BEGGAR 11
11
Bebelwg Soja
1Otuqho swcw mwlw si agam luukin go hoo gomcwr luukinv doonum. 2Hoo nyiilungv dou-caga daiyab nyiogy ginum, ho bulv Sinar gvdag haapa ho nvmcw doonum. 3Hoo bulv akwn-akwn bemin sunum, “Haato, kuj ngulv hita mvtwl hoo ham xaakam tuj.” Hoo bulv wlw kwlib hitangam mvnum, hoo simit kwlib takinam hiqnum. 4Ho bulv benum, “Haato, kuj ngulv ngul atgab bopamlo ak mvtuj hoo hoqg sojangam doa tol cvvc dvb mvtuj, hoo ngulug eminam doom dvb mvptuj, hvbmab nyiloqkam ngulv swcw nvg aoso cwrsaq gob nyitayin.” 5Hoo At Sw nyia ko tulug bopam mam la soja mvnam mam kaatab ipoqnum. 6Hoo At Sw benum, “Kaato, bulv nyiilu akinv, hoo bul mwlwngv agam luukinam goodo, hoo kokwngam nyitanam mam soq sib bulv nyirab robdu do. Hoo bulv hoggv nyidwb mwwdwn hv bul gab hog vs-axaq gob dooram. 7Haato, kuj ngulv ipoq gvdwl hoo bulug agam goangam tadar mins maadwb mvtaj, ho bulv akwn akwg agam goonam mam tacin mins kuram.” 8Ho At Sw bulam swcw nvg aoso cwrsaq twqb mvknum, hoo bulv bopam mam mvngo tvl apaq kunum. 9Hoqgab hoqg eminam Bebel hvl goqnum, hoggab At Sw gvda gvtwg agam goangam luusaq-luusaq dvb mvknum. Hoo hoq hoqgv At Sw bulam swcw nvg aoso cwrsaq twqb mvknum.
Semwg Hotam
10Soq tulu si Semwg hotamv. Hwdlo vnyw 100 gob axa yukho, sa-hindu hengxo vnyw nywnyig kokw so mwv Arpaksadwg abwb nyiknum. 11Hoo Sem Arpaksadwg abwb nyixo kokw so vnyw 500 gob doonum hoo hvraqb asaq nyega kov la nyem kov doonum.
12Hwdlo Arpaksad vnyw 35 gob swwi yikho, mwv Selag abwb nyiknum. 13Hoo Arpaksad Selag abwb nyixo kokw so mwv vnyw 403 gob doonum hoo hvraqb asaq nyega kov la nyem kov doonum.
14Hwdlo Sela vnyw 30 gob swwi yikho, mwv Eberwg abwb nyiknum. 15Hoo Sela Eberwg abwb nyixo kokw so mwv vnyw 403 gob doonum hoo hvraqb asaq nyega kov la nyem kov doonum.
16Hwdlo Eber vnyw 34 gob swwi yikho, mwv Peleg abwb nyiknum. 17Hoo Eber Peleg abwb nyixo kokw so mwv vnyw 430 gob doonum hoo hvraqb asaq nyega kov la nyem kov doonum.
18Hwdlo Peleg vnyw 30 gob swwi yikho, mwv Riyug abwb nyiknum. 19Hoo Peleg Riyug abwb nyixo kokw so mwv vnyw 209 gob doonum hoo hvraqb asaq nyega kov la nyem kov doonum.
20Hwdlo Riyu vnyw 32 gob swwi yikho, mwv Serug abwb nyiknum. 21Hoo Riyu Serug abwb nyixo kokw so mwv vnyw 207 gob doonum hoo hvraqb asaq nyega kov la nyem kov doonum.
22Hwdlo Serug vnyw 30 gob swwi yikho, mwv Nahorg abwb nyiknum. 23Hoo Serug Nahorg abwb nyixo kokw so mwv vnyw 200 gob doonum hoo hvraqb asaq nyega kov la nyem kov doonum.
24Hwdlo Nahor vnyw 29 gob swwi yikho, mwv Terag abwb nyiknum. 25Hoo Nahor Terag abwb nyixo kokw so mwv vnyw 119 gob doonum hoo hvraqb asaq nyega kov la nyem kov doonum.
26Hwdlo Tera vnyw 70 gob swwi yikho, mwv Abram, Nahor, hoo Haranwg abwb nyiknum.
Tera Hotam
27Soq tulu si Terag hotamv. Tera Abram, Nahor, hoo Haranwg abwb nyiknum, hoo Haran Lotwg abwb nyiknum. 28Kaldiya nyi tulug Urho, Haran mwwg ab Tera doodu dvb mwwg vbw-bor tulu gvdaho siknum. 29Hoo Abram la Nahor nywxw naaknum. Abram gv nywxw eminv Sarai, hoo Nahorg nywxw eminv Milka, Haran nyem kov, Milka la Iskag abv. 30Sarai twrngumnum; mwn ko doomanum.
31Tera mwwg ko tuupam la Haran ko tuup Lot nvla mwwg ko siqdangam, hoo Sarai mwwg nyeexwngam mwwg ko tuup Abram nywxwngam boolayil, hoo bulv lvkin gob Kaldiya gvda Ur hoqgv Kanaan gvdab wnum, hvbmabde hwdlo bulv Haran dook ho hvvc yukho, bulv hoqho nvmcw dooknum. 32Terag vnywngv 205 gob nyiknum, hoo Tera Haranho siknum.
Currently Selected:
BEGGAR 11: NYISBSI
Highlight
Share
Copy
Want to have your highlights saved across all your devices? Sign up or sign in
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
