JON 17

Jisu Mwwg Buu Tulu gab Swgwnam

1Hog mwlwngam bexo so Jisu ao gvdab koodu banv benum, “Ab moodv haapa ku noqg Ko Tuupam yuum dvb jitwl hoo Ko Tuup galoqkv namkam yuum dvb jito, 2hoggab nyi mwlwg dvrwq pagoqkam no mwam bibwq jipa kun, ho ngoqg mwam nyi jinama hvnam mam nwrba cwtam swwgam jim dvb jipan. 3Nyi tulungv nam jvqtw Pwnbov hvl noqg kanamnam akam Jisu Kriston cengnamv nwrba cwtam swwgv. 4Ngo noqg yuunam mam gvda gvtam kaakin pakun. Ngam noqg bonam nyitwk hvl jinam mam ngo niqtuq nyilin pakun. 5Ab sija noqg kaaga so ngam yuum dvb jito, gvda gvt sam pwma daqyikho noqg lvgab ngam yuunam hvbkalam yuunam akinam jito.

6“Noqg gvda gvt soq ngam jinam nyi tulu hvdam ngo bulam nam cengdwb jipa kun. Bulv noqg gab nyidkun, bulam noqg ngam jiknamv, hoo bulv noqg agam mam pvvknum, 7hoo bulv sija ham cengdkun noqg ngam hog mwlw jinamv noqg galoqkv haadkun hvl cengdkun. 8Ngo bulam noqg ngam gomcwr jinam mam jitkun, hoo bulv ham nvvrwq gvnkun. Ngo jvqtw jaqb noqg hoggv haanum, hoo no ngam kanamnum hvl bulv mwwjw dvn.

9“Ngo bul gab xumdwn. Ngo gvda gvt gab xuma dvn, hvbmabde noqg ngam jinam nyi tulu gab xumdwn, hoggab bulv noqgv. 10Ngoqg hog mwlw si noqgv, hoo noqg hog mwlw hv ngoqgv, hoo ngoqg yuunamv bulug lvgab yuug dvn. 11Hoo ngo sija noqg dookub wikun, ngo gvda gvt so dookma, hvbmabde bulv gvda gvt si doodwn. Dvrwqbo Ab! noqg ngam jiknum hvbkalam, bulam noqg eminb pvvto, hoo bulam akin gob nyim dvb, ngulv hoggub akin gob nyidwn. 12Ngo bulug lvgab doodwkho ngo bulam noqg ngam emin jinam gab bulam hindib ap tukun. Twrnbo ko tulungam apaqtvl, ngo bulam ywwtkun, bulug pengko hoqgv dvrwqbo potalo xeqnam mam jvqtw jaqb niqtuq nyilin mvdwb nyi akin gonkam niim maanum. 13Hvbmabde sija ngo noqg dookub wikun. Ngo soq sam gvda gvt so begdvn si bulv ngoqg hemp ponam mam bulug hang uraho jubxo-yaro dvb doog mvdwb bedwn. 14Ngo bulam noqg gomcwram jitkun, hoo gvda gvtv bulam oyumnum hoggab ngo gvda gvt soqg nyiib nyimanum, hoq hvbkalam bulv gvda gvt soqg nyi ma. 15Ngo bulam gvda gvt soqgv naalin wg tuku hvl nam bema, hvbmabde bulam nyic nyia nyig bog alaq hoqgv ywwto. 16Ngo gvda gvt soqgv ma, hvbkalam bulv kam gvda gvt soqgv ma. 17No bulam noqg jvqtwngv dvrwq dvb nyedar darxaqto, hoggab noqg agamv jvqtwngv. 18No ngam gvda gvtwb kanamnum, hoq hvbkalam ngo bulam kam gvda gvtwb kanam tukun. 19Hoo ngo bulug emin gab ngo atam atv jipaq gviyin hoq hvbkalam bulam jvqtw jaqb noqg gab atam jipaq mvto.

20“Ngo bul gab xumtwq ma, hvbmabde bulug gomcwram tatwl ngam mwwjwbo tulu gabkam bedwn. 21Ab, no ngoqg uraso, ho ngo noqg uraho doonam hvbkalam bulam kam ngulug uraso doomto, bulam hang pwkin gob nyil doomto, hoo no ngam kanamnum hvl gvda gvtv mwwjw tan. 22Noqg ngam yuum dvb jinam akinam ngo bulam kam jitkun, no la ngo akin gob nyinam hvbkalam bulam akin gob nyil swwm dvb jito. 23Ngo bulug uraho, hoo no ngoqg uraso doogdvn, ho bulam bumpwb hang pwkin gob nyim dvb, ho gvda gvtam cengm to ngam kanamnum, hoo no ngam aby dvn hvbkalam bulam aby dvn hvl cengm to.

24“Ab, no, ngam bulam jigam gab ngo bulam ngoqg dookho doog tvl noqg ngam yuum dvb jinam mam bulam kaam dvb mwwdo. Hoggab no ngam gvda gvtam pwma daqyik hoqgv abynum. 25Dvrwqbo Ab! Gvda gvtv nam cengma dvn, hvbmabde ngo nam cengdwn, hoo bulv no ngam kanam panwk hvl cengdwn. 26Ngo bulam noqg eminam cengm dvb jipa kun, hoo ngo hvraqb ham cengtayin, ho noqg ngam abynam mam bulug dookub doom dvb, hoo ngo kam bulug dook hoo dootayin.”

Currently Selected:

JON 17: NYISBSI

Highlight

Copy