Yohane 4
4
Yesu kɛ Samaria yo ɔ
1Benɛ Yesu na le kaa Farisifo ɔmɛ nu kaa e ngɛ kaseli nae nɛ e ngɛ nihi babauu baptisie pe Yohane ɔ, 2(pohu Yesu nitse ɔ lɛɛ e baptisi we, se mohu e kaseli ɔmɛ lɛ a baptisii) 3e je Yudea nɛ e pue nɔ kɛ yaa Galilea ekohu. 4Se ja e gu Samaria.
5Jeha nɛ ɔ e ba su ma ko nɛ a tsɛɛ lɛ Sikar a he, ngɛ zugba kpɔ ko nɛ Yakob ngɔ ha e bi Yosef ɔ kasa nya. 6Yakob vu ɔ ngɛ lejɛ ɔ. Nɛ akɛnɛ pɔ tɔ Yesu kɛ blɔ ɔ nyɛɛmi he je ɔ, e be ya hi si ngɛ vu ɔ he. E maa pee ngmlɛ nyɔngma kɛ enyɔ mi.
7Samaria yo ko ba nyu yɛmi, nɛ Yesu de lɛ ke: “Ha mi nyu ɔ eko nɛ ma nu.” 8(Ejakaa e kaseli ɔmɛ ho ma a mi ya nɛ e yaa he niyeni.) 9Nɛ Samaria yo ɔ de lɛ ke: “Kɛ pee kɛɛ nɛ mo Yudano ɔ, o ngɛ mi Samariano ɔ nyu bae nɛ o nu ɔ?” (Ejakaa Yudafohi kɛ Samariabihi yi.) 10Yesu he nɔ nɛ e de lɛ ke: “Kaa o le Mawu nɔke nɔ́ ɔ kɛ nɔ nɛ ngɛ mo dee ke: ‘Ha mi eko ma nu’ ɔ, jinɛ mo mohu o maa ba lɛ nɛ e ha mo wami nyu.” 11Yo ɔ de lɛ ke: “Nyɔmtsɛ, o be nɔ́ nɛ o kɛ maa yɛ, nɛ vu ɔ hu mi kuɔ; jije o ma na wami nyu ɔ kɛ je mɔ? 12Anɛ o pe wa tsɛ Yakob nɛ ha wɔ vu nɛ ɔ, nɛ lɛ nitse e nu mi nyu, kɛ e bimɛ kɛ e lohwe ɔmɛ ɔ lo?” 13Yesu he nɔ nɛ e de lɛ ke: “Nɔ tsuaa nɔ nɛ nuu nyu nɛ ɔ eko ɔ, kuma maa ye lɛ ekohu; 14se nɔ nɛ nuu nyu nɛ imi ma ha lɛ ɔ, kuma be lɛ yee gblee kɛ maa ya neneene; se mohu nyu nɛ ma ha lɛ ɔ ma plɛ nyu hɛngmɛ nɛ baa kɛ yaa neneene wami mi ngɛ e mi.” 15Yo ɔ de lɛ ke: “Nyɔmtsɛ, ha mi nyu ɔ eko kone kuma ko ye mi, nɛ i ba hiɛ ɔ ba yɛ nyu hu.” 16Yesu de lɛ ke: “Yaa nɛ o ya tsɛ o huno nɛ o kɛ lɛ nɛ ba hiɛ ɔ.” 17Yo ɔ he nɔ nɛ e de lɛ ke: “I be huno.” Yesu de lɛ ke: “O tu anɔkuale kaa o ke: ‘I be huno’ ɔ; 18ejakaa o hi hunomɛ enuɔ, nɛ nɔ nɛ o kɛ ngɛ piɔ nɛ ɔ ɔ, pi o huno; enɛ ɔ lɛɛ o tu anɔkuale.” 19Yo ɔ de lɛ ke: “Nyɔmtsɛ, i na kaa gbalɔ ji mo. 20Yoku nɛ ɔ nɔ wa tsɛmɛ sɔle ngɛ, nɛ nyɛɛ lɛɛ nyɛ ke Yerusalem ji he nɛ sa kaa a sɔle ngɛ.” 21Yesu de lɛ ke: “Maa, he mi ngɔ ye kaa ngmlɛfia a ma nɛ pi yoku nɛ ɔ nɔ, nɛ pohu pi Yerusalem nɛ nyɛ ma ja Tsɛ ɔ ngɛ. 22Nyɛɛ lɛɛ, nyɛ li nɔ́ nɛ nyɛ ngɛ jae ɔ; wɔɔ lɛɛ, wa le nɔ́ nɛ wa ngɛ jae ɔ, ejakaa yi wami hemi ɔ, Yudafo ɔmɛ a ngɔ e je. 23Se ngmlɛfia a ma nɛ e su momo benɛ anɔkuale jali ɔmɛ ma ja Tsɛ ɔ ngɛ mumi kɛ anɔkuale mi, ejakaa nihi nɛ jaa lɛ kikɛ ɔ Tsɛ ɔ hu ngɛ hlae. 24Mawu ɔ Mumi ji lɛ, nɛ nihi nɛ jaa lɛ ɔ, ja a ja lɛ ngɛ mumi kɛ anɔkuale mi.”
25Yo ɔ de lɛ ke: “I le kaa Mesia nɛ e tsɛɛ lɛ Kristo ɔ ma; nɛ ke e ba a, e maa sɛɛ wɔ nihi tsuo kulaa.” 26Yesu de lɛ ke: “Imi nɛ i kɛ mo ngɛ munyu tue nɛ ɔ, ami ʼi.”
27Kɛkɛ nɛ e kaseli ɔmɛ ba, nɛ a hɛ mi pee mɛ yaa kaa e kɛ yo ngɛ munyu tue; se kɛ ɔ nɔ ko bi we lɛ ke: “Mɛni o ngɛ lɛ bie ɔ?” loo “Mɛni munyu o kɛ lɛ ngɛ tue ɔ?”
28Kɛkɛ nɛ yo ɔ si e paya buɛ ɔ nɛ e pue nɔ kɛ ho ma a mi ya, nɛ e ya de ni ɔmɛ ke: 29“Nyɛɛ ba nɛ nyɛ ba hyɛ nyumu ko nɛ jaje nihi tsuo nɛ i pee ɔ ngɔ ha mi, kaa pi Kristo ɔ ji nɛ ɔ lo?” 30Kɛkɛ nɛ a je ma a mi nɛ a ba e ngɔ.
31Lɛ be ɔ mi nɔuu ɔ, e kaseli ɔmɛ kpa lɛ pɛɛ ke: “Rabi, ye nɔ́ ko.” 32Se e de mɛ ke: “I ngɛ ngma nɛ i yeɔ nɛ nyɛ li.” 33Lɔ ɔ he ɔ e kaseli ɔmɛ bi a he ke: “Anɛ nɔ ko ba ha lɛ nɔ́ ko ye lo?” 34Yesu de mɛ ke: “Ye ngma ji kaa ma pee nɔ nɛ tsɔ mi ɔ suɔmi nya ni, nɛ ma gbe e ni tsumi ɔ nya.”
35“Anɛ nyɛ de we ke: ‘Epiɛ hlami eywiɛ nɛ blɛfo kpɔmi be maa su’? oʼɛ, i ngɛ nyɛ dee ke: Nyɛ wo nyɛ hɛ nɔ nɛ nyɛɛ hyɛ ngmɔ ɔmɛ, bɔ nɛ a gba futaa momo ha ni kpami. 36Nɔ nɛ kpaa a naa e hiɔwo, nɛ e kpaneɔ yiblii ɔmɛ a nya ngɔ toɔ neneene wami, konɛ nɔ nɛ duɔ ɔ kɛ nɔ nɛ kpaa a tsuo a nya si kake. 37Ejakaa enɛ ɔ mi nɛ munyu nɛ a de ke: ‘Nɔ ko duɔ nɛ nɔ ko kpaa’ a baa mi ngɛ. 38Imi lɛɛ i tsɔ nyɛ konɛ nyɛ yakpa nɔ́ nɛ pi nyɛ nɛ nyɛ gbo he dengme; ni kpahi tsu ni ɔ, nɛ nyɛ ba ye mi ni.”
39Nɛ Samariabi ɔmɛ nɛ je jamɛ a ma a mi ɔ a ti nihi fuu he e nɔ ye ngɛ yo ɔ munyu nɛ e kɛ ye odase ke: “E de mi nihi kulaa nɛ i pee hyɛ” ɔ nyɛ. 40Lɔ ɔ he ɔ, benɛ Samariabi ɔmɛ ba e ngɔ ɔ, a ba kpa lɛ pɛɛ ke e kɛ mɛ ba hi si; nɛ e hi lejɛ ɔ ligbi enyɔ. 41Nɛ nihi fuu nɛ pe kekletsɛmɛ ɔmɛ hu he ye ngɛ lɛ nitse e munyu ɔ nya; 42nɛ a de yo ɔ ke: “Jeha nɛ ɔ wa ngɛ hee ngɛ yee, pi ngɛ o munyu ɔ nya hu; ejakaa wɔ nitsɛmɛ wa nu, nɛ wa na le kaa, niinɛ, nɔ nɛ ɔ ji je ɔ yi wami helɔ nɛ ji Kristo ɔ nɛ.”
Yesu tsa ma nɔkɔtɔma ko bi nyumu ko
43Nɛ ligbi enyɔ ɔ se ɔ, Yesu pue nɔ kɛ je lejɛ ɔ kɛ ho Galilea ya. 44Ejakaa Yesu nitse ye odase ke gbalɔ ko hɛ mi be nyami ngɛ lɛ nitse e ma mi. 45Jeha nɛ ɔ benɛ e ba Galilea a, Galileabi ɔmɛ nɛ na nihi tsuo nɛ e pee ngɛ Yerusalem ngɛ nyami ligbi ɔ nɔ ɔ he lɛ hɛmuɔ, ejakaa mɛ hu a ya nyami ligbi ɔ yemi.
46Kɛkɛ nɛ Yesu ba Kana ngɛ Galilea, he nɛ e ha nyu plɛ wai ngɛ ɔ, ekohu. Matsɛ wenyumu ko ngɛ Kapernaum nɛ e bi ngɛ gboe. 47Nɛ benɛ e nu kaa Yesu je Yudea kɛ ba Galilea a, e ya e ngɔ nɛ e ya fa kue ha lɛ ke e ba nɛ e ba tsa e bi ɔ, ejakaa e miɔ nɛ e ma gbo. 48Kɛkɛ nɛ Yesu de lɛ ke: “Ke nyɛ nɛ́ okadihi kɛ nyakpɛ nihi ɔ, nyɛ he we yi.” 49Matsɛ wenyumu ɔ de lɛ ke: “Nyɔmtsɛ, ba loko ye bi ɔ nɛ gbo.” 50Yesu de lɛ ke: “Yaa, o bi ɔ yi na wa.” Nyumu ɔ he munyu nɛ Yesu de lɛ ɔ ye nɛ e pue nɔ kɛ ho. 51Nɛ benɛ e yaa a, e sɔmɔli ɔmɛ kɛ lɛ bakpe, nɛ a de lɛ ke: “O bi nyumu ɔ na he wami.” 52Nɛ e bi mɛ ngmlɛfia nɔ nɛ e bɔni he wami nami ɔ; nɛ a de lɛ ke: “Hiɛ piani ngmlɛ kake mi nɛ asla a po ngɛ e nɔ.” 53Kɛkɛ nɛ tsɛ ɔ kɛ na kaa lɛ ngmlɛfia a nɔ nɔuu nɛ Yesu de lɛ ke: “O bi ɔ he mi wa lɛ” ɔ; nɛ e kɛ e we ɔ tsuo he ye.
54Enɛ ɔ ji nyakpɛ nihi enyɔ nɛ Yesu pee, be nɛ e je Yudea kɛ ba Galilea a.
Currently Selected:
Yohane 4: DAN77
Highlight
Share
Copy
Want to have your highlights saved across all your devices? Sign up or sign in
Dangme New Testament © United Bible Societies, 1977.
