METIYU 14

Jon Baptistg Sinam

(Mk 6:14-29; Lk 9:7-9)

1Hoq apoho Galili gvdangv Herodg alaqho doonum ho mwv Jisug puiyam tapanum. 2Mwwg saab tulungam mwv toxnum, “Jon Baptist mwv jvqtw jaqb lokta turab pakun? Hoqgab mwv swrdorxeq bonam nyin nan atoram doog pa.”

3Hoggab oyu maadab Herod Jonnvn nootu dvb gaml jinum ho mwam leetwl pvtwqho lwql apnum. Soq sam Herod si mwwg bor Pilipg nywxw Herodiag pagoq gab nyinum. 4Hoggab Jon Baptist Herodnvn benum, “No Herodianvn nywxw bool doognam si al ma.” 5Herod mwam mengdwb mwwnum, hvbmabde mwv Juhudi nyi tulungam bosnum, hoggab Jonnvn nyiqry benbo akv bo hvl mwwnum.

6Herodnvn ko bwwd aalho Herodiag nyem ko akv nyi tulug agaho noso soojnum. Herod hemp aljaq mwwpanum, 7hoggab mwv nyem ko akam dingbnv benum, “No hognvkam kootayin ham ngo nam jitayin!”

8Mwwg annam bilwq kotwl nyem ko akv mwam benum, “Ngam Jonwg dumpongam soq beta so jitwb!”

9Lvpw atv tapa tvl mwwdwqnum, hvbmabde mwv nyi tulu mwlw agaho dingr kunam gab nyem ko akwg ko-gabnam mam jidkub mwv gaml jiknum. 10Hoggab kokw so mwv Jonnvn pvtwq uraho dumpongam pvriql mengknum. ko-gab 11Dumpongam beta ao golo tvptvl nyem ko akam joa jinum, ham nyem ko akv annam joojnum. 12Jonwg buu tulungv haal mwwg svmangam joolayil svma liiknum. Kokw so wknv puiyam Jisun bekinnum.

Jisu Nyi Lwwyw Angngam Hoonam

(Mk 6:30-44; Lk 9:10-17; Jn 6:1-14)

13Kokw so Jisu Jonwg puiyam tapa tvl swp golo caol hoq nyookam apaqpel nyi cumciqko nyook golo wleqnum. Ham tapa tvl nyi tulungv bulug nampam mam apaqpel mwwg kokwb kedwb wmin gvnum. 14Jisu swp hoqgv lengknv kokw so mwv nyi acam camt algo kaapa tvl mwwg hangv biil bulam aya mwwpanum, ho mwv bulug vcam mwp jinum.

15Hoq ariyumho mwwg buu tulungv mwwg dookub haal mwam benum, “Nyook si deexa-rara pa, ho doonyiv kam haade ku; nyi tulungam kanam tukul nampamb wgdvl bulug dvsam atam rvl dvmto.”

16Jisu birwqnum, “Bulam wm dvb nyiram, nulv bulam hog dvslo ak dvm dvb jito!”

17Bulv birwqnum, “Ngulug alaq si wtw taqang gola ngui cinyi go dootwq do.”

18Kokw so Jisu benum, “Hoq tulu ham ngoqg dookub bvato.” 19Mwv nyi tulungam misab talap ww aoho doom dvb jinum. Kokw so mwv wtw taqangam la ngui cinyiam naal bvvtwl ao gvdab koodul Pwnboam paqnum. Kokw so wtwngam pingmwql buu tulungam jinum, ho buu tulungv ham nyi tulungam jinum. 20Nyi vxiv ayeq dvdeq dvb dvnum kokw so buu tulungv huc cwyw leq cinyi go bulug dvleqngam dorkum kunum. 21Hoqho dvnbov nyem himy tulungam bepa maab nyeganga hvnam mam xikanamv lwwyw ang gob nyinum.

Jisu Iss Aoho Wnam

(Mk 6:45-52; Jn 6:15-21)

22Kokw so Jisu nyi tulungam wwm dukub kanam ywwtwl mwwg buu tulungam swp aob caol swnyiq kvtin gonwb rabco yaatwk hvl kanamnum. 23Nyi tulungam wxo mvtkul mwv puutu golo vpwb xumtab caonum. Kokw so ariyum nagub hoq ditaqho Jisu vp-cwkwb doonum. 24Hoq ditaqho swpv sugur hoqgv swnyiq ura aado ho doonum, ho suduq-duql hoo dooiyv yiturl ko-gab swpv yookub-yaaxeql swnyiq uraho nyidul doonum.

25Arkomc poroq xoqd ditaqho Jisu buu tulug dookub iss aob lvpiangv korl haanum. 26Kokw so mwam iss aoho lvpiab korl haanam mam kaapa tvl boswl lomnum. “Iss oram go!” hvl benv boswl sogoqnum.

27Jisu nyory alwb bulam agam goorwql mwv benum, “Haakam to! Ngo sulak. Bos maabv!”

28Ho Pitor benum, “At Sw, jvqtw jaqb no jaqloqkam ngam noqg dookub iss aob haam tvb.”

29Jisu birwqnum, “Kv haato!” Hoqgab Pitor swp hoqgv ipoq layil iss aob Jisug dookub wrabnum. 30Hvbmabde vc alwb dooi yinam mam hempa tvl mwv bos kalam iss urab holwq tanum ho mwv xabl benum, “At Sw, ngam ywwtwb!”

31Ho Jisu nyebia alwb ijin banv mwam nootu tvl benum, “Noqg mwwjwngv hwiyw go! No hoggab mwum dvn?”

32Kokw so bunyi vnyi bwbwngv swp aob caokunum ho dooiyv kam yingin kunum. 33Kokw so swp uraho doonbo buu tulungv Jisun xumnum. Bulv benum, “No jvqtw jaqb Pwnbog Ko Tuup goknyi!”

Jisu Genvsaret ho Vcboam Mwpnam

(Mk 6:53-56)

34Kokw so swnyiq kvtin gonwb rabknum hoo Genvsaret gvdaho haanum. 35Hoq gvdag nyi tulungv Jisun kaacinum. Hoqgab gvda taqg-loosaqb nyi kanam tvl diis-paap nampamho doonbo vcbo nyi tulungam mwwg dookub boa mvnum. 36Mwam xuml benum vcbo nyi tulungam mwwg vj laqyap niqtuq gojaqkam gvbw mvtbvk hvl benum ho hvb gvbwbo mwlwngv vc hoqgv al kunum.

Currently Selected:

METIYU 14: NYISBSI

Highlight

Copy