JON 20

Turkur Kunam

(Mt 28:1-8; Mk 16:1-8; Lk 24:1-12)

1Doonu dvk arkomc kan twdwq dvb Meeri Magdalin nyubu ung hoqgv wlwngam ngurgin apnam mam kaapanum. 2Ho mwn xorkur banv Simon Pitor nvla buu tulungam la mwwg abynam akam bekinnum, “Bulv At Swn nyubu hoqgv joog nukba, hoo bulv mwam hogloqb ap sugnuk nvbadwq ham ngulv cengkma!” 3Kokw so Pitor la buu tuugin nyubwb wnum. 4Bulug vnyi gon xarnum, hvbmabde akwn Pitornvn otuqyab nyubu hv xarc coonum. 5Hoo mwv nywar banv vjam kaapanum, hvbmabde mwv nyubu urab haamanum. 6Mwwg kokwb Simon Pitor haamin gvnum, mwv nyubu urab hvvs haadal haanum. Mwv topum vjam la Jisug dumpongam pubum nan vj jeliangam kaapanum. 7Vj jelia rummv topum lvgab doomanum. Hvbmabde atv geqgin tvl doonum. 8Kokw so otuqjaqb nyubungam wc coonbo buu akv urab haabnv kaatwl mwwjwnum. 9Bulv sija godab Dvrwqbo potalo mwv sinam hoqgv turkur tayin hvl xeqnam mam tacin maanum. 10Kokw so buu tulungv nammwb wkur kunum.

Jisug Meeri Magdalinnvn Kaakinam

(Mt 28:9-10; Mk 16:9-11)

11Meeri xobdu banv nyubu bviywrho daqnum. Mwn xabjo ywwtwl pvxw banv nyubu urab kaanum 12hoo mwn ao gumtw vnyi go vj puulu kootwl Jisug svma dook dumpo lwkw hv akwn hoo akwn lvpia lwkw hv doodwb kaapanum. 13Bulv benum, “Nyem, no hoggub xabdwn?” Mwn bulam birwqnum, “Nyi tulungv ngoqg At Swn naag nukba, bulv mwam hogloq nyook hooya ap gvnkun ham ngo cengma!” 14Mwn hvl bexo kokw so nyikur kaanamv Jisun daqdwb kaapanum. Hvbmabde mwn ham Jisu nago mwwmanum. 15Jisu mwnwn toxnum, “Nyem, no hoggub xobdul doodwn? No hiyam meekar dvn?” Mwv boolu kan gon go mwwnum, hoqgab mwn mwam benum, “No mwam kaapa nyiloqkam, nyelo, mwam no hogloqb ap pan ngam bekin tvb, ngo wgdvl mwam kaatayin.” 16Jisu mwnwn benum, “Meeri!”

Ho mwn mwwg taqcib doqkur banv Hibru agamb benum, “Rabboni!” (Hvgdvn si “Tomswrbo”). 17Jisu mwnwn benum, “Ngam gaqka maabv, ngo sija godab Abwg dookub cookur maada, hvbmabde wgdvl ngoqg buu tulungam bekin ta. Ngo noq gvla ngoqg Abwg dookub, ngoqg Pwnbo la noqg Pwnbo dookub cookur deen.” 18Meeri Magdalin buu tulungam mwn At Swnvn kaapa peenwk hvl Jisug puiyam bulam bekinnum.

Jisun Buu Tulungv Kaapanum

(Mt 28:16-20; Mk 16:14-18; Lk 24:36-49)

19Ho Doonu dvk ariyumb nyiknum, buu tulungam bos banv lvkin gob hookum banv viyap pam mutum tvl doonum. Ho Jisu haabnv bulug pengko ho daqtwl benum, “Swrsomalongv nulug lvgab doon ka.” 20Sam Jisu bexo tvl alaqngam la rumbum mam bulam kaatamnum. Buu tulungv At Swn kaatwl hemp ponum. 21Jisu lokta bulam benum, “Swrsomalongv nulug lvgab doonka. Ngam Abv kanamnam hvbkalam nulam ngo kanam dvn.” 22Sam bexo tvl mwv bulug aoho miqbnv benum, “Dvrwqbo Yalam naato. 23Nulv nyi tulug nyic nyiangam apaq jibaloqkam bulug nyic nyiangam apaq jipa kun. Hvbmabde nulv nyi tulug nyic nyiangam apaq jima baloqkam, bulug nyic nyiangam apaq jima pakun.”

Jisu la Tomas

24Buu tulug pengko ho akwn Tomas ngvk hvl (Bwwpiamnam) benam akv Jisu buu tulug dookub haad ho mwv bulug lvgab doomanum. 25Buu tulungv mwam bekinnum, “Ngulv At Swn kaat kun!”

Tomas birwqnum, “Ngo mwwg dvvcw silo lvgab taqkonam alaq paiyam kaama lo hoo ngoqg lvqcwngv dvvcw silo lvgab tvqlwq koam piika maalo, hoo ngoqg alaqngv mwwg rumbum mam hubka maalo ngo mwwjwram.”

26Aal piin kokw so buu tulungv lokta nam urahv doonum, hoo Tomas bulug lvgab doonum, bulv viyap pam mutum tvl doonum, hvbmabde Jisu haabnv bulug pengko hoo daqtwl benum, “Swrsomalongv nulug lvgab doon ka.” 27Ho mwv Tomasnvn benum, “Noqg lvqcwngam soq so piika to, ngoqg alaq sam kaaka to; noqg alaqngv ilwq gvdwl ngoqg rumbum sam hubka to. Noqg mwumnam mam apaq tuku, hvbmabde mwwjwto!” 28Tomas mwam birwqnum, “Ngoqg At Sw hoo ngoqg Pwnbo!” 29Jisu mwam benum, “No ngam kaagam gab i mwwjw dvn? Hvbmabde ngam kaamakam mwwjwbo nyi tulungv paqnam jaqkv.”

Pota soqg Niqtuqkv

30Jisu mwwg buu tulug kaagaho vigo swrdorxeqb nyinam mam soq pota so xiqlwq ap kuma pan. 31Soq torab sam xeqnam si hvb nyiloqkam nulv Jisu Kriston, Pwnbog Ko Tuupv hvl mwwjw mvdwb, hoo mwwg eminho swwgam kaapa mvdwb hvl xeqpan.

Currently Selected:

JON 20: NYISBSI

Highlight

Copy