Luka 3

Yohane Baptisilɔ ɔ fiɛmi

(Mateo 3.1-12; Marko 1.1-8; Yohane 1.19-28)

1Jeha nɛ ɔ, Kaisare Tiberio matsɛ yemi jeha nɛ ji nyɔngma kɛ enuɔ ɔ mi, benɛ Pontio Pilato ngɛ amlaalo yee ngɛ Yudea, nɛ Herode ngɛ amlaalo nɔkɔtɔma yee ngɛ Galilea, nɛ e nyɛmi Filipo hu ngɛ matsɛ ngua yee ngɛ Iturea kɛ Trakɛniti zugba amɛ a nɔ, nɛ Lisania ngɛ amlaalo nɔkɔtɔma yee ngɛ Abileene, 2nɛ Anna kɛ Kaiafa ngɛ osofɔ nikɔtɔmahi yee ɔ, Mawu munyu ba Zakaria bi Yohane ngɔ ngɛ nga a nɔ. 3Nɛ e kpa Yordan kpo ɔmɛ tsuo a mi nɛ e fiɛ baptisimi nɛ a kɛ naa tsui tsakemi kɛ yayami pami; 4kaa bɔ nɛ a ngma ngɛ gbalɔ Yesaia womi ɔ mi ke:

“Nɔ ko ngɛ ngmlaa kpae ngɛ nga a nɔ ke:

‘Nyɛ dla Nyɔmtsɛ ɔ blɔ ɔ,

Nyɛ ha e blɔ ngua amɛ nɛ a da tlɔmɔɔ.

5A maa tsi dɔgba tsuaa dɔgba,

Nɛ a ma ha yoku tsuaa yoku

Kɛ kpongu tsuaa kpongu maa ba si,

Nɛ a ma ha nihi nɛ kpɛ ɔmɛ maa da,

Nɛ blɔ nɛ nɔ ngɛ googãgoogã a maa sɔ;

6Nɛ he lo tsuo kulaa maa na Mawu yiwami hemi ɔ.’ ”

7Kɛkɛ nɛ e de asafo ɔmɛ nɛ ba e ngɔ nɛ e baptisi mɛ ɔ ke: “Sinɔhi a nina, mɛnɔ tu munyu tsɔɔ nyɛ ke nyɛɛ tu muklii mi fumi nɛ ma a nya fo? 8Lɔ ɔ he ɔ, nyɛɛ wo yiblii nɛ sa tsui tsakemi; nɛ nyɛ ko bɔni demi ngɛ nyɛ yi mi ke: ‘Wa tsɛ ji Abraham,’ ejakaa i ngɛ nyɛ dee ke, Mawu ma nyɛ ma tle bimɛ a si kɛ je tɛ nɛ ɔmɛ a mi ngɔ ha Abraham. 9Se jeha nɛ ɔ hu, gbiɛ ɔ fɔɔ si ngɛ tso ɔmɛ a sipoku ɔmɛ a nɔ momo; lɔ ɔ he ɔ, tso tsuaa tso nɛ wui yiblii kpakpahi ɔ, a maa po nɛ a ma sake ngɔ fɔ la mi.”

10Nɛ asafo ɔmɛ bi lɛ ke: “Lɛɛ mɛni waa pee mɔ?” 11Nɛ e he nɔ nɛ e de mɛ ke: “Nɔ nɛ ngɛ hiɔwe tade enyɔ ɔ, e kɛ nɔ nɛ be eko ɔ nɛ dla; nɛ nɔ nɛ ngɛ ngma hu, e pee ja nɔuu.” 12Nɛ onia tsuli hu ba konɛ a baptisi mɛ, nɛ a bi lɛ ke: “Tsɔɔlɔ, mɛni waa pee?” 13Nɛ e de mɛ ke: “Nyɛ ko he pe bɔ nɛ a to ha nyɛ ɔ.” 14Nɛ aslaafohi hu ba bi lɛ ke: “Nɛ wɔ hu, mɛni waa pee?” Nɛ e de mɛ ke: “Nyɛ ko hɛɛ nɔ ko soisoi, nɛ nyɛ ko po nɔ ko nya yaka gu; nɛ nyɛ ha nyɛ hiɔwo nɛ sa nyɛ hɛ mi.”

15Se benɛ ma a tsuo hɛ ngɛ nɔ, nɛ ni ɔmɛ tsuo ngɛ susue ngɛ a tsui mi ngɛ Yohane he kaa be nɛ ɔ mi ɔ lɛ ji Kristo ɔ, 16Yohane he nɔ nɛ e de ni ɔmɛ tsuo ke: “Imi lɛɛ, nyu i kɛ baptisi nyɛ; se nɔ ko nɛ he wa pe mi ma, nɛ i sɛ nɔ nɛ pɛneɔ e tokotahi a nya kpa, lɛ e kɛ Mumi Klɔuklɔu kɛ la maa baptisi nyɛ, 17nɔ nɛ hɛɛ e nɔ mi sami tsine ngɛ e dɛ, nɛ e maa bɛɛ zugba a fitsofitso, nɛ e ma bua ngma a nya ngɔ to e gba a mi, se tsakati ɔ, e kɛ la nɛ gbo we maa sã.”

18Nɛ e de ni kpa komɛ fuu hu kɛ wo mɛ ga, kɛ fiɛ Sane Kpakpa a tsɔɔ mɛ, 19Se amlaalo nɔkɔtɔma Herode ɔ, akɛnɛ Yohane ka e hɛ mi ngɛ e nyɛmi Filipo yo Herodia a he, kɛ ni yayahi tsuo nɛ lɛ Herode ɔ pee he je ɔ, 20e kpale pee enɛ ɔ ngɔ si nɔ kaa e nu Yohane ngɔ wo tsu mi.

Yesu baptisimi

(Mateo 3.13-17; Marko 1.9-11)

21E ba mi kaa benɛ a baptisi ni ɔmɛ tsuo ɔ, a baptisi Yesu hulɔ; nɛ benɛ e ngɛ sɔlee ɔ, hiɔwe nya bli 22nɛ Mumi Klɔuklɔu ɔ kple si kɛ su nɛ ngɛ kaa okpo kɛ ba e nɔ. Nɛ gbi ko je hiɔwe de ke: “Mo ji ye suɔmi bi ɔ nɛ, mo o he ye tsui ngɛ!”

Yesu Wekukpa

(Mateo 1.1-17)

23Nɛ benɛ Yesu je e ni tsumi sisi ɔ, e ye maa pee jeha nyingmi etɛ, nɛ bɔ nɛ a susuu ɔ, e ji Yosef bi, Heli bi, 24Matat bi, Levi bi, Melki bi, Yanai bi Yosef bi, 25Matatia bi, Amos bi, Nahum bi, Esli bi, Nagai bi, 26Maat bi, Matatia bi, Semein bi, Yosek bi, Yoda bi, 27Yohanan bi, Resa bi, Zerubabel bi, Shealtiel bi, Neri bi, 28Melki bi, Adi bi, Kosam bi, Elamadam bi, Er bi, 29Yoshua bi, Eliezer bi, Yorim bi, Matat bi, Levi bi, 30Simeon bi, Yuda bi, Yosef bi, Yonam bi, Eliakim bi, 31Melea bi, Mena bi, Matata bi, Natan bi, David bi, 32Ishai bi, Obed bi, Boaɛ bi, Salmon bi, Nahashon bi, 33Aminadab bi, Admin bi, Arni bi, Hezron bi, Perez bi, Yuda bi, 34Yakob bi, Isak bi, Abraham bi, Tera bi, Nahor bi. 35Serug bi, Reu bi, Peleg bi, Eber bi, Shela bi, 36Kainan bi, Arpakshad bi, Shem bi, Noa bi, Lamek bi, 37Metusela bi, Henok bi, Yared bi, Mahalalel bi, Kainan bi, 38Enos bi, Set bi, Adam bi, Mawu bi.

Currently Selected:

Luka 3: DAN77

Highlight

Copy