METIYU 4

Jisun Supnam

(Mk 1:12-13; Lk 4:1-13)

1Kokw so Yalv Jisun nyorob Ui galoqkv sup mvdwb bool wgnum. 2Aal campy ai campigo dvma twwmab dooxo kokw so Jisu kanonum. 3Hoq jaqho Uiyv mwam hang pooka taab mwwg ogumb haabnv benum, “No Pwnbog Ko Tuupv jaqloqkam so wlw torab sam dvnam wtwb nyitwk hvl beka to.”

4Hvbmabde Jisu birwqnum, “Dvrwqbo Potangv bedwn, ‘Nyiv dvnam wtw dwtwq tvl swwma dvn, hvbmabde Pwnbog agam hoqgv goolinam agam gomxy aoho swwdwb nyitayin.’”

5Hoq kokw so Uiyv mwam Dvrwqbo Nampam Jerusalemho wgnum, Jisun mwlwngam ao yaanbo Israelwg Xumk nam mwwlo niqtuq ao golo doom tvl 6mwam benum, “No Pwnbog Ko Tuupv jaqloqkam atv hatib poqpoq kaato, hoggab Dvrwqbo Potangv bedwn,

‘Pwnbov mwwg gumtw tulungam noqg pagoq gab gvmbwql gaml jil kanam tayin;

ho nam bulug alaqngv joorab aptayin.

Ho noqg lvpiangv wlw aoho hodaq jaqkam vcwr gokam vcram.’”

7Jisu birwqnum, “Hvbmabde Dvrwqbo potangv bedwn, ‘Noqg Pwnbo At Swn pooka-yirka dvb nyimadvn.’”

8Hoq kokw so Uiyv Jisun puutu vigo ao albo ao golo boocanum, ho mwam gvda gvtwg mwlw jaqg nyet-nyeram mam la lvpwngam kaakin banv benum. 9“Soq mwlw sam ngam no lwbw kumbwl xumb nyiloqkam nam jitayin.”

10Kokw so Jisu birwqnum, “Ui no wleqto! Dvrwqbo potangv bedwn, ‘Noqg Pwnbo At Swn xumto hoo mwam pvqtwqto!’”

11Ho dara Uiyv Jisun apaq peekul wleq kunum, hoo kokw so ao gumtwngv ipoqbanv mwam svkanum.

Galiliho Jisu Mwwg Bonam Nyirabnum

(Mk 1:14-15; Lk 4:14-15)

12Kokw so Jonnvn pvtwqho lwqnam puiyam tapa tvl mwv Galilib wleqnum. 13Mwv Najaretam apaqpel Galili swnyiq bviywrho doonbo Jebulun la Naptali gvdag Kaparnahum nampam ho dootab wnum. 14Soq sib nyinam si hvbaloqkam nyiqry kaanbo Aijaya hognvkam otuqho bepwl ap kunum ham jvqtw jaqb niqtuq lengm dvb nyiknum.

15“Jebulun la Naptali gvdaho doonbo lamta,

ho Jordon pobu taqc ho doonbo gvda,

Nyob luusaq gvda Galili!

16Kan uraho doonbo nyi tulungv hutongam kaapa tayin,

ho kan uraho sil doonbo nyi tulug aoho hutongv huudaq pakun.”

17Hoq apo hoqgv Jisu mwwg puiyam berab kunum. Mwv benum, “Nulug nyic nyinam hoqgv mwwkur tuku, hoggab ao lvpwngv ogumb hvvnwq paku.”

Jisu Ngui Nootubo Tulungam Goqnam

(Mk 1:16-20; Lk 5:1-11)

18Jisu Galili sa-svlo bviywrho wdu dvkho vbw-bor vnyi go ngui nootubo nyiv, Pitorvk hvl benam Simon la mwwg bor Andriyonvn swnyiqho wswq hwrl ngui nootul yvnam mam kaapanum. 19Jisu bulam benam, “Ngoqg kokw kokwb wmin gvto, ngo nulam nyi nootu mvdwb tomswr tayin. 20Bulv ho dara bulug wswqngam apaqpel mwwg kokwb wmin gvnum.

21Hoqgv mwv wdul hvraqb doodwkho vbw-bor vnyi gota Jebedig ko tuup Jemsnvn la Jonnvn kaapanum. Bulv hulu ho bulug ab Jebedig lvgab wswqngam mwx-mvaql mvdarl doonum. Jisu bulam goqnum, 22hoo goqda kalam hulungam hoo bulug abam apaqpel mwwg kokwb wmin gvknum.

Jisug Biswrl Tomswrnv Mwpnam

(Lk 6:17-19)

23Jisu Galili gvda tvqpwngam gaqkar banv Sinagog uraho tomswrl ho Lvpw Puiyam bekarl hoo deedib vcbo nyi tulungam mwpnum. 24Mwwg pagoq hoqg puiyv Siriya gvda tvqpwho yuupw kunum, hoqgab mwwg dookub nyi tulungv deedib vcboam, vc luuxy hoqgv vc cidul doonbo nyi tulungam, sony cenam mam, rugaq boam, svmeq boam hoo lviya-laqyabo mwlwngam Jisu bulam mwp jinum. 25Mwwg kokwb nyiv mvqlw jaqg Galili, Dekapoli, Jerusalem, Judiya, hoqgv Jordon taqc gvda hoqgv kam nyiv vigo wbanum.

Currently Selected:

METIYU 4: NYISBSI

Highlight

Copy