Yohane 16

1I de nyɛ ni nɛ ɔmɛ benɛ pee nɛ nyɛ nane nɛ ko kpata. O 2A maa fie nyɛ kɛ maa je kpe he ɔmɛ. Nɛ be maa ba tete nɛ nɔ tsuaa nɔ nɛ gbee nyɛ ɔ a ma susu kaa e kɛ ngɛ Mawu jae. 3Nɛ a maa pee enɛ ɔmɛ, ejakaa a li Tsɛ ɔ loo imi hulɔ. 4Se i de nyɛ ni nɛ ɔmɛ, konɛ ke be ɔ su ɔ nɛ nyɛ kai kaa i wo nɔ ta de nyɛ, se kɛ je sisije ɔ i de we nyɛ ni nɛ ɔmɛ, ejakaa i kɛ nyɛ lɛ ngɛ.

Mumi Klɔuklɔu ɔ nitsumi

5“Se jeha nɛ ɔ ɔ, fi yaa nɔ nɛ tso mi ɔ ngɔ, nɛ nyɛ ti nɔ ko bi we mi ke: ‘Jije o yaa?’ 6Se nɛ i wo ni nɛ ɔmɛ a nɔ ta de nya he je ɔ, kɔmɔ yemi hyi nyɛ tsui mi. 7Se kɛ̃ ɔ, i ngɛ nyɛ anɔkuale dee: e hi ha nyɛ kaa ma je; mɛni he je ɔ, ke i ji ɔ, Hepiɛlɔ ɔ be nyɛ ngɔ bae; se ke i je ɔ, ma ha e ba nyɛ ngɔ. 8Nɛ lɛɛ, ke e ba a, e ma kã je ɔ ngɛ yayami he kɛ dami he kɛ kojomi he: 9Yayami he, ejakaa a he we ye nɔ yi; 10dami he, ejakaa i yaa Tsɛ ɔ ngɔ, nɛ nyɛ be mi nae hu; 11kojomi he, ejakaa a kojo je ɔ mi matsɛ ɔ.

12“I ngɛ nihi fuu nɛ piɛ nɛ ma de nyɛ; se nyɛ be nyɛe he maa pɛtɛ amlɔ nɛ ɔ; 13se ke anɔkuale Mumi ɔ na ba a, e maa tsɔɔ nyɛ anɔkuale ɔ kulaa mi blɔ; ejakaa e be lɛ nitsɛ e yi mi toe kɛ tu munyu, se mohu nɔ́ tsuaa nɔ́ nɛ e maa nu ɔ, kɔlɔ ɔ e ma de, nɛ nihi nɛ ma a, e maa wo nɔ ta de nyɛ. 14Lɛ e maa wo ye hɛ mi nyami, ejakaa e maa ngɔ ye nɔ ɔ eko nɛ e maa wo nɔ ta de nyɛ. 15Nihi tsuo nɛ ji Tsɛ ɔ nɔ ɔ, ye nɔ ʼi; lɔ ɔ he nɛ i de ke: ‘E maa ngɔ ye nɔ ɔ eko nɛ e wo nɔ ta de nyɛ’ ɔ nɛ.”

Kɔmɔ kɛ buajɔmi

16“E piɛ bɔɔ nɛ nyɛ be mi nae, nɛ jeha nɛ ɔ hu e piɛ bɔɔ nɛ nyɛ maa na mi; ejakaa i yaa Tsɛ ɔ ngɔ.” 17Kɛkɛ nɛ e kaseli ɔmɛ a ti ni komɛ bi a he ke: “Mɛni ji nɔ́ nɛ e ngɛ wɔ dee nɛ ɔ: ‘Epiɛ bɔɔ nɛ nyɛ be mi nae hu, nɛ jeha nɛ ɔ hu, e piɛ bɔɔ nɛ nyɛ maa na mi,’ nɛ jeha nɛ ɔ hu; ‘I yaa Tsɛ ɔ ngɔ’? 18Lɔ ɔ he ɔ a ke: “Mɛni ji nɔ́ nɛ e ngɛ dee nɛ ɔ: ‘E piɛ bɔɔ’? Wa li nɔ́ nɛ e ngɛ dee nɛ ɔ.” 19Jeha nɛ ɔ Yesu na kaa a ngɛ hlae nɛ a bi lɛ, nɛ e de mɛ ke: “Nɛ i ke e piɛ bɔɔ nɛ nyɛ be mi nae hu, nɛ jeha nɛ ɔ hu e piɛ bɔɔ nɛ nyɛ maa na mi ɔ, lɔ ɔ nyɛ ngɛ nyɛ he bie nɛ ɔ? 20I ngɛ nyɛ dee anɔkuale mi ke: Nyɛɛ lɛɛ nyɛ ma fo nɛ nyɛ maa wo ya, se je ɔ ma nya. Nyɛ lɛɛ nyɛ maa ye kɔmɔ, se nyɛ kɔmɔ yemi ɔ ma plɛ bua jɔmi. 21Ke yo nu kɔɔmi ɔ, e haoɔ, ejakaa e ngmlɛfia a su. Se benɛ e fɔ bi ɔ se ɔ, e kai we dengme ɔ hu ngɛ bua jɔmi nɛ e naa kaa e fɔ nɔmlɔ kɛ ba je ɔ mi ɔ he. 22Lɔ ɔ he ɔ nyɛ hu, jeha nɛ ɔ nyɛ ngɛ kɔmɔ yee mohu, se ma na nyɛ ekohu, nɛ nyɛ tsui maa nɔ nyɛ mi, nɛ nyɛ bua jɔmi ɔ, na ko be kpɔe ngɛ nyɛ dɛ.

23“Jamɛ a ligbi ɔ nɔ ɔ, nyɛ be mi nɔ́ ko nɔ́ bie. I ngɛ nyɛ dee anɔkuale mi ke: Nɔ́ tsuaa nɔ́ he pɛɛ nɛ nyɛ ma kpa Tsɛ ɔ ngɛ ye biɛ mi ɔ, e ma ha nyɛ. 24Kɛ ba si amlɔ nɛ ɔ ɔ, nyɛ kpa we nɔ́ ko he pɛɛ ngɛ ye biɛ mi; nyɛ kpa pɛɛ nɛ nyɛ ma na, konɛ nyɛ bua jɔmi ɔ nɛ hyi.”

Je ɔ nɔ kunimiyemi

25“Ni nɛ ɔmɛ ɔ, abɛhi a mi i kɛ nyɛ ngɛ tue ngɛ ɔ nɛ; se be ma nɛ i kɛ nyɛ be munyu tue ngɛ abɛhi a mi hu, se mohu paa ma jaje tsɛ ɔ he sane ngɔ tsɔɔ nyɛ. 26Jamɛ a ligbi ɔ nɔ ɔ, nyɛ ma kpa pɛɛ ngɛ ye biɛ mi, se i de we nyɛ ke imi lɛ ma bi Tsɛ ɔ ha nyɛ, 27ejakaa Tsɛ ɔ nitsɛ suɔ nyɛ, mɛni he je ɔ, nyɛ hu nyɛ suɔ mi, nɛ nyɛ he ye kaa Mawu ngɔ i je. 28Tsɛ ɔ ngɔ i je kɛ ba je ɔ mi, jeha nɛ ɔ hu, i ngɛ je ɔ mi jee kɛ yaa Tsɛ ɔ ngɔ.”

29Ekaseli ɔmɛ de lɛ ke: “Oʼɛ, jeha nɛ ɔ o tu munyu faii nɛ o tu we munyu ngɛ abɛhi a mi. 30Jeha nɛ ɔ wa kɔ se kaa o le nihi tsuo nɛ e hia we kaa nɔ ko nɛ bi mo sane ko. Enɛ ɔ waa kɛ heɔ yeɔ kaa Mawu ngɔ o je.” 31Yesu he nɔ nɛ e ke: “Jeha nɛ ɔ nyɛ ngɛ hee ngɛ yee lo? 32oʼɛ, ngmlɛfia a ma, nɛ e su po, nɛ nyɛ maa gbɛ fia nɛ nɔ tsuaa nɔ maa ngɔ e blɔ, nɛ nyɛ maa je ye nɔ kake he; se pi ye nɔ kake ʼi, ejakaa Tsɛ ɔ kɛ mi ngɛ. 33I de nyɛ ni nɛ ɔmɛ, konɛ nyɛɛ wo nyɛ bua ngɛ ye mi. Je nɛ ɔ mi ɔ he hiami nyɛ ma na, se kɛ ɔ, nyɛ tsui nɛ nɔ nyɛ mi. I ye je ɔ nɔ kunimi!”

Currently Selected:

Yohane 16: DAN77

Highlight

Copy