METIYU 15
15
Ab-Apag Nyicw-mwcw
(Mk 7:1-13)
1Kokw so Parisi tulungv la Pvvb tomswrbo nyi ata go Jerusalem hoqgv haalayil Jisun toxnum, 2“Hoggab noqg buu tulungv ngulug ab-apa tulug nyiswr-wswrnam nyicw-mwcwngam tamab nyidwn? Bulv bulug alaqngam dvma daab hind bvkam losuql dvma do!”
3Jisu bulam birwqnum, “Nulv hoggab Pwnbog gamlam tamab nulug atwg nyicw-mwcwngam ya haagab alwb nyidwn? 4Hoggab Pwnbov benum, ‘No noqg ab-annam bugil swwto’ ho ‘Hiyv lajaqkam mwwg ab-annam almab bedwn mwam sim dvb nyitayin.’ 5Hvbmabde nulv bedwn, 6‘Ngoqg galoqkam nam svka kaan tanam mam Pwnboam aky jit kun’ hvl atwg ab-annam ximab nyidwn. Soq sib nulv Pwnbog gamlam ximab nulug atwg nyicw-mwcwngam xixo yarol nyidwn. 7Kaak-takdvb nyinbo nyi tulu! Nyiqry kaanbo Aijaya nulug pagoqkam kvtaqjaqb bepwl ap pvvlaq pa! Mwv benum,
8Pwnbov bedwn, ‘soq nyi tulu si ngam bulug agamv xitwqdvn,
hvbmabde bulug hangv ngoqg galoqkv jvqtw jaqb aado hv doodwn.
9Bulv ngam xumnamv niqtuq dooma,
hoggab nyiig Pvvb mvnam mam ngoqg gaml jaqhvb tomswr dvn!’”
Nyiam Kacdvb Mvnbo Hoolu
(Mk 7:14-23)
10Kokw so Jisu nyi tulungam mwwg dookub goqal bulam benum, “Nyiig ayeq urab haanbov mwam kacdvb mvma sud nvlak! 11Hvbmabde ura hoqgv lengn bov mwam kacdvb mvdwn; sam tagabto hoo tacinto.”
12Kokw so buu tulungv mwwg dookub haal benum, “Noqg benam mam tatwl Parisi tulungv bulug nyurungv tomur nyanba ham no cens i?”
13Jisu birwqnum, “Ngoqg ao gvda tolo doonbo Abwg liimanam svvn nwwxiam busuql bupaq dvb nyitayin.” 14Bulgab mwwdwq maab, nyiqca bo ajinam xilob swwgbov; nyiqca bo nyi akv nyiqca bo akwn bool wg baloqkam bunyi vnyi vnyiv ung golo holwq tayin.”
15Pitor Benum, “Ngulam soq niitinam sam hindib bekin tvb.”
16Jisu bulam birwqnum, “Nulv sija godab nyi asaqkam cenglv yaama da i? 17Nulv sam cengma dvn? Hognvkv nyiig agam urab haadwn, hv ayeq urab haadwn ho kokwngam gv hoqgv agab lengd kun. 18Hvbmabde hognvkv agam hoqgv lengdwn hoqgv hang ura hoqgv lengdwn, soq tulu si nyiam al maadwb kacdvb mvdwn. 19Hoggab mwwg hang ura hoqgv mwwc-mwwyangv, nyi mengnamv, nywxw-nyolam bwwxinamv, yocu-yabiongv, dvconamv, vm mvvnamv, xaalyob hvvky swwnamv, benyi-beyanamv. 20Soq torab siilak nyiam dvrwq maadwb kacdvb mvdwn. Hvbmabde bulug benam hvb nulug alaqngam losuq maab dvnamv nyiam kacdvb mvma dvn.”
Nyem Dvn Akwg Mwwjwnam
(Mk 7:24-30)
21Jisu hoq nyookam apaqpel Taiyar la Sidon nampam ogumho doonbo gvdab wleqnum. 22Hoq gvdaho doonbo Kanaan nyem dvn ak mwwg dookub haal xabl benum, “Debidg Ko Tuup! Ngam aya mwwpa tvb! Ngoqg nyem ko akam oramv nootupa ho mwn sija yuugam tvl doodo.”
23Hvbmabde Jisu nyem dvn akam hog agam birwq maanum. Mwwg buu tulungv mwwg dookub mvnyi-moiyul benum, “Mwnwn kanam tukul wm tuk! Mwn ngulug kokw kokwb wmin gvl tosup-taiyab dvb goodu do!”
24Kokw so Jisu birwqnum, “Ngam sviya niikbo, Israel nyi tulu aro gab kanam pan.”
25Hoqho nyem dvn akv Jisug dookub haabnv mwwg agahv lwbwngv kumbwl xuml benum, “Tomswrbo, ngam svka tvb!”
26Jisu birwqnum, “Ko tulug dvsam naalayil iky tulungam hwrjnam si al maadwn.
27Nyem dvn akv birwqnum, “Tomswrbo hv jvqtwngv jaqsu, hvbmabde iky tulungv at akwg vcin duduq dvngaram huku hoqgv yoql boam dvdnvlak.”
28Jisu mwnwn birwqnum, “No nyem dvn no koi jaqg mwwjwbo gonyi! No hognvkam mwwlwqdvn ham noqg gab nyidwb nyitayin.”
Jisu Vcbo Nyiam Vigo Mwpnum
29Jisu hoq nyookam apaqpel wknv Galili swnyiq ogumho wc kunum. Hoo mwv puutu golo caol doonum. 30Hoo nyi acam camt jaqg mwwg dookub vcbo nyiv vigo lvca bo, nyiqca bo, lukum bo, paca bo hoo luusaq-luusaqb vcbo nyiam boal haagnum hoo bulam Jisug al lwkwho joop jinum. Mwv hoq mwlwngam aldvb mwp jinum. 31Nyi tulungv paca goocin maanboam goocin dvb, lvca boam al dukub ho nyiqca boam kaapa dukub mvnam mam kaapa tvl deedyjaq gokbo mwwnum ho Israel Pwnboam paqnum.
Jisu Lwwyw Vpy Nyiam Hoonam
(Mk 8:1-10)
32Jisu mwwg buu tulungam ogum goqa banv benum, “Ngo soq nyi tulu sam mwwdwqdo, hoggab soolo aal loum paku ngoqg lvgab yvnamv, hoo sija bulug dvdwb dvs akukam dookma. Ngo bulam hog dvs ak dvdwb jimalo kanam namdwb nyima, hoggab lokam lamtaho tabtol doa tayi.”
33Buu tulungv mwam toxnum, “Ngulam hogloqgv soq hvd nyi tulu sam dvgdwb soq deexa-rara so dvsam naalayil dvg tvk hvl bedwn?”
34Jisu toxnum, “Nulug wtwngv toqkgo doodo?”
Bulv birwqnum, “Wtw kvn gola ngui cinyio cimaqbo cinyi-cirumgo dootwq do.”
35Kokw so Jisu nyi tulungam kedho doatvk hvl benum. 36Ho Jisug hoq wtwngam la nguiyam alaqhv bvvtwl Pwnboam paql pingmwq tvl ham mwwg buu tulungam jinum, ho buu tulungv ham nyi tulungam hornum. 37Bul mwlwngv ham dvtar nagub dvnum. Kokw so buu tulungv huc kvn go dvleqngam vmwq akaqkam dorkum kunum. 38Nyem himiam bepa maab nyeganga hvnamv dvn boam xikanamv lwwyw vpy go nyiv dvnum.
39Kokw so Jisu nyi tulungam kanam tukul mwv swp golo caol Magadan gvdab wknum.
Currently Selected:
METIYU 15: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
