NAXUM 3
3
Nenibingv Mwwdwqto
1Ywlw-twwnbo bopamv mwwdwqto,
vm mvvnam mvla naalil naareq bov naleqdo-
mengnyia lama dvb doodo!
2Xiqpwqnanv taqcnam, hoo kookwr duqn bov vcjaqb odynam,
nyebia jaqb svpur xarn bov la naleqgo ceriotwg pojuqnamv dudo!
3Svpuram wgbo nyiilungv ruqduq do,
kwlwq-kvlaqbo lyoqr orioqkv hoo kwlwq-kvlaqbo nwwxongv,
mwlwngam mengnam,
svmangam vigo pookum pa,
sinbo svma tulungv xinya lama-
bulv svma aoho dwqtubnam!
4Hoo yocu-yabio nyijo bo nyi tulungv xila maadwb yocu-yabio nyinam,
anyangv la kangam cumdwq lvgab,
hiyv nyob nyiilungam mwnwg yocu-yabio,
hoo mwnwg kangam lvgab nyiilungam nyepin pingxa dvn
5Kaato, ngo nam ceeko dvn,
nyiit At Sw bibwqdo,
hoo noqg vby-anyongam noqg nyuqm ho liqpup tayin;
hoo ngo nyob nyiilungam noqg talonam mam
hoo lvpw mwlwngam noqg hvnywnam mam kaam tayin.
6Ngo kacboam nam huryaq tayin
hoo nam modu minsmab nyitayin hoo nam bos kaapa dvb mvtayin.
7Hoo mwlwngv nam kaanbov noq galoqkv rintum tayin hoo bedo,
Nenibingv yuupaq paku; hiyv mwnwg gab mwwdwq tayin?
Noqg gab bet-bela bo ngo hogloqkv meegaq tayin?
8Nailwg bviywr doonbo Tebesnvn
no alyad nvi yv,
issiv mwnwn hwwiyum pa,
sa-svlongv mwnwg sulungv,
hoo mwnwg bvliv yv?
9Kus mwnwg atorv;
Ijipt pvkam, hoo hoqhv ywwtwr dooma;
Putv la Libyan tulungv mwnwn svka bov.
10Hvbsujaqkam mwn nyumwb nyiknum;
mwnwn nyumwb leeg nukun;
lyobu but vxy cerho
mwnwg ko hoiyinam cwr-cwrwb mvnum;
mwnwg xinam nyega tulu gab tak kaanum,
hoo mwnwg atorbo nyi mwlwngam tagv korcupnum.
11Nam kam twwxum mvi nvpv;
no kvs sil wi nvpv;
no ceebio hoqgv cwwgw meegaq yinpv.
12Noqg gurum mwlwngv
taoq aaxy ningcol ningyuqbo hvb nyinam-
hwqdin bvnyiloqkam
mwlwngv dvdy bo agam urab yoqlwq yinpv.
13Kaato, noqg nyemaq tulungv
nyem tulug pengko ho yvnam.
Noqg gvda toggoq tulungv
noqg ceebio tulu gab gamk rooto tvl doodo;
wmv noqg noosungam xvvtwr gvnkun.
14Naareqnam gab iss lo suqj to;
noqg gurum nwqtumnam mam ator dvb mvto;
suiyu urab wto;
simitam mviyo-mvco to,
ita mvn nanam mwx-mvaqto!
15Hoqho wmv nam guiyum tayin;
lyoqr orioqkv nam papaq tayin.
Hoqhv komar takam dvxanam hvb nam dvxa tayin.
Nulv atam komar takam hvb buqmw mvto;
takam hvb buqmw mvto!
16Doa nvg takaram koi yaab
no noqg kwm-kor mvnam mam caam to.
Komar takam hoqg alap tulungv lvbjin layil hoo aadob jarleq dvn.
17Noqg lvpw atwg nyega tulungv takam hvb nyinam,
noqg xeqn bov komar takam muqya appo hvb swkwr
aalam sulu ho puml doodo-
hwdlo doonyiv caalin yin, bulv aadob jarleq dukun;
hiyvkam cengkma bulv hogloqb jarn kun.
18Assiriyag lvpw ata,
noqg rvkybo tulungv yubl doodo;
noqg xinam nyiilungv yubngaq duku.
Noqg nyiilungv gvda puutu aoho cwrsaq-bvraq paku
bulam akjijaqkam boocumbo dookma.
19Noqg mwwrnam mam bet-bela bo akkam dookma;
noqg unv gogwq jaqpa.
Mwlwngv hiyv noqg puiyam tapa bo tulungv
bulug alaqkam noqg aoho cupup do.
Hoggab hiyvg aoho noqg xooma bo almanv haama taapwn?
Currently Selected:
NAXUM 3: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
