Лукара йибкьыд Шадды Хабар 12

Гьидыыла гичӀ хывкьасди

1Гьа арыди ягъмиш дуруъура илсанар гьагъзырмыхьван, кӀабала сыние са йикьире ай. ГьӀаса суьхьде джуды мутагьӀлимешихьван гьалгара:

– Фарисейешды тӀылымыыла агьӀдиет диш, десмалчиваӀлиыла!

2Са дагулды адиш

Ашгара джикисды,

са сир адиш,

гъаъ лиджидхьусды.

3ВаӀ мычӀахъваӀле гьухьудбыйды

йыгъад йаӀкваӀ гъаъ лидхьуси,

ваӀ архыйинды джигиди выъыд хьуш-хьуш

хылымырмыыла лал ваъаси.

4Рухьура а ваӀде, хыдиймар,

беден йикье гьаъас руъунийыыла гимийичӀ,

хьели гьанийдаа шыв-га хъаъас йичӀесдиш.

5За гьагваъаси, гъалыыла гичӀ выъыр йигаарди:

йикье гьыъыр, джегьеллемди сидигас руъуднийыыла гичӀ ваъ.

Рухьура ваӀде, гьалыыла гичӀ ваъасди!

6Бес хьуб ишкӀил кьӀунды чат кепекес дишме масак вылцӀад?

Амма Йинчис гьаммыклаа секки йикӀыыла убхур адиш.

7Выхьды хьуйне кьулуу гъадухъунды чӀарбыр ки кьыле гьыъыр а.

ГичӀ мываъ! ВаӀ сиене ишкӀилмыхъаъ багьа диъи!

8За рухьура ваӀде:

Зы сиене илсанашды улихьде ачыхана агъмиш гьаъадбыйды

малаикмыд улихьде Илсанашды Духара ки агъмиш гьаъаси.

9Гьал Зы агъмиш джыъырды илсанашды улихьде,

гьабыйды Аллагьад малаикмашды улихьде Илсанашды Духара ки агъмиш гьаъасдиш.

10Гьал-га Илсанашды Духарыхда фитне выъыхьвна,

гьанийс багъыш йикиси,

амма гьалга Илагьиед РухӀуклаа иянатбыр гьыъыхьвна,

гьанийс багъыш адиш.

11ВаӀ хьура гедир синагогама, кьухьдыбишихда на яхӀ адбишихда йидкьыйне,

Фикир мываъ, ваӀ шыв гьаъасди не шыв гьухьусди.

12Илагьиед РухӀдире гьухьуси ваӀде шыв гьаъасди.

Камды варлыеклаады ихтилат

13Илсанашды кӀабалаклаа сыние рухьура ГьӀасада:

– МагьӀалим, гьихьяъ-мын изды шуда, захьван дидыыла хъуъ гедгыд мал гвал гьаъ хьур!

14– Убур хъацв! Гьал йиъи Зас ихтияр выр ад выхьды диван ваъас, выхьды хъӀал-багьӀсбыр арыди хъыгас? – джываб вылцӀара ГьӀасара. – 15Гадакъ, невсаала агьӀдиет диш – илсанашды гьӀумир ад-ахъынваӀлиылаа асыллы диш, гьанийхда сиене кар анахъунки, – рухьура ГьӀасара илсанашде. – Къаних мадугъӀ!

16Хьели Гьание илсанашис мисед ихтилат гьаъара:

17– Са девлетлиед хуйима йыхды еш руъура. «Гьамыъ шыв гьаъасдихь? – рухьура девлетлиере. – Захда еш сихьисды ер адиш». 18Гьа гедеэне гьание рухьура: 19«Гьамыъ за сиене изды мыхӀыдбыр на гъӀанды халбыр лука хъыъыр, кьухьдыбыр сихъихьиси, хьели сиене магьӀсил гьамма сихьиси. Хьели „гьамыъ захда ад девлет балад сыдырма гъивкьаси зас“ хьур, „уле, рагъ, лука, гьӀумир сивига“ рухьура сукьуси».

20Амма Йинчире гьанийде рухьура: «Лулум! ГъӀанахӀан выды ил лешус дыкьаси. Гьалыс адгаси ва хихьибыр?»

21Гьааса йикиси сиене девлет джвер бадаана хивилхьедбишис, Аллагь бадаана хидживхьир.

Йинчыы инаамиш диш!

22Джуды шагырташде ГьӀасара рухьура:

– Гьадыыла йиъи За ваӀде рухьуд:

ваӀс «ешемиш дикис улесды на валыг

йигара» хьур дерде мадугъӀ.

23ГьӀумир ухьнихъаъ хьура виъи,

беден валгыхъаъ багьа йиъи.

24Гадакъ хъӀадешихда:

Я езеэрдиш, я еш гъаъаардиш,

адиш гьаммыхда я мыхӀыдбыр, я гъӀанды халбыр,

Амма Йинчире гьаммыс кывылцӀара а.

ВаӀ шуркумашыхъаъ багьа диъи!

25Гьалдаа и ваӀклаа, шудаъ чалыш диширдики,

джуды гьӀуьмир са сагьӀатаа ки хӀуляхӀа ваъас йикисды?

26Йидж гьадухъун цӀамды кар ки ваӀдаа лаӀджаӀбчӀуди,

Маддымыд дерде аӀчӀур шиви гьаъасды?

27Гадакъ, шууна лилкьара ади бычӀбыр:

гьаммыра я ылхӀаардиш, я тӀулкаардиш.

Амма рухьура ваӀде, Силиймандаа, шудаа ад-ахъыд йиширдики,

йиггад бычӀире кал валыг лаъас руъурдиш.

28Майданаа гъад бычӀыы, гъиигъа ад,

быгаа лахак кихьисды,

Йинчире гьааса лаъанахъун,

ваӀа ки лаъаси, гьай инаамиш джудгъӀудбыр!

29Хумалук ваӀ ваӀдаа, шыв улесди, шыв рагъасди,

гьадид дерде ки амадугъӀ.

30Гьа ми дуьнйадид сиене кафирешды фикир виъи.

Амма выхьды Дидис гьацӀара, ваӀс гьа сиене лазимды.

31Са кардид дерде эдиъ – Гьанийды ПагьӀчаалыгъад,

мадды сиене Гьание Джу гьадиде ара хихьир выси.

32ГимийичӀ, гьай кӀыъды нехир!

Йинчид васи гьа виъи – ваӀс ПагьӀчаалыгъ пешкеш ваъасды.

33Масак вияъ ваӀхӀде ад-ахъыд, куьмег гъаъ касибешис,

ваӀ ваӀс ладжаабтӀуд кудкунбыр гьаъ,

хӀале ладжваалтӀвад девлет хивихь, –

гьили я сырыхчи лийкьаардиш, я йисирире улеэрдиш.

34Гьис хьуйне, гьили выхьды девлет ади,

гьади выхьды йикӀ ки йикиси.

35Мыс-га гьӀазырана сыкьӀа:

выхьды валгыма чӀил ки ибтӀир а, выхьды пӀинтӀийбыр ки ликӀур а.

Гъил уьзенге йиший!

36Даватаклаа хъикьасды иесси гуьзет гьаъадбыр кал дикихь ваӀ: гьание рак йыхӀыр мадана аъасна. 37Бахтлыер диъи къулар, нагагь гьабыр хъиркьыд иессиеде мыс-га саджадхыр адылганахъун. Дуьзене рухьура ваӀде, гьание джу валыг лыъыр, улесды цухьрудыы сихьир, гьабыр улес аа садгъуси. 38Бахтлыер диъи гьабыр, нагагь гьанийде садхыр адждылганахъун, гьилды сагьӀатаа выдж хъиркьырдики: выше ма йыгъа.

39ГьацӀара йиш, халды иессиес гьацӀарайди, мыс сырыхчи йыкьасди, гьание сырыхчи хала аӀчӀус джикисне гъаъасий. 40Мыс-га гьӀазырана сыдкьӀаӀ: илсанашды Дух ваӀ гуьзет джаъад гедеэне хъикьаси.

Къийимды на къийимсызды къул

41– Илагьи, ва гьа ихтилат са е бадаана гьаъад име, дишди сиенебыр бадаана? – хулкара гьанийдаа Петрара.

42ГьӀасара рухьура:

– ВаӀ гьакьаллы, умуд ваъасды эдеми гьӀасаб дикий, сиене къулашды кьухьдына садгъус йикисды иессиедаа, лазимды вахтинди гъахьун-гъара гъаъ выс умуд ваъас йикисды. 43Бахтлы йиъи къул, иессиеде, хъиркьыйне, гвалахак кине ахъылгад. 44Дуъзене ваӀде рухьура, гьание гьаасанийды хылихьде сиене джуды миче, джуды ад-ахъыд выси. 45Нагагь гуьре къулара гьухьухьна йикӀиклаана: «Гьамыъ кӀыбди хъикьасдиш иесси», – къулар на къаривышер детере каӀчӀухьна, улере, рагъара, гьулхъара йишихьвна, 46гьа къулад иесси хъикьаси джу елли гуьзет джаъад гедеэне, джу фикир джаваъад сагьӀатаа. Хьели, йетир къул, иесси елли умуд гъадишнийхьван кал гьалгаси.

47Иессиед васи вацӀара, гьа кьуле джывгади – ятал агаси. 48Нагагь къулас джавацӀанахъун васи, гьадыыла гьание ятал агасды гвалах выъыхьвна, гьанийс ятал цӀам йикиси.

Гьалыс бала выр ади, гьанийдаа бала худкаси,

гьалыы бала умуд гъади, гьанийдаа бала ягъӀаси.

ГьӀасара илсанашды арыди джуравалды ваъара

49ЦӀай хана йиркьыд и Зы накьудыы,

шудаъ Зас гьа ликӀур йигара!

50ТӀагьаратахьван темиз йишин лазим и Зы,

ул гивхьир а За гьа кьуле йидкьынихда!

ВаӀс Зы дуьнйадис эслагьӀвалды хана йиркьыр ад калагуриме?

51Ваъ, – рухьура За. – Джуравалды!

52Мидыыла хъуъ, хала хьур анахъун,

гьабыр джура дикиси:

хьибыр са суруу, кьӀвар са суруу дикиси,

мибыр тимбишихьван ута уьздеси.

53Дид духарыхьван гъеблесдиш,

дух дидыхьван гъеблесдиш,

нин рышехьван гъеблесдиш,

гаӀнин сусухьван гъеблесдиш,

сус гаӀниныхьван гъеблесдиш.

Мизан

54Элдиде рухьура ГьӀасара:

– ВаӀс виригъ хӀуувгъӀуд суруула гыбыл йидкьыр гьагухьна, ваӀ гьади мадана йихьяъ «гьугъаси» хьур, гьааса руъура. 55Арандаабый хьыбыл либхьуйне, ваӀ гьихьяъ «сиггаси», гьааса йикиси. 56Десмалчиер! ЧӀирыхда на хӀалыхда гадкъара, ваӀдаа шууды гьаваа викисди гьухьус руъуд, шууды мизан йибкьыр ади мегем ваӀ гедыркьаардишме? 57ВаӀдаа ваӀс шыв йыха иди кеэтӀес руъурдишме? 58Месела, вак бырдж кид бырджехъанара вы диван ваъас хъӀыджыркыхьвна, ва сиене лягъӀуд гвалах выъыр йигара, гьанийхьван рыкъӀа гъехълебесне, дишди гьание вы гыргаси диванханыди. Гьадаа вы дустах гьаъаси. 59Дуьзене рухьура, гьадаа гъаъ вадаа са шийи кимабадухъунды гемаа хъикьас йикисдиш.

Currently Selected:

Лукара йибкьыд Шадды Хабар 12: RUT

Highlight

Copy