JAPANIYA 1
1
1At Swg gomcwrv Kusi gv ko tuup Japaniya haanum, Gedalia gv ko tuup, Amariya gv ko tuup, Hejekiya gv ko tuup, Amonwg ko tuup Josiya, Judag lvpw atwb swwd aalho.
Juda aoho Pw-hwwnamv Hoodunam
2“Swcw nvg ao soqg hog luucw luutam
ngo twrkub aadob nuupaq mvtayin,”
At Sw bibwqdo.
3“Ngo nyiingam la svdinam aadob nuupaq mvtayin;
doa pvtangam hoo sa-svlog nguiyam ngo aadob nuupaq mvtayin,
hoo nyicbo lvgab yvqmwq mvnam.
Swcw nvg ao soqgv
ngo nyia koam mingtwr tayin,”
At Sw bibwqdo.
4“Judangam la Jerusalemho doonbo mwlwngam
ngoqg alaqkv ceekol ijin tayin;
hoo soq nyook soqgv ngo boumnam
Baalamnvn mvpaqtayin hoo nyub tulu lvgab murty xumn bo nyub tulug eminam kam ngo mvpaqtayin,
5hiyv mwwlo aoho doag nyiit atam pvxwl xumdwn,
hiyv At Swn dingr pvxwl xumpel hoo hvbsujaqkam Milkom mamkam dingrnam,
6hiyv At Swn wmin gvnbov wkur kunum,
hiyvkam At Swn meegaq maadwn ho mwv tox-tataql pui naakam maanam.”
At Swg Aalv Ogum Duku
7Pwnbo At Swg agaho cooikab dooto!
Hoggab At Swg aal ogum duku;
At Sw pwr jidwn mwx-mvaq paku
hoo mwwg nyiin tulungam darxaq paku.
8Hoo At Swg pwr jid aalho –
“Saab tulu ngamla lvpw atwg nyega ko tulungam ngo laqm-baqm tayin
hoo bul mwlwngv atv nyoodo vjam nookuml kootayin.
9Hoq aalam hiyv viyap dwqtamb lukum tvl jaabo tayin
ngo vxiam laqm-baqm tayin,
hoo hiyv yolu-swcin bvla xaalyonam lvgab bulug nyiit atwg nammam bwwr mvpa kun.
10“Hoq aalam, “At Sw bibwqdo,”
“Ngui Toggoq hoqgv kiir noonam mam,
Door-doopw nam hoqgv sigin ginam,
yorn tulu hoqgv yoqlnam yalam tapa tayin.
11Kwm-kor mvk haty ho doonbo mwlwngv, sigin gingto!
Hoggab kwm-kor mvnbo mwlwngv dookma;
mwlwg mwwlinam rupam mvpaq gvnkun.
12Hoq moodam ngo mur lvgab Jerusalem mam meegaq tayin,
hoo hiyv almab nyita bo
nyi mwlwngam ngo laqm-baqm tayin,
hiyv bulug hang lo bedwn,
‘At Sw alboam nyiram,
hoo mwv alman boam nyitayin.’
13Bulug dupum-dvrab pam naareq tayin,
hoo bulug nam tulungv yuupaq nukun (niqtuq dookma).
Bulv nam tulungam mvsjaqkam,
bulv nam tuluho dooram;
bulv roo boolungam liis jaqkam,
bulv hoq tulu hoqgv twwsam twwpa ram.”
14At Swg koibo aalv ogum duku,
ogum bvla nyebia jaqb wdo;
At Swg aalwg yalv kacaq do;
atorbo nyiv vcjaqb kiir noodo.
15Hang lingtwrnam aalv hoq aal ak hv,
vcjaqb mwwdwq bvla vcnamv hoq aalv,
yuupaq nammv la twryumnamv hoq aalam, kan twdwq bvla doomwq-putum nammv hoq aalam,
16tuuliam miqpur tan hoo ceebio baql gurum nwqtumnam
bopam tulungam nyob padwb kiggoq goqtan
hoo ceekol soja aoho doon boam nyob patan.
17Nyia koam ngo vcjaqb mwwdwqnam mam baqa jitayin ho bulv nyiqca bo wnam hvb wtayin,
hoggab bulv At Swn ceekol nyic nyipa ku;
bulug uiyv diimwr hvb toolin tayin,
hoo bulug aiyaqkv ee hvb eelin tayin.
18Bulug rupam ho hunamkam
kamab bulam jinyiram
At Swg hang lingtwr dvk aalho.
Mwwg kaaneqnam wmv,
swcw mwlw sam guiyum tayin;
mwv swcw soq doonbo mwlwngam bumpw bvla haqma paqb twrm tayin.
Currently Selected:
JAPANIYA 1: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
