Mark 14

Ka kiskinohamaketcik cota aiamihe irakonikewiniw e natowi totakik kitci ki otci makonakaniwiritci Cecoca

(Natawapata kaie Matio 26.1-5; Luc 22.1-2; Jean 11.45-53)

1Mamitcitc nicwo kicko kitci otcitciparinik kitci mawotcihitotcik cota iriniwok kitci aiamihe makocetcik, e mirwatcitcikaterik aniheriw Pâque ka icinikaterik,#14.1 e mirwatcitcikaterik aniheriw Pâque ka icinikaterik: Mikaweritamwakopan e ki pakitinakaniwitcik e micta nekatcihakaniwaspan nete Égypte askik itekera, Kice Manitowa e ki nanakatcihikotcik. kaie aniheriw makocaniw otci, “Pakwecikan aka ka opisotc” e icinikaterik, aniki cota makatewokorewok ka tiperitakik kirika ka kiskinohamaketcik cota aiamihe irakonikewiniw natowi totamwakopan kimotc kitci makonakaniwiritci Cecoca, kaie kitci nipahakaniwiritci. 2Taci aititopanak: “Nama kata miroparin kitci makonaiikw mekwata e aiamihe makocaniwonik. Kwecan ki ka kiciwahanowok iriniwok.”

Peikw iskwew e actwatc ka miromakonik Cecoca octikwanirik

(Natawapata kaie Matio 26.6-13; Jean 12.1-8)

3Nete Béthanie otenacik pa tacikepan Cecoc, neta omikiwamirik iriniwa, Simo ka icinikasoritci. Anahwe Simo omikiwapinekopan. Mekwata e mitcisospan Cecoc mitcisowakanik, aci peikw iskwew ki pe pitakew, e petaritci opotaciriw ka micta mirwacinik, ka mirwapiskosiritci asiniwa e ki apatcihakaniwiritci e ocitakaniwonik aniheriw opotaciriw, tekaci e mockineperik neta pimiteriw ka miromakonik e misakitakonik. Ki pikotaw onoskotc aniheriw opotariw. Ki iti sikinamwew Cecoca octikwanirik aniheriw pimiteriw ka miromakonik. 4Atita ka tacikewaspan kiciwasiwok e ki totamiritci anihi iskwewa, e tca aititotcik: “Ceckwat ki onactaw aniheriw ka miromakonik e micta misakitakonik. 5Matci kata ki atawepan awik, nictowaw mitato mitana coriawapiskoriw#14.5 nictowaw mitato mitana coriawapiskoriw: Ani apitc tepirak peikwapiskoriw kanewikopan ko iriniw peikwo kickwa e otamirotc. kitci kackitatc, kitci ki tca miraspan ka kitimakisiritci.” Nama nac ponimewok anihi iskwewa.

6Aci Cecoc itew: “Ponihakw! Kekwan wetci nekasimekw? Micta mirwaciniw aniheriw ka ki totak nin otci. 7Mocak kata tawok ka kitimakisitcik ota ka ici tacikeiekw. Tatwaw nataweritamekwe kitci miro totawekok, ki ka kackitanawaw kitci totamekw. Aric nin, nama mocak ki ka witci tacikemitinawaw ota. 8Ki totam anahwe iskwew e ici kackitaspan. Ni ki pe actamakw ka miromakonik niwiawirik, e wi nisawihitc kitci nahikakowan matikowocik. 9Tapwe ohwe ka witamatakok: kaskina wiec ke ici tipatcimonaniwok Mirwatcimowin, kaskina e irikokoskamikak, kata tipatcitcikateriw ohweriw ka ki totak anahwe iskwew, mocak kaie kata mikawerimakaniwiw.”

Judas e wi pakiterimatc Cecoca, cota makatekorek e iciwitowatc

(Natawapata kaie Matio 26.14-16; Luc 22.3-6)

10Aci anahwe Judas Iscariote ka icinikatakaniwitc, peikw nta e mitato acitc niciritci owitcewakana Cecoc, ki nta witamawew cota makatewokorewa ka tiperitamiritci e wi pakiterimatc Cecoca. 11Micta mireritamok ani e itikotcik. Itewok kitci miratcik coriariw. Ekoni aci e iti kitciparitc Judas e natowi aitotak mia apitc ke ki pakiterimatc Cecoca, kitci tca makonikoritci anahweriw cota maketekorewa ka tiperitamiritci.

E witci mitcisomatc Cecoc owitcewakana

(Natawapata kaie Matio 26.17-25; Luc 22.7-14,21-23; Jean 13.21-30)

12Aci nictam ohwe e kicikak e mirwatcitcikatek, “Pakwecikan aka ka opisotc” e icinikatcikatek anihe cota aiamihe makocan, anihe e kicikak e makocaniwok e aiamihe pakitinakaniwitcik maritcenicak kitci ki makocaniwok, Pâque otci, aci kokwetcimiko Cecoc owitcewakana: “Tante e ici nataweritaman kitci ici nta ocitaiak makocan?”

13Aci nicw owitcewakana iciticahwew Cecoc, e itatc: “Icakw neta otenak. Mekwata e pimoteiekw ki ka nakickowawaw iriniw e miwotatc nipiriw opotak. Nosanehwakw, 14kirika neta mikiwamik ke ici pitaketc, ki ka itawaw neta ka tiperitak mikiwamiriw: ‘Kiskinohamake iriniw ki kokwetcimikw: Tante anihe aricap ke taci mitcisoak, kitci aiamihe makoceiak Pâque otci, nin kirika niwitcewakanak?’ 15Ki ka tca wapatahikowaw icpimitakok omikiwamik micta aricapiriw, kaskina kekociciriw e takonik, aci e ki nisawinaniwonik kitci icaikw. Ekota tca neta ke ocitaiekw makocan.”

16Aci matcawok aniki Cecoc owitcewakana, otenak e icatcik. Kaskina mia ki icinakoniw Cecoca ka ki aiteritci. Ki tca nisawitawok ke aiamihe makocetcik.

17E iti otakocinik, Cecoc takociniw neta kirika owitcewakana e witcewikotc. 18Mekwata e aipitcik mitcisowakanik e taci mitcisotcik, aci itew Cecoc: “Tapwe ohwe ka witamatakok: peikw neta e taciekw e witci mitcisomiekw ni ka pakiterimikw.”

19Micta kackeritamiriwa anahweriw owitcewakana. Aiackotc kokwetcimiko: “Namaiew ni nin, taina?”

20Itew Cecoc: “Anahwe ke totak, enko anahwe peikw neta mitato acitc nicw e taciekw ke akotcimatc opakwecikanima mia peikon kaie nin akotcimake nipakwecikanim orakanik. 21Tapwe kata nipo anahwe Ka ki pe iriniwihitisotc,#14.21 Ka ki pe iriniwihitisotc: Arimomitiso ota Cecoc. kotc ka itacterik Kice Manito Omasinahikanik e arimomakaniwitc. Aric kata micta arimipaririw anihi iriniwa ke pakiterimikotc! Kirawe kata ki miroparinipan kecpin aka ki otci nitawikiritci anihi iriniwa.”

Mamitcitc e witci mitcisomatc Cecoc owitcewakana

(Natawapata kaie Matio 26.26-30; Luc 22.14-20; 1 Corinthe iriniwok 11.23-25)

22Mekwata e mitcisotcik, Cecoc ki otapinew pakwecikana. Ka ickwa aiamihatc, mikwetc e itatc Kice Manitowa, ki papakwepitew. Ki mamirew owitcewakana, e itatc: “Mowakw ohwe. Enko ni niwiaw.”

23Minawatc ki otapinam peikwo orakan minicaporiw. Ka ickwa naskamowatc Kice Manitowa, mameckotc ki mirew anihi owitcewakana, kaskina tca kitci minikweritci. 24Ki itew: “Enko ohwe nimikw ke ki otci kiskeritakok Kice Manito otacotamakewin, e nataweritak kitci miroparihitoekw kirika wir. Ohwe nimikw kata macikowitakaniwon mitcet iriniwok otci. 25Tapwe ohwe ka witamatakok: aci anotc nama awocamec ni ka minikwan minicapo, patoc minawatc minikweiane ocki minicapo neta Kice Manito Okimawinik.”

26Minawatc ki nakamowok mirwatatamo nakamowiniw. Minawatc ki matcawok, e icatcik matinacik Mont des Oliviers ka icinikaterik.

E nikan witak Cecoc kitci itikotc Piena aka e kiskerimikotc

(Natawapata kaie Matio 26.31-35; Luc 22.31-34; Jean 13.36-38)

27Aci itew Cecoc anahweriw owitcewakana: “Kaskina e taciekw ki ka pakiteriminawaw. Masinatew meka Kice Manito Omasinahikanik:

‘Ni ka nipahaw maritcenici iriniw.

Kaskina tca wiec kata orackawok maritcenicak, arotcikotc kitci ici matcatcik.’” Zacharie 13.7

28Kiapatc itew Cecoc: “Aric ickwa apitcipaiane, nete Galilée askik itekera ni ka ican kitci pehitakok.”

29Pien itew: “Misawatc kaskina aniki kotakihik pakiterimiskawe, nin nama ki ka pakiterimitin.”

30Itiko Cecoca: “Tapwe ohwe ka witamatan: anotc ke mi kicikak, tipiskake tca, epwamoci nicwaw kitotc nape pakahakwan, aci nictowaw ki ka ickwa itwan aka e kiskerimiin.”

31Aric Pien itew kiapatc kirawe e kiciwetc: “Nama wiskat ni ka itwan aka e kiskerimitan, misawatc kecpin acteke kitci nipoan kirika kir.”

Ekoni peikon kaskina ka iteritci anihi kotakihi Cecoc owitcewakana.

Gethsémané pitowatikw e nta aiamihatc Cecoc

(Natawapata kaie Matio 26.36-46; Luc 22.39-46)

32Aci iti takociniwok nete Gethsémané pitowatikw#14.32 pitowatikw: Ekota neta e ici mictikoskak, “oliviers” e icinikatakaniwitcik aniki mictikok. ka icinikaterik. Aci itew Cecoc anahweriw owitcewakana: “Ekota ota apikw. Nin tca ni ka nta aiamihan.”

33Minawatc ki matcewirew anihi Piena, Caka kirika Jeanwa. Aci ki iti micta arimeritam kaie e nekateritak. 34Ki itew owitcewakana: “Ni micta kackeriten nitehik. Ekota ota tacikekw. Nanakatisikw.”

35Minawatc nakewara iti icaw. Ki nipiskopariho e aiamihatc, e pakoserimotc aka kitci iciwepasitc kitci micta nekatcitatc. 36Aci itepan: “Notawi, kaskina kir ki kackitan. Ocita tca aka kitci nekatcitaian. Nama aric nin nititeritamowin kitci apatak, aric kir kititeritamowin.”

37Aci natawapamew minawatc anahweriw owitcewakana e nictiritci. Ki tca wapamew e taci niparitci. Aci itew Piena: “Simo, ki nipan ia ni? Nama ia wawatc ki ki otci kackitan peikwo tipahikan irikik aka kitci nipain? 38Nanakatisikw! Aiamihakw kaie aka kitci cakotcihikoiekw e kokwetcihikoiekw kitci pactatiekw. Ata nataweritam iriniw omitoneritcikanik kitci miro totak. Nama aric tipi mackawisiw owiawik itekera kitci itotisketc.”

39Aci minawatc nakatew owitcewakana anahwe Cecoc, peikon tca kiapatc e itetc e aiamihatc. 40Ka pe natawapamatc minawatc owitcewakana, wapamew e niparitci. Nama ki otci kackitawok kitci aitapitcik. Nama aci kiskeritamok ke itatcik.

41Nac nictowaw ki pe natawapamew. Itew: “Kiapatc ia ki nipanawaw kirika e arwepihitisoekw? Ekoni aci, kanawapatamokw! Aci otcitciparin kitci pakiterimakaniwitc anahwe Ka ki pe iriniwihitisotc,#14.41 Ka ki pe iriniwihitisotc: Arimomitiso ota Cecoc. pactati iriniwa kitci makonikotc. 42Pasikokw! Matcatan! Kanawapamakw tca anahwe iriniw ka pakiterimitc! Aci pe takociniw.”

E makonakaniwitc Cecoc

(Natawapata kaie Matio 26.47-56; Luc 22.47-53; Jean 18.3-12)

43Mekwata kiapatc e taci arimwetc Cecoc, aci pe takociniriw peikw anihi owitcewakana, Judas ka icinikasoritci. Mitcet iriniwa pe witcewiko, micta mokomaniw e pe takonamiritci kaie mictikoriw. Ki pe iciticohokowakopan anahweriw cota makatewokorewa ka tiperitamiritci acitc ka kiskinohamakeritci cota aiamihe irakonikewiniw kaie cota aiamihe okimawa. 44Judas, anahwe ka pakiterimatc Cecoca, ki itepan anahweriw iriniwa ka ki pe witcewikotc ke totak kitci ki otci kiskerimaritci Cecoca, e ki itatc: “Anahwe iriniw ke otcemak, enko na ka natawerimekw. Makonakw tca. Wewerita kaie nanakatcihakw matcewirekwe.”

45Tekocik anahwe Judas, ki natawapamew Cecoca, e tca itatc: “Kiskinohamake iriniw.” Minawatc ki otcemew. 46Tecikotc aniki kotakihik ki makonewok Cecoca. 47Peikw tca nta ka tacikespan, ki korokopitam omicta omokoman. Ki otamitotawew kitci makatewokorewa otarotakaniw, e kickitokewepowatc.

48Aci itew Cecoc: “Actepan ia kitci pe icaiekw e takonamekw micta mokomana kaie mictikwa kitci ki makoniekw, tarasak mia kimoti iriniw e iterimiekw? 49Tato kickwa kitci aiamihe mikiwamik ki ki witci tacikemititawaw, e kiskinohamakeian. Nama aric wiskat ki ki otci makoninawaw. Anihe tca anotc ka totawiekw, iciwepan aci kitci ki isparik anihe ka masinatek Kice Manito Omasinahikanik.”

50Aci kaskina nakatiko owitcewakana e ocimoritci.

51Peikw ockinikiw mi nosanehwepan Cecoca, tepirak wapowaniw e wikwekitc. Ki kotci makonakaniwiw. 52Ekoni ka ici nakatcipatatc aniheriw owapowan e tca ocimotc e cacakarikatepatatc.

Cecoc e iciwirakaniwitc neta ka ici mawotcihitoritci Ka Kitci Tipaskonikeritci

(Natawapata kaie Matio 26.57-68; Luc 22.54-55,63-71; Jean 18.13-14,19-24)

53Kice makatekorek ki iciwirewok Cecoca, nete ka ici mawotcihitotcik ko cota makatewokorewok ka tiperitakik kaie cota aiamihe okimawok kirika ka kiskinohamaketcik cota aiamihe irakonikewiniw. 54Warawik otci nosanehwew Pien Cecoca. Ki tca icaw nete kitci makatewokorewa omikiwamirik. Orowitimik nta pa tacikew, e witapimatc iriniwa ka nanakatcitaritci kitci aiamihe mikiwamiriw, kaie tca e pa awasotc.

55Aniki cota makatewokorewok ka tiperitakik kaie kaskina ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, natowi totamwakopan kitci itactahorakaniwiritci Cecoca, ke ki otci atamerimakaniwiritci kitci tca nipahakaniwiritci. Nama aric ki otci miskamok. 56Mitcet iriniwok itactahorepanak Cecoca e kiraskitcik kitci atamerimakaniwiritci. Aric osam papitoc aitewakopan e arimwetcik. 57Aci atita pasikowok, e tca itetcik: 58“Ni ki petawanan e itetc: ‘Ni ka orahen ohwe kitci aiamihe mikiwam, iriniwok ka ki ocitatcik. Kotak tca ni ka ocitan, nicto kickwa irikik kitci tacikaman. Namaiew ni aric iriniwok ke ocitatcik aniheriw.’”

59Aniheriw aric ka itetcik, papitoc kiapatc aitewakopan.

60Aci pasiko anahwe kitci makatewokorew, nete nikanik e mitcetinaniwonik, e tca kokwetcimatc Cecoca, e itatc: “Nama ia kekocic kit itan? Nama ia ki petamwan aniheriw ka itetcik aniki iriniwok e arimomiskik?”

61Nama aric ki otci naskamo Cecoc. Tekaci nama kito. Aci kiapatc kokwetcimiko anihi kitci makatewokorewa: “Kir ia ni Kice Manito Okosa, anihi ka ki itespan Kice Manito kitci pe iciticohwatc ota askik kitci akwacimiweritci, anahwe mocak ka mirwatcimakitc e aiamihaiak?”

62Cecoc itew: “Ehe, nin ni. Kaie kaskina e taciekw ki ka wapamawaw anahwe Ka ki pe iriniwihitisotc#14.62 Ka ki pe iriniwihitisotc: Arimomitiso ota Cecoc. e apitc onihiwinirik Kice Manitowa e mackawisiritci, kaie ki ka wapamawaw wakwek e pe ototetc oskok e pe otci nokositc.”

63Ekoni e ici pikopitak anahwe kitci makatewokorew owikasim, e tca itetc: “Nama aci awocamec ki ka irapatcihanowok iriniwok kitci mamicimatcik. 64Aci wir tipirawe ki ki petawawaw ka ki itetc e marerimatc Kice Manitowa! Tan tca e iteritamekw?”

Kaskina ki itewok: “Anweritakosiw kirika ki kackitamatiso kitci nipahakaniwitc!”

65Atita neta e tacitcik, ekoni e ici kitciparitcik e iskwatatcik.#14.65 e iskwatatcik: Manawan: e sikowatatcik. Ki akonakwenehwewok kirika ki pasakwehwewok, e itatcik: “Awin ka ki otamohwisk?”

Ki tca makonewok aniki cimakanicak kirika tca e ki macikowatcik.

Pien e itetc aka e kiskerimatc Cecoca

(Natawapata kaie Matio 26.69-75; Luc 22.56-62; Jean 18.15-18,25-27)

66Pien kiapatc pa tacikepan orowitimik neta kitci makatewokorew omikiwamirik, aci ka pe takociniritci peikw iskwewa, kitci makatewokorewa ka atoskectawatc. 67Ki wapamew anihi Piena e pa awasoritci. Wewerita ki kanawapamew, e tca itatc: “Kaie kir ni, ki pa witcewatai anaha Cecoc, Nazareth ka otcitc!”

68Aric ki kaso anahwe Pien, e itetc: “Nama ni kiskeriten anihe wa itein. Nama ni nisitoten.”

Ekoni ka iti icatc pecotcik nete ka ici pitakaniwonik ickwatemik. Aci matce kito nape pakahakwan. 69Aric ki wapamiko anihi iskwewa. Ekoni kiapatc e itaritci neta ka tacikeritci: “Anahwe iriniw, kaie wir ni pa witcewepan anihi Cecoca.”

70Kiapatc Pien ki kaso, e itetc: “Nama ni kiskerimaw.”

Nama kinowec aci minawatc itiko Pien anahweriw iriniwa neta ka tacikerispana: “Tapwe kaie kir ni, peikw nta e taciritci ka pa witcewatcik Cecoca. Galilée askik meka kaie ki otcin.”

71Aci itew Pien: “Kitci kicakonitc Kice Manito kecpin kiraskiwanen! Tapwe ohwe ka iteian, nama ni kiskerimaw anaha iriniw ka arimomekw.”

72Mia ka ickwa itetc aniheriw, aci minawatc kitoriw nape pakahakwana, ekoni nicwaw e kitoritci. Aci mikawiw Pien aniheriw ka ki itikotc Cecoca: “Epwamoci nicwaw kitotc nape pakahakwan, aci nictowaw ki ka ickwa itwan aka e kiskerimiin.” Aci iti micta mato.

Currently Selected:

Mark 14: ATMK

Highlight

Copy