Mark 15

Cecoc e iciwirakaniwitc kice okimak, Pilate ka icinikasoritci

(Natawapata kaie Matio 27.1-2,11-14; Luc 23.1-5; Jean 18.28-38)

1Wipatc e kicepawonik ki mawotcihitowok aniki cota makatewokorewok ka tiperitakik, cota aiamihe okimawok, ka kiskinohamaketcik cota aiamihe irakonikewiniw acitc kaskina ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, kitci arimotakik ke totawatcik Cecoca. Ki itewok kitci takopitakaniwiritci. Ki tca matcewirakaniwiriw, nete e iciwitowakaniwiritci kice okimak, Pilate ka icinikasoritci.

2Aci wir anahwe Pilate kokwetcimew Cecoca: “Kir ia ni cota iriniwok okimamiwawa?”

Itew Cecoc: “Kir ni ka itein.”

3Mitcet kekociciriw itactahorepanak Cecoca aniki cota makatewokorewok ka tiperitakik. 4Aci minawatc kokwetcimew Pilate Cecoca: “Nama ia ki kiton? Ki petawawok ia? Mitcet kekociciriw kit itactahorikok!”

5Nama awocamec ki otci kito Cecoc. Ki mamiskaterimiko tca anihi Pilata aka e naskamotc.

Cecoc e anwerimakaniwitc kitci nipotc

(Natawapata kaie Matio 27.15-26; Luc 23.13-25; Jean 18.39–19.16)

6Tato pipona, mekwata e cota aiamihe makocaniwonik, Pâque ka icinikaterik, anahwe kice okimaw Pilate pakitinekopan ko peikw iriniwa ka kipohwakaniwiritci. Wirawaw tca iriniwok e mitcetitcik itakaniwiwakopan kitci orapamatcik tan anihi mia ke pakitinakaniwiritci. 7Takopan nta peikw iriniw e kipohwakaniwitc, Barabbas icinikasopan. Kotakihik matci iriniwok kaie wirawaw tacikewakopan neta kipohotowikamikok ka ki manohotcik mekwata e kotci cakotcihatcik kice okimawa. 8Mitcet iriniwok ki icawok nte Pilata omikiwamirik, e tca nta natawerimatcik kitci pakitinakaniwiritci awiriw, mia ko e totcikaterik wirawaw otci. 9Aci itew Pilate: “Ki nataweritenawaw ia kitci pakitinimak anihi okimamiwawa cota iriniwok?”

10Kiskeritamokopan meka Pilate e asawakeritamiritci #15.10 e asawakeritamiritci: osam e micta nosanehwakaniwiritci Cecoca. aniki cota makatewokorewok ka tiperitakik. Ekoni wetci ki pakiterimatcik Cecoca kitci makonakaniwiritci. 11Aric ki cikimewok neta kaskina iriniwa ka tacikeritci kitci nataweritamawaritci kice okimawa Pilate, Barabbas wir kitci pakitinakaniwitc. 12Aci minawatc Pilate kokwetcimew anihi iriniwa e mitcetiritci: “Kekwan ka nataweritamekw kitci totawak anahwe ka icinikatekw ‘cota iriniwok okimamiwawa’?”

13Aci itewok e tepitepwetcik: “Tcictaskowaci tcipaiatikok!”

14Kokwetcimew Pilate: “Kekwariw ka ki ici matci totak?”

Atcikotc kirawe kiciwewok, e itetcik: “Tcictaskowaci tcipaiatikok!”

15 Pilate ki pakitinew anihi Barabbas, e wi mireritamihatc anihi iriniwa e mitcetiritci, kaie ki itew kitci pasakactehwaritci Cecoca, kaie kitci tcictaskowatakaniwiritci tcipaiatikok.

Cimakanicak e papirotowatcik Cecoca

(Natawapata kaie Matio 27.27-31; Jean 19.2-3)

16Minawatc aniki cimakanicak iciwirewok Cecoca kice okimawa omicta omikiwamirik. Kaskina tca wicamewok owitc cimakaniciwawa kaie wirawaw kitci pe icaritci. 17Kapotowaniw e mikwekacinik#15.17 Kapotowaniw e mikwekacinik: Icinakonikopan mitowiriw aniheriw kapotowaniw weckatc okimawok ka apatcitawakopanen. ki piskamotarewok Cecoca. Minawatc ki apikatamok minesikaciriw,#15.17 minesikaciriw: Enko na mictikocic ka kawak. octikwanirik tca Cecoca e actawatcik. 18Ekotca e ici kicterimakasotcik e itatcik: “Kwei, cota iriniwok okimamiwawa!”

19Mitcetwaw ki otatamohwewok octikwanirik, mictikociriw e totakik, kaie ki iskwatewok. Kirika tca ki nipiskoctawewok, kiapatc e kicterimakasotcik. 20Ka ickwa papirotowatcik, ki maninamawewok aniheriw kapotowaniw ka mikwekacinik. Wir tipirawe owikasimiriw ki piskamotarewok. Minawatc ki orowitahewok neta kice okimawa omikiwamirik kitci nta tcictaskowatatcik tcipaiatikok.

Cecoc e tcictaskowatakaniwitc tcipaiatikok

(Natawapata kaie Matio 27.32-44; Luc 23.26-43; Jean 19.17-27)

21Tapan nte peikw iriniw, Cyrène otenak ka otcitc. Simo icinikasopan, Arikisan#15.21 Arikisan: Alexandre kaie Rufus otawiwawa. Mia pimotekopan neta, nte e ototetc okitikan askik. Cimakanicak ki cikimewok anihi iriniwa kitci miwiraritci Cecoca otcipaiatikomiriw. 22Cecoc iciwiriko cimakanica neta matinacik Golgotha ka icinikaterik. Wi itemakan anihe, Octikwanikekan. 23Aci nta wi minihewok minicaporiw, kirika mackikiriw e ki actakaniwonik, “la myrrhe” ka icinikaterik. Nama aric ki otci minikwew Cecoc. 24Ki tcictaskowatewok tcipaiatikok aniki cimakanicak. Minawatc owikasimiriw ki tetawonamatowok, kaie ki metowewok kitci kiskeritakik anahwe ke kanewitc aniheriw wikasiriw. 25Cakitato tipahikanearipan e kicepawonik ka tcictaskowatatcik neta tcipaiatikok. 26Napakitikwatikocik masinateripan wetci ki anwerimakaniwitc Cecoc, ohweriw e itasinaterik: “Cota iriniwok okimamiwawa.” 27Nicw kimoti iriniwok kaie wirawaw ki tcictaskowatakaniwiwok otcipaiatikomiwak, aitowi opimera Cecoc ka ici tcictaskowatakaniwitc, peikw onihiwinik, kotak onamatciwinik. [ 28Ekoni ka ki isparinik kotc anihe ka itemakak Kice Manito Omasinahikanik: “Mitowi matci iriniw ki aitotowakaniwiw.”]#15.28 Nama takon ohwe atita weckatc masinahikanik.

29Iriniwok ka pimotewakopanen neta marerimewakopan Cecoca, e wepiskoweparihowakopanen: “Kir ka ki itein kitci orahaman kitci aiamihe mikiwam, minawatc kitci ocitain, nicto kickwa tepirak kitci tacikaman, 30kir tipirawe wikotcihitiso! Nitatowi neta kitcipaiatikomik!”

31Peikon kaie wirawaw cota makatewokorewok ka tiperitakik kaie ka kiskinohamaketcik cota aiamihe irakonikewiniw marerimewakopan Cecoca, e itatcik: “Ki wikotcihew kotakihi iriniwa, nama aric kackitaw kitci wikotcihitisotc! 32Kecpin tapwe wir anihi ka ki itespan Kice Manito kitci pe iciticohwatc ota askik kitci akwacimiweritci, kecpin tapwe Israël okimawikwen, kata kackitapan kitci nitatowitc neta otcipaiatikomik. Kecpin wapatamake anihe, aci nta ni ka tapwerimanan.”

Aniki kaie ka nicitcik kimoti iriniwok ka ki tcictaskowatakaniwitcik, kaie wirawaw marerimewakopan Cecoca.

Ka nipotc Cecoc

(Natawapata kaie Matio 27.45-56; Luc 23.44-49; Jean 19.28-30)

33Ka apita kicikak tekaci ki tipiskaw kaskina wiec, nac nicto tipahikan e ickwa apita kicikak. 34Ka nicto tipahikanearik, ki tepwew Cecoc, e micta kiciwetc:

“Éloï, Éloï, lema sabactani?”

Wi itemakaniw aniheriw:

“Nikice Manitom, Nikice Manitom,

kekwan wetci ki pakiterimiin?” Psaumes 22.1

35Atita aniki ka tacikewakopanen ki petawewok aniheriw e iteritci. Aci tepwewok e itetcik: “Natotamokw, Éliwa#15.35 Élie, enko anahwe peikw weckatc ka ki pe nikan tipatcimotc Kice Manitowa otci. ka tepwatatc!”

36Aci peikw nta e tacitcik tecikotc nta natcipataw pakiwaniciriw,#15.36 pakiwaniciriw: Mia itemakan e emitikociwictek: une éponge. pinekinapok e ki kitanak.#15.36 pinekinapo: Minicapo aka ka misakitakok, kekatc mia pinekinapo e ispokok. Onoskotc mictikok ki akokataw, e itaskanamowatc Cecoca kitci minikweritci, e tca itetc: “Aka patama, ki ka tca wapamano ke apitc pe nitinikokwen otcipaiatikomik anihi Éliwa.”

37Aci ki micta notakosiw Cecoc, ekoni ka iti nipotc.

38Mia ani apitc nete kitci aiamihe mikiwamik micta akwekahikanekin tekaci ki tetawekiparin e rarikiparik, icpimik nte e otci kitciparik, nac nte nitek. 39Ka tiperimatc Romain cimakanica nte itactamikapowipan Cecoca otcipaiatikomirik. Ki wapamew ka ispariritci Cecoca e niporitci. Ki tca itew: “Anahwe iriniw, tapwe ni Kice Manito Okosa!”

40Atita iskwewok nete pa tacikewakopan, warawik e otapiketcik. Peikw anahwe, Mari, Magdala otenak ka otcitc, tacikepan nte, kaie kotak Mari (okawiwawa Cak, anahwe “ka ocki pimatisitc” ka icinikatakaniwikopanen ko, kirika Joses) kirika tca Sarome.#15.40 Sarome: Salomé 41Galilée askik ki otci pe nosanehwewakopan Cecoca e wi atoskectawakopanen. Mitcetipanak kotakihik iskwewok kaie wirawaw e taciketcik e ki pe witcewakopanen Cecoca, Jérusalem otenak e icaritci.

Cecoc ka nahikowakaniwitc omatikowocik

(Natawapata kaie Matio 27.57-61; Luc 23.50-56; Jean 19.38-42)

42-43E iti otakocinik, aci takociniw peikw iriniw, Sosep#15.42 Sosep: Joseph e icinikasotc, Arimathée otenak ka otcitc. Kicterimakaniwipan anahwe Sosep, nte e ici apispan ka ici apiritci Ka Kitci Tipaskonikeritci cota iriniwok otci. Asperimopan kaie wir kitci takociparinik Kice Manitowa Okimawiniw. Aci aniheriw e kicikarik epwamoci arwepi kicikarik, ka nisawitcik ko cota iriniwok kitci aiamihatcik, ekoni ka icatc anahwe Sosep nete kice okimak, Pilate. Nama ki otci cakwerimo e nta nataweritamawatc aniheriw Cecoca owiawiriw.

44Aric ki kockomakaniwiw anahwe Pilate e petaketc aci e niporitci. Ki tca wicamew cimakanica ka nikaniwiritci, e kokwetcimatc e apitc tapwe ki niporitci Cecoca. 45“Ehe,” ki itiko anihi cimakanica. Ki tca itew kitci mirakaniwiritci Sosepa aniheriw Cecoca owiawiriw.

46Anahwe Sosep ki otapinam pakiwaniciapiriw. Minawatc ki nta nitinam tcipaiatikok Cecoca owiawiriw. Ki wikwekinam pakiwaniciapirik. Minawatc matikowocik#15.46 matikowocik: tcipaikamikok. ki nta nahikam, asinik e ki ocitakaniwonik. Micta asiniwa ki tetipiwepinew neta, kitci kipitinik aniheriw matikowociriw. 47Anahwe Mari, Magdala otenak ka otcitc, kirika kotak Mari, Joses okawiwa, kanawapikewakopan e nahikowakaniwiritci Cecoca.

Currently Selected:

Mark 15: ATMK

Highlight

Copy