Matio 17

E wapatahetc Cecoc oticperitakosiwin

(Natawapata kaie Mark 9.2-13; Luc 9.28-36)

1Ka ickwa nikotwaso kickokarik, ki matcewirew nicto owitcewakana Cecoc: Pien, Cak acitc Jean (Cak anihi ocima), nte e ici icpatinarik e iciwiratc. Wirancikewaw nete e taciketcik. 2Mekwata e kanawapamikotc, pitoc iti icinakosiw Cecoc. Mictahi iti wasikweso, mia pisimw e wasisotc e icinakositc, kaie iti wasiteriw owikasim, mia wactenamakan e wactek. 3Kek wapamewok nicw iriniwa, Moïsa acitc Éliwa,#17.3 Moïsa acitc Éliwa: Weckatc ki pe pimatisiwakopan aniki, enko aniki ka ki arimomakaniwitcik Kice Manito Omasinahikanik. e taci aimihitoritci kirika Cecoca.

4Pien itew Cecoca: “Teperitcikein, mirwacin e tacikeikw ota. Mireritamane, nicto rakasimonikiwama ni ka orekahenan: peikw kir, peikw Moïse, acitc peikw Élie otci.”

5Mekwata kiapatc e taci arimwetc Pien, iti nokoniw oskoriw e micta wacterik nac kaskina aka e nokositcik e rikockakotcik oskoriw. Kek petakon e otci arimwaniwok nta oskok, e itwaniwok: “Enko ohwa Nikosis ka micta sakihak kaie ka micta mirerimak. Natotawakw!”

6Ka petakik Cecoc owitcewakana aniheriw e itwaniwonik, ki sekisiwok. Ka apitc sekisitcik, ki nipiskoparihowok. 7Cecoc pe natcikapowictawew. Takinew e itatc: “Pasikokw! Aka sekisikw!” 8E itapitcik tca, wapamewok Cecoca e peikokapowiritci.

9Minawatc e iti nitcitciwetcik Cecoc kirika owitcewakana, aci itew: “Aka awik atisokowakw anihe ka ki ici wapatamekw, patoc ickwa apitcipate anahwe Ka ki pe iriniwihitisotc.”#17.9 Ka ki pe iriniwihitisotc: Arimomitiso ota Cecoc.

10Kokwetcimiko owitcewakana: “Kekwariw wetci itetcik ka kiskinohamaketcik cota aiamihe irakonikewiniw wirctam anihi Éliwa kitci pe icaritci?”

11Itew tca Cecoc: “Tapwe wirata minawatc kata pe icaw Élie kitci pe nta wecitatc kaskina ka matciparinik, mia ocki kitci iteritakonik. 12Aric nin ki witamatinawaw: aci ickwa takociniw anahwe Élie. Nama aric ki otci nisitowinawewok iriniwok. Ki aitotawewok ka ki aiteritakik. Ekoni mia peikon ke ici matci totawatcik anihi Ka ki pe iriniwihitisoritci.”

13Aci Cecoc owitcewakana nisitotamiriwa Capatisa e arimomatc.

Cecoc e kikehatc awaca ka opirikorispana

(Natawapata kaie Mark 9.14-29; Luc 9.37-43a)

14Ka pe takocikik neta e ici micta mitcetinaniwonik, aci peikw iriniw pe natcikapowictawew Cecoca, nipiskoctawew, 15e itatc: “Teperitcikein, kitimakerimi nikosis. Mocak opiriko. E apitc micta nekatcitatc e opirikotc, matci ko ickotek kekotc ma nipik ici pakicin. 16Kiwitcewakanak ni ki iciwitowawok, nama aric ki otci kackihewok kitci kikehatcik.”

17Aci naskamawew Cecoc, e itatc: “Kirawaw ka matci iriniwiekw kaie aka ka asperimototawiekw! Tan irikik ke actek kitci witci tacikemitakok? Tan kaie irikik ke actek kitci witcihitakok? Pecowakw anahwe ockinikicic.” 18Cecoc kitotew matci manitowa. Ekoni e ici orowiritci omatci manitoma anahwe awacic, tecikotc e iti kiketc.

19Aci Cecoc pe natcikapowictako owitcewakana. Wircikewaw e wi aimihatcik Cecoca, e tca kokwetcimatcik: “Kekwan aka wetci ki orowiticohwakitc anahwe matci manito?”

20Itikowok Cecoca: “Osam nama ki tipi asperimototawaw Kice Manito. Tapwe ohwe ka witamatakok: kecpin ni irikokwake kitapwetamowiniwaw mitowi kitikanicic e irikokwak rimotat ka icinikatek ka micta apicacik, ki ta itanawaw anihe matinacic, ‘Atipi ota, nete tca ica.’ Kata tca atciparinopan. Nama kata takonopan kekocic aka kitci kackitaiekw. [ 21Aric patoc aiamihaiekwe kirika riskosoiekwe, ki ka kackihawaw anahwe towi matci manito kitci orowiticohwekw.]”#17.21 Nama takon ohwe mitcet weckatc masinahikanik.

Minawatc e tipatcimotc Cecoc kitci nipotc kaie kitci apitcipatc

(Natawapata kaie Mark 9.30-32; Luc 9.43b-45)

22Peikwaw e kicikarik, kaskina e mamowi tacikewaspan Galilée askik Cecoc owitcewakana, aci ki itikowok Cecoca: “Anahwe Ka ki pe iriniwihitisotc kata pakiterimakaniwiw kitci makonikotc iriniwa. 23Kata nipahiko. Aric ickwa nicto kickokarike kata apitcipaw.”

Ekoni e micta kackeritamiritci owitcewakana.

E natockakaniwok kitci aiamihe mikiwam otci

24Ka pe takocikik Capernaüm otenak Cecoc kirika owitcewakana, ka natockaketcik ki pe natawapamewok Piena, e kokwetcimatcik: “Kikiskinohamake irinimiwaw, nama ia kicikam aniheriw ka natockakaniwonik kitci aiamihe mikiwamiriw otci?”

25“Ehe, kicikam,” itew Pien.

Apitc ka pitaketc Pien neta mikiwamik, Cecoc wirctam arimwew, e itetc: “Tan e iteritaman kir, Simo? Awin ni ka acterik kitci kicikak e natockakaniwonik ota askik, ka acterik kitci kicikasohakaniwitcik okimawok otci? Otirinimiwawa tipirawe otaskiwak kekotc ma mantewok?”#17.25 Otirinimiwawa tipirawe otaskiwak kekotc ma mantewok: Peikon kata ki ici nisitotakon: Tipirawe okosiwawa kekotc ma kotakihi iriniwok.

26“Mantewok,” itew Pien.

Itiko Cecoca: “Nama arimatc kicikamiriwa okimawok otirinimiwawa. 27Aric nama ki wi kiciwahanowok aniki ka natockaketcik. Ki ka tca ican nete sakihikanik. Ki ka wepinen nipik kimikikan. Ki ka otcipitaw anahwe nictam names ke kwackwepitatc. Minawatc ki ka tawotonepitaw. Ki ka tca miskamwan neta peikw coriawapiskoriw. Ekoni anihe kitci tipiparik, nin kirika kir otci, kitci kicikamokw anihe ka natockasonaniwok kice okimaw otci. Otapinamokan anihe coria. Kicikasokan tca e niciikw otci.”

Currently Selected:

Matio 17: ATMK

Highlight

Copy