Atata 25

Paulus iainisi na Ia Aia Mainae Roma iasei tanui

1Pestus ihokai poe otoe rei, oyo onona tonu oyo, ieu iarihoni Kaisarea nanie ieui roe Yerusalem. 2Hoka roe oyo, sio imam no sio onata runa sio ona Yahudiu tamena oama-amanaru Paulus osiki. Sio oai-ainisi 3na iuna iake osiso na iaisosi sio umau orori Paulus roe Yerusalem. Sio rei oheu nanie osakai poe arena tihue, oyo ohunui. 4Ne Pestus on poe iasau, “Sio soratatua wason osakai poe Kaisarea. Au oi, potuina tewa nea, oyo ununiku poe rei honu. 5Reiso oaisosi sio wason no kawasa umau rerihoni omi rei na sio oeuso poe, okataku. Munata Paulus isana mka sio oamanarui poe rei.”

6Iruei roe Yerusalem roe sio Yahudiu onona wanu te hutusa honu, oyo Pestus inuniki poe Kaisarea. Hoka poe, hanu san rei oyo, iruei tau ne katera wani iatinu parakanau tanui nanie iasau ata kani Paulus isana te tewa. Iruei poe oyo, iaisosiso orori Paulus poe tanui. 7Paulus ihokai poe nea oyo, sio Yahudiu wason ohokaso on roe Yerusalem rei, oooso ohoriki. Oamanarui oasau ata ne isanaya mtinta panesi. Ne sio onoo tau matae tewa sae waron sio oamanarui tanure. 8Oyo Paulus ianamana inete ruai. Iahata, “Upuku. Pusu Musa ne maunauna, au we isanae isa tewa. Pusu Anahatana ne numa mainisie, au we isanae isa tewa. Pusu Ia Aia Mainae Roma ne maunauna iae, au we isanae isa tewa oi.”

9Ne Pestus nanie inana sio Yahudiu anoo. Reiso iasei tau Paulus san rei, “Ano nanie aeua roe Yerusalem na uarinii ata kani sio oamanarua titue te tewa?” 10Ne Paulus on poe iasau, “Au wani uoo mai ano me kawasa. Ia natu Kaisar Roma irui kawasa osia na arinii ata kani usana te tewa. Kahurae omi oasei tanuku mai rei. Ano ruam anei ia-ia ata au we sanae isa osi sio Yahudiu tewa. 11Au we isanae mtinte isa tewa. Isanae mtinte wani kahurae oapasanaku ohunuku tanui. Sinana au we isanae mtinte na kahurae ohunuku, ohunuku, areimo iake. Au uainisi tewa na pene ohunuku. Ne sio oamanaru oakarota, reiso sio no kawasa oruiku osi sio Yahudiu rei tewa. Au uainisi na ia natu Kaisar Roma ruai iasei tanuku na iasau ata kani we isanae te tewa.”

12Oyo Pestus ianamana runa sio wason oau-aunaui, oyo iasau osi Paulus, “Ano ainisi na uaisosia roe Ia Aia Mainae Roma reiso kahurae ano aeu roe tanui.”

Pestus isima rerihoni Paulus ne parakana osi aia Agripa

13Potuina tewa oyo, Aia Agripa runa hotai Bernike ohokaso poe Kaisarea nanie oatapea Pestus. 14Hoka poe oyo, orue onona inasa rai, oyo Pestus isima runa Paulus ne parakana osi Aia Agripa. Iasau san rei, “Ia isa wain rei, Peliks iarihoniki pan pui anoe. 15Ueuku roe Yerusalem, oyo sio imam no sio onata runa sio ona Yahudiu nesia rei osima osiku runa ia rei. Osima oyo, oainisi na uasau ata ia rei isana. 16Ne uasau osiso ata ami, Ia Aia Mainae Roma ne mansiau, piasa atapi ia wain sio oamanarui iamanane sio wason oamanarui rei na ianamana inete ruai. Inete ruai samatoro ami asau ata kani isana te tewa. 17Reiso sio ona Yahudiu rei ohokaso mai, oyo unapa potuina tewa. Nene hanu roe oyo, urueku tau we katera wani uatinu parakanau tanui. Oyo uaisosiso orori ia rei poe tanuma. 18Sio wason oamanarui rei ohitio roe, oyo uahata kani sio nanie oamanarui tau kahatena mainaya. Aikee oamanarui rerihoni kahatena san rei tewa. 19Hasae otuntana runai rerihoni sapani na kahurae sio oainaa runa Anahatana. Otuntana runai rerihoni ia wain nanai Yesus wain imatai. Ne Paulus iasau ata wain iamahaiki. 20Reiso au mo uanei tewa sapani na mka uariniiki rerihoni rei. Oyo uasei ata kani nanie ieui roe Yerusalem na sio oarinii ne parakana roe kota rei. 21Ne Paulus iainisi na sio soratatua oapamesei na mka Ia Aia Mainae Roma iasei tanui na iasau ata kani isana te tewa. Oyo au uaisosiso oapa-apamesei rotu-tu mka au bisa uaisosiki roe Ia Aia Mainae Roma.” 22Oyo Agripa iasau osi Pestus, “Potuina nea au ruaku nanie uatinu ia rei.”

Pestus on poe iasau, “Hanroe mka ano atinui.”

Paulus ianamana osi aia Agripa

23Reiso hanroe oyo, Agripa runa Bernike ohokaso. Ohokaso oyo, sio panesi oamuira uaso tau maise onate. Onususo pan numa mainae wani sio hutua oamanouso tanui. Onusu okata sio mainaya rerihoni sio soratatua runa sio onata rerihoni kota rei oi. Oyo Pestus iaisosiso orori Paulus roe tanso. 24Hoka roe oyo, Pestus iasau, “Upuku Aia Agripa runa pusimo utumo wani okatama mai rei. Omi onoo ia reino. Sio Yahudiu pusiso wason roe Yerusalem runa mai Kaisarea reini, oainisi runa oakapona oahata kahurae ami ahunui. 25Ne au usupu ne isanae isa tewa na ami ahunui. Ia ruai iainisi na uaisosiki roe Ia Aia Mainae Roma na iasei tanui na iasau ata kani isana te tewa. Reiso uapamata sou nanie uaisosiki roe Ia Aia Mainae Roma. 26Ne uanei tewa mka ukanu tau surate sapan osi upuku Aia Mainae Roma rerihoni ia reini runa ne parakana rei. Reiso au uaisosiki ihokai mai tanumo reini runa ano ruam, Aia Agripa, na ita iasei tanui honu na usupu sae isa na ukanu surate rei. 27Uahana iake tewa kani uaisosi ia isa wain sio oaresiki na ieui roe Ia Aia Mainae Roma kani usima tewa rerihoni sio oamanarui sapan. Kahurae usima rerihoni ne isanae sae.”

Currently Selected:

Atata 25: ANA

Highlight

Copy