BEGGAR 24
24
Aisak la Rebeka
1Sija Abraham vnywngv vigo wknv nyekam kunum. Hoo At Sw Abrahamnvn hog luucw-luutam mwlwngam lvqcnum. 2Hoo Abraham mwwg namho mwlwngam axa yaanbo hoo mwwg doognam hog mwlwngam kvvyw-tada yaanbo, mwwg nyerangam benum, “Noqg alaqkam ngoqg xarpo so mabdaqto, 3hoo ngoqg doogw ko Kanaan nyi tulug gvdag nyem mam no ngoqg ko tuup gab nywxw nvvjram hvl At Sw, hiyv swcw-nyodongam Pwnbo eminho, ngo nam dingm gviyin, 4hvbmabde ngoqg gvdab wgdvl hoo ngoqg nyi hoolu hoqgv ngoqg ko tuup Aisak gab nywxw nvvjto.” 5Nyera akv mwam benum, “Nyem akv ngam soq gvda namgub wmin gvdwb maak hvkam suiyv. Ngo noqg ko tuupam no hogloq gvda hoqgv haanum hoqb ngo wg gvden?” 6Abraham mwam benum, “No hoggub nyijaqkam ngoqg koam aloqb bool wgmab. 7Ao lvpwg Pwnbo, At Sw, hiyv ngoqg abwg nam hoqgv la ngoqg imiq dvpar hoqgv ngam boolin layil ngam agam gool hoo dingrnum, ‘Noqg hosiqkam ngo soq gvda sam jitayin,’ mwwg gumtwngam noqg otuqb mwv kanam tayin hoo ngoqg ko tuup gab no aloqkv nywxw ak nvvjtayin. 8Hvbmabde nyem akv noqg lvgab wmin gvram hvbnyiloqkam ngoqg soq dingrnam si noqg aoho hog nyiram; no hoggub nyijaqkam ngoqg kongam aloqb bool wgmab.” 9Ho nyera akv mwwg alaqkam mwwg at Abraham gv xarpo ho mamdaqtvl mwam soq pagoq gab dingrnum.
10Ho nyera akv mwwg atwg Svjin tulungam doryw go naalayil hoo albo xinam akiam mwwg atwg hoqgv naalayil wnum; hoo mwv wrab kunv Nahorg bopam Mesopotamiyab wnum. 11Hoo hwdlo nyem tulug iss bwwtab lengd moodho mwv bopam lvvgwg sokum ho ariyum svjin tulungam iss twwm dvb buma mvnum. 12Hoo mwv benum, “Ngoqg nyiit at Abraham gv Pwnbo At Swa, soolo ngam niqtuq nyilin mvtbv hoo ngoqg nyiit at Abrahamnvn tumab abynam mam kaakin tvb. 13Kaato, ngo iss buqlinko si doqdu dvn, hoo bopam soqg nyi tulug nyem ko tulungv iss bwwtab lingdu do. 14Hiyvg nyem nyijwram ngo betayin, ‘Anya mwwpa gvdwl noqg uppum mam tvpoqto ngo iss twwtayin,’ hoo hiyv twwto hvl betayin, hoo ngo noqg svjin tulungam iss twwm tayin’—hoq akam jaq ham ngoqg nyera Aisak gab no xuqbwq tvbv. Hoq hoqgv ngoqg nyiit atam noqg tumab abynam kaakinam mam ngo cengtayin.” 15Mwv hvb agam goodunam mam goonya maatab, kaato, Rebeka, Milkag ko tuup Betuel, Nahorg nywxw, Abraham gv bor hoqg nyem kov iss uppum mam mwnwg gorbw ho jootwl lvvgwb lengnum. 16Nyem nyijwr akv vcjaqb kvvlwql kaaby dvb nyinum, mwn nyega cengka maata bo mvvngam akv. Mwn iss buqlin koob wnv hoo mwnwg uppumho iss bwwr dvb suqlwq layil caaknum. 17Ho nyera akv xarbnv mwnwn kvvrwq banv benum, “Anya mwwpa gvdwl noqg uppum hoqgv ngam iss loq ak twwm dvb jila bv.” 18Mwn benum, “Ngoqg atv, twwto.” Hoo mwn nyebia jaqb uppum mam tvpoq banv mwam iss twwm dvb jinum. 19Hwdlo mwn mwam iss twwm dvb jixo kokw so, mwn benum, “Noqg svjin tulu gab kam ngo iss loq tuqlin jitayin, bulv mwlwngam hvngwr twwn mvto.” 20Ho mwn nyebia jaqb mwnwg uppum iss twwngongam dookam ho tooro pel hoo lokta xarnv sokum hoqgv iss bwwnum, hoo mwn mwwg svjin mwlw gab iss bwwjnum. 21At Sw mwwg nyiody boonam mam niqtuq lengm tad nvba dwq ma, lengma tamdvn yaaba dwq, nyi ak ham cooikab mwnwn rogabl doonum.
22Hwdlo svjin tulungv issam twwnya yukho, nyi akv xinam jaq hun gagy papo sikil gob mvnam ak naanv mwnwg nyuruho kvrlwq jinum, hoo wyw gob sikil vgw dvb mvnam hun kooj pwnyi go mwnwg alaqho kuqlwq tvl, 23hoo benum, “No hiyvg nyem kongv, ngam anya mwwpa gvdwl betam. Noqg abwg nam alo soi ngul gab dook dooma yv?” 24Mwam mwn benum, “Ngo Milkag ko tuup Betuel kongv, hiyam mwn Nahor gab ko bwwjnum.” 25Mwn hvraqb benum, “Ngulgv naleqgo tvpy-tapoq am piil svding dvsv doodwn, hoo aiyam yubkv doodwn.” 26Nyi akv mwwg dumpongam pvxwl hoo At Swn xumnum 27hoo benum, “Ngoqg nyiit at Abraham gv Pwnbo At Swn paqyalinco, hiyv ngoqg nyiit atam mwwg tumab abynam mam la mwwg dengkynam mam apaqma. At Sw ngam ngoqg nyiit atwg imiq dvpar namsi boolwq paku.” 28Ho nyijwr akv mwnwg annwg nammwb xarbnv soq hog mwlw sam betamnum.
29Rebeka vbw ak doonum mwwg eminv Laban. Laban nyi lvvgwb xarlinv subuq buqlinko ho doqdu bo nyiam kvvrwqnum. 30Mwv mwwg bwrm nyuruho gagy gvnam mam hoo mwwg bwrm alaqho kooj gvnam mam kaapanum, hoo mwwg bwrm Rebekag goonam mam tapanum, “Soq sib nyi hv ngam benum,” ho mwv nyi dookub wnum. Hoo kaato, nyi ak hv svjin tulu lvgab iss buqlinko ho doqdunam. 31Mwv benum, “Kujo urab haato, At Swg lvqcnam ak no. Hoggub no lvvg so daqdwn? Ngo noqgab dook nammam mux-mvaq peen hoo svjin tulu gab daqkv doodwn.” 32Ho nyi hv nammwb haanum hoo svjin tulug baqnam mam joopnum, hoo svjin tulungam tvpy-tapoq kvla am piil dvs jinum, hoo nyi ak ham la mwwg lvgab wba bo nyi tulungam lvpia hurs mvdwb iss jinum. 33Ho dvsam mwwg agaho dvm dvb joopnum. Hvbmabde mwv benum, “Ngo hoggv betab haadwn ham bema deedib hog dvram.” Mwv benum, “Gooka to.”
34Ho mwv benum, “Ngo Abraham gv nyerangv. 35At Sw ngoqg nyiit atam vc loodab lvqc cipan, hoo mwv vc jaqb koidvn. Mwv mwam sviya pvtwngam hoo sibin-svvngam, rup la hunam, nyerangam la paqnam, svjin tulungam la svdam tulungam jipa kun. 36Hoo hwdlo mwn xox yukho ngoqg nyiit atwg nywxw Sara ngoqg nyiit atam ko tuup ak bwwjnum, hoo mwwg doognam hog mwlwngam mwam jipa kun. 37Ngoqg nyiit atv ngam dingnam hoo begamv, ‘Mwwg doogw ko Kanaan nyi tulug gvdag nyem mam mwwg ko tuup gab ngam nywxw nvvj mvma dvb benum, 38hvbmabde ngoqg abwg nammwb no wgdvl hoo ngoqg nyob hoolu hoqgv ngoqg ko tuup gab nywxw loq ak nvvj taabwqk hvnum.’ 39Ngoqg nyiit atam ngo benum, ‘Lokam nyemv ngam wmin gvmab yikam suiyv.’ 40Hvbmabde mwv ngam benum, ‘Ngo hiyvg agaho wl yvbanam akv, At Sw, mwwg gumtwngam noqg lvgab kanam tvl hoo noqg lamtangam niqtuq lengm tayin. Ngoqg ko tuup gab ngoqg nyob hoolu maalo ngoqg abwg imiq dvpar hoqgv no nywxw nvvjtayin. 41Ho nam ngoqg dingr mvn hoqgv pw-hwwjram, hwdlo no ngoqg nyob hoolub haai kukam hoo bulv nam mwnwn jima baloqkam, ngoqg nam dingr mvnam hoqgv pw-hwwjram.’
42“Ngo soolo iss buqlinko ho haanum hoo benum, ‘Ngoqg nyiit at Abraham gv Pwnbo At Swa, sija ngoqg lamta wnam mam no niqtuq lengm dvb mwwd nyiloqkam, 43kaato, ngo iss buqlinko si doqdu dvn. Iss buqlinko ho iss bwwtab lengn bo mvvngam nyijwram, hiyam ngo betayin, “Anya mwwpa gvdwl noqg uppum hoqgv ngam twwm tvb hvl beikam,” 44hoo hiyv ngam betayin, “Twwto, hoo noqg svjin tulu gab kam ngo iss bwwj tan hvnbo,” nyem akam At Sw ngoqg nyiit atwg ko tuup gab xuqj pakun.’
45“Ngoqg hang uraho hoqhvb goodunamv goonya maatab, kaato, Rebeka mwnwg uppum mam mwnwg gorbw ho joolayil haanum, hoo mwn sokumb haabnv iss suqnum. Ngo mwnwn benum, ‘Anya mwwpa gvdwl ngam iss loq twwm tvb.’ 46Mwn nyebia jaqb mwnwg gorbw hoqgv uppum mam joopoq banv hoo benum, ‘Twwto, hoo noqg svjin tulu gab kam ngo iss bwwjtayin hvnum.’ Ho ngo twwnum, hoo mwn svjin tulungam kam twwdwb jinum. 47Ho ngo mwnwn toxnum, ‘No hiyvg nyem kongv?’ Mwn benum, ‘Nahorg ko tuup Betuel gvla Milkag nyem kongv hvnum.’ Ho ngo mwnwg nyuruho gagiam kvrlwq jinum hoo mwnwg alaqho koojam kuqlwq jinum. 48Ho ngoqg dumpongv pvxw banv ngo At Swn xumnum hoo ngoqg nyiit at Abraham gv Pwnbo At Swn paqyalinco paqnum, hiyv ngam kvtaq jaqb wgnv ngoqg nyiit atwg imiq dvpar hoqg nyem koam mwwg ko tuup gab naam tagdo. 49Ho sija noqg tumab abynam mam la ngoqg nyiit atam no mwwjw swswnam mam no ngam kaakin gvdwl betam to; hoo noqg ma hvnam mamkam ngam betam to, ho ngo lvqbwq bvjaqkam ho laqc bvjaqkam wtayin.”
50Ho Laban la Betuel birwqnv hoo benum, “Bvrwqsi At Swg hoqgv haapa; ngulv nam al-koram benyi deema. 51Kaato, Rebeka noqg agahv doodo; At Sw agam goop nyiloqkam, mwnwn naal boogwn, hoo mwnwn noqg nyiit atwg ko tuup nywxwb swwm ta.”
52Hwdlo Abraham gv nyerangv bulug gomcwram tapa tvl, mwv atv dumpo pvxwl At Swn xumnum. 53Hoo nyera akv xinam jaq hun-rupam, hoo vjam naalin banv Rebekanvn jinum. Mwv mwnwg vbwngam la mwnwg annam kam xinam jaq akiam jinum. 54Hoo mwv la mwwg lvgab wba bo nyi tulungv dvk-twwknum, hoo bulv hoq aiho ho dooknum. Hwdlo bulv ar gorab yukho, mwv benum, “Ngam ngoqg nyiit atwg dookub kanam tukbv.” 55Mwnwg vbwngv la annv benum, “Aal looyw gob nyem ko sam ngulug lvgab doom tvb; hoq kokwb mwnwn wmtayin.” 56Hvbmabde mwv bulam benum, “Ngam oyu mvmabv, hoggab ngoqg lamtangam At Sw niqtuq nyilin gvpa ku. Hoqgab, ngam ngoqg nyiit atwg dookub kanam tukub.” 57Bulv benum, “Honyiloq kuj ngulv nyem koam goqg dvl mwnwn taka tuj.” 58Hoo bulv Rebekanvn goqnum hoo mwnwn benum, “No soq nyi lvgab wmin gvb yv?” Mwn benum, “Ngo wtayin.” 59Ho bulug bwrm mam la mwnwg paqnam Abraham gv nyera nyi tulug lvgab bulv kanam nvmlwq kunum. 60Hoo bulv Rebekanvn oj-amar mvtwl hoo mwnwn benum,
“Ngulug bwrma, no
lwwyw-lwwyw cam ann gob nyita ka,
hoo noqg hosiqkv bulam oyum bo toggoqkam gumn bwwg nvka!”
61Ho Rebeka la mwnwg paqn tulungv gorabnv svjin tulu aoho caol nyi ak ham wmin gvknum. Ho nyerangv Rebekanvn boola yukul mwwg lamtab wknum.
62Sija Aisak Beer-lahai-roi hoqgv hookur layil Negeb ho doodunum. 63Hoo ariyum daiya Aisak rongo ho kaakar yvnum. Hoo mwwg vnyiqkv piorabnv kaanum, hoo kaanamv, svjin tulungv hoodul doonam. 64Hoo Rebeka mwnwg vnyiqkv piorabl kaanum, hoo hwdlo mwn Aisaknvn kaapa yin, mwn svjin hoqgv geepoqnum 65hoo nyerangam benum, “Rongo alo ngulam wrwq taab wdu dvn nyi vv hiyv yu?” Nyerangv benum, “Aloq vv ngoqg nyiit atv.” Ho mwn mwnwg nyuqm putumnanam naanum hoo mwn atam putumnum. 66Hoo nyerangv Aisaknvn hog mwlw mwam nyiknam mam betamnum. 67Ho Aisak mwnwn mwwg ann Sarag tombu ho boa kunum, Rebekanvn nyem naaknum hoo mwn mwwg nywxwb nyiknum, hoo mwv mwnwn abynum. Ho Aisak mwwg annwg sixo kokw so haat mvl kunum.
Currently Selected:
BEGGAR 24: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
