Yohane 5

Yesu tsa nyumu ko

1Enɛ ɔ se ɔ Yudafo ɔmɛ ngɛ nyami ligbi yee, nɛ Yesu ya Yerusalem. 2Jeha nɛ ɔ taku ko ngɛ Yerusalem ngɛ tohi agbo ɔ kasa nya, nɛ Hebri gbi mi ɔ a tsɛɛ lɛ Betesda, nɛ kue enuɔ ngɛ he. 3Enɛ ɔmɛ a mi hiɔtsɛmɛ fuu, hɛ yuyuili, pɔtsɛmɛ kɛ ninɛmɛ nɛ hule pueɔ si ngɛ, [nɛ a ngɛ nyu ɔ mi klemi mlɛe. 4Ejakaa be komɛ ɔ, hiɔwe bɔfo ko kpleɔ si kɛ baa taku ɔ mi, nɛ e ba klɛɔ nyu ɔ mi; kɛkɛ ɔ, o mi klemi ɔ se ɔ, nɔ tsuaa nɔ nɛ ya nɔɔ nyu ɔ mi kekle ɔ, hiɔ tsuaa hiɔ nɛ ngɛ e he ɔ tãa.] 5Nyumu ko ngɛ lejɛ ɔ nɛ hiɔ hɛɛ lɛ jeha nyingmi etɛ kɛ kpaanyɔ. 6Nɛ benɛ Yesu na lɛ nɛ e fɔɔ si, nɛ e le kaa e se kɛ hluu ɔ, e bi lɛ ke: “O suɔ kaa o na he wami lo?” 7Hiɔtsɛ ɔ he nɔ ke: “Mawetsɛ, i be nɔ ko nɛ ke a ba klɛ nyu ɔ mi nɛ e ma wo mi ya fɔ taku ɔ mi; se ke i yaa a, nɔ kpa sɛɛ ye hlami ya nɔɔ mi.” 8Yesu de lɛ ke: “Tee si, wo o sa a nɛ o nyɛɛ!” 9Nɛ amlɔ ɔ nɔmlɔ ɔ he mi wa lɛ, nɛ e wo e sa a, nɛ e nyɛɛ.

Se lɛ ligbi ɔ Hejɔɔmi Ligbi ʼi. 10Lɔ ɔ he ɔ Yudafo ɔmɛ de nɔ nɛ a tsa a ke: “Hejɔɔmi Ligbi ji nɛ ɔ nɛ; o be he blɔ kaa o tloɔ o sa.” 11E he nɔ ke: “Nɔ nɛ tsa mi ɔ, lɛ nɔuu lɛ de mi ke: ‘Wo o sa a nɛ o nyɛɛ.’ ” 12Jeha nɛ ɔ a bi lɛ ke: “Mɛnɔ ji nɔ nɛ de mo ke: ‘Wo o sa a nɛ o nyɛɛ’ ɔ?” 13Se nɔ nɛ a tsa a li nɔ nɛ ji, ejakaa nihi fuu ngɛ lejɛ ɔ he je ɔ Yesu sã e he si.

14Pee se ɔ Yesu ya na lɛ ngɛ sɔlemi we ɔ, nɛ e de lɛ ke: “Oʼɛ, o na he wami; koo pee yayami hu, kone nɔ́ ko yaya nɛ pe kekle nɔ́ ɔ ko ba o nɔ.” 15Nyumu ɔ pue nɔ kɛ ho nɛ e ya sɛɛ ha Yudafo ɔmɛ ke Yesu ji nɔ nɛ tsa lɛ ɔ nɛ. 16Lɔ ɔ he ɔ, Yudafo ɔmɛ je a hɛ ka Yesu, nɛ a ngɛ lɛ hlae nɛ a gbe, ejakaa Hejɔɔmi Ligbi ɔ nɔ e pee nɔ́ nɛ ɔ ngɛ ɔ nɛ. 17Se Yesu he nɔ nɛ e de mɛ ke: “Tsaatsɛ ngɛ ni tsue kɛ mwɔɔ nɛ imi hu i ngɛ ni tsue.” 18Enɛ ɔ he titli Yudafo ɔmɛ ngɛ lɛ hlae nɛ a gbe ɔ nɛ, ejaksaa pi Hejɔɔmi Ligbi ɔ kɛkɛ nɛ e ble, se mohu e tsɛ Mawu ke lɛ nitse e tsɛ, nɛ e kɛ Mawu sɔ.

Bi ɔ he blɔ nɛ e ngɛ

19Lɔ ɔ he ɔ Yesu he nɔ nɛ e de mɛ ke: “I ngɛ nyɛ dee anɔkuale mi ke: Bi ɔ nitse be e yi mi nyɛe maa to kɛ pee nɔ ko, ja nɔ nɛ se naa kaa Tsɛ ɔ peɔ ɔ; ejakaa nihi tsuo nɛ Tsɛ ɔ peɔ ɔ, kɔlɔ ɔmɛ nɔuu Bi ɔ hu peɔ. 20Ejakaa Tsɛ ɔ suɔ Bi ɔ, nɛ e tsɔɔ lɛ nihi kulaa nɛ lɛ nitse e peɔ ɔ, nɛ e maa tsɔɔ lɛ ni tsumi nguahi nɛ pe enɛ ɔmɛ tete, nɛ nyɛ nya maa kpɛ nyɛ he. 21Ejakaa bɔ nɛ Tsɛ ɔ tleɔ ni gbogboehi a si nɛ e haa mɛ wami ɔ, ja kɛ̃ Bi ɔ hu haa nihi nɛ e suɔ ɔ wami. 22Ejakaa Tsɛ ɔ kojo we nɔ ko, se e tu kojomi ɔ tsuo ngɔ wo Bi ɔ dɛ; 23konɛ nihi tsuo bu Bi ɔ, kaa bɔ nɛ a buu Tsɛ ɔ. Nɔ nɛ bui Bi ɔ, e bui Tsɛ ɔ nɛ tsɔ lɛ ɔ hulɔ.

24“I ngɛ nyɛ dee anɔkuale mi ke: Nɔ nɛ nuɔ ye munyu nɛ e heɔ nɔ nɛ tsɔ mi ɔ yeɔ ɔ, e ngɛ neneene wami, nɛ e be kojomi mi yae, se mohu e po mi ngɛ gbenɔ mi kɛ ho wami mi ya. 25I ngɛ nyɛ dee anɔkuale mi ke: Ngmlɛfia a ma, nɛ e su ta, nɛ ni gbogboe ɔmɛ maa nu Mawu Bi ɔ gbi, nɛ nihi nɛ nuɔ ɔ yi ma na wa. 26Ejakaa bɔ nɛ Tsɛ ɔ ngɛ wami ngɛ lɛ nitse e mi ɔ, ja kɛ̃ e ha Bi ɔ hu ke e hi wami ngɛ lɛ nitse e mi. 27Nɛ e ha lɛ he blɔ kaa e kojo hulɔ, ejakaa Nɔmlɔ Bi ji lɛ. 28Enɛ ɔ ko pee nyɛ nyakpɛ; ejakaa ngmlɛfia a ma, nɔ́ mi nɛ nihi tsuo nɛ ngɛ yɔkɔ ɔmɛ a mi ɔ maa nu e gbi, 29nɛ a maa je kpo, nihi nɛ pee kpakpa a maa te si kɛ maa ya wami mi, nɛ nihi nɛ tsu ni yayahi ɔ maa te si kɛ maa ya kojomi mi.”

Yesu he odasefohi

30“Imi nitse i be ye yi mi nyɛe maa to kɛ pee nɔ ko; bɔ nɛ i nuɔ ɔ, ja i kojoɔ, nɛ ye kojomi ɔ dami kojomi ʼi, ejakaa i hia we nɔ́ nɛ imi nitsɛ i suɔ, se mohu nɔ nɛ Tsɛ ɔ nɛ tsɔ mi ɔ suɔ? 31Ke imi nitsɛ ye he odase i yeɔ ɔ, ye odase ɔ pi anɔkuale. 32Nɔ kpa ko ngɛ nɛ yeɔ ye he odase, nɛ i le kaa e odase nɛ e yeɔ ngɛ ye he ɔ anɔkuale ʼi! 33Nyɛɛ lɛɛ nyɛ tsɔ kɛ ya Yohane ngɔ, nɛ e ye anɔkuale ɔ he odase. 34Se imi lɛɛ i ngɔɛ nɔmlɔ ko odase; se benɛ pee nɛ a he nyɛ yi wami he je i ngɛ enɛ ɔmɛ dee ɔ nɛ. 35Yohane ji kane nɛ ngɛ tsoe nɛ ngɛ kpee ɔ nɛ, se nyɛɛ lɛɛ, nyɛ suɔ kaa nyɛ bua nɛ jɔ be kpiti kɛkɛ ngɛ e la a mi. 36Se imi lɛɛ, i ngɛ odase nɛ pe Yohane nɔ ɔ, ejakaa ni tsumi ɔmɛ nɛ Tsɛ ɔ ngɔ ha mi kaa ma gbe nya a, lɛ ni tsumi ɔmɛ nɛ i tsuɔ ɔ nɔuu yeɔ ye he odase kaa Tsɛ ɔ lɛ tsɔ mi. 37Nɛ Tsɛ ɔ nɛ tsɔ mi ɔ, lɛ nitsɛ e ye ye he odase. Nyɛ nui e gbi hyɛ ɔ, pohu nyɛ nɛ e subai hyɛ; 38nɛ e munyu ɔ nui si ngɛ nyɛ mi, ejakaa nya he we nɔ nɛ e tsɔ ɔ yi. 39Nyɛ hla ngmami ɔmɛ a mi; ejakaa nyɛ nitsɛmɛ nyɛ susuu kaa kɔlɔ ɔmɛ a mi nyɛ naa neneene wami ngɛ, nɛ kɔlɔ ɔmɛ nɔuu ji nihi nɛ yeɔ ye he odase ɔ nɛ. 40Se nyɛ sume kaa nyɛ baa ye ngɔ nɛ nyɛ na wami.

41“I hla we nimli a hɛ mi nyami. 42Se mohu i kpa nyɛ si kaa nyɛ be Mawu suɔmi ngɛ nyɛ mi. 43Imi lɛɛ i ba ngɛ Tsaatsɛ biɛ mi, nɛ nyɛ he we mi; ke nɔ kpa ko ba ngɛ lɛ nitsɛ e biɛ mi ɔ, lɛɛ nyɛ ma he lɛ. 44Nyɛ nɛ nyɛ ngɛ hɛ mi nyɛmi he hae ngɛ nyɛ kpɛti, se hɛ mi nyami nɛ jee Mawu kake too ɔ ngɔ ɔ lɛɛ nyɛ di se ɔ, kɛ maa pee kɛɛ nɛ nyɛ ma nyɛ he ye mɔ? 45Nyɛ ko susu kaa ma po nyɛ nya ngɔ ha Tsɛ ɔ; nɔ ko ngɛ nɛ ngɛ nyɛ nya poe, lɛ ji Mose, nɔ nɛ nɔ nɔuu nɛ nyɛ ngɔɔ nyɛ hɛ ngɔ fɔɔ ɔ. 46Se kaa nya he Mose ye jinɛ, imi hu nyɛ ma he mi ye; ejakaa ye he sane e ngma a nɛ. 47Se ke nyɛ he we e ngmami ɔmɛ yi ɔ, kɛ maa pee kɛɛ nɛ nyɛ ma he ye munyu ɔmɛ maa ye mɔ?”

Currently Selected:

Yohane 5: DAN77

Highlight

Copy