Luka 5

Yesu tsɛ kekleekle kaseli ɔmɛ

(Mateo 4.18-22; Marko 1.16-20)

1Jeha nɛ ɔ benɛ Yesu daa si ngɛ Genesaret Taku ɔ nya nɛ nihi fuu pueɔ si ngɛ e nɔ nɛ a ngɛ Mawu munyu ɔ tue bue ɔ, 2e na lɛ enyɔ nɛ a muɔ mɛ si ngɛ taku ɔ nya; se hɛli ɔmɛ je mi nɛ a ngɛ a ya amɛ a he fɔe. 3Yesu ya sɛ lɛ ɔ kake nɛ ji Simon nɔ ɔ mi, nɛ e kpa lɛ pɛɛ konɛ e tsɛ̃ kɛ ya hɛ mi bɔɔ. E be hi si nɛ e tsɔɔ mɛ ni kɛ je lɛ ɔ mi.

4Benɛ e jɔɔ munyu ɔ tumi ɔ, e de Simon ke: “Nyɛɛ tsɛ̃ kɛ ya he nɛ mi kuɔ ɔ nɛ nyɛɛ fɔ̃ nyɛ ya amɛ konɛ nyɛɛ gbe lo.” 5Simon de lɛ ke: “Nyɔmtsɛ, nyɔ nɛ ɔ mi tsuo ɔ wa tsu ni gbegbelii se wa nɛ nɔ́ ko; se kɛ ɔ, ngɛ o munyu ɔ nya a, ma fɔ̃ ya a.” 6Nɛ benɛ a pee ja a, a gbe lo babauu bɔ nɛ piɛ bɔɔ nɛ a ya amɛ ko gba. 7Lɔ ɔ he ɔ a fɔ a huɛmɛ nɛ ngɛ lɛ kpa a mi ɔ nine ke a ba nɛ a ba piɛ a he. A ba nɛ a ba wo lɛ enyɔ ɔme tsuo tɔtɔɔtɔ bɔ nɛ piɛ bɔɔ nɛ a ko mu. 8Benɛ Simon Petro na enɛ ɔ ɔ, e nɔ si ngɛ Yesu nane nya nɛ e ke: “Nyɔmtsɛ jee ye kasa nya, ejakaa yayami peelɔ ji mi!” 9Nɛ e kɛ nihi nɛ piɛ e he ɔ tsuo a he mi po ngɛ lo fuu nɛ a gbe ɔ he; 10nɛ ja nɔuu e pee Yakobo kɛ Yohane, Zebedeo bimɛ ɔmɛ nɛ ji Simon he piɛli ɔmɛ. Nɛ Yesu de Simon ke: “Koo ye gbeye! Kɛ je be nɛ ɔ kɛ yaa nɛ ɔ, o ma sa nimli.” 11Nɛ a kɛ lɛ ɔmɛ ba kple, nɛ a si kulaa nɛ a nyɛɛ e se.

Yesu hã tsitsɛ ko he tso

(Mateo 8.1-4; Marko 1.40-45)

12E ba mi kaa benɛ Yesu ngɛ ma a eko mi ɔ, nyumu ko nɛ tsi pue e he tsuo ngɛ lejɛ ɔ; benɛ e na Yesu ɔ, e kɛ e hɛ mi bu si nɛ e kpa lɛ pɛɛ ke: “Nyɔmtsɛ, ke o suɔ ɔ, o ma nyɛ kaa o haa ye he tsɔɔ.” 13Yesu kpa e nine mi nɛ e ta e he nɛ e ke: “I suɔ, o he nɛ tsɔ!” Nɛ amlɔ ɔ tsi ɔ ta ngɛ e he. 14Nɛ Yesu bɔ lɛ kɔkɔ ke: “Ko de nɔ ko, se mohu yaa nɛ o kɛ o he ya tsɔɔ osɔfo ɔ nɛ o sa bɔ ngɛ o he tsɔmi ɔ he kaa bɔ nɛ Mose wo kita a, konɛ e pee odase ngɔ ha ni ɔmɛ.’ 15Se e he sane ɔ gbɛ fia babauu mohu. Nihi fuu ba bua a he nya nɛ a ba bu lɛ tue nɛ a tsa a hiɔ ɔmɛ. 16Se ke pee ɔ, e sãa e he si kɛ yaa nga a nɔ he komɛ banee nɛ e ya sɔlee.

Yesu tsa nyumu ko nɛ hule

(Mateo 9.1-8; Marko 2.1-12)

17Jeha nɛ ɔ, ligbi ɔ eko nɔ nɛ Yesu ngɛ ni tsɔɔe ɔ, Farisifohi kɛ mlaa tsɔɔli nɛ je Galilea kɛ Yudea ma amɛ tsuo nɔ kɛ Yerusalem ba a hii si ngɛ lejɛ ɔ. Nɛ a je Nyɔmtsɛ ɔ hewami ɔ kpo tsɔɔ ngɛ lejɛ ɔ nɛ e kɛ tsa hiɔtsɛmɛ ɔmɛ. 18Nɛ oʼɛ, ni komɛ kɛ nyumu ko nɛ hule nɛ fɔɔ si ngɛ sa nɔ ba, nɛ a ngɛ hlae nɛ a kɛ lɛ nɛ sɛ we ɔ mi konɛ a kɛ lɛ ba fɔ e hɛ mi. 19Nɛ benɛ a nɛ́ bɔ nɛ a maa pee nɛ a kɛ lɛ maa ba ngɛ asafo ɔ he ɔ, a kuɔ kɛ ya tsu ɔ yi mi, nɛ a kpɔ siaudo ɔ nɔ zu ɔ, nɛ a siu lɛ kɛ e sa a kɛ gu mi kɛ ya fɔ̃ ni ɔma a kpɛti ngɛ Yesu hɛ mi. 20Benɛ Yesu na a hemi kɛ yemi ɔ, e de hiɔtsɛ ɔ ke: “Maminyumu, a ngɔ o he yayami ɔmɛ ngɔ pa mo.” 21Mlaatsɔɔli ɔmɛ kɛ Farisifo ɔmɛ bɔni susumi ke: “Mɛnɔ ji nɔ nɛ ɔ nɛ tuɔ musu bɔmi munyu nɛ ɔ? Mɛnɔ ma nyɛ yayamihi kɛ pa kaa ja Mawu kɛkɛ?” 22Se benɛ Yesu kpa a susumi ɔmɛ si ɔ, e bi mɛ ke: “Mɛni nyɛ ngɛ susue ngɛ nyɛ tsui mi ɔ? 23Te nɔ́ nɛ demi wɛ hu? Nɔ́ nɛ a ma de ke: ‘A ngɔ o he yayami ɔmɛ ngɔ pa mo,’ aloo nɔ́ nɛ a ma de ke: ‘Tee si nɛ o nyɛɛ ɔ?’ 24Se benɛ pee nɛ nyɛɛ le kaa Nɔmlɔ Bi ɔ ngɛ he blɔ ngɛ zugba a nɔ kaa e ngɔɔ yayamihi ngɔ paa a,” e de nɔ nɛ hule ɔ ke: “I ngɛ mo dee ke: ‘Tee si nɛ o wo o sa a nɛ o ya o we mi.’ ” 25Nɛ amlɔ ɔ nyumu ɔ te si ngɛ a hɛ mi nɛ e wo nɔ́ nɛ e hwɔɔ si ngɛ nɔ ɔ nɛ e pue nɔ kɛ ho e we mi ya kɛ Mawu hɛ mi nyami womi. 26Nɛ mɛ tsuo a nya kpɛ a he, nɛ a wo Mawu hɛ mi nyami nɛ a ye gbeye wawɛɛ nɛ a ke: “Wa na nyakpɛ ni mwɔnɛ ɔ.”

Yesu tsɛ Levi

(Mateo 9.9-13; Marko 2.13-17)

27Ni nɛ ɔmɛ a se ɔ, Yesu je kpo nɛ e ya na onia tsulɔ ko nɛ a tsɛɛ lɛ Levi nɛ e hii si ngɛ onia tsumi he ɔ, nɛ e de lɛ ke: “Nyɛɛ ye se.’ ” 28Nɛ e si e ni ɔmɛ tsuo, nɛ e te si nyɛɛ e se.

29Levi ngmɛ okplɔɔ ngua ngɛ e we ɔ mi ha Yesu, nɛ onia tsuli kɛ ni kpahi fuu kɛ mɛ ba ye ni. 30Nɛ Farisifo ɔmɛ kɛ mlaa tsɔɔli ɔmɛ tu munyu huitihuiti wo e kaseli ɔmɛ ke: “Mɛni he je nyɛɛ kɛ onia tsuli kɛ yayami peeli ngɛ ni yee nɛ nyɛɛ kɛ mɛ ngɛ nue nɛ ɔ?” 31Yesu ha heto nɛ e de mɛ ke: “Nihi nɛ ngɛ hewami ɔ, e hia we mɛ tsopatsɛ, se nihi nɛ ngɛ gboe ɔ mohu e hia. 32I bɛ dali a tsemi, se mohu yayami peeli kɛ ha tsui tsakemi.”

Hwɔhami he sane

(Mateo 9.14-17; Marko 2.18-22)

33Kɛkɛ nɛ a bi Yesu ke: “Mɛ he je nɛ Yohane kaseli ɔmɛ pɔɔ hwɔ hami kɛ sɔlemi, nɛ Farisifo ɔmɛ a kaseli ɔmɛ hu peɔ ja nɔuu, nɛ moo lɛɛ o kaseli ɔmɛ yeɔ ni nɛ a nuu ɔ?” 34Yesu de mɛ ke: “Anɛ nyɛ ma nyɛ ha yo kpeemi he biali ɔmɛ nɛ a ha hwɔ benɛ ayɛflo huno ɔ kɛ mɛ ngɛ lolo nɛ ɔ? 35Be maa ba nɛ a maa ngɔ ayɛflo huno ɔ kɛ maa je a ngɔ, nɛ lɛ be ɔ loko a maa ha hwɔ.”

36Yesu bu mɛ abɛ nɛ ɔ hulɔ ke: “Nɔ ko gba we bo he nya kɛ ta we tade momo mi; se ke a pee ja a, e ma gba ehe ɔ, nɛ bo nya nɛ a je ngɛ ehe ɔ nya a kɛ momo ɔ ya be yee. 37Nɛ nɔ ko ngɔɛ wai he wui lohwe he womi tɔ momohi a mi se ke a pee ja a, wai he ɔ ma pɛ lohwe he womi tɔ ɔmɛ nɛ e ma pue si, nɛ lohwe he womi tɔ ɔmɛ hu ma puɛ. 38Wai he ɔ, lohwe he womi tɔ hehi a mi a kɛ woɔ. 39Nɛ jeha nɛ ɔ hu nɔ ko nui wai momo nɛ amlɔ ɔ nɔuu ɔ nɛ e hla ehe, ejakaa e deɔ ke: ‘Momo ɔ hi.’ ”

Currently Selected:

Luka 5: DAN77

Highlight

Copy