JON 16

1“Ngo nulam mwwjwnam ho hengab dool bwdw hom mvma dvb nulam betkun. 2Bulv nulam Sinagog nam hoqgv ruqlin tayin, hoo nyi tulungv nulam mengtwl ham Pwnbog bonam nyid nvk hvl bid moodv haatayin. 3Hoo bulv nulam soq sib nyitanam si hvbnyiloqkam bulv Abam kam cengma ho ngam kam cengma. 4Hvbmabde ngo nulam soq sam bekin tukun si hvbaloqkam moodv haaikukam nulam bulv deedy luuxib mvtayin, hoq ditaqngam ngoqg nulam bekin kunam mam nulv mwwpa tayin.

Dvrwqbo Yalwg Bon Nyinam

5Hvbmabde ngo sija ngam kanambo dookub wde kun, hoo nulv ngam akkam tox maabv, ‘No hogloqb wde kun?’ 6Hvbmabde ngo nulam soq sam bekinko gab nulug hangv mwwdwq rooxonum. 7Hvbmabde ngo jvqtwb bekin dvn, ngo wleqnamv nulgab altayin, ngo wma baloqkam nulgab svka bov haaram. Hvbmabde ngo wb nyiloqkam nulug dookub mwam kanam tayin. 8Hoo mwv haab nyiloqkam mwv gvda gvtwg nyi tulungam bulug nyic nyiangam la hoo hognvkv jvqtwngv hoo Pwnbog pw-hwwtwr hwwnya hwwdynam mam kaakin tayin: 9bulug nyic nyia nyigam gab bulv ngam mwwjw maadwn; 10jvqtw jaqb beb nyiloqkam ngo Abwg dookub wde kun, hoo nulv ngam kaapa kuram; 11hoo pw-hwwdynam mam bebaloqkam gvda gvt soq lvpw abam hwwxo pakun.

12“Ngo nulam meegta vigo bekin sv doopa, hvbmabde nulv hoq mwlwngam sija tagab laram. 13Hvbmabde jvqtw Yalv haab nyiloqkam mwv nulam hog mwlwg jvqtwg lamtangam kaakin tayin. Mwv mwwg galoqkv gooram, hvbmabde mwv hognvkv tapa dvn ham nulam bekin tayin. 14Mwv ngam yuum dvb jitayin; mwv ngoqg benam mam baqlayil nulam bekin tayin. 15Abwg hog mwlw doog gvdwn hv ngoqgv, hoqgab lak ngo betkun, Yalv ngoqg mwam betak hvl benam mam mwv nulam bekin tayin.

Nulug Mwwdwqnamv Hempwb Nyikub Tayin

16“Nulv ngam oyu maadab kaapa kuram; hoo nulv oyu yooma daab kokwngam ngam kaapa tayin.” 17Mwwg buu tuugin tox minsul benum, “Hoq begdvn hv hoggv yu? Mwv ngulam bekindo, nulv ngam oyu yooma daab kaapa kuram hoo nulv oyu yooma daab kokwngam kaapa tayin. Hoo mwv hvlakam bedo, “Soq sam ngo Abwg dookub wggam gab nyidwn.” 18Bulv toxnum, miceq oyu yooma go hvgdvn si hoggv? “Mwv hog hvla yu bidul doodwn ham ngulv hiyvkam cengma!” 19Jisu mwam bulug tox tanam mam cengtwl mwv bulam benum, “Ngo benum, oyu yooma daab nulv ngam kaapa kuram ho oyu yooma daab kokwngam nulv ngam kaapa tayin. Soq sam nulv nulug pengko hoo hoggub tox xumin sudwn i? 20Ngo jvqtw jaqb nulam bekin dvn, nulv xabnv nyiqs tanap rooxob ditayin, hvbmabde gvda gvtv hemp potayin. Nulv mwwdwq dwqtayin, hvbmabde nulug mwwdwq dwqnamv hemp ponam gob nyikub tayin. 21Nyemv ko bwwtayin cinc cibnv vc yukam mwn mwwdwq dvn hoggab mwnwg hentwr hend moodv hvvnwq paku. Hvbmabde koam bwwxo kokwngam mwnwg hentwr kaanyiam mwwpa kuma dvn. Hoggab soq gvda gvt so ko ak bwwpa, hoqgab mwn hemp podwn. 22Hoq hvbkalam nulv sija mwwdwq dvn, hvbmabde ngo nulam lokta kaapa tayin hoo nulug hang uraho ho hemp-hvnyiram kaapa tayin, hoo nulug hemp ponam sam hiyvkam nulug hoqgv naareq nyoram.

23“Hoq aalv haaikam nulv ngoqg galoqkv hog gokam komab. Ngo jvqtw jaqb nulam bekin dvn, ngoqg Abv nulug hog mwlw mwam konam mam ngoqg eminb nulam jitayin. 24Nulv sija godab ngoqg eminb hog gokam koma da, nulv koto, hoo nulv kaapa tayin. Nulug hemp ponam mam niqtuq polin mvdwb.

Ngo Gvda Gvtam Mviya Pakun

25“Ngo soq mwlw sam nulam doocil betkun, hvbmabde moodv lokta haatayin, hoq ditaqngam ngo nulam doocil beram, hvbmabde ngo Abwg pagoqkam nulam bedar cekar gvdwl bekin tayin. 26Hoq aalv haaikukam nulv mwam ngoqg eminb koto, hoo ngo nulam hvl bema ngo nulug kwlib Abam koj tayin hvl beram; 27Abv nulam mwv atv aby dvn. Nulv ngam Pwnbog hoqgv haanbov hvl mwwjw banv ngam aby bogam gab nulam aby dvn. 28Ngo Abwg dook toloqgv ipoqbanv gvda gvtwb haanum, hoo sija ngo gvda gvtam apaqpel Abwg dookub lokta wde kun.”

29Ho mwwg buu tulungv mwam benum, “Kaaka to, no sija doocil bema kam tadar cekar dvb bedku. 30Sija ngulv nam cengpaku no hog luuxiam cengd kunyi nam hiyvkam hog tox dvb nyima. Soq siilak no Pwnbog hoqgv haanbov hvl ngulam mwwjw mvgdvn.” 31Jisu bulam birwqnum, “Sija nulv mwwjw dvn yv? 32Nulv ngam vp-cwkwb apaqpel asaqtwqb at at nammwb keleqdvk moodv haaiku, sija kam moodv paku. Hvbsujaqkam ngo vp cwkw ma, hoggab Abv ngam dooba dvn. 33Ngo soq tulu sam nulam bekin pakun, ho nulv ngoqg lvgab swrsob doodkun. Gvda gvtv nulam nyelin dors hem tayin. Hvbmabde nulv haakamb mwwto; ngo gvda gvtam mviya peekun.”

Currently Selected:

JON 16: NYISBSI

Highlight

Copy