Matio 24

Cecoc e tipatcimotc kitci oraparinik kitci aiamihe mikiwamiriw

(Natawapata kaie Mark 13.1-2; Luc 21.5-6)

1Cecoc pe orowipan kitci aiamihe mikiwamik. Mekwata e iti matcaspan, owitcewakana ki pe natcikapowictako, e wapatahikotc tan ka ki ici ocitakaniwonik aniheriw kitci aiamihe mikiwamiriw. 2Aci itew Cecoc: “Ki wapatenawaw ia kaskina anihe? Tapwe ohwe ka witamatakok: kecko kata otcitciparin aka otci peikw asiniik kitci akwatowickik. Kaskina kata oraparin.”

Ke pe iciwepak epwamoci ponaskiwok

(Natawapata kaie Mark 13.3-13; Luc 21.7-19)

3Cecoc taci aipipan nte matinak Mont des Oliviers. Aci ki pe natcikapowictako owitcewakana, e itikotc: “Witamacinan apitc anihe ke isparik. Tan nta ke otci nisitowinamak kitci takociniin acitc kitci ponaskiwok?”

4Ki naskamoctawew Cecoc, e itatc: “Aiekwamisikw aka kitci paskewiritakw awik. 5Mitcet meka iriniwok kata takociniwok niticinikasowiniw kitci apatcitatcik, kitci tca itetcik: ‘Nin ni anihi ka ki itespan Kice Manito kitci pe iciticohwatc ota askik kitci akwacimiweritci!’ Mitcet iriniwa kata paskewirewok. 6Ki ka petenawaw pecotcik e mote natoparinaniwok, kaie ki ka petakanawaw e natoparictatonaniwok warawik kotakihi askik. Akawir aric koctatcikw. Actew kitci icinakok. Nama aric ni moci kata ponaskiwon. 7Kata mamowinehitowok iriniwok ite kotc e ici aitaciketcik. Peikw okimaw kata nta natoparictawew kotakihi okimawa. Kata kokataniwon, kaie kata kwekon atita e aitaskamikak. 8Kata micta ariman, mitowi iskwew e iti matce akositc aci kitci wapamawasotc, ekoni ke apitc akosiweritakok.”

9“Ki ka pakiterimikowawok iriniwok kitci nekatcihikoiekw kirika kitci nipahikoiekw. Kaskina wiec ki ka cikerimikowinawaw, osam e nosanehwiekw. 10Ani apitc mitcet ka tapwerimitcik kata wepakonamok otapwetamowiniwaw. Kata wecimitowok kaie kata cikerimitowok. 11Kata mitcetiwok iriniwok arotc ke nikan tipatcimotcik, ke kiraskitcik kitci itetcik: ‘ni tipatcimon Kice Manito otci.’ Mitcet iriniwa kata wecimewok. 12Ke apitc mictahi pamiparik ka maratak, mitcet iriniwok kata ponitawok e sakihitotcik. 13Aric anahwe mocak ke nosanehwitc kata akwacimakaniwiw. 14Anihe tca Mirwatcimowin, Kice Manito Okimawin ka arimotcikaterik, kata pa tipatcitcikatew kaskina e irikokoskamikak, kaskina awik kitci petak. Minawatc nta kata ponaskiwon.”

E tipatcimotc Cecoc kitci nekatcitakaniwonik

(Natawapata kaie Mark 13.14-23; Luc 21.20-24)

15“Ki ka wapamawaw anahwe ka icinikatakaniwitc ‘ka kice maratisitc,’ weckatc ka ki arimomikotc anihi ka nikan tipatcimorispana Taniena.#24.15 Tanien: Daniel Pitakamik kitci aiamihe mikiwamik kata icikapowiw, neta mia ka ici kitcitwaweritakonik.” — Anahwe ka tapwatak ohweriw, acteriw kitci miro nisitotak.— 16“Ani apitc iriniwok Judée askik ka taciketcik arimatc nte kata ici ocimowok e ici matinarik. 17Anahwe okitc mikiwamik ke pa taciketc ani apitc, nama acteriw kitci nitatowitc kitci natcipatatc ka ici tatak kitci matcewitatc. 18Kaie anahwe ke pa otamirotc kitikan askik, nama acteriw kitci kiwetc omikiwamik, okapotowan kitci natcipatatc. 19Ani apitc aici kicikarike, kata micta nekatcitawok iskwewok ka kanawerimawasotcik kaie aniki ke nocanihawasotcik! 20Aiamihakw kitci pakoserimekw Kice Manito aka kitci actek kitci ocimoekw mia mekwata e pipok kekotc ma e arwepi kicikak. 21Kecpin meka ani apitc aici kicikake, enko anihe ke mawotci nekatcitakaniwok patok kaskina ka ki ici pe kiskeritcikatek e nekatcitakaniwok esko ka pe askiwok nac anotc, kaie nama wiskat awocamec kata asitci nekatcitakaniwon. 22Kecpin aka ki otci oreritak Kice Manito kitci atciwonak irikik ka tatinikipan kicikoriw ke nekatcitakaniwonikipan, nama awik kata pimatisipan. Aric ki atciwonam anahweriw otci iriniwa ka ki orapamatc kitci iteritakosiritci otirinima.”

23“Kecpin tca awik ititakwe: ‘Kanawapamakw! Enkweriw anihi ka ki itespan Kice Manito kitci pe iciticohwatc ota askik kitci akwacimiweritci!’ kekotc ma kecpin ititakwe: ‘Enko anaha ka pa taciketc!’, akawir tapwetowakw. 24Kata pe takociniwok meka iriniwok ke itekasotcik: ‘Ni ki pe iciticohokw Kice Manito kitci akwacimitakok,’ aka aric tapwe e icinakonik. Kaie kotakihik iriniwok ke nikan tipatcimokasotcik kata pe takociniwok, aka aric tapwe e itotisketcik Kice Manitowa otci. Kata mata kackitawok. Kata matawi aitotamok e natowi aitotakik kitci wikokwe wecimatcik iriniwa ka ki orapamikoritci Kice Manitowa, kecpin e kackitatcik. 25Natotamokw! Ki nikan witamatinawaw.”

26“Kecpin tca itikoiekwe, ‘Nta kanawapamakw! Nete pa tacikew ka ici cipewatawokarik!’, akawir icakw. Kekotc ma itikoiekwe, ‘Nta kanawapamakw! Nta pitakamik mikiwamik taci kasotc!’, akawir tapwetamokw. 27Mia mitowi onimiskiw keskat e waskorehak kaskina icpimik nte wapanok nac nakapehonok, ekoni ke icinakonik pe icate Ka ki pe iriniwihitisotc.”

28“Anihe tca pe isparike, kata miro kiskeritakon. Mia mitowi e ici takonik owiaw awesis e ki nipotc, ekota neta ke waskaretcik mikisiwok.”

Ke pe isparik, minawatc pe takocike anahwe Ka ki pe iriniwihitisotc

(Natawapata kaie Mark 13.24-27; Luc 21.25-28)

29“Tecikotc ickwa ici nekatcitakaniwoke, nama kata nokosiw pisimw, kaie tipiskaw pisimw nama kata wasikew. Atcikocak waskok kata otci papakiciniwok. Kaskina tca aniki pisimw, tipiskaw pisimw kaie atcikocak kata ninikipariwok. 30Aci kekocic kata nokon waskok, kitci otci kiskeritakok aci kekatc kitci pe takocik anahwe Ka ki pe iriniwihitisotc.#24.30 Ka ki pe iriniwihitisotc: Arimomitiso ota Cecoc. Aci kaskina iriniwok ota askik kata matowok, kitci kackeritakik. Kata wapamewok anihi Ka ki pe iriniwihitisoritci, oskok kitci otci pe nokosiritci, minawatc pe icaritena, e mackawisiritci kirika e icperitakosiritci. 31Aci kata petakon micta kweckoctatcikan kitci tca iciticohwatc otacerima, kaskina wiec ota askik e irikokoskamikarik kitci pa icaritci, kaskina e new kakikearik askik. Aniki aceriwok kata mawotcihewok anahweriw iriniwa ka ki orapamikoritci Ka ki pe iriniwihitisoritci, kaskina wiec ota askik e irikokoskamikarik kitci pa natcipahatcik.”

Ka ici kiskinohamatokw wapiminatikw

(Natawapata kaie Mark 13.28-31; Luc 21.29-33)

32“Enko ohweriw ka ici kiskinohamatokw wapiminatikw: e iti mirokarik otikon kaie e iti sakipakarik, ki kiskeritenawaw aci e peconakok kitci pe nipik. 33Peikon wapatamekwe kaskina anihe ke isparik, aka nokosite pisimw, papakicikawe atcikocak, ki ka kiskeritenawaw aci kekatc kitci pe takocik anahwe Ka ki pe iriniwihitisotc. 34Tapwe ohwe ka witamatakok: anotc ka pimatisitcik iriniwok nama moci kaskina kata nipowok epwamoci kaskina aniheriw pe iciwepanik. 35Waskok kaie aski tekaci kata ickwaparino, aric nititewin nama wiskat kata ickwaparin.”

Wircike Kice Manito kiskeritam tan apitc ke ponaskiwonik

(Natawapata kaie Mark 13.32-37; Luc 17.26-30,34-36)

36“Nama awik kiskeritam tan apitc mia ke takociparinik aniheriw e kicikarik kekotc ma ke tato tipahikanearik apitc ke ponaskiwonik. Nama wawatc aceriwok wakwek ka taciketcik kiskeritamok, [nama kaie Kice Manito Okosa].#24.36 Nama masinatew atita masinahikanik. Wircike tepirak Kotawino kiskeritam. 37Anihe weckatc ka ki pe iciwepanik mekwata Noé ka pe pimatisikopanen, ekoni peikon ke pe iciwepanik pe takocike anahwe Ka ki pe iriniwihitisotc. 38Ani apitc epwamoci otcitciparinikopanen kitci riskipoterik askiriw, iriniwok mitcisowakopan, minikwewakopan kaie nipowiwakopan kekotc nipowihawakopan otanisiwawa, nac aniheriw e kicikarik Noé ka positcimetc. 39Nama kekociciriw ki otci kiskeritamwakopan nac apitc ka micta kimiwonik kitci tca riskipoterik askiriw, acitc ka kwapawetcik kaskina. Ekoni peikon ke isparinik pe takocike anahwe Ka ki pe iriniwihitisotc. 40Nicw iriniwok tapickotc mekwata kata taci otamirowok kitikan askik. Peikw anahwe kata matcewirakaniwiw, kotak tca anahwe kata nakatakaniwiw. 41Nicw iskwewok tapickotc mekwata kata taci ocihewok napanewa. Peikw anahwe kata matcewirakaniwiw, kotak anahwe kata nakatakaniwiw. 42Nanakatcitakw tca! Nama meka ki kiskeritenawaw apitc mia e kicikarik Teperitciketc ke pe icatc. 43Miro nisitotamokw ohwe: iriniw e taciketc omikiwamik, kecpin tca e kiskeritak apitc mia tepiskarik ke pe icaritci kimoti iriniwa, nama kata nipapan. Nama kaie kata pakitinepan kitci pitakeritci omikiwamik. 44Ekoni ke otci nanakatcihitisoekw kaie kirawaw. Anahwe meka Ka ki pe iriniwihitisotc kata pe icaw apitc mia aka e iteritamekw kitci takocik.”

Ka miro atoskectaketc kirika aka ka miro atoskectaketc

(Natawapata kaie Luc 12.41-48)

45“Tan anahwe ka miro atoskectaketc, mocak ke ki asperimototawakaniwitc kitci miro otamirotc kirika ka kakitaweritak? Anahwe ka mirikotc anihi ka tiperimikotc kitci nanakatcihatc kotakihi ka atoskectakeritci, tato kickwa kitci miratc omitcimimiriw apitc pakateritena. 46Kata mirwaciniw wir otci, anahwe ka atoskectaketc, kecpin e takociniritci okimama omikiwamirik, miskakote mekwata e taci otamirotc. 47Tapwe ohwe ka witamatakok: kata miriko anihi okimama kitci nanakatcitamowatc kaskina e ici tatamiritci. 48Kecpin aric aka miro otamirote anahwe ka atoskectaketc, kata iteritam: ‘Nokimam nama nac pe takociniw.’ 49Aci kata nta macikawew anihi kotakihi ka atoskectakeritci, kaie kata nta witci mitcisomew kirika kata witci minikwemew iriniwa ka kiwockwepiritci. 50Kek nikotin kata takociniw anahwe ka tiperitak, apitc mia tekaci aka e pehikospan anihi otarotakana, aka e kiskeritamiritci apitc mia ke takociniritci. 51Anahwe ka tiperitak kata matceticahwew anihi ka atoskectakotc, mitowi e ici anwerimakaniwitcik iriniwok ka miro iriniwikasotcik, wiec ko e ici micta matonaniwonik kirika e ici kakiceapitecininaniwonik.”

Currently Selected:

Matio 24: ATMK

Highlight

Copy