Luka 4

A ka Yesu

(Mateo 4.1-11; Marko 1.12-13)

1Kɛkɛ nɛ Yesu, nɛ Mumi klɔuklɔu ɔ hyi lɛ tɔ ɔ kpale e 2se kɛ je Yordan he, nɛ Mumi ɔ kpaka lɛ kɛ ya nga a nɔ, nɛ abosiami ya ka lɛ ngɛ lejɛ ɔ ligbi nyingmi eywiɛ. Nɛ lɛ be ɔmɛ a mi ɔ, e yi nɔ́ ko nɔ́ ko nɛ lɔ ɔ se ɔ hwɔ ye lɛ.

3Nɛ abosiami de lɛ ke: “Ke Mawu bi ji mo ɔ, lɛɛ de tɛ nɛ ɔ nɛ e plɛ abolo.” 4Nɛ Yesu he nɔ nɛ e de lɛ ke: “A ngma ke: Ti abolo kɛke nɔ nɛ nɔmlɔ guu kɛ hii si.’ ”

5Kɛkɛ nɛ abosiami ngɔ lɛ kɛ ya yo gaga ko nɔ, nɛ e ngɔ je mi matsɛ yemi ɔmɛ tsuo ngɔ tsɔɔ lɛ hɛngmɛfia. 6Abosiami de lɛ ke: Mo ma ngɔ hewami nɛ ɔmɛ tsuo kɛ a nyami ɔmɛ ngɔ ha, ejakaa imi a ngɔ ha, nɛ nɔ tsuaa nɔ nɛ i suɔ ɔ, lɛ i kɛ haa. 7Kɛ o ma kpla si nɛ o ja mi ɔ, enɛ ɔmɛ tsuo kulaa maa pee o nɔ.” 8Yesu he nɔ nɛ e de lɛ ke: “A ngma ke: ‘Ja Nyɔmtsɛ o Mawu ɔ, nɛ lɛ kɛkɛ o sɔmɔ.’ ”

9Kɛkɛ nɛ abosiami ngɔ Yesu kɛ ba Yerusalem nɛ e kɛ lɛ ba da sɔlemi tsu ɔ yi mi poplooplo ɔ nɛ e de lɛ ke: “Ke Mawu bi ji mo ɔ, sakee o he ngɔ fia si, 10ejakaa a ngma ke: ‘Mawu ma fã e bɔfo ɔmɛ nɛ a bu o he,’ 11kɛ jeha nɛ ɔ hu: ‘A maa hɛɛ mo ngɛ a dɛ mi konɛ o nane ko si tɛ ko.’ ” 12Se Yesu he nɔ nɛ e de lɛ ke: “A de ke: ‘Koo ka Nyɔmtsɛ o Mawu ɔ.’ ” 13Benɛ abosiami ka lɛ ngɛ blɔ nɛ ɔmɛ tsuo a nɔ ɔ, e si lɛ lolo.

Yesu je e nitsumi sisi ngɛ Galilea

(Mateo 4.12-17; Marko 1.14-15)

14Kɛkɛ nɛ Yesu kpale e se ngɛ Mumi ɔ nya kɛ ba Galilea; nɛ e he sane jije ngɛ lejɛ ɔ ni ɔmɛ a mi tsuo. 15E tsɔɔ ni ngɛ a kpe he ɔmɛ, nɛ ni ɔmɛ tsuo je e yi.

A kua Yesu ngɛ Nazaret

(Mateo 13.53-58; Marko 6.1-6)

16Nɛ Yesu ba Nazaret he nɛ a lɛ lɛ ngɛ ɔ, nɛ kaa bɔ nɛ e pɔɔ peemi ɔ, e ya kpe he ɔ ngɛ Hejɔɔmi Ligbi ɔ nɔ. E te si konɛ e kane ni, nɛ 17a ngɔ gbalɔ Yesaia womi ɔ ngɔ sɔle lɛ. Nɛ benɛ e bli womi ɔ mi ɔ, e na he nɛ a ngma ngɛ ke:

18“Nyɔmtsɛ ɔ mumi ɔ ngɛ ye nɔ.

Lɔ ɔ he ɔ, e pɔ mi nu konɛ ma fiɛ

Sane Kpakpa a ngɔ tsɔɔ ohiafohi,

Konɛ ma fiɛ he yemi ngɔ tsɔɔ nyɔgue ɔmɛ,

Kɛ nɔ́ hyemi ha hɛyuyuili.

19Nɛ ma fiɛ jeha ko nɛ sa Nyɔmtsɛ ɔ hɛ mi.”

20Nɛ e hluɛ womi ɔ nɛ e ngɔ ha sɔmɔlɔ ɔ, nɛ e be ya hi si; nɛ ni ɔmɛ tsuo nɛ ngɛ kpe he ɔ bɔni lɛ hyemi too. 21Kɛkɛ nɛ e kɛ mɛ bɔni munyu tumi ke; “Mwɔnɛ ɔ ngmami nɛ ɔ ba mi ngɛ nyɛ hɛ mi.” 22Nɛ nihi tsuo ye lɛ odase, nɛ a nya kpɛ a he ngɛ dloomi munyuhi nɛ je e nya a he, nɛ a de ke: “Anɛ pi Yosef bi nyumu ɔ ji nɛ ɔ?” 23Se e de mɛ ke: “Bɔ tsuaa bɔ nɛ pee ɔ nyɛ maa bu mi abɛ nɛ ɔ ke: ‘Tsopatsɛ, tsa mo nitse o he! Nihi abɔ nɛ wa nu kaa o pee ngɛ Kapernaum ɔ, pee ngɛ hiɛ ɔ nɛ ji mo nitse o ma a mi hulɔ.’ ” 24Nɛ e ya nɔ nɛ e de ke: “Niinɛ i ngɛ nyɛ dee ke a bui gbalɔ ko ngɛ lɛ nitse e ma mi. 25Se i ngɛ nyɛ dee anɔkuale mi ke: Yalɔ yi fuu ngɛ Israel ngɛ Elia yinɔ ɔ benɛ a nga hiɔwe nya jeha etɛ kɛ hlami ekpa sɔuu nɛ hwɔ ngua ba zugba a tsuo nɔ ɔ; 26se a tsɔ we Elia kɛ yɛ́ a ti nɔ ko nɔ ko ngɔ kaa ja yalɔ yo ko nɛ ngɛ Zarefat ngɛ Zidon zugba a nɔ ɔ ngɔ. 27Nɛ tsitsɛmɛ fuu ngɛ Israel ngɛ gbalɔ Elisha be ɔ mi, se a tsa we a ti nɔ ko nɔ ko kaa ja Naeman, Siriano ɔ.” 28Nɛ nihi nɛ ngɛ kpe he ɔ tsuo a muklii mi fu benɛ a nu enɛ ɔ ɔ. 29A te si nɛ a tsitsɛɛ le kɛ je ma a mi, nɛ a kpaka lɛ kɛ ho yoku nɛ a ma a maa si ngɛ nɔ ɔ nya ya. 30Se e gblee a kpɛti zaa kɛ je.

Nyumu ko nɛ mumi yayami ngɛ e mi

(Marko 1.21-28)

31Nɛ Yesu ba Kapernaum, ma ko nɛ ngɛ Galilea a mi nɛ e tsɔɔ mɛ ni ngɛ Hejɔɔmi Ligbi ɔmɛ a nɔ. 32Nɛ mɛ tsuo a nya kpɛ a he ngɛ e nitsɔɔmi ɔ he, ejakaa e munyu ɔ mi ngɛ hewami. 33Jeha nɛ ɔ nyumu ko ngɛ kpe he ɔ nɛ mumi yayami ngɛ e mi, nɛ e kpa ngmlaa wawɛɛ ke: 34“Aa, mɛni sane waa kɛ mo ngɛ, mo Yesu Nazareno? O ba wa hɛ mi kpatami lo? I le nɔ nɛ ji mo, mo ji Mawu Nɔ Klɔuklɔu ɔ nɛ!” 35Kɛkɛ nɛ Yesu nga e yi nɛ e ke: “Ma o nya nɛ o je e mi!” Mumi yayami ɔ sake lɛ ngɔ fɔ si ngɛ a hɛ mi, nɛ e je e mi, nɛ e yi lɛ awi ko, 36Ni ɔmɛ tsuo a he nya si mɛ, nɛ a de a he ke: “Mɛni munyu ji nɛ ɔ! Ejakaa he blɔ kɛ hewami e kɛ hiaa mumi yayami ɔmɛ nɛ a jee kpo ɔ nɛ!” 37Nɛ Yesu he sane gbɛ fia lejɛ ɔ ni ɔmɛ a mi tsuo.

Yesu tsa nihi fuu

(Mateo 8.14-17; Marko 1.29-34)

38Yesu je kpe he ɔ nɛ e ya sɛ Simon we ɔ mi. Jeha nɛ ɔ Simon nganyɛ fɔɔ si kɛ asla ku ko nɛ a kpa lɛ pɛɛ nɛ e pee he no ko. 39Yesu hɛ lɛ su hiɔtsɛ ɔ he nɛ e nga asla a yi, nɛ asla a po ngɛ e nɔ, nɛ amlɔ ɔ e te si nɛ e sɔmɔ mɛ.

40Pu si nɔmi be ɔ, nihi tsuo nɛ ngɛ nihi nɛ hiɔhi slɔɔtohi hɛɛ mɛ ɔ kɛ mɛ ba Yesu ngɔ. Nɛ e ngɔ e ninehi pue mɛ tsuo a nɔ kakaaka nɛ etsa mɛ. 41Mumi yayamihi hu je nihi fuu a mi nɛ a kpa ngmlaa ke: “Mo ji Mawu bi ɔ nɛ!” Nɛ e nga a yi nɛ e ngmɛ́ mɛ blɔ nɛ a de ke a le kaa lɛ ji Kristo ɔ.

Yesu fiɛ ngɛ Yudea

(Marko 1.35-39)

42Nɛ benɛ je na a, Yesu pue nɔ kɛ ho nga nɔ he ko ya. Asafo ɔ bɔni lɛ hlami nɛ benɛ a na lɛ ɔ, a hla kaa a tsi e nya konɛ e ko je a ngɔ. 43Se e de mɛ ke: “E sa kaa i ya fiɛɛ Mawu matsɛ yemi ɔ he Sane Kpakpa a ngɔ tsɔɔ ma kpa kome hulɔ, ejakaa lɔ ɔ he a tsɔ mi kɛ ba ngɛ.” 44Lɔ ɔ he ɔ, e tsa e fiɛmi ɔ nɔ ngɛ Yudea kpe he ɔmɛ.

Currently Selected:

Luka 4: DAN77

Highlight

Copy