniwok kekatc mitowi mictikok e aicinakositcik, aric pimotewok.”

25Kiapatc ki takinew Cecoc anihi iriniwa ockicikorik. Tipickotc nikanik itapiriw. Ekoni e kikeritci. Aci kaskina micta miro wapatamiriw. 26Kiweticahwew tca Cecoc omikiwamirik, e tca itatc: “Akawir ica neta otenacik.”

Pien e itetc: “Cecoc, enko anihi Kice Manito ka ki itespan kitci pe iciticohwatc kitci akwacimiweritci”

(Natawapata kaie Matio 16.13-20; Luc 9.18-21)

27Minawatc ki matcawok Cecoc kirika owitcewakana, neta e icatcik otenaciskarik, pecotcik ka ici takonik aniheriw otenariw Césarée de Philippe ka icinikaterik. Mekwata e pimotetcik, aci kokwetcimew Cecoc: “Tan ni e itetcik iriniwok e arimomitcik?”

28Itiko owitcewakana: “Atita itewok, ‘Capatis anahwa.’ Kotakihik, ‘Élie na.’ Minawatc kotakihik itewok, ‘Peikw nta e tacitcik weckatc ka ki pe nikan tipatcimowaspan.’”

29Itikowok Cecoca: “Aric kirawaw, awin ka iterimiekw?”

Pien itew: “Kir anihi ka ki itespan Kice Manito kitci pe iciticohwatc ota askik kitci akwacimiweritci!”#8.29 anihi ka ki itespan Kice Manito kitci pe iciticohwatc ota askik kitci akwacimiweritci: le Messie. Peikon icinikatakaniwiw Krist.

30Aci itew Cecoc anahweriw owitcewakana aka awiriw kitci arimotamowaritci.

E nikan witak Cecoc ke iciwepasitc

(Natawapata kaie Matio 16.21-28; Luc 9.22-27)

31Minawatc Cecoc iti kiskinohamawew owitcewakana, e itatc: “Acteriw anahwe Ka ki pe iriniwihitisotc#8.31 Ka ki pe iriniwihitisotc: Arimomitiso ota Cecoc. kitci micta nekatcitatc. Cota aiamihe okimawok#8.31 Cota aiamihe okimawok: Ka nikaniwitcik cota aiamihewinik itekera. acitc cota makatewokorewok ka tiperitakik kaie ka kiskinohamaketcik cota aiamihe irakonikewiniw kata wepakonewok. Kata nipahakaniwiw, minawatc ickwa nicto kickokarike kata apitcipaw.”

32Wewerita ki witamawew aniheriw kitci miro nisitotamiritci. Aci tipan ki iciwiriko Piena, wircikewaw kitci arimwetcik. Kaketin ki aimihiko Cecoc aniheriw e ki itetc. 33Aric kiwekapowiw Cecoc e kanawapamatc anihi kotakihi owitcewakana, e itatc anihi Piena, kaketin e aimihatc: “Matca, matca, nete warawik Matci Manito,#8.33 Matci Manito: Satan icinikatakaniwiw Matci Manito ota. ponihici!” itew Cecoc. “Nama meka kit iteriten mia wir Kice Manito e iteritak, aric mia iriniwok e iteritakik.”

34Minawatc Cecoc ki wicamew anihi iriniwa e mitcetiritci kirika owitcewakana kitci pe natotakotc, e itatc: “Kecpin awik wi pe nosanehwite, kata ponitaw wir tepirak e mamitonerimitisotc. Kata miwirew otcipaiatikoma kitci pe nosanehwitc. 35Anahwe meka tepirak ka iteritak ota askik opimatisiwin, kata onitaw. Aric anahwe ke pakiteritak opimatisiwin nin e nosanehwitc, kirika Mirwatcimowiniw otci, kata kanaweritam. 36Ceckwat awik kata wi tatamopan kaskina kekociciriw ota askik, kecpin wir tipirawe onicimitisote. 37Kecpin awik onitate opimatisiwin,#8.37 opimatisiwin: Peikon kata ki ici nisitotakon: otcitcakoca. takoniw ia kekociciriw ke ki meckotinamaketc, kitci ki pe kiwe mirakaniwitc aniheriw opimatisiwin? Nama! 38Anotc nama orina wi nosanehwakaniwiw Kice Manito. Matci itatisiwin wi nosanetakaniwon. Kecpin awik wanerimite kirika waneritake nititewiniw, kata wanerimiko anihi Ka ki pe iriniwihitisoritci, minawatc pe takociniritena, Otawiriw oticperitakosiwinirik, Kice Manito otacerima kitci pe witcewikoritci.”

Currently Selected:

Mark 8: ATMK

Highlight

Copy