JAKARIYA 8
8
Swrso ngvla Swwnam-Geenamv Jaiyon ho Hoodunam
1Hoo nyiit At Swg gomcwrv haanum, hoo begamv, 2“Soq sib nyiit Pwnbo At Sw bedo: vcjaqb kaaneqnam lvgab ngo Jaiyon gab kaaneq dvn, hoo vcjaqb hang lingtwrnam lvgab ngo Jaiyon gab kaaneq dvn. 3Soq sib At Sw bedo: Ngo Jaiyonwb hookur pakun hoo Jerusalem pengko ho dootayin, hoo Jerusalem mam dengky bo bopam gob goqtayin, nyiit At Swg puutungam dvrwqbo puutu gob goqtayin. 4Soq sib nyiit At Sw bedo: Nyekam-xox tulungv lokta Jerusalemwg lamta tuluho dootayin, vcjaqb axa ko-gab vxiv alaqho beqnyia bwwtayin. 5Hoo bopamg lamta tuluho naleqgo nyem-nyega ko tulungv hoq lamta tuluho soominl yvtayin.
6Soq sib nyiit At Sw bedo: Hoq moodho boumnam nyi tulug kaagaho soq si Swrdorxeq panyiloqkam, soq si ngoqg kaaga lo swrdorxeq gob nyidy nvi yv, nyiit At Sw bibwqdo? 7Soq sib nyiit At Sw bedo: Kaato, dou-caga haaga gvda hoqgv ngoqg nyiilungam ngo ywwtayin, 8hoo bulam Jerusalem pengko ho doom dvb ngo boa tayin. Hoo bulv ngoqg nyi tulub nyitayin, hoo dengky hoola jvqtwho, ngo bulug Pwnbob nyitayin.”
9Soq sib nyiit At Sw bedo: “Nulug alaqkam ator mvto, nulv hoq aalho nyiqry benbo tulug agam hoqgv soq gomcwr tulu sam todu keedkun, hiyv hoq aalho doonam nyiit At Swg nam gwwlam diirab yukho, ho dvrwqbo namlongam mvdwb nyikam yinpv. 10Hoggab hoq aal tulu otuqb nyi gab la svdin gab hog nyijo doomanum, mwwg ceebio gab mwv swrsob wi-wcal nyila maanum, hoggab nyi vxiam mwwg door-doopwngam ceeko mins mvdwb mvpan. 11Hvbmabde otuqg aal tulu hvb soq boumnam nyi tulug lvgab ngo hog nyikram, nyiit At Sw bibwqdo. 12Hoggab swrsog aaxiam paqtayin. Roo ngv aaxy xeetayin, hoo rongo ngv vigo vly-axiv lengtayin, hoo doangv bulam gumsiam diiyum jitayin. Hoo soq hog mwlw sam soq boumnam nyiilungam doog mvdwb ngo mvtayin. 13Hoo nyob asaqg pengko ho nulam beenam agam gob nyipa kun, Juda la Israelwg dvpar tulunga, ho nulam ngo ywwtayin, hoo nulam lvqc citayin. Bos maabv, hvbmabde nulug alaqkam ator to.”
14Hoggab soq sib nyiit At Sw bedo: “Hwdlo nulug ab tulungv ngam hang lingtwr dvb nyiluqnum, ho ngo ciqcaq-bviyaqkam nulam ham dvb xuqbwq pakun, hoo ngo ham anyo dvb mvram, nyiit At Sw bedo, 15ho ngo lokta hoq aalam Jerusalem mam la Judag dvparam alboam ham dvb xuqbwq pakun; bos maabv. 16Soq tulu sam nulv nyitayin: Akwn-akwn jvqtwngam gooto; nulug toggoq tuluho jvqtw pw-hwwto hoo swrso gab nyito, 17nulug hanglo akwn-akwn ceekol alman boam nyidwb mwwmabv, hoo xaalyol dingdwb aby maabv; hoggab soq mwlw sam ngo oyum dvn, At Sw bibwqdo.”
18Hoo nyiit At Swg gomcwrv ngam haanum hoo begamv, 19“Soq sib nyiit At Sw bedo: Pool bvrpiam vrnamv hoo bargngam vrnamv, hoo kvnnam vrnamv hoo bvrywngam vrnamv Judag dvpar gab hwnyir-hvmar mood gob nyitayin hoo hemp bvla hwrcwb soominl dvmin-twwminam gob nyitayin. Hoqgab jvqtwngam la swrsongam aby to.
20“Soq sib nyiit At Sw bedo: Nyiilungv hvvxiqtayin, ho bopam tuluho doonbo nyi tulu ngvkam hvvxiqtayin. 21Akwn bopam ho doonbo nyiilungv akwn wtayin, hoo begamv, ‘Kuj ngulv lvkin ciqnyi gob At Swn mwwsw kodwb modul xuml kotuj hoo nyiit At Swn meegaq taaj; ngo atv kam wdu dvn.’ 22Atorbo nyob asaq kvla vigo nyiilungv nyiit At Swn Jerusalemho haal meegaq tayin hoo At Swn mwwsw kodwb kodwn. 23Soq sib nyiit At Sw bedo: Hoq aalam nyi wyw go agam asaq-asaqb goonbo gvda hoqgv Juhudig kamt vjam nootu tayin, hoo begamv, ‘ngulam nulug lvgab wmtvb, hoggab ngulv tapa pakun Pwnbov nulug lvgab doodwn.’”
Currently Selected:
JAKARIYA 8: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
