Atata 24

Peliks iatinu tau sio ona Yahudiu no parakana runa Paulus

1Onona nima oyo, sio imam no ia mainae, Ananias, ihokai ikata sio ona Yahudiu umau runa ia wain iamanaru tumatau pusu maunauna isa nanai Tertulus. Ohokaso on roe Yerusalem rotu-tu ohokaso poe Kaisarea. Hoka poe oyo, oamanaru Paulus osi ia gubernur wain nanai Peliks. 2Reiso ia onate rei ianaha runa Paulus. Ihokai oyo, Tertulus iamanarui san rei, “Upuku. Ano aisosima iake. Reiso aruema amaturuma mai rei. Ano me iaka panesi osi ami Yahudiu mai mani tuamane rei. Tau sae, ano aheu pusu me anei panesi. 3Upuku Peliks. Ano iake! Sui supan-supan man ami anoma rapeka runa pusire waron ano auna osima. 4Au nanie uakaremaya potuina tewa, ne uainisi na anom iake atinu tau we anamanaya mkana-mkana rai man.

5Ami asupu ia reini mo iuna neka mansia panesi. Iakarema panesi sui supan-supan man sui tuniai reini pusiki iuna sio Yahudiu ouna purie. Ia sahoro iaisosi sio wason opusu ia wain on pan nia Nasaret. 6Ia iapaputi Anahatana wain iainaa nnai ne numa mainisie. Ne ami asotai naone. Ami nanie apasanai pusu Musa ne maunauna man. 7Ne ia mainae tau Ia Aia Mainae Roma ne soratatua iwahui rerihonima, 8oyo iaisosi sio wason oamanarui oamananea. Munata ano ruam asei tanui, mka atinu ata pusire ami wani amanarui tanure waron titue.” 9Sio Yahudiu oama-amanaru Paulus oi oasau ata Tertulus wain iasau titue.

10Oyo ia gubernur iatieu osi Paulus na Paulus ianamana. Reiso Paulus iasau san rei, “Upuku. Au uanei ata ano arinii parakanau mai otoe reini rotu-tu musum inasa rai. Reiso uahata iake uanamana unete ruaku mai tanua. 11Ano ruam bisa asei na mka atinu ata mato ueu roe Yerusalem nanie uainisi uainaa runa Anahatana. Mato ueuku we onona hutusa rahana ua. 12Sio Yahudiu onooku wani utuntana runa ia isa tewa. Onooku uamanou sio hutue na ouna purie tewa. Roe Anahatana ne numa mainisie, pan numa mananouna osi sio Yahudiu, sui kota rei pusiki, onooku una san rei tewa. 13Reiso sio bisa osima runa sae isa osia tewa na ano anei ata sio wason oamanaruku titue. 14Ne uasau ata sae wani titue wan san rei. Uainisi uainaa runa Anahatana wain mania upu, sio Yahudiu, oainaa runai oi. Au uainaa runai pusu Yesus ne maunauna waron sio Yahudiu oasau ata waron titue tewa. Runa uparisaa tau Musa ne maunauna runa sio mamsima runa Anahatana ne anamanaya no maunauna sirinia. 15Uparisaa sani sio rei oi, ata mka Anahatana iapuhai sio matana pusiso. Sio wason oamanisa runa sio wason oamanisa tewa. 16Reiso au uawaha tau we mkonae pusiki na uamahaiku manisate. Uarinii rerihoni uamahaiku sapan. Uamahaiku manisate. Upusu Anahatana ne maunauna pusire. Au we sanae isa osi tumata tewa.

17Ueu uarihoni Yerusalem musum inasa rai, oyo ununiku roe rei honu nanie urori kepen osi sio mosokinia rerihoni we mansiau runa urehi makapanau osi Anahatana. 18Sio Yahudiu onooku roe Anahatana ne numa mainisie urehire upusu monne uatipusi nea. Ukata sio hutue tewa. Au uunaso ouna purie tewa. 19Ne sio Yahudiu umau on pan otoe Asia ounaso ouna purie. Sio sahoro kahurae ohokaso mai na oamanaruku kani nanie oahata au we isanae. 20Ne ohokaso tewa. Reiso kahurae sio Yahudiu rei wason oamanaruku mai rei ruao osima osimo runa osupu we kahatene sae pannuhu uanamana unete ruaku osi sio ona Yahudiu. 21Hasae sio bisa oasau ata au uoo uamanane sio onata rei, oyo usima na anamanae osa rei man. Uasau, ‘Omi wani oasei tanuku ranie hatae reini tau au uparisaa ata mka Anahatana iapuhai sio matana.’”

22Peliks, ia wain ia ne kawasa rei, ianei panesi rerihoni sio mampusu Yesus no maunauna. Iasau tewa ia seia titue, ia seia isana rerihoni Paulus runa sio Yahudiu rei. Ne iasau san rei, “Mka ia mainae tau Ia Aia Mainae Roma ne soratatua Lisias ihokai, oyo mato uapamata sou rerihoni parakana rei.” 23Oyo iaisosi ia kapitane tau sio soratatua utuni isaka Paulus ne pene iuna mtinte tanui runa itapi ne netau orori apia te, muaine te osiki.

Peliks runa sahai Drusila oatinu tau Paulus

24Onona inasa rai oyo, Peliks ihokai ikata sahai Drusila. Drusila ia Yahudi. Peliks ianaha runa Paulus, oyo iatinu tau Paulus ianamana rerihoni sapani na iparisaa tau Yesus, Ia Aia wain Anahatana Ihitiki na Iapuheu ne Mansiau. 25Paulus iaunaui rerihoni sapani na ita iamanisa, sapani na iamtou hanari, iamtou airi na pene ipalalosa, runa sapani na mka ranie hatae isa Anahatana iarinii pusita. Iarinii ia sia wain titue na ia sia wain titue tewa. Oyo Peliks ikaitau. Reiso iasau osi Paulus, “Ano bisa aeua nea. Ne munata mka patapariku tewa, au uanaha runaya.” 26Tau muie rei Peliks inina na Paulus irui kepen osiki na ialapasiki. Reiso taua-taua ianaha runa Paulus na ianamana runai.

27Ianaha runa Paulus rotu-tu musum ua oyo, sio okati Peliks. Ohiti Perkius Pestus tau ia ne kawasa tau otoe rei. Peliks nanie iuna iake osi sio Yahudiu, reiso ihoka Paulus rerihoni pui anoe tewa.

Currently Selected:

Atata 24: ANA

Highlight

Copy