HABAKKUK 1
1
1Gamt tonam mam nyiqry benbo Habakkuk kaapanum.
Habakkukwg Sornam
2At Swa, hog hwd oyu go ngo svka gab xabtayin,
hoo no tapa kuram yv?
Ho nam “Yolu dul!” xabt yv
hoo no ywwlin ramyv?
3No hoggub ngam nyixaqnam mam kaam dvb mvpa kun,
hoo no hoggub nyimuram kvvmw dvn?
Twrmnam mvla kwr-kornamv ngoqg aga si doodo;
jwwnam mvla loomin sumanamv koi yaiya do.
4Hoqgab pvvbv ywwriq deeku,
hoo jvqtwngv nywywngam lengkma.
Hoggab nyicv jvqtwngam hwwiyum paku;
ho jvqtw lengnam mam muk-mviya paku.
At Swg Birwqnam
5“Nyob nyi tulu pengko lo tuugabl, hoo kaato;
mwwc lama dvb nyinam mam hoo lomkaq-saqto.
Hoggab ngo nulug aal so bonam ak nyidu dvn
ho nam betam sujaqkam no mwwjw ram.
6Hoggab kaato, kacaq bvla nyebia jaqb nyinbo nyob,
Bebilon nyiilungam ngo mvqlw lwwrab mvtayin,
hiyv swcw nvg ywwtwr namgob wtayin,
ho hogloqhv bulug atwg doogw maasu ham bulv naareq tayin.
7Bulv kwiywq twqb la bos jaq dvb nyido;
bulug jvqtwngv la xinamv bulug atwg otuqb wdo.
8Bulug svpur tulungv hogga takaram nyebia yaadwn,
ariyumg svcangam bos yaadwb nyidwn;
bulug svpuram wgbo tulungv larl wgdo.
bulug svpuram wgbo tulungv aado hoqgv haadwn;
bulv xookam cinnam hvb cilwql mviyaqdo.
9Bul mwlwngv yolu swcin mvtab haadwn,
bul mwlwg nyuqmv otuqb pwrdo.
Bulv xuqx hvb nyuum mam bookuml appa.
10Lvpw at tulungam bulv benyi-beya do,
hoo pvvb bwwl doogbo tulungam bulv nyirj do.
Bulv gurum vxiam nyirj do,
hoggab bulv swcwngam paal aptvl hoo ham naagdo.
11Nyimurbo nyiilungv, bulug pwnbov bulug atwg atorv,
bulv dooi hvb nuul wggwl doodo!”
Habakkukwg Lwnyi dvb Sornam
12No kuiyum hoqgv maaiyv,
ngoqg Pwnbo At Swa, ngoqg Dvrwqbo Aka?
Ngulv siram.
At Swa, no bulam hvvky akwb xuqbwq pakun,
hoo no Lwwn atv, bulam benyi-beya dvb mvl ap pan yv.
13Alman boam kaan mamlin sam nulug vnyiqkam dvrwq kwrwqb pvvto
hoo nyixaqkam kaanyi ram,
hoggub no nyepinbo tulungam kvvmw dvn
hoo hoggab cooikab doodwn hwdlo nyic bov mwam
dvrwq yaanbo nyiingam dvmeq yukam?
14No nyia ko tulungam sa-svlog ngui hvb mvp pan,
ngaml wnbo tulungam pvvb bwwl doogbo doomanam hvb.
15Mwv vkar lvgab bul mwlwngam naalin pan;
mwv mwwg wswq lvgab bulam agwb naalin pan;
mwv mwwg seel wgnam wswq uraho bulam nookum pan;
ho mwv hwnyir-hvmar hoo mwwngam do.
16Hoqgab mwv mwwg wswqkam pwr jidwn hoo mwwg seel wgnam wswqkam aky jidwn;
Hoggab bulug hoqgv mwv swwngam jaqb swwl doodwn,
hoo mwwg dvsv naleqdo.
17Hoqgab mwwg wswqkam mwv asarb pvvyin dviyv
hoo aya mwwpa maab nwrba gob nyob nyiilungam mingdu tai nvi yv?
Currently Selected:
HABAKKUK 1: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
