JON 19

Jisun Daapoho Mengm dvb Jilin kunum

1Ho Pilat Jisu boolinl hoo mwam xipwql mvnum, 2Hoo sipai tulungv taag ywr dumtup ak mvtwl mwwg dumpo hv tulwqnum. Ho bulv lwwsa-lwwma bo lvlwq rumg mwam koomnum. 3Mwwg ogumb wnwq banv benyanum, “Juhudi hvdwg Lvpw Atv swwiyu nvka!” hoo bulv wnwq banv mwam alaqngv pitaqnum.

4Pilat lingkur banv nyi tulungam benum, “Kaaiya to, ngo sija mwam nulug dookub agab boolin tayin, hoo nulam ngo mwwg aoho dod yolu meepa maak hvl nulam kaakin tayin.” 5Jisu taag ywr dumtup pam la lwwsa-lwwma bo lvlwqngam kootwl agab lengnum. Pilat bulam benum, “Kaato siilak nyi akv!” 6Ho Nyub buda tulungv la rvkybo tulungv mwam kaatwl bulv sogoql benum, “Mwam daapo tol dvvcw silo lvgab taqtin to! daapo tol dvvcw silongv taqtin to!” Pilat bulam benum, “Nulv mwam boog dvl daapotol dvvcw silo lvgab taqtin gvdwl mengta, hoggab ngo mwam mengdwb hog dod yolu meepa ma.” 7Juhudi tulungv mwam birwqnum, “Ngulug pvvb ak doodwn, hoo hoq pvvb beab mwv sidwb nyitayin, hoggab mwv atam Pwnbog Ko Tuupvk hvl besdvn.”

8Pilat bulug benam mam tatwl mwv meeg yaiya bosnum. 9Ho mwv nam urab hookur banv Jisun benum, “No hogloqkv haai yin i?” Hvbmabde Jisu mwam hog gokam birwqmanum. 10Pilat Jisun benum, “No ngam birwqram i? No cengma dvn yv, ngo nam toxa jid bvkam hoo nam daapo ao tol dvvcw silo lvgab taqtinl mengd bvkam atorv doodwn?” 11Jisu mwam birwqnum, “No ngoqg aoso ator doonyiram nam ao hoqgv jima deedib. Hoqgab noqg alaqho hiyv gvqlwq jinbo nyi tulu hoqg nyic-nyiangv vi yaadwn.” 12Pilat ham tatwl mwv Jisun toxa dvb mwwnum. Hvbmabde Juhudi tulungv sogoql benum, “No mwam tolin baloqkam no Lvpw hvdwg Gora abwg ajin ma! Hiyv lajaqkam ngo atv Lvpw atv hvl benbov Gora abwg ceebiongv.” 13Ho soq benam sam tatwl Jisun agab boolin banv mwv nyel bebnv dootam ak “Wlw paanam” aohv doonum. (Hibrungv ham “Gabbata” hvl eminum.)

14Ho doonyiv taab kunum. Soq aal si Nyedarko Durum otuq mwx-mvaqko aalwb nyinum. Pilat ho Juhudi tulungam benum, “Nulug Lvpw at sam kaato!” 15Ho bulv sogoq goql benum, “Mwam mengxato! Mwam mengxato! Mwam daapo ao tol mengto!”

Pilat bulam benum, “Nulug Lvpw atam mengto i?”

Ho nyub buda tulungv birwqnum, “Sijar ao hoqgv ngulug Lvpw at dooma dvn.” 16Ho kokw so Pilat Jisun daapo aoho mengm dukub bulug alaqb gvqlwq kunum.

Jisun Daapo Aoho Mengnam

(Mt 27:32-44; Mk 15:21-32; Lk 23:26-43)

Kokw so bulv Jisun bool wgnum. 17Hoo mwv daapongam jootwl “Dungk lo Alo” ngvk hvl benam nyookub wnum, (Hibrungv ham “Golgota” hvl goqdwn.) 18Ho bulv mwam daapo aoho dvvcw silo lvgab taqtinum; hoo bulv nyi vnyi gota Jisug taqg-loosaqho daapo ponyi golo mengnum. 19Pilat pota taqg xeqtwl daapo aohv tengpnum, “Najaretwg Jisu, Juhudi tulug Lvpw atv hvl xeqpnum.” 20Jisun mengkv bopam hoqgv haajaqb aado maanum, hoqgab Juhudi nyiv vigo hoq xeql tengpnam mam poory nyanum. Hoq tengtaqnamv Hibru, Letin hoo Gwrik agamb xeqnum. 21Hvbmabde Juhudi tulug nyub buda tulungv Pilatnvn benum, “Juhudi tulug Lvpw atv hvl xeqmab, hvlaya xeqto, “Soq nyi ak si benum, “Ngo Juhudi tulug Lvpw atv.” 22Pilat birwqnum, “Hoggv ngo xeqyinam ngo xeqtkun.”

23Sipai tulungv Jisun daapo aohv dvvcw silo lvgab taqtin xootwl bulv mwwg vjam naabnv mvpin-mvranum hoo sipai vxiv rumsaq twqb naanum. Kokw so bulv mwwg lvlwq kamtam hoiyo dvb cumbunam mam hvmsiq maanam rummam kam naanum. 24Sipai tulungv akwn akwn bemin sunum, “Sam surtu yooju, tak kaag dvl hiyv naadwb nyidwn ham kaaka tuj.” Soq si dvrwqbo potalo xeqnam mam jvqtw jaqb niqtuq nyilin dvb nyiknum:

“Bulv ngoqg vjam bulug pengko ho mvpin-mvral naag nukun,

hoo ngoqg vj gab bulv tak kaanum,”

Hoqgab sipai tulungv sam nyinum.

25Hoq ditaqho Jisug daapo ogumho mwwg ann, mwwg bwrm, Klopaswg nywxw Meeri la Magdalin Meeri daqnum. 26Jisu mwwg abynam buu akam ogumho daqnam mam kaatwl, mwv mwwg annam benum, “Ann, noqg kov islak.” 27Ho buu akam benum, “Islak noqg annv.” Hoqjaq hoqgv buu akv mwam booknv mwwg namho doomnum.

Jisug Sinam

(Mt 27:45-56; Mk 15:33-41; Lk 23:44-49)

28Jisu hog mwlwngam dvrwqbo potalo xeqnam mam niqtuq nyilin paku hvl cengtwk mwv benum, “Ngam hvngwr pa.” 29Hoq ditaqho opo pooxu bo dootwl bulv hissop svvn toolo golo hiipungv cabgab tvl opoho subum tvl mwwg agamb hwca jinum. 30Ho hoq pooxu bo opongam twwka tvl mwv benum, “Hvvkbo hvnum!” Kokw so mwv pvxw kunv siknum.

Jisug Rumbum mam Nwqkonum

31Ho Juhudi tulungv Pilatnvn nyi mengknam lvpiangam pvtwr tvl bulam daapo ao hoqgv joopoq mvtbvk hvl gaml konum. Hoggab hoq aalhv loong deen aalwb nyigam gab bulv svmangam Doonu dvk aalho daapo aoho doom nwmanum, hoggab haata bo Doonu dvk aalho mwlwjaqkam dvrwqbo aalwb nyinum. 32Ho sipai tulungv wbnv Jisug lvgab daapo ho mengnam nyi vnyi-vnyig lvpiangam pvtwrnum. 33Hvbmabde bulv Jisug dookub haal kaaknamv sitkul doonum. Hoqgab bulv mwwg lvpiangam pvtwr maanum. 34Hvbmabde sipai akwn Jisug rumbum mam nwwxongv nwqlwqnum, hoo nwqda kalam uiyv la issiv tolinum. 35Soq nyinam sam kaanbov jvqtw jaqb benum, mwwg gon si jvqtw gojnyi, hoo ham kam cengdwn mwwg benam si jvqtwngam bidu dvn, hoo nulam kam mwwjw kamyi nvpv. 36Soq sib nyinam si dvrwqbo potalo xeqp kunam mam jvqtw jaqb niqtuq nyilin mvdkub nyinum. “Ngoqg alo buukin gonkam pvtwr dvb nyiram.” 37Dvrwqbo potalo hvlkam xeqnam ak doodwn, “Nyi tulungv bulug nwwxo nwqnam akam kaagab tayin.”

Jisun Svma Liinum

(Mt 27:57-61; Mk 15:42-47; Lk 23:50-56)

38Soq kokw so Arimatiya bopam hoqgv Josap ngvk hvl benam nyi akv Pilatnvn svmangam naam tvbwg hvl konum. (Josap Jisug buu ak gon su, hvbmabde Juhudi tulungam bosil buu swwsil swwnum.) Pilat mwam svmangam naatwk hvl benum, hoqgab Josap wbnv svmangam jool wgnum. 39Otuqho aal golo Jisun kaatab wnbo Nikodimas kam Josap lvgab wbanum. Mwv mirr hoo alos ngvk hvl benam hoq mviyotvl nvmnyi bov sar camkvn leq ang go bwanum. 40Ho bunyiv Jisug svmangam joopoq banv topum vj golo tumtwl Juhudi tulug liicib liinum. 41Jisun mengk ditaqho boolu ak doonum hoq boolu ho lokkam svma liika maanum nyubu nit ak doonum. 42Hoq aalhv Juhudi tulug Doonu dvk aalwg mwx-mvaqko aalwb nyigam gab bulv svmangam hoq ogumho doonbo nyubu ho liiknum.

Currently Selected:

JON 19: NYISBSI

Highlight

Copy