Matio 19

E kiskinohamaketc Cecoc aka kitci wepinitonaniwonik

(Natawapata kaie Mark 10.1-12)

1Ka ickwa aitespan aniheriw Cecoc, ki matcaw neta Galilée askik, nete e icatc itekera Judée askik, akam sipik Jourdain itekera. 2Micta mitcetiripana iriniwa ka nosanehikotc kaie ki kikehew ka akosiritci e aitarispana neta.

3Aci atita Pharisien iriniwa pe natcikapowictako, e wikokwe paciwirikotc, arotc kitci itetc ke ki otci itactahorakaniwitc.#19.3 ke ki otci itactahorakaniwitc: Kata takoniw meka kitci itactahorakaniwitc, kecpin pitoc itete kirika cota aiamihe irakonikewiniw. Aci kokwetcimewok Cecoca: “Kirano kitirakonikewinino, masinatew ia matci kitci wepinatc iriniw okoma kotc arotc kekociciriw otci?”

4Aci itew Cecoc: “Nama ia ki ki otci tapwatenawaw anihe ka itemakak Kice Manito Omasinahikanik:

‘Ickotok ka kitciparitc Kice Manito kaskina kekociciriw ka kiceritak,

iriniwa kaie iskwewa ki kicerimew.’ Genèse 1.27; 5.2

5Kaie itemakaniw:

‘Ekoni ke otci nakatatc onikihikowa iriniw,

kitci witci tacikematc owiwa,

kitci mamweritakositcik.

6Nama aci nicw kata iteritakosiwok,

aric mia peikw awik.’ Genèse 2.24

Nama tca acteriw iriniw kitci tipananak aniheriw Kice Manitowa ka ki mamowinamiritci!”

7Aci kokwetcimiko anahweriw Pharisien iriniwa: “Kekwariw tca wetci ki itetc Moïse, kecpin iriniw e matcetcitcicohatc okoma, masinahikaniw kata ocitomawew e witamawatc aka aci e wikimatc anihi okoma?”

8Itew Cecoc: “Moïse ki pakitinam kitci wepinekok kitiskwemiwawok, osam aka e wi nisitotamekw okiskinohamakewin. Aric weckatc ickotok Kice Manito ka kiceritak kaskina kekociciriw, pitoc ki icinakoniw. 9Ki witamatinawaw: kecpin iriniw e matceticohwatc okoma, aka e ki otci wecimikotc, e tca nipowitc kotakihi iskwewa, pacikwatisiw.”

10Aci itiko owitcewakana: “Kecpin tca aka e mireritcikaterik iriniw kitci wepinatc okoma kotc e ici nataweritak, kirawe kata mirwacinipan aka kitci nipowitc.”

11Itikowok Cecoca: “Nama kaskina iriniwok kackitawok tapwe kitci naheritakik aniheriw kiskinohamakewiniw, aric tepirak aniki iriniwok ka ki mirikotcik Kice Manitowa kitci ici naheritakik. 12Mitceniw ke ki otci isparitc awik aka kitci ki nipowitc: atita nama kackitawok, osam ekoni e ki icinakositcik esko ka nitawikitcik. Kotakihik tca nama ki nipowiwok osam e ki matocwakaniwitcik kitci icinakositcik. Minawatc kotakihik, wetci aka wi nipowitcik, osam e wi atoskectawatcik Kice Manitowa Okimawinik. Anahwe tca ka kackitatc kitci naheritak ohweriw kiskinohamakewiniw, acteriw kitci ici naheritak.”

Cecoc e aiamitowatatc awaca

(Natawapata kaie Mark 10.13-16; Luc 18.15-17)

13Iriniwok pe iciwirepanak awaca kitci takinikoritci Cecoca, kitci tca aiamitowatikoritci. Aric aniki Cecoc owitcewakana ki otcinehwewok anahweriw iriniwa. 14Itew tca Cecoc: “Pakitinakok awacak kitci pe natawapamitcik. Akawir otcinehwakok. Iriniwok meka ka asperimototawitcik mia ohki awacak, enko aniki ka ici tatakik Kice Manitowa Okimawiniw.”

15Ekoni e ici takinatc anihi awaca, tato nta e taciritci e aiamitowatatc. Minawatc ki iti matcaw.

Peikw ockinikiw e micikitatc

(Natawapata kaie Mark 10.17-31; Luc 18.18-30)

16Peikw iriniw iti natcikapowictawew Cecoca, e kokwetcimatc: “Kiskinohamake iriniw, tan ke ki ici miro totaman kitci ki mirikoian kakike pimatisiwin?”

17Cecoc itew: “Kekwan wetci kokwetcimiin ke ki ici miro totcikatek? Tepirak peikociw anaha mocak e miro totak. Enko na Kice Manito. Kecpin wi pitakeine kakike pimatisiwinik, kaskina irakonikewina kitci nosanetain.”

18“Tan anihi irakonikewina,” itiko iriniwa.

Itew Cecoc:

“Akawir manoho.

Akawir pacikwatisi.

Akawir kimoti.

Akawir kiraski, awik kitci ki otci atamerimakaniwitc.

19Kicterimi kotawi kaie kikawi.

Ki ka sakihawok kiwitc iriniwok

mia mitowi e asitci sakihitisoin.” Exode 20.12-16; Deutéronome 5.16-20; Lévitique 19.18

20Aci itew anahwe ockinikiw: “Aci ni ki sapiten kaskina anihi irakonikewina. Kekwan ni kiapatc ke ki totaman?”

21Itew Cecoc: “Kecpin tekaci mia wa itatisiwonen, matca nta atawe kaskina e ici tataman. Ki ka tca mamirawok ka kitimakisitcik aniheriw coriariw irikik ke kackitain. Meckotc tca wakwek ki ka micikitan. Petcimote pe nosanehici.”

22Aric anahwe ockinikiw ka petak aniheriw e itakaniwitc ki matcaw, e micta kackeritak. Mictahi meka micikitapan.

23Cecoc itew owitcewakana: “Tapwe ohwe ka witamatakok: arimaniw iriniw e micikitatc kitci pitaketc Kice Manitowa Okimawinik. 24Ohwe kaie ki witamatinawaw: arimaniw micta atikw#19.24 micta atikw: Mia itemakan e emitikociwictek: un chameau. kitci ki pitaketc e iriko pokoneckarik caponikaniw. Kirawe aric kiapatc arimaniw iriniw e micikitatc kitci ki pitaketc Kice Manitowa Okimawinik.”

25Ka petakik aniheriw Cecoc owitcewakana, ki micta kockopariwok kirika e itetcik: “Awin tca ke ki akwacimakaniwitc?”

26Kanawapamew Cecoc, e itatc: “Iriniwok nama kackitawok kitci akwacimitisotcik. Wir aric Kice Manito kackitaw kitci akwacimiwetc. Kaskina meka kekociciriw wir kackitaw.”

27Ekoni tca e ici arimwetc Pien, e itetc: “Natota! Kaskina kekocic ni ki pakiteritenan e nosanehitak. Tan tca ke iciwepasiak?”

28Itew Cecoc: “Tapwe ohwe ka witamatakok: apitc kaskina kekocic ocitakaniwoke mia ocki kitci icinakok, anahwe Ka ki pe iriniwihitisotc#19.28 Ka ki pe iriniwihitisotc: Arimomitiso ota Cecoc. pe nta apite neta okimaw tetapiwakanik ka micta kicteritakonik kitci tiperitciketc, kirawaw e mitato acitc niciekw ka ki pe nosanehwiekw kaie kirawaw papeikw okimaw tetapiwakanik ki ka apinawaw, kitci tipaskonekok Israël iriniwok e mitato acitc nicw otenwesitcik. 29Kaskina aniki ka ki nakatakik omikiwamiwawa nin otci, kaie otaskiwawa, kekotc ka ki nakatatcik octesiwawa, omisiwawa, ocimiwawa, otawiwawa, okawiwawa, kekotc onitcaniciwawa, awocamec mitato mitana tatwaw kata mirakaniwiwok e iteritakonik, kaie kakike pimatisiwiniw kata mirakaniwiwok. 30Aric mitcet iriniwok anotc ka nikanickatcik, kecko otananik kata pimotewok. Aniki tca anotc ka otananickatcik kata nikanickawok.”

Currently Selected:

Matio 19: ATMK

Highlight

Copy