MALAKI 3
3
1Kaato, ngoqg pui baqnboam ngo kanam tayin, hoo ngoqg otuqb mwv mwx-mvaq tayin. Hoo nulug meegaqnam At Sw haqmapaq galo mwwg dvrwqbo namlo so haatayin; hoo hiyam nulug hempwl birnam pui baqnbo akv, kaato, mwv hoodu do, nyiit At Sw bedo.
2Hvbmabde mwwg haad aalam hiyv cwqnyi tayin, hoo hwdlo mwv daqlin yin hiyv daqnyi tayin? Hoggab mwv wm porxubo ak hvbla neexaq nan sabon ak hvb nyidwn. 3Mwv raxorbo ak hvb la rupam heexorbo ak hvb dootayin, hoo mwv Lebi ko tuup tulungam nyedar darxaq tayin hoo hunam la rupam heexornam hvb heexor tayin, hoo At Sw gab bulv jvqtw akiam bwa jitayin. 4Ho otuqg mood hoola vnyw tuluho hoggub Judag gvla Jerusalemwg aky jinam mam At Sw hempnam hvb hemp tayin.
5“Ho nulam pw-hwwtab ngo ogum hvvnwq tayin. Nyioky nyub tulungam, bwwxinbo tulungam, xaalyo bo tulungam, bonam nyijo bo tulungam nyijab-nyiyiqbo tulungam, xwwmy-hopin tulungam nyijab-nyiyiq boam, nyoodo nyiilungam jvqtwb nyimanam mam, hoo ngam bos maanbo tulungam, ngo nyebia jaqb ceekol hvvky swwtayin, nyiit At Sw bedo.
Pwnboam Naalil Naareqnam
6“Hoggab At Sw ngo kwly maadwn; hoqgab Jakubg ko tulunga nulam, twryum maap kun i. 7Nulug ab tulug swwd aal hoqgv nulv ngoqg pvvbam caabo paku hoo ham pvvl ap kumanum. Ngoqg dookub hookur to, hoo ngo nulug dookub hookur tayin, nyiit At Sw bedo. Hvbmabde nulv bedo, ‘Hoggub nyil ngulv hookur tayin?’ 8Nyiingv Pwnboam naalil naareq dvn yv? Hvbmabde nulv ngam naalil naareq do. Hvbsutwl nulv bedo, hogloq ho ngulv nam naalil naareqnum? Nulug jibwqko hoola svkal aky jik ho naalil naareq do. 9Nulam beenam lvgab beeknum, hoggab nyook soq nyi mwlwngv ngam nulv naalil naareq riqdu do. 10Ho ngoqg namho dvs-twwsam doom dvb, jibwqnam mam bumpwb noosu urab baqa to. Hoo hvb nyigdvl ngoqg hangam pooka to, nyiit At Sw bedo, ngo nulgab doa viyap pam ciqko jimab nyiyi bwdwq hoo nulgab lvqcv jot paku hvma deedib jil tayin. 11Rongongam dwtwr tanbo takam-yorup pam ngo nulgab mvtur tayin, ho hoqhv nulug ked rongog aaxy tulungam dwtwram, hoo nulug roo boolungv aaxy xeemab nyiram, nyiit At Sw bedo. 12Ho gvda soq nyob asaq nyiingv nulam xinam gob betayin, hoggab nulv jampko gvdaho dootayin, nyiit At Sw bedo.
13“Nulug gomcwr tulungv ngam ceekol tac dvb goodo, At Sw bedo. Hvbmabde nulv bedo, ‘Hogloq ho ngulv nam ceekol agam goonum?’ 14Nulv bepakun, ‘Pwnbon bon nyij namsi niqtuq dooma dvn. Mwwg pvvbam ngulug pvvnamv ho nyiit At Swg agaho nyix-riil wnbo wnam hvb wnmv, hognvk niqtuqkv kaapa tayin? 15Hoo sija ngulv kvla-kwdwrnam mam xinam akib mwwdwn. Almab nyinbo tulungv nyet twtwqma hvbmabde bulv Pwnboam pooka-peel ho bulv keleqdo.’”
Mwwpanam Kitap
16Ho At Swn bosbo tulungv akwn-akwn goomin sunum. At Sw ruucw kwrgab do hoo bulam tapanum, hoo At Swn bos boam la mwwg eminam xinbo tulungam mwwg agaho mwwpanam kitap ak xeqknum. 17“Bulv ngoqgv ku, nyiit At Sw bedo, hoq aalam hwdlo ngo ngoqg gumnam paaikam, hoo nyi akv mwwg ko tuupv hiyv mwam bon nyij yin hang biinam hvb ngo bulam hang biitayin. 18Ho nulv lokta jvqtw gvla nyicig pagoqkam hoo Pwnboam bon nyij boam la bon nyij maanbog pagoqkam dvrwq kwrwq dvb kaapa tayin.
Currently Selected:
MALAKI 3: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
