Matio 23

Kitci aiekwamictowakaniwitcik ka kiskinohamaketcik cota aiamihe irakonikewiniw kaie Pharisien iriniwok

(Natawapata kaie Mark 12.38-39; Luc 11.43,46; 20.45-46)

1Cecoc ki aimihew iriniwa e mitcetiritci ka ki pe nta natotakotc kirika owitcewakana, e itatc: 2“Ka kiskinohamaketcik cota aiamihe irakonikewiniw kirika Pharisien iriniwok ki itarakaniwiwok kitci kiskinohamatakok mia wa itemakanik aiamihe irakonikewiniw, Moïse ka ki masinahak. 3Acteriw tca kitci sapitowekok kirika kitci itotiskeiekw kaskina e ititakok. Akawir aric keskinowapamakok e ici pimatisitcik. Nama meka nosanetawok e ici kiskinohamaketcik. 4Micta kosikoniw aniheriw ka miratcik kitci miwotaritci iriniwa, irakonikewiniw ka micta arimanik kitci nosanetakaniwonik, nama aric wawatc karike memantcic wi witcihewok. 5Kaskina ka aitotisketcik, tepirak kitci wapamikotcik iriniwa wetci totakik. Itaspisowok kitci iterimikotcik iriniwa ‘miro aiamihawok.’ Akokatawok oskatikowak kekotc ospitinowak pweteciciriw e masinaterik pitc neta Kice Manito Omasinahikanik, kaie okapotowaniwawa e riwepiteriw. 6Sakitawok e miro apihakaniwitcik e makocaniwonik kaie kitci miro nokositcik ici apiwok aiamihe mikiwamik. 7Kaie e mitcetinaniwonik sakitawok wewerita kitci arimikowakaniwitcik, kirika ‘kiskinohamake iriniw’ kitci icinikatikotcik iriniwa. 8Aric kirawaw akawir ‘Kiskinohamake iriniw’ wi icinikatikosikw. Kaskina meka ki witcicanitonawaw. Peikociw kaie Kikiskinohamake irinimiwaw. 9Ota askik akawir awik icinikatakw ‘Notawi.’ Peikociw meka Kotawiwaw, enko anahwe wakwek ka taciketc. 10Akawir kaie ‘Okimaw’ wi icinikatikosikw. Peikociw meka Kokimamiwaw, enko anahwe Krist, Kice Manito ka ki itetc kitci pe iciticohwatc ota askik kitci akwacimiwetc. 11Anahwe ka mawotci kicteritakositc neta e taciekw ki ka atoskectakowaw. 12Kaskina meka awik ka icperimitisotc, kata tipaterimakaniwiw. Kaskina tca ka tipaterimitisotc kata icperimakaniwiw.”

Cecoc e itatc iriniwa ka kiskinohamakeritci cota aiamihe irakonikewiniw kaie Pharisien iriniwa, “miro iriniwikasowok”

(Natawapata kaie Mark 12.40; Luc 11.39-52; 20.45-47)

13Cecoc itew kiapatc: “Ekwa kirawaw ka kiskinohamakeiekw aiamihe irakonikewin kirika Pharisien iriniwok! Nikotin ki ka nakickenawaw kitci arimipariekw! Ki miro iriniwikasonawaw! Ki kipahamowawok iriniwok ickwatemiriw Kice Manito Okimawinik. Kirawaw tipirawe nama ki pitakanawaw neta. Nama kaie ki pakitinawawok iriniwok ka nataweritakik kitci pitaketcik.”

[ 14“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Ki kimotimawawok cikawok kaskina e ici tatakik, mekwata kinowec e aiamihaiekw, e wi kanawapamikosiekw kitci iterimikoekw ‘micta aiamihatisiwok.’ Ekoni ke otci kirawe tipaskonikoiekw!”]#23.14 Nama takon ohwe mitcet weckatc masinahikanik.

15“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Ki pa pimatisinawaw askik kaskina e irikokoskamikak e wikokwe cakosimekw misawatc peikw awik kitci ici nosanetatc kitaiamihe irakonikewiniwaw, mia kirawaw. Aric e ickwa cakosimekw, nicwaw irikik wir kirawe iteritakosiw kitci iciwepinakaniwitc atamiskamakok patok kirawaw.”

16“Ki ka arimiparinawaw, kirawaw ka iteritakosiekw mia awik aka ka wapitc ka iterimitisotc kitci ki miwiratc kotakihi iriniwa e pimoteritci! Kit itwanawaw ko: ‘Kecpin awik e itetc kekociciriw kitci totak, e tca nespi tapwetc kitci aiamihe mikiwamiriw otci, nama orina sokiteritakoniw aniheriw ka ki ici nespi tapwetc. Nama tca arimatc kata totam.’ Aric kaie kit itwanawaw: ‘Kecpin e nespi tapwetc aniheriw otci osawo coriawapiskoriw ka ici takonik neta pitakamik kitci aiamihe mikiwamik, otcitakotc kata totam aniheriw ka ki ici nespi tapwetc.’ 17Tekaci nama ki kiskeritenawaw! Tekaci nama ki wapinawaw! Tan anihe kirawe ka kicteritakok: osawo coriawapiskw pitakamik kitci aiamihe mikiwamik ka actek kekotc ma kitci aiamihe mikiwam? Anihe meka kitci aiamihe mikiwam ka itotiskemakik kitci kitcitwaweritakok osawo coriawapiskw! 18Kaie kit itwanawaw: ‘Kecpin awik e itetc kekociciriw kitci totak, e tca nespi tapwetc mitcisowakaniw#23.18 mitcisowakaniw: arimeskanatikw. otci, aniheriw pitakamik cota aiamihe mikiwamik ka acterik, neta ko ka ici ickwaswakaniwitcik awesisa e aiamihe pakitinikaniwok, nama orina sokiteritakoniw aniheriw ka ki ici nespi tapwetc. Nama tca arimatc kata totam.’ Aric kaie kit itwanawaw: ‘Kecpin e nespi tapwetc aniheriw otci, ka ici aiamihe pakitinikaterik, neta okitc mitcisowakanik ka acterik, otcitakotc kata totam aniheriw ka ki ici nespi tapwetc.’ 19Tekaci nama ki wapinawaw! Tan anihe kirawe ka kicteritakok: anihe ia ka ici aiamihe pakitinikatek kekotc ma mitcisowakan? Enko meka ni anihe mitcisowakan wetci kitcitwaweritakok ka ici pakitinikatek e tetictakaniwok neta okitc. 20Anahwe tca ka nespi tapwetc mitcisowakaniw otci, nespi tapwew mitcisowakaniw otci kaie kaskina ka ici teticterik. 21Anahwe kaie ka nespi tapwetc kitci aiamihe mikiwamiriw otci, nespi tapwew kitci aiamihe mikiwamiriw otci, aric kirika Kice Manitowa otci. Ekota meka neta e tacikeritci. 22Kaie anahwe ka nespi tapwetc e itetc ‘wakwek otci,’ nespi tapwew wakwek, kirika Kice Manitowa acitc aniheriw otci okimaw tetapiwakaniw e ici apiritci.”

23“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Tato pipona kit aiamihe pakitinikanawaw Kice Manito otci peikwaw nta e mitatoniwok kitikan mitcim kirika kotakihi nakowi e ici nitawikiki kikitikan askiwak, mitowi ‘menthe,’ ‘fenouil’ acitc ‘cumin’ e icinikateki, e iteritamekw kitci nosanetawekw otirakonikewin. Nama aric ki pameritenawaw irakonikewina ka mawotci kicteritakoki, mitowi ohwi: mocak icikowisk kitci itatisiekw, kaie kitci miro totawekok kiwitc iriniwaw acitc mocak kitci itatisiekw kitci ki asperimototakoiekw. Enko ni anihi kirawe ka kicteritakoki kitci nosanetakaniwoki. Peikon aric kaie anihi kotakihi irakonikewina, actew kitci nosanetaiekw. 24Kirawaw ka iteritakosiekw mia awik aka ka wapitc ka iterimitisotc kitci ki miwiratc kotakihi iriniwa! Ki ocitanawaw nipi kitci mirwakamik ke minikweiekw aka kitci kotciparihekw sikimew, mekwata aric atikw#23.24 micta atikw: Mia itemakan e emitikociwictek: un chameau. e kotciparihekw!”

25“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Mocak ki kisisipasonawaw, aric atamik nama ki mirwinakosinawaw. Ki wi kimotinawaw kirika ki matci iteritenawaw kotc e ici pimatisiekw. Anihe ka totamekw, mia awik oskitc tepirak ka kisisipatatc orakan, aka tca e kisisipatatc pitc. 26Pharisien iriniw aka ka wapiin, pitama ki ta kisisipatan pitc korakan. Kata tca mirwacin oskitc.”#23.26 Wi itemakanotake: Pitama ki ta kweskatisin kitehik. Ki ka tca wapaten tapwe e nosanetain irakonikewin.

27“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Mia tapickotc matikowoc asinik e ki ocitakaniwonik kit icinakosinawaw, ka ki wapapekahikatek.#23.27 matikowoc asinik e ki ocitakaniwonik … ka ki wapapekahikatek: Ani apitc wapapekahamwakopan matikowociriw rikwaskanik ka takonik. Wetci ki totakik, kitci ki miro nokonik, aka tca kitci motci takinikatek kekotc takoskatcikaterik e mekwa tipiskarik, aka tca kitci iteritakositcik ometciwok otaiamihe irakonikewiniwak itekera. Oskitc mirwinakon. Aric nte atamik, mockinew tepirak oskaniwaw iriniwok ka nipotcik acitc kotakeriw kekociciriw ka ki pakickiritinik. 28Ekoni peikon kirawaw, iriniwok kit iterimikowawok ‘miro nosanehwewok Kice Manitowa,’ aric atamik kitehiwak tekaci ki miro iriniwikasonawaw kaie ki micta matci totenawaw.”

29“Ki ka arimiparinawaw, kirawaw ka kiskinohamakeiekw aiamihe irakonikewin kirika Pharisien iriniwok! Ki miro iriniwikasonawaw! Ki mirotanawaw matikowoc neta ka ki ici nahikowakaniwitcik iriniwok ka pe nikan tipatcimowaspan ka ki nipahikotcik weckatc kitaniskotape kimocomiwawa kaie ki wapikonikatamowanawaw omatikowociwaw neta ka ki ici rikwaskatakaniwitcik iriniwok icikowisk ka itatisiwaspan. 30Kaie kit itwanawaw: ‘Kecpin ki pimatisiakipan kaie ninan ani apitc, tapickotc kirika nitaniskotape nimocominapanak, nama ninan nte ni ta ki otci witcihatanak ka nipahatcik iriniwa ka nikan tipatcimorispan.’ 31Anihe e iteiekw, ki witenawaw e kiskeritamekw kirawaw tipirawe e okice omocomiekw aniki ka ki nipahatcik ka pe nikan tipatcimorispana. 32Ekoci tca kirawaw kictawakw aniheriw ka ki kitciparitcik kitaniskotape kimocomiwawok.#23.32 Wi itemakanotake: Ekoni tca pot kaie kirawaw wa totamekwen, pot ki wi nipahawatakenak ka tipatcimotcik Kice Manitowa otci, kaie kirawaw mia ka ki totakik kitaniskotape kimocomiwawok. 33Kirawaw ka matci iriniwiekw, mia tapickotc kinepikok ka itatisiekw! Ki matceritakosinawaw, mia kinepikok ka pitcipohiwetcik! Tan e iteritamekw kitci ki aka anwerimikoiekw kitci iciwepinikoiekw atamaskamikok? 34Ekoni ke otci iciticahamatakok ka nikan tipatcimotcik kirika iriniwok ka omiro omitoneritcikanitcik kirika ke kiskinohamaketcik. Atita ki ka nipahawawok, kotakihik ki ka tcictaskowatawawok tcipaiatikok, kiapatc kotakihik kitaiamihe mikiwamiwak ki ka pasakactehwawawok, kaie ki ka nosanehawok otenaskak e wi makonekok. 35Ekoni tca aci nac kirawaw ki ka anweritakosinawaw anihe otci ka ki nipahakaniwitcik iriniwok aka wiec ka ki otci ici patahakik. Ekoni meka ka ki otci kitciparik: apitc nictam anahwe ka ki nipahakaniwitc, Abel ka icinikasospan, icikowisk ka itatisispan, nac Sakari ka icinikasospan, Barachie okosa, ka ki nipahekw#23.35 ka ki nipahekw: Wi itemakanotake: kitaniskotape kimocomiwawok ka ki nipahatcik. neta pitakamik kitci aiamihe mikiwamik, nictowitc neta ka ici micta kicteritakonik kirika neta ka ici ickwasowakaniwitcik awesisak e aiamihe pakitinikaniwonik. 36Tapwe ohwe ka witamatakok: iriniwok anotc ka pimatisitcik kata anweritakosiwok aniheriw otci ka ki ici manohonaniwonik.”

Cecoc e kackeritamihikotc Jérusalem iriniwa

(Natawapata kaie Luc 13.34-35)

37Itew kiapatc Cecoc: “Jérusalem, Jérusalem, kirawaw neta ka tacikeiekw Jérusalem otenak. Ki nipahawawok ko ka nikan tipatcimotcik kirika ki pe mosinihawawok iriniwok ka ki pe iciticohikotcik Kice Manitowa kirawaw otci. Mitcetwaw ni ki iteriten kitci pe mawotcihitakok kitci nanakatcihitakok, mia pakahakwan e ici nanakatcihatc opakahakwanicicima, cekotc otatakonik e aratc onitcanica. Nama aric ki ki otci ici naheritenawaw. 38Aci tca Kice Manito kata nakatam kotenamiwariw. 39Tapwe ohwe ka witamatakok: tapwe aci anotc nama awocamec ki ka wapaminawaw, patoc otcitciparike kitci iteiekw e arimomiekw: ‘Caweritakosiw aniheriw Kice Manito ka ki pe iciticohwatc!’”#23.39 aniheriw Kice Manito ka ki pe iciticohwatc: Kirawe mia itemakan: Caweritakosiw anahwe ka pe icatc Teperitcikeritci oticinikasowin otci.

Currently Selected:

Matio 23: ATMK

Highlight

Copy