Лукара йибкьыд Шадды Хабар 13
13
«Йешайиш дегиш джыъыхьна, дыкьыркьаси!»
1Ми гедеэне, йидкьыр, ГьӀасас ихтилат гьаъара галилеяшурыйшииклаа, – гьабыр Пылата дыркьа дыъыр а Илагьиед хала, тимбише садакьабыр вылцӀад вахтинди. 2ГьӀасара джываб вылцӀара:
– ВаӀс гьа галилеяшурыер мадды сиене галилеяшурыйшихъаъ гунаабыр бала кидбыр каладгуриме? 3Диш, рухьура ваӀде! Амма ваӀ ки выхьды гьӀуьмир дегиш джывыъыхьвна, ваӀ ки гьабыр кал дыкьыркьаси! Дишди ти цӀымыер, Силоамди тӀуьнтӀуьй лувкур, гьадихьде гидхьур, дыркьыд? 4ВаӀс гьабыр сиене Иерусалимди ешемиш дуруъудбишихъаъ нагьакьна гьадгуриме? 5Диш, рухьура ваӀде! Амма ваӀ выхьды гьӀумир дегиш джывыъыхьна, сиенебыр гьабыр кал дыкьыркьаси!
6ГьӀасара мисед ихтилат гьаъара:
Са эдемиед тӀымлад багъди кини виъий инджиред хук. Ми йиркьыр багъди, гьа хукаала емишбыр ахтармиш гьаъара кагъӀуре, амма алгаардиш. 7Гьа гедеэне рухьура миние тӀымлымыд багъманчиеде: «Хьибыд сен и зы миди руъура, емишбыр ахтармиш гьаъад ми хукаала, – садаки алгаардиш. КеэпӀе ваъ! Гьидис гьадиде ер хывкьас вылцӀад и?» 8Амма тиние рухьура: «Гьай иесси, са сыда ки сахъабта. За гьа хӀаабхъӀва ки ваъаси, хьид ки хаъаси. 9Белки гьадире йыкьасда емиш выгыргад? Дишди хьели гьабтӀуси».
ГьӀасара кишды йыгъа цӀырбыр йиргара
10ГьӀасара кишды йыгъа сабыйды синагогади хӀаар даъара ай. 11Ай гьади са хъуртӀуд хьыдылды. Гьанийдаа елли лаъ рикис руъура адиший, – гьанийик цӀырбыр каӀчӀур ай, гьаммыра цӀымыйды сыда гьанийде дуьз хъирикис джывыр ай. 12Гьа гьаргуйне, ГьӀасара джуды бейде сес выъыр, рухьура:
– «Вы эзреклаа азад риъи».
13Гьание минийыы хыл гъӀывхӀа выъыри, ти ки гьади мадана дуьз хъиршир Йинчихьде шукур ваъара каргъӀуре. 14Синагогадид кьухьнийис хъӀал ливилкьара, ГьӀасара гьа кишды йыгъа хъырыъыри хьур. Гьание рухьура халкьдиде:
– Гвалах ваъас ихтияр ад рыхьыд йыгъ а. Гьа йыгъырма дыкьа даваа ваъас, кишды йыгъа ваъ.
15Амма Илагьире рухьура гьанийде:
– Десмалчиер! Кишды йыгъа ваӀ гьӀанние яц я йымаӀл кеэпӀир тӀынаклаа хьидыы гыргаардишме? 16Гьанийис, Ибрайим-пайгъампарад рышес, цӀымыйды сыда иблис Сатана хьур дур гъад кьухьды иблиседе сиртӀир хад, ядлад йитӀал кишды йыгъа сехъеэйъес гьӀайиб име?!
17Гьа чӀилмыыла сиене Гьанийды душманашис рыхъӀ руъура. Сиене халкь ки шад вуруъура ГьӀасара гьаъад гьӀаламатмыы.
Аллагьад ПагьӀчаалыгъ
18ГьӀасара рухьура:
– Гьидик кивикара Аллагьад ПагьӀчаалыгъ?
Гьидыхьван За гьа ара хивхьисдихь?
19Хьваам гьаъ: гьеми емишед йикӀ йиъи,
гьа лешур эдемиере джуды быстана килхьере,
гьадиклаа вуруъура хук,
шуркумаше гьадид гаӀрима джвершис аӀкваӀлбыр гъаъара.
20Хьели рухьура ГьӀасара:
Гьидыхьван ара хивхьиси За Аллагьад ПагьӀчаалыгъ?
21Хьваам гьаъ: ми тӀыба хад хамир йиъи,
гьа лешур хьыдыние хьибды хӀурид рубыдик кийере,
лилкьара сиене лызыд.
КьыцӀды рак
22ГьӀаса шегьермаа на мукъӀмаа хьуъ йиъина ай, илсанар хӀаар даъара. Гьа Иерусалимдыхдана йиъина ай. 23Са эдемиере хулкара Гьанийдаа: – Илагьи, яраб сагьӀалдыбыр диъимихь гиидхьусды, азад дишир?
24ГьӀасара гьабишде рухьура:
– КьыцӀды ригимаа аъ дуруъус чалыш диш,
гьис хьуйне, инаамиш диш,
баладбыр дуруъус чалыш дикиси, амма йикисдиш.
25Аммане иесси лаъ лузур, рак гъигъе хъыъыйне
ВаӀ гъаъ суруу хъадгаси, рак етере, рухьура дикиси:
«Иесси, ачых гьаъ ес!»
Гьание хьуйне ваӀс джываб выси:
«Зас гьацӀаардиш, ваӀ вышди, гьилаадыбыр диъиди».
26Гьа гедеэне ваӀ гьухьуси:
«Е вахьван сытӀаана улере, рагъара ай.
Ва хӀаар даъара ай е дуьзенмыы».
27Гьание ваӀде гьухьуси:
«Зас гьацӀаардиш, ваӀ вышди, гьилаадыбыр диъиди.
Рад диш, сиене писвалды ваъадбыр!»
28Хьели дешеси ваӀ, сылаб рухӀуре,
Ибрайим на, Исакь на, Якьуб,
са ки мадды сиене пайгъампарар Йинчид ПагъӀчаалыгъаа гьадгуйне,
ваӀ, хьуйне, йидигыр, гъаъна хъадгаси!
29Дыкьаси виригъ лывхад суруула, виригъ хӀуувгъӀуд суруула,
Арандаа на къузуйяа,
луьдкеси сывабад цухьрудыхда Аллагьад ПагьӀчаалыгъа.
30Гьа гедеэне гъиигъа джыбра хъудбыр хьура дикиси,
хьура гидбыр джыбра хъидхьуси.
«Зы Изды рыкъӀа ана йыхьыр йигара!»
31Гьа вахтинди дуруъура са шумур иди фарисей,
– Вы мидаа хъыхьыр йигара, – рухьура гьабише. – Хъырых, Иродыс Вы йикье гьаъас йигара а!
32– Дырых, гьихьяъ гьа сикӀирде, – джываб вылцӀара ГьӀасара, – «За шийтӀамашде хадбыр хъадаъаси, гьӀуьзир кидбишис даваа ваъаси гъиигъа ки, быгаа ки. Хьибыдхьусды йыгъа За Изды гвалах бегьем ваъаси. 33Амма гъиигъа ки, быгаа ки, хьалды йыгъа ки Зы Изды рыкъӀа ана йыхьыр йигара. Гьис хьуйне, пайгъампар Иерусалимди дишне, мадды гьилига йыхӀын неминкир виъи».
34Гьай Иерусалим! Гьай Иерусалим!
Пайгъампарар дыкьыркьа даъад на джухда сидигыдбишыы къат сийтед!
Шума Зас йигара ай
сиене выды халкь Изды аа-уу сытӀа ваъас,
шуркура джиды джуьджуьймар къанатахьде ягъмиш гьаъад кал,
амма ваӀс йигара йиширдиш!
35Гьамыъ выхьды Хал сийир а!
ВаӀде рухьура: ваӀс Зы таа ки
«Илагьиед дур хакьыр Йиъинийс рухсат а»
рухьумаа гьахъагусдиш!
Currently Selected:
Лукара йибкьыд Шадды Хабар 13: RUT
Highlight
Share
Copy
Want to have your highlights saved across all your devices? Sign up or sign in
© Библие мадды чӀилмыы хъывгад Институтара, 2004
