Matio 26

Cota okimawok e natowi totakik kitci makonakaniwiritci Cecoca

(Natawapata kaie Mark 14.1-2; Luc 22.1-2; Jean 11.45-53)

1Ka ickwa kiskinohamaketc aniheriw kaskina ke totcikaterik Cecoc, ki itew owitcewakana: 2“Ki kiskeritenawaw ki nicwo kickokake aci kitci aiamihe makocaniwok Pâque: ani apitc anahwe Ka ki pe iriniwihitisotc#26.2 Ka ki pe iriniwihitisotc: Arimomitiso ota Cecoc. kata makonakaniwiw kitci tcictaskowatakaniwitc tcipaiatikok.”

3Aci aniki cota makatewokorewok ka tiperitakik kaie cota okimawok ki mawotcihitowok omicta omikiwamirik kitci makatewokorewa, Caïphe ka icinikasoritci. 4Kaskina tapickotc ki natowi totamok kitci kimotc makonakaniwiritci Cecoca kaie kitci nipahakaniwiritci. 5Itewakopan: “Nama ki ta makonano mekwata e aiamihe makocaniwonik, aka kitci kiciwahawikok iriniwok.”

Iskwew e actawatc ka miromakonik octikwanirik Cecoca

(Natawapata kaie Mark 14.3-9; Jean 12.1-8)

6Nete Béthanie otenacik pa tacikepan Cecoc, neta omikiwamirik iriniwa, Simo ka icinikasoritci. Anahwe Simo omikiwapinekopan. 7Aci peikw iskwew pe natcikapowictawew Cecoca, e petaritci opotaciriw ka micta mirwacinik, ka mirwapiskosiritci asiniwa#26.7 asiniwa: “Albâtre” icinikasoriw anihi asiniwa. e ki apatcihakaniwiritci e ocitakaniwonik aniheriw opotaciriw, e mockineperik neta pimiteriw ka miromakonik e misakitakonik. Ki sikinamwew Cecoca octikwanirik mekwata e taci apispan mitcisowakanik. 8Aniki Cecoc owitcewakana ka wapatakik aniheriw, ki kiciwamowok, e itetcik: “Kekwariw wetci onactatc? 9Matci kata ki atawepan awik, nipara coriariw kitci kackitatc, kitci miraspan ka kitimakisiritci!”

10Cecoc petawew ani e ici arimweritci. Aci itew: “Kekwan wetci nekasimekw anahwe iskwew? Micta mirwaciniw aniheriw ka ki totak nin otci. 11Mocak meka kata tawok ka kitimakisitcik ota ka ici tacikeiekw. Aric nin, nama mocak ki ka witci tacikemitinawaw ota. 12Ni ki pe sikinamakw aniheriw ka miromakonik e wi nisawihitc kitci nahikakowan matikowocik. 13Tapwe ohwe ka witamatakok: kaskina wiec ke ici tipatcimonaniwok ohwe Mirwatcimowin, kaskina e irikokoskamikak, kata tipatcitcikateriw ohweriw ka ki totak anahwe iskwew, mocak kaie kata mikawerimakaniwiw.”

E iteritak Judas kitci pakiterimatc Cecoca

(Natawapata kaie Mark 14.10-11; Luc 22.3-6)

14Aci peikw neta e mitato acitc niciritci Cecoc owitcewakana, Judas Iscariote ka icinikasoritci, natawapamew cota makatewokorewa ka tiperitamiritci, 15e itatc: “Kekwan ke pe miriekw kecpin pakiterimake Cecoc, kitci ki makonekw?” Ki akitamok nicto mitana coriawapiskoriw, e miratcik anihi Judawa. 16Ekoni aci e iti kitciparitc Judas e natowi aitotak mia apitc ke ki pakiterimatc Cecoca, kitci tca makonikoritci anahweriw cota maketekorewa ka tiperitamiritci.

Cecoc e witci mitcisomatc owitcewakana e aiamihe makocaniwonik

(Natawapata kaie Mark 14.12-21; Luc 22.7-14,21-23; Jean 13.21-30)

17Aci otcitcipariniw kitci mirwatatakik cota iriniwok, “Pakwecikan aka ka opisotc” e icinikaterik aniheriw otaiamihe makocaniwaw. Aci nictam aniheriw e kicikarik e mirwatcitcikaterik, Cecoc pe nta kokwetcimiko owitcewakana, e itikotc: “Tante e ici nataweritaman kitci ici nta ocitamatak makocan?” Pâque#26.17 Pâque: Ani apitc, tatwaw peikwo pipona, ani e kicikarik, nipahewakopan ko cota iriniwok maritcenica kitci aiamihe makocetcik. icinikateriw aniheriw cota aiamihe makocaniw ka arimotakik.

18Itikowok Cecoca: “Icakw otenak. Peikw nte iriniw ki ka natawapamawaw. Ki ka tca itawaw nte: ‘Kiskinohamake iriniw itew: Aci otcitciparin kitci isparik kaskina ka ki itactek kitci iciwepasian. Kir kimikiwamik ni ka taci aiamihe makocan kirika niwitcewakanak.’”

19Aci ki itotiskeriwa Cecoc owitcewakana kotc ka ki itatc, kaie ki nisawitariwa ke aiamihe makocetcik.

20E iti otakocinik, Cecoc natapiw mitcisowakanik kirika owitcewakana e mitato acitc niciritci. 21Mekwata e taci mitcisotcik, itew Cecoc: “Tapwe ohwe ka witamatakok: peikw neta e taciekw ni ka pakiterimikw.”

22Micta kackeritamiriwa anahweriw owitcewakana. Aiackotc kokwetcimiko: “Namaiew ni nin, taina, Teperitcikein?”

23Cecoc itew: “Anahwe ka ki akotcimatc opakwecikanima neta orakanik mia tapickotc ka akotcimak nipakwecikanim, enko anahwe ke pakiterimitc. 24Anahwe Ka ki pe iriniwihitisotc kata nipo, kotc ka itacterik Kice Manito Omasinahikanik e arimomakaniwitc.#26.24 Natawapata Psaume 22.2-19; Ésaïe 53. Aric kata micta arimipaririw anihi iriniwa ke pakiterimikotc! Kirawe kata ki miroparinipan kecpin aka ki otci pe nitawikiritci anihi iriniwa!”

25 Judas, anahwe ke pakiterimatc Cecoca, arimwew, e kokwetcimatc: “Namaiew ni nin, taina, Kiskinohamake iriniw?”

Cecoca itiko: “Kir ni ka itein.”

Cecoc kirika owitcewakana e aiamihe makocetcik

(Natawapata kaie Mark 14.22-26; Luc 22.14-20; 1 Corinthe iriniwok 11.23-25)

26Mekwata e mitcisotcik, Cecoc ki otapinew pakwecikana. Ka ickwa aiamihatc, mikwetc e itatc Kice Manitowa, ki papakwepitew. Ki mamirew owitcewakana, e itatc: “Otapinakw ohwa pakwecikan! Mowakw! Enko ni niwiaw.”

27Minawatc ki otapinam peikwo orakan minicaporiw. Ka ickwa naskamowatc Kice Manitowa, mameckotc ki mirew anahweriw owitcewakana kitci minikweritci, e itatc: “Minikwekw, kaskina e taciekw. 28Enko ohwe nimikw ke ki otci kiskeritakok Kice Manito otacotamakewin, e nataweritak kitci miroparihitoekw kirika wir. Kaie kata macikowitakaniwon mitcet iriniwok otci kitci kasihikaterik opactatowiniwaw. 29Ki witamatinawaw: aci anotc nama awocamec ni ka minikwan minicapo, patoc minawatc tapickotc minikweikwe ocki minicapo neta Notawi Okimawinik.”

30Minawatc ki nakamowok mirwatatamo nakamowiniw.#26.30 mirwatatamo nakamowiniw: Enkweriw aiamihe nakamowina, Mirwatatamo Nakamowin Masinahikanik ka otinikaterik (les Psaumes), 115–118 ka ki ici nakamotcik ka ickwa makocetcik. Minawatc ki matcawok, e icatcik matinacik Mont des Oliviers ka icinikaterik.

Cecoc e tipatcimotc aka e kiskerimikotc Piena

(Natawapata kaie Mark 14.27-31; Luc 22.31-34; Jean 13.36-38)

31Aci Cecoc ki itew anahweriw owitcewakana: “Ohwe ke mi tipiskak, kaskina e taciekw ki ka pakiteriminawaw. Masinatew meka Kice Manito Omasinahikanik:

‘Ni ka nipahaw maritcenici iriniw.

Kaskina tca wiec kata orackawok maritcenicak, arotcikotc kitci ici matcatcik.’” Zacharie 13.7

32Kiapatc itew Cecoc: “Aric ickwa apitcipaiane, nete Galilée askik itekera ni ka ican kitci pehitakok.”

33Pien aci naskamo, e itetc: “Misawatc kaskina aniki kotakihik pakiterimiskawe, nin nama wiskat ki ka pakiterimitin.”

34Cecoca itiko: “Tapwe ohwe ka witamatan: anotc ke mi tipiskak, epwamoci kitotc nape pakahakwan, aci nictowaw ki ka ickwa itwan aka e kiskerimiin.”

35Itew Pien: “Nama wiskat ni ka itwan aka e kiskerimitan, misawatc kecpin acteke kitci nipoan kirika kir.”

Ekoni peikon kaskina ka iteritci anihi kotakihi Cecoc owitcewakana.

Cecoc e nta aiamihatc Gethsémané

(Natawapata kaie Mark 14.32-42; Luc 22.39-46)

36Aci iti takociniwok Cecoc kirika owitcewakana nete Gethsémané pitowatikw ka icinikaterik. Aci itew Cecoc: “Ekota ota apikw. Nin tca nete ni ka nta aiamihan.”

37Minawatc ki matcewirew Piena, kaie anihi e niciritci Zébédée okosa, Cak kirika Jean. Ki iti micta kackeritam kaie e nekateritak. 38Ki tca itew anahweriw owitcewakana: “Ni micta kackeriten nitehik. Ekota ota tacikekw. Akawir kaie notekocikw.”

39Minawatc nakewara iti icaw. Ki nipiskopariho e pakoserimatc Kice Manitowa, e tca itetc: “Notawi, mireritamane, ocita aka kitci nekaterimoian.#26.39 ocita aka kitci nekaterimoian: Kirawe mia itemakan: maninamaci ohwe orakan ka ki mirikoian kitci minikweian. Nama aric nin nititeritamowin kitci apatak, aric kir kititeritamowin.”

40Aci natawapamew minawatc anahweriw owitcewakana e nictiritci. Ki tca wapamew e taci niparitci. Aci itew Piena: “Nama ia wawatc ki ki otci kackitanawaw peikwo tipahikan irikik aka kitci nipaiekw? 41Nanakatisikw! Aiamihakw kaie aka kitci cakotcihikoiekw e kokwetcihikoiekw kitci pactatiekw. Ata nataweritam iriniw omitoneritcikanik kitci miro totak. Nama aric tipi mackawisiw owiawik itekera kitci itotisketc.”

42Aci kiapatc minawatc nakatew owitcewakana. Aiamihaw e tca itetc: “Notawi, kecpin otcitakotc nataweritamawiine kitci nekatcitaian, ni ka iciwepasin, kir meka ka ici nataweritaman, kir kititeritamowin kitci apatak.”#26.42 Kirawe mia itemakan: Mia mitowi orakanik ni mirikowin nekatcitawin kitci minikweian. Kecpin otcitakotc natawerimiine kitci minikweian ohwe orakanik, aka tca kitci maninamowiin anihe nekatcitawin, ni nataweriten kir kititeritamowin kitci apatak.

43Minawatc kiapatc pe natawapamew owitcewakana. Wapamew e niparitci. Nama ki otci kackitaripana kitci aitapiritci. 44Nac nictowaw nakatew Cecoc, nakewara e nta aiamihatc, peikon kiapatc e itetc. 45Minawatc tca kiapatc pe natawapamew, e itatc: “Kiapatc ia ki nipanawaw kirika e arwepihitisoekw? Aci otcitciparin kitci pakiterimakaniwitc anahwe Ka ki pe iriniwihitisotc, pactati iriniwa kitci makonikotc! 46Pasikokw! Matcatan! Kanawapamakw tca anahwe iriniw ka ki pakiterimitc! Aci pe takociniw!”

E makonakaniwitc Cecoc

(Natawapata kaie Mark 14.43-50; Luc 22.47-53; Jean 18.3-12)

47Mekwata kiapatc e taci arimwetc Cecoc, aci pe takociniriw peikw anihi owitcewakana, Judas ka icinikasoritci. Mitcet iriniwa pe witcewiko, micta mokomaniw e pe takonamiritci kaie mictikoriw. Ki pe iciticohokowakopan anahweriw cota makatewokorewa ka tiperitamiritci kaie cota aiamihe okimawa. 48Judas, anahwe ka pakiterimatc Cecoca, ki itepan anahweriw iriniwa ka ki pe witcewikotc ke totak kitci ki otci kiskerimaritci Cecoca, e ki itatc: “Anahwe iriniw ke otcemak, enko na ka natawerimekw. Makonakw tca!”

49Tecikotc Judas ki natawapamew Cecoca, e tca itatc: “Kwei, Kiskinohamake iriniw!” Minawatc ki otcemew.

50Itiko Cecoca: “Nikwimes, anihe ka otci pe icain, tactapi itotiske!”

Aci petcimotewok aniki kotakihik iriniwok, e matcikonatcik, kaie e makonatcik. 51Peikw tca nta ka ki pe witcewaspan Cecoca, ki korokopitam omicta omokoman. Ki otamitotawew kitci makatewokorewa otarotakaniw, e kickitokewepowatc. 52Aci itew Cecoc: “Pitaha anihe kimicta kimokoman kimokomaniwocik. Itwaniwon meka, kaskina awik ka mikasotc, micta mokomaniw e apatcitatc, micta mokomanik kata otcinew. 53Nama ani ki kiskeriten matci kitci ki tepwatakipan Notawi kitci pe nta witcihitc, tecikotc kitci pe iciticohwaspan kice mitcet aceriwa kitci pe witcihimitci! 54Kecpin aric ani ki totaman, nama nte kata isparinopan anihe ka itasinatek Kice Manito Omasinahikanik. Itasinatew meka neta ani kitci pe iciwepak.”

55Aci itew Cecoc anihi mitcet iriniwa ka ki pe icaritci: “Actepan ia kitci pe icaiekw e takonamekw micta mokomana kaie mictikwa kitci ki makoniekw, tarasak mia kimoti iriniw e iterimiekw? Tato kickwa ni ki apin neta kitci aiamihe mikiwamik e kiskinohamakeiapan. Nama aric wiskat ki ki otci makoninawaw. 56Aric kaskina anihe pe iciwepan, kitci ki isparinik aniheriw weckatc ka ki aitetcik ka nikan tipatcimowaspan Kice Manito Omasinahikanik.”

Aci kaskina nakatiko owitcewakana e ocimoritci.

Cecoc e iciwirakaniwitc neta ka ici mawotcihitoritci cota iriniwa Ka Kitci Tipaskonikeritci

(Natawapata kaie Mark 14.53-65; Luc 22.54-55,63-71; Jean 18.13-14,19-24)

57Minawatc kitci makatekorek ki iciwirewok Cecoca aniki ka ki makonatcik. Caïphe icinikasokopan anahwe kitci makatewokorew. Ekota nta ka ki ici mawotcihitowaspan iriniwok ka kiskinohamaketcik cota aiamihe irakonikewiniw kirika cota aiaimihe okimawok. 58Warawik otci nosanehwew Pien Cecoca, nac neta ka iciwirakaniwiritci, orowitimik kitci makatewokorewa omikiwamirik. Orowitimik nta pa tacikew, e witapimatc iriniwa ka nanakatcitaritci kitci aiamihe mikiwamiriw, e wi kiskeritak tan ke iciwepanik.

59Aniki cota makatewokorewok ka tiperitakik kaie kaskina ka tipaskoniketcik cota iriniwok otci, Ka Kitci Tipaskoniketcik e icinikatakaniwitcik, natowi totamwakopan kitci itactahorakaniwiritci Cecoca, ke ki otci atamerimakaniwiritci kitci tca nipahakaniwiritci. Kata ki mireritamwakopan wawatc kitci kiraskinaniwonik aniheriw otci. 60Nama aric ki otci miskamok ke ki otci atamerimakaniwiritci, misawatc mitcet iriniwok e ki pe nta itactahoratcik e kiraskitcik. Kek nicw iriniwok ki pe icawok nta nikanik, 61e itetcik: “Ni ki petawanan anahwe iriniw e itetc: ‘Ni kackitan kitci orahaman Kice Manito okitci aiamihe mikiwam, minawatc ni ka koski ocitan, nicto kickwa irikik kitci tacikaman.’”

62Aci pasiko anahwe kitci makatewokorew, e tca kokwetcimatc Cecoca: “Nama ia kekocic kit itan? Nama ia ki petamwan aniheriw ka itetcik aniki iriniwok e arimomiskik?”

63Nama aric ki otci itew Cecoc. Aci kiapatc kokwetcimiko anihi kitci makatewokorewa: “Actew kitci witamawiak, e nespi tapwein, Kice Manito otci e pimatisitc: kir ia ni Kice Manito Okosa, anihi ka ki itespan kitci pe iciticohwatc ota askik kitci akwacimiweritci?”

64Cecoc itew: “Kir ni ka itein. Aric ki witamatinawaw: aci anotc ki ka wapamawaw anahwe Ka ki pe iriniwihitisotc e apitc onihiwinirik Kice Manitowa e mackawisiritci, kaie ki ka wapamawaw wakwek e pe ototetc, oskok e pe otci nokositc.”

65Ekoni e ici pikopitak anahwe kitci makatewokorew owikasim, e tca itetc: “Micta marerimew Kice Manitowa! Nama aci awocamec ki ka irapatcihanowok iriniwok kitci mamicimatcik! Aci wir tipirawe ki ki petawawaw ka ki itetc e marerimatc Kice Manitowa! 66Tan tca e iteritamekw?”

Itewok: “Anweritakosiw kirika ki kackitamatiso kitci nipahakaniwitc!”

67Ekoni tca e ici iskwatatcik Cecoca otactamikorik. Ki otatamohwewok. Kotakihik ki pasakwehwewok, 68e itatcik: “Awin ka ki otamohwisk, kir ka ki pe iciticohwisk Kice Manito kitci akwacimiwein! Wi kokwe kiskerita!”

E itetc Pien aka e kiskerimatc Cecoca

(Natawapata kaie Mark 14.66-72; Luc 22.56-62; Jean 18.15-18,25-27)

69Pien taci apipan orowitimik kitci makatewokorewa omikiwamirik. Aci arotakan ickweca pe natcikapowictako Pien, e itikotc: “Kaie kir ni, ki pa witcewatai Cecoc, anahwe iriniw Galilée askik ka otcitc.”

70Aric ki kaso Pien, kaskina neta ka tacikeritci e petakotc, e itetc: “Nama ni kiskeriten anihe wa itein.”

71Ekoni ka iti icatc nete pecotcik ickwatemik miniskanatikok. Aci kotakihi arotakan ickweca wapamiko Pien. Aci anahwe ickwecic itew iriniwa neta ka tacikeritci: “Anahwe iriniw kaie wir ni pa witcewepan anihi Cecoca, Nazareth ka otciritci.”

72Kiapatc Pien ki kaso, e itetc: “Tapwe ohwe ka iteian, nama ni kiskerimaw anahwe iriniw!”

73Kek nanake, aniki neta ka taciketcik pe natcikapowictawewok Piena, kirika e itatcik: “Otcitakotc, kaie kir ni nta peikw e tacitcik Cecoc owitcewakana! Ki nisitotakosin e arimwein, kaie kir nte e otciin nte ka otcitc anahwe Cecoc.”

74Aci itew Pien: “Kitci kicakonitc Kice Manito kecpin kiraskiwanen! Tapwe ohwe ka iteian, nama ni kiskerimaw anahwe iriniw!”

Mia ka ickwa itetc aniheriw, aci kitoriw nape pakahakwana. 75Aci mikawiw aniheriw ka ki itikospan Cecoca: “Epwamoci kitotc nape pakahakwan, aci nictowaw ki ka ickwa itwan aka e kiskerimiin.” Aci ki orowiw Pien, e micta matotc.

Currently Selected:

Matio 26: ATMK

Highlight

Copy